BAEBOLO KPUYIA MƆƆ BƐBUA

Sonla holɛ boni a Nyamenle de a?

Nyamenle le sunsum nu sonla mɔɔ bɛnnwu ye. Yemɔ a bɔle anwuma, azɛlɛ ye nee debie biala mɔɔ die ɛnwomenle la. Awie biala ambɔ Nyamenle—ɔnlɛ mɔlebɛbo. (Edwɛndolɛ 90:2) Nyamenle kulo kɛ menli kpondɛ ye na bɛnwu ɔ nwo nɔhalɛ ne.—Kenga Gyima ne 17:24-27.

Nyamenle le awie mɔɔ yɛbahola yɛanwu ye duma a. Saa yɛsuzu ninyɛne mɔɔ yeyɛ la anwo a yɛbahola yɛanwu ye subane bie mɔ. (Wulomuma 1:20) Noko saa yɛbanwu Nyamenle kpalɛ a, ɔwɔ kɛ yɛsukoa ye Edwɛkɛ, Baebolo ne. Ɔmaa yɛnwu Nyamenle kɛ awie mɔɔ lɛ ɛlɔlɛ la.—Kenga Edwɛndolɛ 103:7-10.

Kɛzi Nyamenle te nganeɛ wɔ nzisi nwo ɛ?

Gyihova, yɛ Bɔvolɛ ne kyi nzisi. Ɔbɔle menli noko wɔ ye subane zo. (Mɛla ne 25:16) Ɛhye ati a yɛ nuhua dɔɔnwo kyi nzisi la. Nzisi mɔɔ yɛnwu ye la ɛnvi Nyamenle. Nyamenle maa sonla kola fi ye ɛhulolɛ nu yɛ debie. Ɔyɛ alɔbɔlɛ kɛ, menli dɔɔnwo sɛkye adenle ɛhye mɔɔ bɛlɛ la na bɛyɛ nzisi. Ɔyɛ Gyihova nyane.—Kenga Mɔlebɛbo 6:5, 6; Mɛla ne 32:4, 5.

Gyihova kulo pɛlepɛlelilɛ, na ɔnrɛmaa nzisi ɛnrɛhɔ zo dahuu. (Edwɛndolɛ 37:28, 29) Baebolo ne bɔ ɛwɔkɛ kɛ ɔnrɛhyɛ Nyamenle bamaa nzisi kɔsɔɔti abo apɛ.—Kenga 2 Pita 3:7-9, 13.