5 Ɛzonlenlɛ Kɔsɔɔti Le Kpalɛ—Asoo Ɔle Nɔhalɛ?

Bie mɔ ka kɛ: “Kɛmɔ ndenle ngakyile kola kɔ ɛleka ko ne ala la, zɔhane ala a bɛkola bɛdua ndenle ngakyile zo bɛkɔ Nyamenle ɛkɛ a. Ɔwɔ kɛ awie ko biala kpondɛ ye adenle ɔdua zo ɔkɔ Nyamenle ɛkɛ.”

Mɔɔ Baebolo ne kilehile: Ɔwɔ kɛ yɛfa nɔhalɛlilɛ yɛsonle, ɔnle kɛ yɛyɛ nabalaba. Gyisɛse hanle deɛmɔti Nyamenle kpole ye mekɛ zo ɛzonlenlɛ mgbanyima ne mɔ la hilele bɛ: “Ayezaya nwunle bɛ bɔkɔɔ yɛɛ ɔhanle a. Bɛle nabalabama kpalɛ kpalɛ, kɛmɔ ɔhɛlɛle ɔdole ɛkɛ ne la; ɔse, ‘Nyamenle se, Menli ɛhye mɔ fa bɛ nloa babonle mgbane a kanvo me a, na bɛ ahonle ɛdeɛ, ɔmbikye me.’” (Maake 7:6) Noko, mɔdenlebɔlɛ angome ɛngile kɛ Nyamenle balie yɛ ɛzonlenlɛ ado nu.

Gyisɛse luale nvonleɛ titile mɔɔ ɛnee wɔ zɔhane ɛzonlenlɛ mgbanyima ne nee bɛ ɛdoavolɛ ne mɔ ɛzonlenlɛ nwo mɔɔ ɔkpale nwolɛ ɛdanlɛ la azo ɔlale ɛhye ali. Ɔhanle kɛ Nyamenle edwɛkɛ ɛhye fane bɛ nwo: “Bɛsonle me mgbane, ɔluakɛ bɛkilehile mɔɔ menli ɛhyehyɛ la kɛ asɛɛ me mɛla ɔ!” (Maake 7:7) Ɛnee bɛ ɛzonlenlɛ ne le “mgbane” ɔboalekɛ ɛnee bɛmaa bɛ ɛzonlenlɛ ne anu amaamuo dumua mɔɔ Nyamenle kpondɛ kɛ bɛyɛ la anyunlu.

Baebolo ne ɛnlie ɛndo nu kɛ ndenle dɔɔnwo wɔ ɛkɛ mɔɔ bɛdua zo bɛnwu Nyamenle a, emomu, ɔka kɛ adenle kokye ala a wɔ ɛkɛ a. Mateyu 7:13, 14 (NW) ka kɛ: “Bɛva anuhɔlɛ ɛdenraa ne anu; ɔluakɛ anuhɔlɛ kpolomgbolo ne mɔɔ tɛlɛ la kɔ ɛzɛkyelɛ nu, na menli dɔɔnwo a lua zo ɛlɛkɔ nu a; noko anuhɔlɛ ɛdenraa ne nee adenle ekyi ne yemɔ yɛɛ ɔkɔ ngoane nu a, na menli ekyi bie a nwu ye a.”

Yɛnwu nɔhalɛ ne a kɛzi ɔboa yɛ la: Fa ye kɛ wɔva siane dɔɔnwo wɔziezie ɛ nwo wɔmaa ɛnriandilɛ tendenle bie na wɔli fɛse noko bɛanva ɔluakɛ ɛbule ɛnriandilɛ ne anwo mɛla ko azo mɔɔ wɔannwu ye a. Anrɛɛ duzu nganeɛ a ɛbade a? Ɛbade nganeɛ kɛ wɔvɛ mgbane. Asoo debie zɛhae bie bahola ado yɛ wɔ yɛ Nyamenle ɛzonlenlɛ nu?

Mekɛ mɔɔ ɔlɛfa yɛ ɛzonlenlɛ ne yeado ɛnriandilɛ nwo la, ɛzoanvolɛ Pɔɔlo hɛlɛle kɛ: “Awie biala mɔɔ su ɛnriandilɛ la ɛngola ɛnnyia ahyɛlɛdeɛ kyesɛ ɔdi nwolɛ mɛla ne mɔ azo.” (2 Temɔte 2:5) Saa yɛsonle Nyamenle kɛmɔ “nwolɛ mɛla ne mɔ” de la a, ɔdie ɔto nu na yɛnyia ɔ nyunlu ɛlolɛ. Kɛmɔ awie mɔɔ ɛlɛsu ɛnriandilɛ la ɛnrɛhola ɛnrɛbu ɔ nye ɛnrɛgua ɛnriandilɛ nwo mɛla ne mɔ azo na ɔnrɛli konim la, zɔhane ala a yɛnrɛhola yɛnrɛlua adenle biala mɔɔ yɛkulo la azo yɛnrɛzonle Nyamenle a.

Amaa yɛazɔ Nyamenle anye la, ɔwɔ kɛ yɛkoati ɔ nwo adalɛ biala. Gyisɛse hanle kɛ: “Ɛzonlenlɛma kpalɛ ne bazonle Selɛ ne wɔ sunsum nu nee nɔhalɛ nu.” (Dwɔn 4:23) Yɛnwu adenle kpalɛ ne mɔɔ kɔ Nyamenle ɛkɛ la wɔ ye Edwɛkɛ, Baebolo ne anu.—Dwɔn 17:17.a

[Ɔ bo ɛkɛ ne edwɛkɛ]

[Edwɛkɛ mɔɔ bɛkpa wɔ mukelɛ 8]

Ɛzonlenlɛ kɔsɔɔti kilehile menli maa bɛsonle Nyamenle kpalɛ ɔ?