Ebileham A Le Nwane?
MENLI ekyi bie ala a ɛlie duma wɔ ɛzonlenlɛ nu wɔ ewiade ye a. Bɛbu Ebilehama kpalɛ wɔ Dwuuma, Ngɛnlamoma, nee Keleseɛnema ɛzonlenlɛ nu. Bɛka ɔ nwo edwɛkɛ kɛ “Ngɛlɛlera ne anu kakanyinli” na ɔyɛle “diedi nwo neazo kpalɛ.” Baebolo ne fɛlɛ ye kɛ “bɛdabɛ mɔɔ bɛdie Nyamenle bɛdi . . . la bɛ ze.”—Wulomuma 4:11.
Kɛmɔti a menli dɔɔnwo bu Ebileham ɛ? Debie ko a le kɛ, Ebileham angome a Baebolo ne ka ɔ nwo edwɛkɛ kɛ Nyamenle agɔnwo a—na ɔka ye zɔ fane nsa!—2 Edwɛkɛsisilɛ 20:7; Ayezaya 41:8; Gyemise 2:23.
Noko akee, Ebileham le sonla kɛ yɛdayɛ la. Ɔyiale ngyegyelɛ mɔɔ yɛyia la dɔɔnwo noko ɔgyinlanle ɔ nloa. Ɛkulo kɛ ɛnwu kɛzi ɔyɛle ye la ɔ? Maa yɛzuzu mɔɔ Baebolo ne ka ye wɔ sonla titile ɛhye anwo la anwo.
Ɔ Nwo Edwɛkɛ
Bɛwole Ebileham wɔ ɛvolɛ 2018 K.Y.M., na ɔnyinle wɔ Yule. (Mɔlebɛbo 11:27-31) Ɛnee Yule le suakpole na ezukoa wɔ zo. Eza bɛzonlenle awozonle dɔɔnwo wɔ ɛkɛ. Ɔbayɛ kɛ ɛnee Ebileham ɔ ze Tilaa boka bɛdabɛ mɔɔ bɛzonlenle awozonle ne mɔ la anwo. (Dwɔhyua 24:2) Noko, Ebileham kpale kɛ ɔbazonle Gyihova.b Yeanzonle awozonle mɔɔ bɛnlɛ ngoane la.
Duzu a manle Ebileham zile kpɔkɛ zɔhane a? Ɔnyianle ɛvolɛ 150 kolaa na Nowa ara Hyɛm awu. Saa ɔ nee nrenya kpanyinli ɛhye dule a, ɛnee ɔboale ye kpalɛ! Ebileham bahola ade kɛzi bɛnyianle bɛ ti wɔ Azuyilɛ ne anu la anwo edwɛkɛ avi Hyɛm mumua ne ɛkɛ. Bie a eza ɔnwunle kɛzi ɔhyia kɛ bɛsonle Gyihova, Nyamenle ne mɔɔ liele Hyɛm nee ye abusua ne ngoane wɔ Azuyilɛ ne anu la.
Saa Hyɛm ɛkɛ a Ebileham zukoale nɔhalɛ Nyamenle ne anwo debie vile anzɛɛ awie fofolɛ bɔbɔ a, ɔvale mɔɔ ɔzukoale la ɔlile gyima. Mekɛ mɔɔ Gyihova mɔɔ “sɔ ahonle kɔsɔɔti nea” nleanle Ebileham la, ɔnwunle debie kpalɛ bie wɔ ye nu na ɔboale ye ɔmanle ɔnyinle ɔyɛle sonla kpalɛ.—Mrɛlɛbulɛ 17:3; 2 Edwɛkɛsisilɛ 16:9.
Ye Asetɛnla
Ebileham nyinli kpalɛ yɛɛ ɔ nye liele wɔ asetɛnla nu. Ɔyiale ngyegyelɛ dɔɔnwo noko ɛnee ye asetɛnla gyi bodane zo. Ninyɛne mɔɔ ɔyɛle la anu ekyi ɛne.
▪ Mekɛ mɔɔ ɛnee Ebileham wɔ Yule la, Nyamenle hanle hilele ye kɛ ɔvi ɛleka mɔɔ bɛwole ye la na ɔhɔdɛnla maanle mɔɔ Ɔbahile ye la anu. Ɔwɔ nuhua kɛ ɛnee Ebileham nee Sɛla ɛnze ɛleka mɔɔ bɛlɛkɔ la nee deɛmɔti Nyamenle se bɛhɔ la ɛdeɛ, noko bɛhɔle. Ebileham nee Sɛla dɛnlanle ndanlɛ sua nu wɔ Keena kɛ adenduvoma hɔle ewule nu.—Gyima ne 7:2, 3; Hibuluma 11:8, 9, 13.
▪ Mɔɔ ɛnee Ebileham nee Sɛla ɛtɛwole ralɛ la, Gyihova bɔle ɛwɔkɛ kɛ ɔbamaa Ebileham ayɛ maanle kpole. Eza Gyihova hanle kɛ mbusua kɔsɔɔti balua Ebileham anwo zo anyia nyilalɛ. (Mɔlebɛbo 11:30; 12:1-3) Nzinlii, Gyihova dinli nu kɛ ɔbamaa zɔhane ɛwɔkɛ ne ara nu. Ɔzele Ebileham kɛ ɔ bo zo amra anwo bazo kɛ anwuma nwɔlɔra.—Mɔlebɛbo 15:5, 6.
▪ Mɔɔ Ebileham lile ɛvolɛ 99 na Sɛla ɛlɛbikye ɛvolɛ 90 la, Gyihova bɔle bɛ ɛwɔkɛ kɛ bɛbawo ralɛ nrenya. Wɔ sonla nye zo ɛnee ɛhye ɛyɛlɛ bayɛ se, noko yeangyɛ Ebileham nee Sɛla nwunle kɛ “debie biala ɛnyɛ se ɛmmaa [Gyihova].” (Mɔlebɛbo 18:14) Ɛvolɛ ko dwule mɔɔ ɛnee Ebileham ɛli ɛvolɛ 100 la, ɔwole ralɛ nrenya na ɔdonle ye duma Ayezeke. (Mɔlebɛbo 17:21; 21:1-5) Nyamenle bɔle ɛwɔkɛ kɛ ɔlua Ayezeke anwo zo alesama banyia nyilalɛ dɔɔnwo.
▪ Ɛvolɛ ekyi pɛle nu la, Gyihova bizale debie titile bie vile Ebileham ɛkɛ: Ɔzele Ebileham kɛ ɔva ɔ ra ne mɔɔ ɔkulo ye edwɛkɛ kpalɛ, Ayezeke, ɔbɔ afɔle ɔmaa ye ɔnva nwo kɛ ɛnee Ayezeke ɛtɛgyale na ɔnlɛ ngakula la. Bie a ɔ ra ne mɔɔ ɔbawu la manle ɔlile nyane kpole, noko ɛnee Ebileham ɛziezie ɔ nwo kɛ ɔbadie Gyihova yeava Ayezeke yeabɔ afɔle. Ɛnee Ebileham lɛ diedi kɛ saa ɔba ye kɛ ɔwɔ kɛ Nyamenle dwazo Ayezeke fi ewule nu amaa Ye ɛwɔkɛ ne ara nu a, ɔbahola yeayɛ. (Hibuluma 11:19) Mekɛ mɔɔ Ebileham fa Ayezeke abɔ afɔle la yɛɛ Nyamenle hanle kɛ ɔmmaku ɔ ra ne a. Ɔhanvole Ebileham wɔ ye tieyɛ ne anwo. Gyihova dinli ɛwɔkɛ mɔɔ ɔbɔle Ebileham la anu.—Mɔlebɛbo 22:1-18.
▪ Ebileham nyianle ɛvolɛ 175 na yeawu. Baebolo ne ka kɛ, “ɔyɛle ɛrelera nwosonwoso na yeawu,” eza ɔhanle kɛ ɔyɛle “kpanyinli kpalɛ.” (Mɔlebɛbo 25:7, 8) Yemɔti Ebileham nwunle kɛ Nyamenle ɛwɔkɛ bieko mɔɔ ɔbɔle la ɛra nu. Yemɔ a le kɛ ɔbanyi na yeawu anzondwolɛ nu.—Mɔlebɛbo 15:15.
Mɔɔ Ɔvale Ɔgyakyile Yɛ La
Tɛ ɛzonlenlɛ anzɛɛ tetedwɛkɛ nu ala yɛɛ Ebileham anwo hyia a. Ɔyɛle neazo kpalɛ mɔɔ ɔwɔ kɛ yɛ kɔsɔɔti yɛsukoa a. (Hibuluma 11:8-10, 17-19) Maa yɛzuzu Ebileham subane ngɛnlɛma ne anu nna anwo. Yɛbalumua yɛaha ye subane ne mɔɔ bie a menli dɔɔnwo ze la anwo edwɛkɛ—diedi.
[Ɔ bo ɛkɛ ne edwɛkɛ ne mɔ]
a Mɔlebɛbo ne ɛnee bɛfɛlɛ Ebileham Ebilam yɛɛ ɛnee bɛfɛlɛ ɔ ye Sɛleeyae. Nzinlii, Nyamenle hakyile Ebilam duma yɛle ye Ebileham, ɔ bo kile “Maanle Dɔɔnwo Bɛ Ze,” yɛɛ ɔhakyile Sɛleeyae noko duma ɔyɛle ye Sɛla, ɔ bo a le “Belemgbunli Raalɛ.” (Mɔlebɛbo 17:5, 15) Noko, wɔ edwɛkɛ ɛhye mɔ anu, yɛbava bɛ aluma Ebileham nee Sɛla a yɛali gyima a.
b Baebolo ne maa yɛnwu kɛ Nyamenle duma a le Gyihova.
[Ɛlɛka wɔ mukelɛ 4]
Sonla Mɔɔ Ɔ Nwo Hyia Wɔ Baebolo Kɛlɛtokɛ Nu
Mɔlebɛbo buluku ne mɔɔ wɔ Baebolo ne anu la ka tete diedima dɔɔnwo mɔɔ bie a le Ebɛle, Yinɔko, nee Nowa la asetɛnla nu edwɛkɛ wɔ tile bulu ne mɔɔ lumua la anu. Noko, wɔ tile 15 ne mɔɔ doa zo la anu, ɔka sonla ko—Ebileham ala anwo edwɛkɛ.
Bieko, bɛlumuale bɛhanle Baebolo nu edwɛkɛ titile ne mɔ bɛvanenle Ebileham anwo. Kɛ neazo la, ɛbanwu ɛhye mɔ wɔ Ebileham anwo edwɛkɛ ne anu . . .
▪ mekɛ mɔɔ ɔlumua mɔɔ bɛhanle Nyamenle anwo edwɛkɛ kɛ Enyinlike, anzɛɛ Awie mɔɔ bɔ ye azonvolɛ nwo bane la.—Mɔlebɛbo 15:1; nea Mɛla ne 33:29; Edwɛndolɛ 115:9; Mrɛlɛbulɛ 30:5.
▪ awie mɔɔ ɔlumua mɔɔ bɛhanle kɛ ɔliele Nyamenle ɔlile la.—Mɔlebɛbo 15:6.
▪ mekɛ mɔɔ ɔlumua mɔɔ bɛhanle Nyamenle kpɔmavolɛ anzɛɛ ngapezonli nwo edwɛkɛ la.—Mɔlebɛbo 20:7.
▪ mekɛ mɔɔ ɔlumua mɔɔ bɛhanle ɛrɛladane mɔɔ lɛ ɛlɔlɛ nwo edwɛkɛ la.—Mɔlebɛbo 22:2.