May

Mɔɔ Gyihova liele ye menli ne vile Yigyibiti akɛlɛzonlenlɛ nu la, ɔkpale ɛsɔfoma kɛ bɛyɛ gyima wɔ ye ɛdanlɛsua ne anu. Ɔmaanle Livaema noko yɛle gyima gyɛne wɔ ɛdanlɛsua nwuanzanwuanza zɔhane anu. Asoo Gyihova nleanle bɛdabɛ mɔɔ ɛnee bɛyɛ gyima wɔ ɛdanlɛsua ne anu anzɛɛ ɛnee bɛde bɛbikye ye la kpalɛ dɛlale bɛdabɛ mɔɔ bɛha la ɔ? Kyɛkyɛ! Gyihova ɛnnea sonla nyunlu. Awie biala mɔɔ wɔ azokoɛleɛ ɛkɛ ne la nyianle nwolɛ adenle ko ne ala kɛ ɔbava Gyihova agɔnwolɛ. Kɛ neazo la, Gyihova nleanle kɛ ɔbamaa maanle ne amuala anwu amungu pila ne nee senle pila ne mɔɔ ɔluale nwanwane adenle zo ɔmaanle ɔzinzele ɛdanlɛsua ne azo la. (Ɛzɛ. 40:38) Saa amungu ne bɔ ɔ bo kɛ ɔfi ɛkɛ ne yeahɔ ɛleka fofolɛ a, bɛdabɛ mɔɔ bɛnde bɛmbikye ɛdanlɛsua ne fee bɔbɔ la kola nwu ye, ɔti bɛboɔboa bɛ ninyɛne nloa, bɛtudu bɛ ɛdanlɛ azua ne mɔ na bɛ nee bɛdabɛ mɔɔ bɛha la amuala bɔ nu kɔ. (Nɔm. 9:​15-23) Zɔhane ala a ɛnɛ noko, ɔnva nwo ɛleka mɔɔ yɛde wɔ azɛlɛ ye azo la, Gyihova kulo yɛ, ɔnea yɛ na ɔbɔ yɛ nwo bane a. w24.06 4 ¶10-12

Ɛnee Devidi ngoane la esiane nu. Ɔ ra Abesalɛm zile kpɔkɛ kɛ ɔdie belemgbunlililɛ ne yeavi ɔ sa nu. (2 Sa. 15:​12, 13) Ɛnee ɔwɔ kɛ Devidi yɛ ye ndɛndɛ fi Gyɛlusalɛm! Mɔɔ ye sonvolɛma ne ɛlɛkɔ la, Devidi nwunle kɛ ɔwɔ kɛ awie tɛnla Gyɛlusalɛm amaa yeanwu Abesalɛm adwenle ngyehyɛlɛ na yeaha nwolɛ edwɛkɛ yeahile ye. Ɔti ɔzoanle Zeedɔko nee ɛsɔfoma bie mɔ kɛ bɛzia bɛhɔ suakpole ne azo bɛhɔyɛ busiama. (2 Sa. 15:​27-29) Ɛnee ɔwɔ kɛ bɛmaa bɛ nye da ɛkɛ kpalɛ. Devidi vale adwenle bie na ɔvale ɔluale Zeedɔko nee ɔdaye Devidi ɔ gɔnwo Huhyae mɔɔ di nɔhalɛ la anwo zo. (2 Sa. 15:​32-37) Huhyae yɛle mɔɔ Devidi hanle la, ɔyɛle ɔ nwo kɛ asɛɛ ɔwɔ Abesalɛm afoa na ɔmaanle ye adwenle wɔ kɛzi ɔbahola yeateta Devidi la anwo. Na adwenle zɔhane bamaa Devidi anyia mekɛ aziezie ɔ nwo amaa Abesalɛm ɛtetalɛ ne. Akee Huhyae hanle adwenle mɔɔ ɔbɔle la anwo edwɛkɛ hilele Zeedɔko nee Abayata. (2 Sa. 17:​8-16) Bɛdabɛ noko bɛbɔle Devidi amaneɛ na ɔmaanle bɛbɔle Devidi anwo bane.—2 Sa. 17:​21, 22. w24.07 4-5 ¶9-10

Gyihova azonvolɛ bie mɔ di nyane kpole wɔ ɛtane dɛba mɔɔ bɛyɛle kolaa na bɛazɔne bɛ anzɛɛ wɔ bɛ ɛzɔnenlɛ ne anzi la anwo. Noko ɔhyia kɛ yɛkakye kɛ, kɛmɔ Gyihova kulo yɛ kpole kpalɛ la ati a ɔvale ɛkpɔnedeɛ ne ɔmaanle yɛ a. Nɔhalɛ nu, ɔkulo kɛ yɛdie ye ahyɛlɛdeɛ ɛhye yɛto nuhua. Gyihova maa yɛnyia anwodozo kɛ, saa yɛ nee ye ‘siezie yɛ avinli’ a, ɔbava yɛ ɛtane yeahyɛ yɛ bɔkɔɔ. Nea kɛzi ɔyɛ yɛ fɛ kɛ Gyihova ɛngakye yɛ ɛtane mɔɔ yɛyɛle ye dɛba la! Noko akee ɔ rɛle ɛnvi kpalɛ mɔɔ yɛyɛle la ɛlɛ. (Edw. 103:​9, 12; Hib. 6:10) Saa wɔ adwenle ɛlɛbua wɔ fɔlɛ wɔ ninyɛne mɔɔ ɛyɛle ye dɛba la anwo a, bɔ mɔdenle kɛ ɛbava wɔ adwenle wɔazie mɔɔ ɛlɛyɛ ye ɛnɛ nee mɔɔ ɛbahola wɔayɛ ye kenle bie la azo na tɛ mɔɔ ɛze ɛhɔ la azo ɔ. Ɛdawɔ noko ɛnrɛhola ɛnrɛhakyi mɔɔ zile dɛba ne la. Noko ɛbahola wɔaye Gyihova ayɛlɛ wɔ tɛnlabelɛ mɔɔ ɛwɔ nu kɛkala la anu na wɔamaa ɛ nye ala ninyɛne mɔɔ yeva yebɔ wɔ ɛwɔkɛ kenle bie la ade. w24.10 8 ¶8-9

Saa ɛkenga Baebolo ne na ɛdwenle kɛzi ɛbava wɔali gyima la anwo a, bie a ɛbade nganeɛ kɛ nzenzaleɛ mɔɔ ɔwɔ kɛ ɛyɛ la zonle somaa. Kɛ neazo la, fa ye kɛ ɛnɛ wɔ Baebolo ɛgengalɛ ne ɛlɛtu wɔ folɛ kɛ ɛmmanea sonla nyunlu. (Gye. 2:​1-8) Wɔnwu ye kɛ ɛbahola wɔanyia anyuhɔlɛ wɔ kɛzi ɛ nee awie mɔ di la anu, ɔti ɛzile kpɔkɛ kɛ ɛbayɛ nzenzaleɛ. Akee aleɛ hyenle la ɛgengale edwɛkɛ bie mɔɔ ɔlɛmaa wɔanwu kɛ ɔwɔ kɛ ɛnea wɔ ɛdendɛlɛ boɛ la. (Gye. 3:​1-12) Ɛnwunle kɛ ɔyɛ a wɔ ɛdendɛlɛ ɛnyɛ fɛ. Ɔti ɛbɔle kpɔkɛ kɛ ɛbamaa wɔ ɛdendɛlɛ ayɛ fɛ na yeamaa anwosesebɛ. Ye kenle nsa ne azo ɛnee wɔ Baebolo ɛgengalɛ ne ɛlɛbɔ wɔ kɔkɔ kɛ ɛmmafa ewiade ne agɔnwolɛ. (Gye. 4:​4-12) Na ɛyɛle ye nzonlɛ kɛ ɔwɔ kɛ ɛnea boɛ wɔ ninyɛne mɔɔ ɛfa ɛdielie ɛ nye la anwo. Ɔkadwu kenle nna ne azo la, bie a akee ɛbade nganeɛ kɛ nzenzaleɛ mɔɔ ɔwɔ kɛ ɛyɛ la zonle somaa. Mmamaa ɛ sa nu to. Kakye kɛ “subane fofolɛ ne” mɔɔ yɛbawula la ɛnle kenle ko debie. w24.09 5-6 ¶11-12

Ɛnee Gyisɛse ze kɛ kɛzi Gyihova nwu edwɛkɛ ne la a hyia kpalɛ a. Ɔnyianle anwodozo kɛ Gyihova bali nzisi nwo gyima wɔ mekɛ kpalɛ nu. Saa awie nee yɛ anli ye boɛ a, yɛbahola yɛazukoa Gyisɛse na yɛanlea mɔɔ yɛbaha la boɛ. Nzisi ne bie mɔ le ngyikyi ɔti yɛbahola yɛabu yɛ nye yɛagua zo. Anzɛɛ yɛbahola yɛayɛ koonwu amaa yɛanga edwɛkɛ mɔɔ bamaa edwɛkɛ ne azɛkye la. (Nol. 3:7; Gye. 1:​19, 20) Ɔdwu mekɛ ne bie noko na yɛnwu kɛ bɛ nee awie mɔ ɛnli ye boɛ anzɛɛ ɔwɔ kɛ yɛgyinla nɔhalɛ ne anzi a, bie a ɔbahyia kɛ yɛtendɛ. (Gyi. 6:​1, 2) Saa yɛbadendɛ a, ɔwɔ kɛ yɛbɔ mɔdenle biala kɛ yɛbadendɛ bɛtɛɛ yɛɛ ɔwɔ kɛ ɔda ali kɛ yɛbu menli ne. Eza yɛbahola yɛazukoa Gyisɛse ɔlua “Ahenle mɔɔ bua ndɛne pɛlepɛle” mɔɔ yɛbava yɛ nwo yɛado ɔ nwo zo la azo.—1 Pita 2:23. w24.11 5-6 ¶10-12

Saa ɛtanevolɛ bie nu ɔ nwo a, yɛ nye die kpole kpalɛ! (Luku 15:7) Nwane a ɔwɔ kɛ yɛfa nwolɛ nganvolɛ ne yɛmaa ye a? Asoo yɛfa yɛmaa mgbanyima ne mɔ? Kakye edwɛkɛ mɔɔ ɛzoanvolɛ Pɔɔlo hɛlɛle ye wɔ ɛtanevolɛma anwo la: “Bie a Nyamenle bamaa bɛanlu bɛ nwo.” (2 Tim. 2:25) Saa ɔba ye zɔhane a, yɛfa nwolɛ nganvolɛ ne yɛmaa Gyihova na tɛ sonla ɔ, ɔluakɛ Gyihova a ɛmaa ahenle ɛyɛ nzenzaleɛ kpole ɛhye a. Pɔɔlo toa zo la, ɔhanle ninyɛne mgbalɛ mɔɔ fi anlubɛnwo ɛhye anu ba la bie mɔ anwo edwɛkɛ. Ɔmaa ɛtanevolɛ ne nyia nɔhalɛ ne anwo nɔhalɛ ndelebɛbo, ɔ nye ba ɔ nwo zo na ɔkola ɔnriandi ɔfi Seetan ɛhane ne mɔ anu. (2 Tim. 2:26) Saa ɛtanevolɛ bie nu ɔ nwo a, kɔmatii ne bayɛ ɛkpɔlalɛ nwo ngyehyɛleɛ amaa ahenle ahɔ zo anyia moalɛ mɔɔ ɔhyia nwo na yeaho yeatia Seetan ngane ne mɔ na yeamaa ɔ gyakɛ abo adenle ayɛ fɔɔnwo la.—Hib. 12:​12, 13. w24.08 23 ¶14-15

Ɛnee menli dɔɔnwo ne mɔɔ Gyisɛse maanle bɛ paano ne la adwenle amuala wɔ bɛ nwonane afoa nu ngyianlɛ nee bɛ atiakunluwɔzo mɔɔ bɛdi nwolɛ gyima la ala azo. Duzu a bɛyɛle a? Aleɛ hyenle la, bɛnwunle kɛ ɛnee Gyisɛse nee ye ɛzoanvolɛma ne ɛhɔ. Awie mɔ nee ɛlɔne gyɛne vi Taebilease rale ɛkɛ, ɔti menli ne vole bie kɛ bɛkɔ Kapɛnayɛm bɛahɔkpondɛ Gyisɛse. (Dwɔn 6:​22-24) Asoo kɛmɔ ɛnee bɛkulo kɛ bɛtie Belemgbunlililɛ ne anwo edwɛkɛ dɔɔnwo la ati a ɛnee bɛlɛkɔ ɔ? Kyɛkyɛ. Debie titili mɔɔ ɔti bɛlɛkpondɛ Gyisɛse la a le kɛ bɛkulo kɛ ɔmaa bɛ paano dɔɔnwo. Duzu ati a yɛkola yɛka ye zɔ a? Nea mɔɔ zile wɔ mekɛ mɔɔ menli ne nwunle Gyisɛse wɔ Kapɛnayɛm nehane la. Gyisɛse hanle ye wienyi kɛ deɛmɔti bɛlɛkpondɛ ye la a le kɛ bɛkulo kɛ ɔmaa bɛ aleɛ. Ɔhanle kɛ “bɛlile na bɛ ko yile” ɛdeɛ, noko ɔle “aleɛ mɔɔ sɛkye la.” Ɔmaanle bɛ anwosesebɛ kɛ “bɛyɛ aleɛ mɔɔ ɛnzɛkye na ɔmaa dahuu ngoane” la anwo gyima. (Dwɔn 6:​26, 27) Gyisɛse hanle kɛ ɔ Ze ne a fa aleɛ zɔhane maa a. w24.12 5 ¶8-9

Mediema mrenyia, amaa bɛayɛ kilehilevolɛma kpalɛ la, bɛmaa bɛ ngilehilelɛ wɔ bagua nu nee bɛ folɛdulɛ ɛgyinla Nyamenle Edwɛkɛ ne azo. Sukoa Baebolo ne nee yɛ mbuluku ne mɔ kpalɛ. (Mrɛ. 15:28) Saa ɛlɛsukoa debie a, anrɛɛ yɛ kɛzi bɛhilehile Ngɛlɛlera ne anu nee kɛzi yɛbahola yɛava yɛali gyima la nzonlɛ kpalɛ. Yɛɛ saa ɛlɛkilehile a, bɔ mɔdenle ɛsesebɛ kɛ ɛbamaa edwɛkɛ ne aha wɔ tievolɛma ahonle. Saa ɛbiza mgbanyima mɔɔ bɛlɛ anwubielɛ la adwenle na ɛfa bɛ nzuzulɛ ne mɔ ɛdi gyima a, ɔbahola yeaboa wɔ yeamaa wɔanyia anyuhɔlɛ. (1 Tim. 5:17) Ɔwɔ kɛ mgbanyima kola maa bɛ mediema anwosesebɛ; noko ɔdwu mekɛ ne bie a ɔwɔ kɛ bɛtu bɛ mediema folɛ anzɛɛ bɛtwi bɛ nyunlu bɔbɔ. Wɔ ɔ muala anu, ɔwɔ kɛ mgbanyima da atiakunlukɛnlɛma ali. Saa wɔanyɛ kyengye, ɛda ɛlɔlɛ ali na ɛmaa wɔ ngilehilelɛ ne gyinla Nyamenle Edwɛkɛ ne azo a, ɛbanwu kilehile kpalɛ ɔluakɛ ɛlɛsukoa Gyisɛse, Kilehilevolɛ Kpole ne.—Mat. 11:​28-30; 2 Tim. 2:24. w24.11 24 ¶16

Yɛdua mɔɔ yɛka ye wɔ Gyihova anwo la azo yɛwule ye anyunlunyia. Bɛha bɛhile Gyihova menli kɛ “bɛdo edwɛne bɛmaa Gyihova,” “bɛye ye duma ne ayɛlɛ,” “bɛbɔ ye ngoanelielɛ nwo edwɛkpa ne nolo” na “bɛha ye anyunlunyia ne anwo edwɛkɛ wɔ maanle maanle ne mɔ anu.” (Edw. 96:​1-3) Ɛhye mɔ amuala le ndenle mɔɔ yɛbahola yɛalua zo yɛawula yɛ anwuma Selɛ ne anyunlunyia a. (Gyi. 4:29) Yɛbahola yɛava yɛ ninyɛne mɔɔ sonle bolɛ la yɛawula Gyihova anyunlunyia. Nɔhalɛ azonvolɛ ɛlua ndenle ɛhye mɔ azo ɛwula Gyihova anyunlunyia dahuu. (Mrɛ. 3:9) Kɛ neazo la, Yizilayɛma vale bɛ ninyɛne boale bɛmaanle bɛzile ɛzonlenlɛsua ne na bɛnleanle zolɛ boɛ. (2 Arl. 12:​4, 5; 1 Ek. 29:​3-9) Gyisɛse ɛdoavolɛma mɔɔ ɛnee dwenle ɔ nwo la “vale bɛ ninyɛne boale” ye nee ye ɛzoanvolɛma ne. (Luku 8:​1-3) Alimoa Kilisienema ne noko vale moalɛ maanle bɛ sunsum nu mediema mrenyia nee mraalɛ. (Gyi. 11:​27-29) Ɛnɛ noko, yɛbahola yɛaye ndoboa yɛawula Gyihova anyunlunyia. w25.01 4 ¶8; 5 ¶11

Duzu a boale Kɔnileɛse ɔmaanle bɛzɔnenle ye a? Baebolo ne ka kɛ ɛnee “ɔsulo Nyamenle yɛɛ ɔ nee ye sua nu amra amuala sonle Nyamenle.” Yɛɛ ɛnee Kɔnileɛse bodo Nyamenle dahuu. (Gyi. 10:2) Mɔɔ Pita hanle edwɛkpa ne hilele Kɔnileɛse la, ɔ nee ye abusua ne nyianle Kelaese anu diedi na bɛmaanle bɛzɔnenle bɛ ndɛndɛ. (Gyi. 10:​47, 48) Ɔda ali kɛ ɛnee Kɔnileɛse lɛ ɛhulolɛ kɛ ɔbayɛ nzenzaleɛ biala mɔɔ ɔhyia kɛ ɔyɛ la amaa ɔ nee ye abusua ne abɔ nu azonle Gyihova. (Dwɔh. 24:15; Gyi. 10:​24, 33) Kɔnileɛse noko ammaa gyinlabelɛ mɔɔ ɔlɛ la anzi ye adenle kɛ ɔbayɛ Kilisienenli. Asoo nɔhalɛ ne mɔɔ wɔranwu ye la bahyia kɛ ɛdawɔ noko ɛyɛ nzenzaleɛ wɔ wɔ ɛbɛlabɔlɛ nu ɔ? Saa ɔwɔ kɛ ɛyɛ bie a, Gyihova baboa wɔ. Saa ɛbɔ kpɔkɛ kɛ ɛbava Baebolo ngyinlazo wɔayɛ gyima amaa wɔahola wɔazonle ye a, ɔbayila wɔ. w25.03 5 ¶12-13

Saa ɛte ahyehyɛdeɛ ne anzɛɛ mediema mɔɔ li yɛ nyunlu la anwo adalɛ edwɛkɛ bie a, kakye mɔɔ Nyamenle agbɔvolɛ vale yɛle Gyisɛse nee alimoa Kilisienema ne la. Ɛnɛ, bɛyɛ Gyihova menli kpɔdekpɔde na bɛka bɛ nwo adalɛ edwɛkɛ ngakyile kɛ mɔɔ Baebolo ne hanle dole ɛkɛ ne la. (Mat. 5:​11, 12) Saa yɛnwu ɛleka mɔɔ adalɛ edwɛkɛ ɛhye mɔ vi la na yɛyɛ nwolɛ debie ndɛndɛ a, bɛnrɛhola bɛnrɛbɛlɛbɛla yɛ. Duzu a ɔwɔ kɛ yɛyɛ yɛbɔ yɛ nwo bane a? Mmatie adalɛ edwɛkɛ. Ɛzoanvolɛ Pɔɔlo maanle yɛ mɔɔ ɔwɔ kɛ yɛyɛ wɔ adalɛ edwɛkɛ nwo la anwo adehilelɛ fɔɔnwo. Ɔhanle ɔhilele Timote kɛ ‘ɔha ɔhile bie mɔ kɛ bɛmmatie adalɛ edwɛkɛ’ nee “adalɛ edwɛkɛ mɔɔ ɛbulɛ ɛnle nu” la. (1 Tim. 1:​3, 4) Yɛndie adalɛ edwɛkɛ biala ɔluakɛ yɛze ɛleka mɔɔ ɔvi a. Yɛsɔ nɔhalɛ ne anwo “edwɛkɛ kpalɛ” ne anu.—2 Tim. 1:13. w24.04 13 ¶16-17

Ɛ nee menli mɔɔ di nɔhalɛ maa Gyihova la ɛhɔ zo ɛyɛ ko. Nyamenle kulo kɛ yɛbɔ nu yɛfa koyɛlɛ yɛsonle ye. Mekɛ ala mɔɔ yɛbeta nɔhalɛ ne la ɔbamaa yɛayɛ ko. Awie biala mɔɔ angɔ zo anzɔ nɔhalɛ ne anu la fa mgbakyemgbakyenu ba asafo ne anu, ɔti Nyamenle bɔ yɛ kɔkɔ kɛ ‘yɛhwe yɛ nwo yɛvi bɛ nwo.’ Tɛ ye zɔhane a bɛbahola bɛahwe yɛdayɛ mumua ne bɛavi nɔhalɛ ne anwo. (Wlo. 16:17) Saa yɛnwu nɔhalɛ ne na yɛsɔ nu kpundii a, yɛbabeta Gyihova dahuu na yɛanyia diedi kpole. (Ɛfɛ. 4:​15, 16) Seetan ɛnrɛhola ɛnrɛva ye adalɛ ngilehilelɛ nee ye mɛlɛbɛla edwɛkɛ ne mɔ ɛnrɛli yɛ adwenle na Gyihova babɔ yɛ nwo bane wɔ anwongyelelɛ kpole ne anu. Kɔ zo sɔ mɔɔ le nɔhalɛ la anu kpundii “na anzodwolɛ Nyamenle ne nee [wɔ] badɛnla.”—Fel. 4:​8, 9. w24.07 13 ¶16-17

Gyisɛse vale ye adwenle ziele menli mɔɔ ɛtane ɛmaa adwenleadwenle ɛdɔ bɛ nwo la anwo zo titili na ɔdole ɛsalɛ ɔvɛlɛle bɛ kɛ bɛrayɛ ye ɛdoavolɛma. Ɛnee ɔze kɛ ɛtane a maa alesama nwu amaneɛ a. Ɔti ɔboale mrenyia nee mraalɛ mɔɔ ɛnee bɛlie duma kɛ bɛle ɛtanevolɛma la. Ɔluale ndonwo zo ɔhilehilele nu kɛ: “Menli mɔɔ te kpɔkɛ la ɛngyia ayileyɛvolɛ nwo, emomu menli mɔɔ ɛnde kpɔkɛ la a hyia bie a.” Ɔdoale zolɛ kɛ: “Membale kɛ mebavɛlɛ ɛtanevolɛma na tɛ tenlenema ɔ.” (Mat. 9:​12, 13) Na zɔhane a amgba Gyisɛse yɛle a. Mɔɔ raalɛ bie vale ɔ nye monle kyikyile ɔ gyakɛ anwo la, ɔdendɛle kɛnlɛma ɔhilele ye na ɔvale ye ɛtane ɔhyɛle ye. (Luku 7:​37-50) Gyisɛse hanle nɔhalɛ edwɛkɛ bie mɔɔ hyia la hilele Samɛleanli raalɛ bie ɔnva nwo kɛ ɛnee ɔze kɛ ɔbɔ ɛbɛlatane la. (Dwɔn 4:​7, 17-19, 25, 26) Nyamenle maanle Gyisɛse tumi bɔbɔ kɛ ɔye ngyegyelɛ mɔɔ vi ɛtane kɔsɔɔti anu ba, mɔɔ yemɔ a le ewule la ɔvi ɛkɛ. Kɛzi ɔyɛle ye ɛ? Gyisɛse dwazole mrenyia nee mraalɛ yɛɛ ngakula nee mgbanyinli vile ewule nu.—Mat. 11:5. w24.08 4 ¶9-10

Kɛzi ɔnrɛhyɛ Gyihova bawula ye duma ne anyunlunyia ɛ? Ɔbalua ndɛne mɔɔ ɔbabua la azo a yeayɛ ye zɔ a. Ɔnrɛhyɛ, ɔbazɛkye Babelɔn Kpole ne kɛ bɛguale ye duma nwuanzanwuanza ne anwo evinli la. (Yek. 17:​5, 16; 19:​1, 2) Wɔannea a menli mɔɔ banwu Babelɔn Kpole ne ɛzɛkyelɛ ne la bie mɔ baraboka yɛ nwo wɔ nɔhalɛ ɛzonlenlɛ nu. Awieleɛ bɔkɔɔ ne, Gyihova bazɛkye Seetan ngyehyɛleɛ kɔsɔɔti, na yeaye bɛdabɛ mɔɔ bɛdwazo bɛtia ye na bɛgua ye duma ne anwo evinli la yeavi ɛkɛ wɔ Amagɛdɔn ne anu, noko ɔbalie menli mɔɔ bɛkulo ye na bɛtie ye na eza bɛ nye die nwo kɛ bɛbawula ye anyunlunyia la. (Maake 8:38; 2 Tɛs. 1:​6-10) Ɔkadwu sɔnea mɔɔ li Kelaese Ɛvolɛ Apenle Ko Tumililɛ ne awieleɛ la, ɛnee Gyihova ɛde ye duma ne anwo bɔkɔɔ. (Yek. 20:​7-10) Wɔ zɔhane mekɛ ne, “Gyihova anyunlunyia ne anwo nrɛlɛbɛ bayi azɛlɛ ye tɛkɛɛ kɛ mɔɔ nzule keda nyevile zo la.”(Hab. 2:14) Nea kɛzi ɔbayɛ anyelielɛ kɛ menli kɔsɔɔti mɔɔ de aze la bava anyunlunyia mɔɔ fɛta Gyihova duma ne la amaa ye la! w25.01 7 ¶15-16

Duzu a ɛnee ɔbaboa Hibulu Kilisienema ne yeamaa bɛagyinla kpundii wɔ dwazotia mɔɔ ɛnee bɛlɛyia la anu a? Ɛnee ɛzoanvolɛ Pɔɔlo ze kɛ ɔwɔ kɛ bɛnwu nvasoɛ mɔɔ vi bɛ sɔnea ne mɔ anu bara la. Ɔti ɔhilehilele nu kɛ Nyamenle maa adenle maa yɛyia yɛ diedi ne anwo sɔnea amaa yɛava yɛatete yɛ. Ndetelɛ zɛhae kola boa awie maa ɔnyia Kilisiene subane ngakyile fofolɛ na ɔnyia anyuhɔlɛ wɔ mɔɔ ɔlɛ ye dɛba la anu. Saa Kilisienema zɔhane fa bɛ adwenle sie mɔɔ vi bɛ sɔnea ne mɔ anu bara la azo a, ɔnrɛmaa ɔnrɛyɛ se kɛ bɛbagyinla nu kpundii. (Hib. 12:11) Pɔɔlo maanle Hibulu Kilisienema ne anwosesebɛ kɛ bɛbɔ kpɔkɛ kyengye kɛ bɛbamia bɛ nye bɛagyinla sɔnea nloa. Ɛnee Pɔɔlo le awie mɔɔ ɔfɛta kɛ ɔbahɛlɛ ɛhye anwo edwɛkɛ yeahɔmaa bɛ a. Ɔluakɛ kolaa na yearayɛ Kilisienenli la, ɛnee ɔyɛ Kilisienema kpɔdekpɔde yɛɛ ɔnwunle kɛzi bɛyɛle bɛ amumuyɛ la. Ɛnee eza ɔze kɛzi bɛgyinla kpɔdekpɔdeyɛlɛ nloa kpundii la. Ɔluakɛ ɔrayɛle Kilisienenli la, ɔyiale dwazotia ngakyile.—2 Kɔl. 11:​23-25. w24.09 12-13 ¶16-17

Alehyenlɛ biala, yɛ edwɛkɛhanlɛ gyima ne anwo kyia ndɛndɛ kpalɛ. Duzu ati ɔ? Ɔluakɛ mekɛ ne ɛlɛwie. Suzu mɔɔ Gyisɛse hanle ye wɔ edwɛkɛhanlɛ gyima ne mɔɔ yɛbayɛ ye wɔ mekɛ mɔɔ li awieleɛ anu la anwo kɛ mɔɔ bɛhɛlɛ ye wɔ Maake 13:10 la anwo. Mateyu noko hanle kɛ Gyisɛse hanle kɛ bɛbabɔ edwɛkpa ne nolo wɔ azɛlɛ ye amuala azo kolaa na “awieleɛ ne” ara. (Mat. 24:14) Edwɛkɛ zɔhane fale Seetan ɛtane ewiade ne mɔɔ ɔbara awieleɛ bɔkɔɔ la anwo. Gyihova ɛye ninyɛne ɛhye mɔ mɔɔ ɔnrɛhyɛ bɛbasisi la anwo ‘kenle nee dɔnehwele ne’ ɛzie ɛkɛ. (Mat. 24:36; Gyi. 1:7) Aleɛ kye biala a, ɛnee mekɛ zɔhane ɛlɛbikye kpalɛ. (Wlo. 13:11) Noko kolaa na awieleɛ ne ara la, ɔwɔ kɛ yɛkɔ zo yɛka edwɛkɛ ne. Mekɛ mɔɔ yɛlɛsuzu yɛ edwɛkɛhanlɛ gyima ne anwo la, ɔle kpalɛ kɛ yɛbadwenle kpuya ɛhye mɔɔ anwo hyia la anwo: Duzu ati a yɛbɔ edwɛkpa ne nolo a? Ye sikalɛ nu a le kɛ, ɛlɔlɛ a maa yɛbɔ edwɛkpa ne nolo a. Mɔɔ yɛyɛ wɔ edwɛkɛhanlɛ gyima ne anu la da ɛlɔlɛ mɔɔ yɛlɛ la ali—ɛlɔlɛ mɔɔ yɛlɛ yɛmaa nɔhalɛ ne, ɛlɔlɛ mɔɔ yɛlɛ yɛmaa menli yɛɛ mɔɔ tɛla biala la, ɛlɔlɛ mɔɔ yɛlɛ yɛmaa Gyihova nee ye duma ne la. w24.05 14-15 ¶2-3

Awovolɛ bɛmaa bɛ ra anwosesebɛ bɛmaa ɔdwenledwenle abɔdeɛ nwo. Saa bɛ nee bɛ ra lua ɛleka mɔɔ mbaka ngakyile wɔ la a, bɛhwe ye adwenle bɛhɔ kɛzi abɔdeɛ ko biala de la azo. Duzu ati ɔ? Ɔluakɛ kɛzi bɛde la maa ɔda ali kɛ awie bie mɔɔ ze nrɛlɛbɛ la a hyehyɛle bɛ kɛnlɛma zɔhane a. Kɛ neazo la, saa ɛnea kɛzi sunflower, nyevile nu ɛnlonkoɛ bie mɔ anwo abonle, mbaka bie mɔ nya yɛɛ kɛzi nwɔlɔra ekpunli bie mɔ de la a, ɛbanwu kɛ bɛ muala bɛzɔho bɛ nwo; bɛyɛ bɛ kɛ mosquito coil la. Abɔdeɛ nwo nrɛlɛbɛvolɛma ɛva ɛvolɛ dɔɔnwo ɛzukoa nwolɛ debie. w24.12 16 ¶7

Mosisi, Devidi nee Dwɔn dɛnlanle aze wɔ mekɛ nee tɛnlabelɛ mɔɔ le ngakyile fi yɛ ɛdeɛ ne anwo la anu. Noko yɛle kɛ bɛdabɛ wɔ ndenle dɔɔnwo azo. Bɛzonlenle nɔhalɛ Nyamenle ne kɛ yɛdayɛ la. Kɛ mɔɔ bɛyɛle la, yɛdayɛ noko yɛfa yɛ asɔneyɛlɛ yɛto Gyihova anyunlu, yɛfa yɛ nwo yɛto bɛ nwo zo na yɛmaa ɔkile yɛ adenle. Yɛɛ yɛlɛ anwodozo kɛ Gyihova yila bɛdabɛ mɔɔ bɛtie ye la kpole kɛ bɛdabɛ la. Ɔti bɛmaa yɛli Gyihova mɛla ne mɔ azo yɛva yɛhile kɛ yɛlɛdi mrenyia mgbanyinli zɔhane mɔ edwɛkɛ mɔɔ li awieleɛ la azo. Na ɔbawie yɛ boɛ wɔ debie biala mɔɔ yɛyɛ la anu. Yɛbanyia ngoane na ‘yɛadɛnla aze mekɛ tendenle,’ ɛhɛe, dahuu! Na yɛ nye balie kɛ yɛlɛyɛ mɔɔ sɔ yɛ anwuma Selɛ ne mɔɔ lɛ ɛlɔlɛ na ɔdi ye ɛwɔkɛ zo wɔ ndenle mɔɔ bo yɛ ndelebɛbo zo la anye la.—Ɛfɛ. 3:20. w24.11 13 ¶20-21

Wɔ alimoa Kilisienema mekɛ zo, bɛkpale mediema mrenyia bie mɔ kɛ asafo nu azonvolɛ. (1 Tim. 3:8) Ɔzɔho kɛ bɛdabɛ a ɛzoanvolɛ Pɔɔlo hɛlɛle bɛ nwo edwɛkɛ kɛ ɛnee “bɛboa awie mɔ” la. Ɔti ɔbayɛ kɛ ɛnee asafo nu azonvolɛ yɛ gyima ngakyile mɔɔ hyia la amaa asafo nu mgbanyima ne mɔ ahola ava bɛ adwenle azie ngilehilelɛ nee mboanekpɔlalɛ gyima ne azo. Kɛ neazo la, bie a asafo nu azonvolɛ boale maanle bɛnleanle Ngɛlɛlera mɔɔ wɔ ɛkɛ la azo bɛhɛlɛle bie bɛdole ɛkɛ anzɛɛ bɛboale bɛmaanle bɛtotɔle ninyɛne mɔɔ bɛbahyia nwo bɛahɛlɛ bie la. Suzu ninyɛne mɔɔ asafo nu azonvolɛ yɛ boa awie mɔ wɔ wɔ asafo ne anu la anwo. (1 Pita 4:10) Bie a bɛbamaa bɛ gyima kɛ bɛnlea asafo ne ezukoa anzɛɛ azɛlɛsinli ne mɔ azo, bɛhɛla mbuluku na bɛva bɛmaa nolobɔlɛma ne, bɛnlea vidio nee edwɛnebɔlɛ milahyinli ne azo, bɛlie nyɛvolɛ anzɛɛ bɛboa bɛmaa bɛziezie ninyɛne mɔɔ ɛlɛsɛkye wɔ Belemgbunlililɛ Asalo ɛkɛ ne la. Ɛhye mɔ amuala boa maa ninyɛne kɔ zo pɛpɛɛpɛ wɔ asafo ne anu.—1 Kɔl. 14:40. w24.10 19 ¶4-5

Saa yɛkakye kɛ Gyihova de aze na ɔbaboa yɛ a, yɛbahola yɛagyinla sɔnea biala, kɛ ɔle kpole anzɛɛ ekyi la anloa. Ɔdaye a ɔle Tumivolɛ Bedevinli ne a na ɔbahola yeamaa yɛ tumi yeamaa yɛagyinla ɔ nloa. Ɛhye ati yɛlɛ debie mɔɔ yɛbahola yɛagyinla zo yɛava anwodozo yɛagyinla yɛ sɔnea ne mɔ anloa a. Saa yɛnwu kɛ Gyihova boa yɛ wɔ yɛ sɔnea ngyikyi nu a, ɔmaa yɛnyia anwodozo kɛ eza ɔbaboa yɛ wɔ yɛ sɔnea mgbole nu. Nea anwubielɛ nwiɔ mɔɔ maanle Belemgbunli Devidi nyianle Gyihova anu anwodozo kpole la. Mɔɔ ɔle kakula la, ezizile nee awenade hyele ye papa mboane ne mɔ bie. Wɔ tɛnlabelɛ nwiɔ ɛhye mɔ anu, Devidi vale akɛnrasesebɛ doale nane ne mɔ na ɔliele mboane ne. Noko yeanlie nwolɛ nganvolɛ ne yeammaa ɔ nwo. Ɛnee ɔze kɛ Gyihova a boale ye a. (1 Sa. 17:​34-37) Anwubielɛ zɔhane mɔ mɔɔ Devidi dwenledwenlenle nwo la, maanle ɔnyianle anwodozo kɛ tease Nyamenle ne bamaa ye anwosesebɛ kenle bie. w24.06 21 ¶5-6

Kɛ neazo la, fa ye kɛ awie mɔ ɛlɛkɔ ahɔlielie bɛ nye na bɛdo ɛsalɛ bɛvɛlɛ wɔ. Ɔwɔ kɛ ɛkɔ ɔ? Saa ɛnze ahenle mɔɔ ɛlɛyɛ gyimalilɛ ne la kpalɛ anzɛɛ ɛnze nwolɛ ngyehyɛleɛ biala a, ɔhyia kɛ ɛbiza ye kpuya le kɛ ɛhye mɔ: “Nienwu a bɛbayɛ gyimalilɛ ne a, na bɛbayɛ ye mekɛ boni? Menli dɔɔnwo bara bie ɔ? Nwane a banlea zo a? Nwane mɔ a bara bie a? Nwɔhoa ngakyile boni a bɛbali wɔ ɛkɛ a? Bɛbava nza mɔɔ bo la bɛara ɔ bo ɔ?” Ɛnyia kpuya ɛhye mɔ anwo mualɛ a ɔbaboa wɔ yeamaa wɔazi kpɔkɛ kpalɛ. Saa ɛnwu edwɛkɛ ne anu kpalɛ a, akee suzu mɔɔ ɔbahɔ zo wɔ ɛkɛ la anwo kɔ moa. Kɛ neazo la, saa ɛnwu kɛ menli mɔɔ bɛmbu Baebolo ngyinlazo la bara bie anzɛɛ nza mɔɔ bo la babu na awie biala banlo dodo biala mɔɔ ɔkulo la noko ɛ? Asoo ɛnwu kɛ gyimalilɛ ne bahola ahakyi ayɛ anyelielɛ mgbane mgbane ɔ? (1 Pita 4:3) Mekɛ mɔɔ wɔnwu edwɛkɛ ne anu kpalɛ la, akee ɛbahola wɔazi kpɔkɛ kpalɛ. w25.01 15 ¶4-5

Eza Gyihova dua ndonwo zo boa yɛ maa yɛnwu kɛzi ɔdua ɛkpɔnelɛ afɔlebɔlɛ ne azo ɔkyikyi ɛtanevolɛma mɔɔ bɛnu bɛ nwo la ɛtane la. Saa debie mɔɔ le weɔɔnwo anzɛɛ ɔle kɛ ebo la ka wɔ tɛladeɛ nu a, ye ɛkyikyilɛ ɛnla aze fee. Noko Gyihova ɛlɛdua ndonwo ɛhye azo yeamaa yɛanyia anwodozo kɛ ɔbahola yeakyikyi yɛ ɛtane ne mɔ bɔkɔɔ mɔɔ yɛnrɛnwu bɛ bieko a. Eza bɛfa ɛtane bɛtoto “kakɛ” nwo. (Mat. 6:12; Luku 11:4) Ɔti mekɛ biala mɔɔ yɛbayɛ ɛtane yɛatia Gyihova la, ɔle kɛ asɛɛ yɛ kakɛ ne ɔ nyunlu ala a ɔkɔ a. Yɛtua ye kakɛ kpole kpalɛ! Noko saa Gyihova fa yɛ ɛtane kyɛ a, ɔle kɛ asɛɛ yepɛ yɛ kakɛ ne mɔɔ yɛtua ye la anu. Ɔ nye ɛnla kɛ yɛbadua ɛtane mɔɔ yeva yehyɛ yɛ la anwo kakɛ. Ɛhye le ndonwo kɛnlɛma mɔɔ maa yɛnwu kɛzi yɛ nwo tɔ yɛ wɔ mekɛ mɔɔ Gyihova bava yɛ ɛtane ahyɛ yɛ la! w25.02 9-10 ¶9-10

Bie a awovolɛ bahyia moalɛ bie wɔ mekɛ mɔɔ bɛbayɛ mgbanyinli la, na ngakula dɔɔnwo anye die nwo kɛ bɛbaboa bɛ. (1 Tim. 5:4) Noko Kilisiene awovolɛ ze kɛ saa bɛ nye balie kpalɛ a, ɔgyi kɛzi bɛbaboa bɛ mra bɛamaa bɛazonle Gyihova la azo na tɛ kɛ bɛtete bɛ mra ne mɔ amaa bɛaboa bɛ wɔ ezukoa afoa nu kenle bie. (3 Dwɔn 4) Fa wɔ neazo kilehile ɛ mra ne mɔ maa bɛva bɛ nwo bɛdo Gyihova anwo zo wɔ mekɛ mɔɔ ɛlɛtete bɛ wɔamaa bɛanwu kɛzi bɛbanyia ezukoa bɛanlea bɛ nwo kenle bie la. Maa bɛnwu nvasoɛ mɔɔ wɔ gyima ɛsesebɛ ɛyɛlɛ zo la ɔvi bɛ ngakula nu. (Mrɛ. 29:21; Ɛfɛ. 4:28) Saa bɛlɛnyi a, boa bɛ maa bɛbɔ mɔdenle wɔ sukulu. Awovolɛ bahola ayɛ neɛnleanu akpondɛ Baebolo ngyinlazo aboa bɛ mra bɛamaa bɛazi nwomazukoalɛ nwo kpɔkɛ kpalɛ. Ɛhye baboa bɛ mra ne mɔ yeamaa bɛahola bɛanlea bɛ nwo na bɛayɛ dɔɔnwo wɔ ɛzonlenlɛ gyima ne anu la. w25.03 30-31 ¶15-16

Gyihova ɛha asetɛnla mɔɔ menli mɔɔ de sunsum nu paladaese ne anu banyia la anwo edwɛkɛ wɔ Ayezaya tile 65 ne anu. Ngapezo ɛhye limoale rale nu wɔ ɛvolɛ 537 K.Y.M. Wɔ zɔhane mekɛ ne, bɛyele Dwuuma mɔɔ nlunle bɛ nwo la bɛvile Babelɔn akɛlɛzonlenlɛ nu na bɛziale bɛhɔle bɛ sua zo. Gyihova yilale ye menli ne yɛɛ ɔboale bɛ ɔmaanle bɛyɛle Gyɛlusalɛm nee ɛzonlenlɛsua ne mɔɔ ɛzɛkye la bieko amaa yeayɛ ɛleka mɔɔ nɔhalɛ ɛzonlenlɛ bahɔ zo wɔ Yizilayɛ a. (Aye. 51:11; Zɛk. 8:3) Ayezaya ngapezo ne bɔle ɔ bo kɛ ɔba nu bieko wɔ 1919 Y.M. wɔ mekɛ mɔɔ Gyihova azonvolɛ mɔɔ bɛwɔ ɛkɛ ne ɛnɛ la hwenle bɛ nwo vile Babelɔn Kpole ne anwo la. Ɛhye anzi, sunsum nu paladaese ne bɔle ɔ bo kɛ ɔnyia anyuhɔlɛ ngyikyingyikyi wɔ ewiade amuala. Belemgbunlililɛ ne anwo nolobɔlɛma mɔɔ bɔ mɔdenle la dele asafo ngakyile dɔɔnwo na bɛlale sunsum ne ma ne ali. Mrenyia nee mraalɛ mɔɔ bɛyɛle basabasa na bɛbɔle ɛbɛlatane la ɛva “subane fofolɛ ne mɔɔ bɛbɔle ye wɔ Nyamenle ɛhulolɛ zo la” ɛwula. w24.04 20-21 ¶3-4

Wɔ maanle bie mɔ anu, bie a awovolɛ anzɛɛ mgbanyinli gyɛne a kpa awie maa bɛ busuanli mɔɔ le belazinli la a. Wɔ maanle gyɛne nu, mbusua anzɛɛ agɔnwolɛma kpondɛ awie mɔɔ belazinli bie bahola agya ye la na akee bɛayɛ ngyehyɛleɛ bɛamaa nrenyia ne nee raalɛ ne ayia na bɛanlea saa bɛbahola bɛadu na bɛagya a. Saa bɛka bɛkile wɔ kɛ ɛnlea saa menli nwiɔ bie bahola adu anzɛɛ agya a, suzu mɔɔ bɛ nuhua ko biala kulo nee mɔɔ ɔhyia nwo la anwo. Saa ɛnwu awie mɔɔ wɔ busuanli anzɛɛ ɛ gɔnwo bie bahola agya ye la a, bɔ mɔdenle kɛ ɛbanwu ye subane nee ye nyɛleɛ, yɛɛ mɔɔ tɛla biala la, ye sunsum nu gyinlabelɛ nwo edwɛkɛ dɔɔnwo. Agɔnwolɛvalɛ kpalɛ mɔɔ awie nee Gyihova lɛ la hyia kpalɛ tɛla ezukoa, nwoma anzɛɛ dibilɛ mɔɔ awie lɛ la. Noko kakye kɛ, mbelazinli ne mɔ a ɔwɔ kɛ bɛsi kpɔkɛ bɔkɔɔ kɛ bɛbagya anzɛɛ bɛnrɛgya a. w24.05 23 ¶11

Yɛbahola yɛalua edwɛkɛ mɔɔ yɛka nee mɔɔ yɛnga la azo yɛaboa menli mɔɔ bɛlɛtu la. Ɔyɛ a ɔwɔ kɛ yɛkomo yɛ nwo zo. (Mrɛ. 12:18) Kɛ neazo la, bie a yɛ nwo bapele yɛ kɛ yɛbaha yɛahile awie mɔ kɛ asomasi nee asomasi ɛlɛtu kɛ bɛbagya, noko bie a anrɛɛ bɛdabɛ mumua ne bɛkulo kɛ bɛka bɛ debie. Ɔnle kɛ yɛye menli mɔɔ bɛlɛtu la anwo ndɛne anzɛɛ yɛtendɛ yɛtia bɛ wɔ ninyɛne mɔɔ ɔle bɛdabɛ mumua ne bɛ edwɛkɛ la anwo. (Mrɛ. 20:19; Wlo. 14:10; 1 Tɛs. 4:11) Eza ɔnle kɛ yɛka anzɛɛ yɛbiza bɛ edwɛkɛ mɔɔ bamaa bɛade nganeɛ kɛ ye biala anu ɔwɔ kɛ bɛgya la. Na saa bɛsi kpɔkɛ kɛ bɛpɛ bɛ ngyehyɛleɛ ne anu noko ɛ? Ɔnle kɛ yɛfa yɛ nloa yɛwulowula bɛ edwɛkɛ nu anzɛɛ yɛbɔ bie somolɛ. (1 Pita 4:15) Kɛ mɔɔ yɛlimoale yɛhanle la, saa bɛpɛ ngyehyɛleɛ ne anu a, ɔngile kɛ ninyɛne angɔ boɛ ammaa bɛ. Fane dɔɔnwo ne ala, mɔɔ ɔkile la ala a le kɛ bɛ ɛdulɛ ne dwule ye bodane nwo—ɔboale bɛ ɔmaanle bɛzile kpɔkɛ kpalɛ. Noko bie a zɔhane kpɔkɛzilɛ ne ɛlɛmaa bɛali nyane. Ɔti yɛbahola yɛakpondɛ ndenle yɛalua zo yɛaboa bɛ.—Mrɛ. 17:17. w24.05 31 ¶15-16

Sɔnea mɔɔ maa yɛdi nyane kpalɛ la anu ko a le kɛ yɛ busuanli anzɛɛ yɛ gɔnwo bie bagyakyi Gyihova ɛzonlenlɛ. (Edw. 78:40) Saa yɛbikye ahenle ne kpalɛ a, ɔmaa ɔyɛ se kɛ yɛbalie tɛnlabelɛ ne yɛado nu. Saa wɔhɔ tɛnlabelɛ ɛhye mɔɔ yɛ nyane la bie anu ɛlɛ a, Zeedɔko nɔhalɛlilɛ nwo neazo ne bahola amaa wɔ anwosesebɛ. Ɔhɔle zo ɔlile nɔhalɛ ɔmaanle Gyihova wɔ mekɛ mɔɔ ɔ gɔnwo kpalɛ Abayata kpale kɛ ɔnrɛli nɔhalɛ la. Ɛhye zile wɔ mekɛ mɔɔ Devidi la ye ewule ɛkpa zo la. Ɔ ra nrenyia Adonaegya bɔle mɔdenle kɛ ɔdie belemgbunli ebia ne mɔɔ Gyihova bɔle ɛwɔkɛ kɛ ɔbava yeamaa Sɔlɔmɔn la. (1 Ek. 22:​9, 10) Abayata kpale kɛ ɔbagyinla Adonaegya anzi. (1 Arl. 1:​5-8) Ɛhye mɔɔ Abayata yɛle la ammaa yeanli nɔhalɛ yeammaa Devidi nee Zeedɔko yɛɛ Gyihova! Ɛnee Zeedɔko nee Abayata ɛbɔ nu ɛyɛ ɛsɔfo gyima ne ɛvolɛ dɔɔnwo.—2 Sa. 8:17; 15:29; 19:11-14. w24.07 6 ¶14-15

Saa yɛkɔ zo yɛmaa yɛ nye da ɛkɛ amaa yɛaho yɛatia sɔnea a, yɛbahola yɛanyia anwodozo kɛ yɛbanyia zolɛ nvasoɛ. Bie a yɛyɛ ɛtane a ɔbamaa ‘yɛ nye alie mekɛ ekyi’ ɛdeɛ, noko saa yɛfa Gyihova ngyinlazo ne mɔ yɛbɔ yɛ ɛbɛla a, ɔbamaa yɛ nye alie dahuu. (Hib. 11:25; Edw. 19:8) Ɔluakɛ bɛbɔle yɛ kɛ yɛva ye ngyinlazo ne mɔ yɛbɔ yɛ ɛbɛla. (Gyn. 1:27) Ɛhye bamaa yɛanyia adwenle mɔɔ anu te na yeaboa yɛ yeamaa yɛanyia dahuu ngoane kenle bie. (1 Tim. 6:12; 2 Tim. 1:3; Dwu. 20, 21) Nɔhalɛ nu, “nwonane ne le bɛtɛɛ.” (Mat. 26:41) Noko ɛhye ɛngile kɛ yɛnrɛhola yɛnrɛyɛ nwolɛ ɛhwee. Gyihova ɛziezie ɔ nwo kɛ ɔbava tumi mɔɔ yɛhyia nwo la yeamaa yɛ. (2 Kɔl. 4:7) Yɛ ye nzonlɛ kɛ, tumi bedevinli ne a Nyamenle fa maa yɛ a. Noko yɛdayɛ mumua ne a ɔwɔ kɛ yɛyɛ biala mɔɔ yɛbahola la alehyenlɛ biala kɛ yɛbamaa yɛ nye ala ɛkɛ amaa yɛaho yɛatia sɔnea a. Gyihova badie yɛ asɔneyɛlɛ na yeava anwosesebɛ mɔɔ yɛhyia la yeamaa yɛ. (1 Kɔl. 10:13) Amgba, ɔlua Gyihova moalɛ zo, yɛbahola yɛamaa yɛ nye ala ɛkɛ amaa yɛaho yɛatia sɔnea. w24.07 19 ¶19-21

Ɛzoanvolɛ Pɔɔlo hɛlɛle ɛnɛ tɛkese ne anu edwɛkɛ ne hɔmaanle ɔ gɔnwo asafo nu kpanyinli Timote amaa yeanwu kɛzi ɔbali “menli mɔɔ kɔ zo yɛ ɛtane” la edwɛkɛ nwo gyima la. Duzu a ɛnee ɔlɛkile a? Ɛnee ɔngile kɛ “menli mɔɔ wɔ ɛkɛ ne la kɔsɔɔti” gyi ɛkɛ ne maa asafo ne anu amra amuala. Emomu, ɛnee ɔlɛka menli ekyi ne mɔɔ bie a bɛde ɛtane mɔɔ ahenle yɛle la dɛba la anwo edwɛkɛ. Bɛbahola bɛayɛ menli mɔɔ bɛvale bɛ nye bɛnwunle ye anzɛɛ menli mɔɔ ɛtanevolɛ ne mumua ne hanle edwɛkɛ ne hilele bɛ la. Mgbanyima ne mɔ balua adenle kpalɛ zo aha ahile menli ɛhye mɔ kɛ bɛli tɛnlabelɛ ne anwo gyima yɛɛ bɛdenrɛ ɛtanevolɛ ne. Wɔ tɛnlabelɛ bie mɔ anu, bie a asafo ne anu amra dɔɔnwo ɛde ɛtane mɔɔ awie ɛyɛ la anzɛɛ bie a menli dɔɔnwo bade. Wɔ tɛnlabelɛ zɛhae anu, asafo ne boka “menli mɔɔ wɔ ɛkɛ ne la kɔsɔɔti” anwo. Ɔti kpanyinli ko babɔ nolo wɔ asafo ne anu kɛ bɛhwi adiema nrenyia anzɛɛ raalɛ ne anyunlu. Duzu ati ɔ? Pɔɔlo buale kɛ: “Amaa yeayɛ kɔkɔbɔlɛ yeamaa menli mɔɔ ɛha la” amaa bɛanyɛ ɛtane kpole. w24.08 23-24 ¶16-17

Ɔwɔ kɛ yɛkɔ zo yɛyɛ gyima ɛsesebɛ wɔ Gyihova ɛzonlenlɛ nu kɔdwu awieleɛ ne. Ɔwɔ kɛ bɛdabɛ mɔɔ bɛkpokpa bɛ la kɔ zo sinza amaa Gyisɛse ‘ava bɛ ahɔ’ anwuma Belemgbunlililɛ ne anu. (Mat. 24:40) Menli ɛhye mɔ anye la ye ɛsesebɛ kɛ ‘bɛbaboɔboa bɛ nloa’ bɛahɔ Gyisɛse anwo lɔ wɔ anwuma. Wɔ Amagɛdɔn konle ne anzi, bɛdabɛ a bɛbayɛ Gyisɛse atɔfolɛ raalɛ ne wɔ Boaneralɛ ne atɔfolɛlielɛ mekɛ ne a. (2 Tɛs. 2:1) Ndɛnebualɛ ne ɛlɛbikye ndɛndɛ ɛdeɛ, noko ɔnle kɛ yɛmaa ɛzulolɛ ka yɛ. Saa yɛkɔ zo yɛdi nɔhalɛ a, yɛ anwuma Selɛ ne mɔɔ lɛ ɛlɔlɛ la bamaa yɛ “tumi bedevinli ne” amaa ‘yɛahola yɛagyinla sonla Ra ne anyunlu.’ (2 Kɔl. 4:7; Luku 21:36) Saa yɛlɛ anyelazo kɛ yɛbahɔ anwuma o, anzɛɛ yɛbadɛnla azɛlɛ ye azo o, saa yɛtie kɔkɔbɔlɛ mɔɔ wɔ Gyisɛse ndonwo ne mɔ anu la a, yɛbazɔ yɛ Ze ne anye. Ɔlua Gyihova ɛlolɛ kpole ne ati, bɛbanwu kɛ ‘bɛhɛlɛ yɛ duma’ wɔ ngoane buluku ne anu.—Dan. 12:1; Yek. 3:5. w24.09 24-25 ¶19-20

Nyamenle Edwɛkɛ ne bahola aboa wɔ yeamaa wɔanyia anzodwolɛ. Wɔ adenle boni azo? Dwenledwenle ninyɛne mgbalɛ mɔɔ ɛlɛ, mɔɔ bie a le anwonyia mɔɔ ɛlɛ wɔ anwuma la anwo na fa toto mɔɔ bado bɛdabɛ mɔɔ ewiade ye anu ninyɛne ala a bɛlɛ la anwo. Bie a bɛbava bɛ nwo bɛado mɔɔ bɛbanyia ye ɛnɛ la ala azo ɔluakɛ bɛ nye ɛnla debie biala ade kenle bie. Noko wɔ wɔ afoa nu, Gyihova ɛbɔ wɔ ɛwɔkɛ kɛ ɔbayila wɔ ɛnɛ nee kenle bie. (Edw. 145:16) Eza suzu kpuya ɛhye anwo: Saa yɛsisile kpɔkɛ ngakyile a, asoo anrɛɛ yɛze kɛzi yɛ ɛbɛlabɔlɛ ɛwie yɛ kɛkala la ɔ? Noko yɛze wienyi kɛ: Bɛdabɛ mɔɔ bɛ kpɔkɛzilɛ gyi Nyamenle nee bɛ gɔnwo mɔ anwo ɛlɔlɛ zo la, debie kpalɛ biala ɛngyia bɛ. w24.10 27 ¶12-13