3 Nyamenle Di Nzenralɛ—Asoo Ɔle Nɔhalɛ?

Bie mɔ ka kɛ: “Nyamenle bu ɛtane biala mɔɔ menli yɛ la anwo mgbonda na ɔbayɛ bɛ kpɔdekpɔde dahuu wɔ abɔnsam senle nu.”

“Nyamenle maa esiane sisi ɔfa ɔtwe ɛtanevolɛma anzo.”

Mɔɔ Baebolo ne kilehile: Baebolo ne ka ye Gyihova anwo wɔ 2 Pita 3:9 kɛ: “Ɔngulo kɛ bɛsɛkye awie biala. Ɔkpondɛ kɛ awie biala nu ɔ nwo.” Ɔnva ye adwenle ɔnzie yɛ nvonleɛ zo, emomu, kpalɛ ne mɔɔ yɛyɛ la. Nyamenle “fa ɔ nye bɔ ewiade ye anwo mgbɔlɔka, na ɔfa tumi ɔdie bɛdabɛ mɔɔ bɛdi nɔhalɛ bɛmaa ye la.”—2 Edwɛkɛsisilɛ 16:9.

Ɛtanevolɛma mɔɔ bɛyɛ bɛ kpɔdekpɔde dahuu wɔ abɔnsam senle nu la ɛnle Baebolo ngilehile, ɔle Nyamenle kyibadeɛ. Anzohwenlɛ mɔɔ akunlu yɛ se kpalɛ mɔɔ Nyamenle fa ba amumuyɛma nwo zo la a le kɛ ɔbahu bɛ. (Gyɛlɛmaya 7:31; Wulomuma 6:7) Saa esiane si sɛkye ninyɛne a ɔngile kɛ Nyamenle yɛɛ ɛyɛ a, ɔboalekɛ esiane kola to awie biala.—Nolobɔvo ne 9:11.

Yɛnwu nɔhalɛ ne a kɛzi ɔboa yɛ la: Saa yɛnwu kɛ “fakyɛ” wɔ Nyamenle afoa yɛɛ ɔlɛ abotane a, ɔmaa yɛbikye ye. (Edwɛndolɛ 86:5) Tɛ yɛ adwenle mɔɔ babua yɛ fɔlɛ anzɛɛ yɛsulo kɛ ɔbahwe yɛ nzo la ati a ɔwɔ kɛ yɛsonle Nyamenle a. Emomu, yɛbahola yɛalua adwenle kpalɛ—Gyihova anwo ɛlɔlɛ zo yɛanyia diedi wɔ ye nu. Zɛhae ɛlɔlɛ ne maa yɛyɛ mɔɔ sɔ ɔ nye la.—Mateyu 22:36-38; 1 Dwɔn 5:3.

Nyamenle kpondɛ kɛ awie biala kakyi ye adwenle na ɔyɛ mɔɔ le kpalɛ la, noko ɔze kɛ menli dɔɔnwo ɛnrɛyɛ. Saa yeandua ɛtanevolɛma kakɛ wɔ bɛ nyɛleɛ nwo a, ɔbayɛ kɛ maanle mgbanyima mɔɔ bɛdi mɛla noko bɛnnea bɛmmaa menli ɛnli zo na bɛmaa mgbɔvodɛne nee amaneɛnwunlɛ kɔ zo dahuu la. (Nolobɔvo ne 8:11) Kɛmɔ yɛze kɛ Nyamenle ɛnrɛmaa amumuyɛ ɛnrɛdɛnla ɛkɛ dahuu la ati ɔmaa yɛnyia anyelazo kpalɛ. Nyamenle ɛbɔ ɛwɔkɛ kɛ ɔbaye menli mɔɔ kɔ zo di ɛtane la ɛkɛ, amaa “bɛlɛvoma” anyia dahuu ngoane wɔ azɛlɛ ye azo kɛmɔ ye mɔlebɛbo bodane ne de la.—Edwɛndolɛ 37:10, 11, 29.a

[Ɔ bo ɛkɛ ne edwɛkɛ]

[Edwɛkɛ mɔɔ bɛkpa wɔ mukelɛ 6]

Asoo Nyamenle kpondɛ kɛ yɛsonle ye ɔluakɛ yɛsulo kɛ ɔbahwe yɛ nzo la ati?

[Nvoninli Ɛvileka wɔ mukelɛ 6]

Doré a yɛle a