Ebileham Nee Sɛla Diele Nyamenle

Suakpole Ɛɛle nee Babɛle avinli andwe biala yɛɛ menli mɔɔ wɔ ɛkɛ la sonle awozonle ngakyile. Noko ɛnee nrenyia bie wɔ Ɛɛle mɔɔ sonle Gyihova a. Bɛfɛlɛ ye Ebileham.

Gyihova zele Ebileham kɛ: ‘Ɛvi wɔ sua nu nee wɔ mbusuafoɔ avinli tu, na kɔ azɛlɛ ne mɔɔ mebahile wɔ la azo.’ Akee Nyamenle bɔle ye ɛwɔkɛ kɛ: ‘Ɛbayɛ maanle kpole, na ɛdawɔ ti mebayɛ ninyɛne mgbalɛ dɔɔnwo meamaa menli kɔsɔɔti mɔɔ wɔ ewiade la.’

Ɛnee Ebileham ɛnze ɛleka mɔɔ Gyihova se ɔhɔ la, noko ɛnee ɔlɛ ye nu anwodozo. Yemɔti Ebileham, ɔ ye Sɛla, ye papa Tilaa yɛɛ ye awozoa Lɔɔto boɔboale bɛ nwo na bɛbɔle bɛ adendulɛ ne abo.

Mɔɔ Ebileham nee ye abusua ne dwule azɛlɛ ne mɔɔ Gyihova hilele bɛ la azo la, ɛnee yeli ɛvolɛ 75. Bɛfɛlɛ ɛkɛ ne Keena. Ɛkɛ ne, Nyamenle bɔle Ebileham ɛwɔkɛ kɛ: ‘Mebava azɛlɛ ɛhye mɔɔ ɛnwu ye la meamaa ɛ bo zo amra.’ Noko ɛnee Ebileham nee Sɛla ɛyɛ mrelera yɛɛ bɛtɛwole. Yemɔti ɛnee kɛ ɔkɛyɛ na Gyihova amaa ye ɛwɔkɛ ne ara nu ɛ?