Diedi Nwo Sɔnea

Ebileham tetele Ayezeke maanle ɔhulole Gyihova na ɔvale ɔ nwo ɔdole ye ɛwɔkɛ ne mɔ azo. Mekɛ mɔɔ Ayezeke lile ɛvolɛ 25 la, Gyihova hanle kɛ Ebileham ɛyɛ debie bie mɔɔ yɛ se kpalɛ la. Duzu ɔ?

Nyamenle zele Ebileham kɛ: ‘Mesɛlɛ wɔ fa ɛ ra kokye ne kɔbɔ afɔle maa me wɔ boka bie mɔɔ wɔ Molaya azɛlɛ zo la azo.’ Ɛnee Ebileham ɛnze deɛmɔti Gyihova se ɔyɛ ɛhye la. Noko ɔdiele Gyihova.

Nwonlomɔ mangyee ne ala, Ebileham vale Ayezeke nee ye sonvolɛma nwiɔ zile nu hɔle Molaya. Mɔɔ bɛdiale kenle nsa adenle la, bɛnwunle awoka ne mɔ wɔ moamoa lɔ. Ebileham zele ye sonvolɛma ne kɛ bɛhendɛ, na ɔ nee Ayezeke kabɔ afɔle. Ebileham vale ɛyɛne maanle Ayezeke zoale, na ɔdaye noko ɔvale dadeɛ. Ayezeke bizale ye papa kɛ: ‘Nane ne mɔɔ yɛfa yeabɔ afɔle ne la wɔ ni?’ Ebileham buale kɛ: ‘Me ra, Gyihova bahile.’

Mɔɔ bɛdwule boka ne azo la, bɛzile afɔlemokyea. Akee Ebileham kyekyele Ayezeke asa nee ɔ gyakɛ na ɔvale ye ɔdole zolɛ.

Ebileham vale dadeɛ ne. Ɛkɛ ne ala Gyihova anwumabɔvolɛ vi anwuma deanle nu kɛ: ‘Ebileham! Mmaku kakula ne! Akee menwu kɛ ɛlɛ diedi ɔluakɛ ɛlɛ ɛhulolɛ kɛ ɛbava ɛ ra ne wɔabɔ afɔle wɔamaa me.’ Akee Ebileham nwunle boane nyinli bie kɛ ɔgyi kpɔkɛ ne anu. Ɛkɛ ne ala ɔtulule Ayezeke na ɔvale boane ne ɔbɔle afɔle.

Ɔvi kenle zɔhane, Gyihova vɛlɛle Ebileham kɛ ɔ gɔnwo. Ɛze deɛmɔti ɔ? Ɔyɛle debie biala mɔɔ Gyihova zele ye la, saa bɔbɔ ɔnde deɛmɔti ɔse ɔyɛ zɔ la abo a.

Gyihova zile ye ɛwɔkɛ ne azo fane dɔɔnwo hilele Ebileham kɛ: ‘Mebayila wɔ na meamaa ɛ bo zo amra anwo azo.’ Ɛhye kile kɛ Gyihova balua Ebileham abusua ne anwo zo yeayila kpalɛma amuala.