4 Nyamenle Ɛnli Pɛlepɛle—Asoo Ɔle Nɔhalɛ?
Bie mɔ ka kɛ: “Nyamenle a nea ewiade ɛhye azo a, na mɔɔ ɔbazi biala la le ye ɛhulolɛdeɛ. Yemɔti saa nyeyenu, mgbɔvodɛne, nee nzisi ɛbu ewiade a ɛnee ɔvi Nyamenle.”
Mɔɔ Baebolo ne kilehile: Nzisi mɔɔ ɛbu zo la ɛnvi Nyamenle. Baebolo ne ka Gyihova anwo edwɛkɛ kɛ: “Bodane ne, ye gyima di munli, ɔluakɛ ɔdi pɛlepɛle.”—Mɛla ne 32:4.
Nyamenle yɛ menli kɔsɔɔti, mɔɔ ɛtanevolɛma bɔbɔ boka nwo la nyele. Kɛ neazo la, “ɔmaa ye ezule tɔ na ye ewia fi maa ɛtanevolɛma nee kpalɛyɛlɛma amuala.” (Mateyu 5:45) Ɔ nee menli mɔɔ wɔ maanle kɔsɔɔti anu la di ye pɛpɛɛpɛ, kɛmɔ Gyima ne 10:34, 35 ka la: “Nyamenle bu menli kɔsɔɔti kɛ bɛsɛ. Awie biala mɔɔ sulo ye na ɔdi boɛ la ɔdie ye ɔto nu, yɛɛ ɔnnea ɛleka mɔɔ ɔvi nee maanle holɛ ko mɔɔ ɔvi nu la.”
Nienwu a nzisi vi a? Menli dɔɔnwo le amile, bɛnli Nyamenle pɛlepɛlelilɛ nwo neazo ne anzi. (Mɛla ne 32:5) Eza Baebolo ne kile kɛ Nyamenle ɛmaa ye kpɔvolɛ Abɔnsam adenle kɛ ɔli tumi wɔ ewiade.a (1 Dwɔn 5:19) Noko akee, ɔnrɛhyɛ nzisi nwo adenle ɛhye mɔɔ Nyamenle ɛmaa la bara awieleɛ. Yeyɛ ngyehyɛleɛ mɔɔ ɔbalua zo yeazɛkye “Abɔnsam gyima biala mɔɔ yeli la.”—1 Dwɔn 3:8.
Yɛnwu nɔhalɛ ne a kɛzi ɔboa yɛ la: Ninyɛndane, amile, nee nzisi mɔɔ asɛɛ yɛte nwolɛ edwɛkɛ alehyenlɛ biala la bamaa yɛ adwenle azɛkye. Ɛnwu ɛleka mɔɔ ngyegyelɛ bo vi la a, ɔbamaa wɔade deɛmɔti ewiade ne ɛzɛkye zɛhae nee mɔdenle mɔɔ menli bɔ kɛ bɛmaa yeayɛ boɛ noko bɛngola la abo. (Edwɛndolɛ 146:3) Mmafa wɔ mekɛ nee wɔ anwosesebɛ ɛkpondɛ ninyɛne mɔɔ zolɛ bara wɔ nvasoɛ wɔ mekɛ ekyi bie ala anu la, emomu, fa kpondɛ anyelazo kpalɛ mɔɔ gyi Nyamenle ɛwɔkɛ ne mɔ azo la.—Yekile 21:3, 4.
Saa yɛze ɛleka mɔɔ nzisi bo vi la a, ɔbaboa yɛ wɔ mekɛ mɔɔ yɛkɛhɔ ngyegyelɛ nu la. Bɛsisi yɛ a, bie a yɛbazu yɛavɛlɛ Nyamenle kɛmɔ ye sonvolɛ Habakɛke yɛle la: “Mɛla nwo ɛnlɛ nvasoɛ yɛɛ pɛlepɛlelilɛ ɛnle ɛkɛ bieko.” (Habakɛke 1:4) Nyamenle andea Habakɛke ɔlua edwɛkɛ ɛhye mɔɔ ɔhanle la ati. Emomu, Nyamenle kyekyele ye sonvolɛ ne arɛle kɛ Ɔlɛ mekɛ mɔɔ ɔbava yeatoto ninyɛne boɛ a. Akee ɔboale Habakɛke ɔmanle ɔ nye liele wɔ ngyegyelɛ mekɛ ne anu. (Habakɛke 2:2-4; 3:17, 18) Zɔhane ala a ɛwɔkɛ mɔɔ Nyamenle ɛbɔ kɛ ɔbaye nzisi yeavi ɛkɛ la kola boa yɛ maa yɛnyia anzondwolɛ wɔ ewiade mɔɔ pɛlepɛlelilɛ ɛnle nu la anu a.
[Ɔ bo ɛkɛ ne edwɛkɛ]
a Saa ɛkpondɛ kɛ ɛnwu kɛzi ɔyɛle mɔɔ Abɔnsam rale ewiade ye la a, nea Duzu A Baebolo ne Kilehile Amgba A? buluku ne tile 3.
[Edwɛkɛ mɔɔ bɛkpa wɔ mukelɛ 7]
Asoo amaneɛnwunlɛ nee nzisi vi Nyamenle amgba?
[Nvoninli Ɛvileka wɔ mukelɛ 7]
© Sven Torfinn/Panos Pictures