June

Kɛkala bɔbɔ yɛlɛnyia Kelaese ɛkpɔnelɛ afɔlebɔlɛ ne azo nvasoɛ. Kɛ neazo la, ɔlua ɛkpɔnedeɛ ne ati, Gyihova fa yɛ ɛtane ne mɔ kyɛ yɛ. Mɛla biala ɛnkyekye ye kɛ ɔwɔ kɛ ɔfa yɛ ɛtane ɔkyɛ yɛ. Noko ɔkulo kɛ ɔfa ɔkyɛ yɛ. (Edw. 103:​3, 10-13) Wɔannea a yɛ nuhua bie mɔ bade nganeɛ kɛ yɛnfɛta kɛ Gyihova fa yɛ ɛtane kyɛ yɛ. Na ɔle zɔ, yɛ muala yɛnfɛta. Ɛzoanvolɛ Pɔɔlo dele ɔ bo kɛ ‘ɔnfɛta kɛ bɛkɛvɛlɛ ye ɛzoanvolɛ.’ Noko ɔvale ɔzɔle zolɛ kɛ: “Ɔlua Nyamenle ɛlolɛ kpole ne azo mele kɛ mɔɔ mede la.” (1 Kɔl. 15:​9, 10) Saa yɛnu yɛ nwo wɔ yɛ ɛtane ne mɔ anwo a, Gyihova fa kyɛ yɛ. Duzu ati ɔ? Tɛ kɛ yɛfɛta la ati ɔ, emomu kɛmɔ ɔkulo yɛ la ati ɔ. Saa ɛte nganeɛ kɛ ɛnfɛta a, kakye kɛ Gyihova anva ɛkpɔnedeɛ ne ammaa menli mɔɔ ɛtane ɛnle bɛ nwo la, emomu ɔvale ɔmaanle ɛtanevolɛma mɔɔ bɛnu bɛ nwo la.—Luku 5:32; 1 Tim. 1:15. w25.01 26-27 ¶3-4

Yɛnrɛhola yɛnrɛhile awie mɔ mɔɔ ɔwɔ kɛ bɛka anzɛɛ bɛyɛ la, noko yɛbahola yɛayɛ mɔɔ yɛbayɛ ye wɔ nwolɛ la anwo debie. Na fane dɔɔnwo ne ala, mɔɔ ɔhyia kɛ yɛyɛ ye wɔ nwolɛ la a le kɛ yɛbava yɛahyɛ bɛ. Duzu ati ɔ? Ɔluakɛ yɛkulo Gyihova yɛɛ ɔkulo kɛ yɛfa ɛtane yɛkyɛ. Saa yɛkɔ zo yɛfa ɛya na yɛanva ɛtane yɛangyɛ a, bie a ɔnrɛmaa yɛnrɛyɛ yɛ ninyɛne nrɛlɛbɛ nu na bie a yɛanwu nwolɛ amaneɛ. (Mrɛ. 14:​17, 29, 30) Saa yɛye ɛya yɛfi yɛ nu a, ɔmaa yɛ nee awie mɔ di ye boɛ. Eza yɛkyɛ yɛ nwo debie—ɔmmaa yɛngɔ zo yɛndwenledwenle edwɛkɛ ne anwo, emomu yɛfa anyelielɛ yɛbɔ yɛ ɛbɛla. Kɛ ɔkɛyɛ na wɔaye ɛya wɔavi wɔ nu ɛ? Adenle ko a le kɛ ɛbamaa ɛ nwo mekɛ wɔamaa ɛya ne avi wɔ nu. Saa awie boda kpole na bɛyɛ ye ayile a, ɔhyia mekɛ na hanlɛ ne ahɔ bɔkɔɔ. Zɔhane ala a bie a ɔbalie mekɛ na yɛahola yɛaye awie mɔɔ yɛle yɛ ɛtane la anwo ɛya yɛavi yɛ nu kolaa na yɛahola yɛavi yɛ ahonle nu yɛava yɛahyɛ ye bɔkɔɔ a. (Nol. 3:3; 1 Pita 1:22) Yɛ asɔne sɛlɛ Gyihova kɛ ɔboa wɔ ɔmaa ɛva ɛtane ɛhyɛ. w25.02 16-17 ¶8-11

Mɔlebɛbo ngilehilelɛ ne bie mɔ a le anlubɛnwo, diedi, ɛzɔnenlɛ yɛɛ ewudwazo ne. (Hib. 6:​1, 2) Ɛhye mɔ le mɔlebɛbo ngilehilelɛ mɔɔ Kilisienema kɔsɔɔti die di la anu bie. Ɔti mɔɔ ɛzoanvolɛ Pita tendɛ ahile menli ekpunli ne wɔ Pɛntekɔso kenle ne la, ɔhanle ninyɛne ɛhye mɔ bie anwo edwɛkɛ. (Gyi. 2:​32-35, 38) Ɔwɔ kɛ yɛdie mɔlebɛbo ngilehilelɛ ɛhye mɔ yɛto nu amaa yɛayɛ Kelaese ɛdoavolɛma. Kɛ neazo la, Pɔɔlo bɔle yɛ kɔkɔ kɛ, awie biala mɔɔ yeanlie ewudwazo nwo ngilehilelɛ ne yeanli la, ɛnrɛhola ɛnrɛyɛ nɔhalɛ Kilisienenli. (1 Kɔl. 15:​12-14) Noko ɔnle kɛ yɛmaa yɛ kunlu dwo nɔhalɛ ne anwo edwɛkɛ ekyi mɔɔ yɛze la ala anwo. Sunsum nu aleɛ mɔɔ anu yɛ ɛlomboɛ la ɛnle kɛ mɔlebɛbo ngilehilelɛ ne la; emomu, ɔfale Gyihova mɛla nee ye ngyinlazo ne mɔ mɔɔ boa yɛ maa yɛnwu Gyihova adwenle la anwo. Amaa yɛanyia aleɛ zɛhae azo nvasoɛ la, ɔwɔ kɛ yɛsukoa Nyamenle Edwɛkɛ ne, yɛdwenledwenle nwo na yɛfa yɛbɔ yɛ ɛbɛla. Mekɛ mɔɔ yɛlɛyɛ zɔ la, ɛnee yɛlɛtete yɛ nwo amaa yɛahola yɛasisi kpɔkɛ mɔɔ Gyihova anye die nwo la. w24.04 5 ¶12-13

Nyamenle hakyele Dwona kɛ Nenɛvɛma ne ‘ɛnze kpalɛ a bɛnze ɛtane.’ (Dwona 1:​1, 2; 3:10; 4:​9-11) Nzinlii, Gyisɛse vale neazo zɔhane hilehilele Gyihova pɛlepɛlelilɛ nee ye anwunvɔnezelɛ ne anwo debie. Noko saa bɛka kɛ Nenɛvɛma “badwazo wɔ ndɛnebualɛ mekɛ ne anu” a, ɔkile duzu? Gyisɛse hanle ‘bɛdabɛ mɔɔ bɛbadwazo bɛ na bɛabua bɛ ndɛne’ kenle bie la anwo edwɛkɛ. (Dwɔn 5:29) Ɛnee ɔlɛka ye Ɛvolɛ Apenle Ko Tumililɛ ne anwo edwɛkɛ, mekɛ zɔhane anu a “bɛbadwazo tenlenema nee bɛdabɛ mɔɔ bɛnle tenlenema la bɛavi ewule nu” a. (Gyi. 24:15) Wɔ bɛdabɛ mɔɔ bɛnle tenlenema la afoa nu, ɛhye bayɛ mekɛ mɔɔ “bɛbadwazo bɛ na bɛabua bɛ ndɛne” a. Ɛhye kile kɛ, saa bɛdwazo bɛ a, Gyihova nee Gyisɛse bagua bɛ nye aze anlea bɛ ɛbɛlabɔlɛ nee kɛzi bɛlɛfa mɔɔ bɛlɛkilehile bɛ la bɛali gyima la kpalɛ. Saa Nenɛvɛnli mɔɔ bɛbadwazo ye la anzonle Gyihova nɔhalɛ nu a, Gyihova babua ye ewule fɔlɛ. (Aye. 65:20) Noko bɛdabɛ mɔɔ bɛbazonle Gyihova nɔhalɛ nu la kɔsɔɔti banyia nwolɛ adenle adɛnla ngoane nu dahuu!—Dan. 12:2. w24.05 5 ¶13-14

Mɔɔ ɔyɛle la maanle bɛnwunle kɛzi ɔ Ze noko se anwunvɔne la. (Dwɔn 14:9) Ɔluale ye edwɛkɛ nee ye nyɛleɛ zo ɔhilele kɛ ɔ Ze ne mɔɔ lɛ ahunluyelɛyelalɛ na ɔse anwunvɔne la kulo menli na ɔkulo kɛ ɔboa awie biala ɔmaa ɔdi ɛtane nwo zo konim. Gyisɛse boale ɛtanevolɛma maanle bɛnyianle ɛhulolɛ kɛ bɛbahakyi bɛ ɛbɛlabɔlɛ na bɛali ɔ nzi. (Luku 5:​27, 28) Ɛnee Gyisɛse ze mɔɔ la ɔ nyunlu a. Ɔhanle ɔhilele ye ɛdoavolɛma ne wɔ mekɛ ngakyile nu kɛ bɛbaye ye bɛamaa na bɛahu ye wɔ baka zo. (Mat. 17:22; 20:​18, 19) Ɛnee ɔze kɛ ye afɔlebɔlɛ ne baye ɛtane avi ewiade. Eza ɛnee Gyisɛse ze kɛ ɔfa ye ngoane ne ɔbɔ afɔle ɔwie a, ɔbahwe “menli ngakyile kɔsɔɔti” yeara ɔ nwo. (Dwɔn 12:32) Saa alesama mɔɔ le ɛtanevolɛma la die Gyisɛse to nu kɛ bɛ Awulae na bɛdi ɔ gyakɛ anzi a, bɛbahola bɛayɛ mɔɔ sɔ Gyihova anye la. Saa bɛyɛ ye zɔ a, awieleɛ bɔkɔɔ ne ‘bɛbalie bɛ bɛavi ɛtane nu.’ (Wlo. 6:​14, 18, 22; Dwɔn 8:32) Ɔti Gyisɛse lale akɛnrasesebɛ ali na ɔvile ye ɛhulolɛ nu ɔwule nyane nyane nu.—Dwɔn 10:​17, 18. w24.08 5 ¶11-12

Dwenle kɛzi ɛdele nganeɛ wɔ mekɛ mɔɔ ɛlimoale ɛzukoale nɔhalɛ ne mɔɔ wɔ Nyamenle Edwɛkɛ ne anu la anwo nea. Ɛnwunle kɛ wɔ anwuma Selɛ ne kulo wɔ, ɔkulo kɛ ɛbaboka ye azonvolɛ ne mɔ anwo, yebɔ ɛwɔkɛ kɛ ɔbaye nyanelilɛ nee amaneɛnwunlɛ yeavi ɛkɛ, ɛbahola wɔanyia anyelazo kɛ ɛbanwu wɔ alɔvolɛ mɔɔ bɛwu la wɔ ewiade fofolɛ ne anu, yɛɛ dɔɔnwo mɔɔ boka nwo la. (Maake 10:​29, 30; Dwɔn 5:​28, 29; Wlo. 8:​38, 39; Yek. 21:​3, 4) Nɔhalɛ zɔhane mɔ maanle ɛ nye liele. (Luku 24:32) Ɛnee ɛkulo mɔɔ ɛlɛsukoa la, na wɔangola wɔanva nɔhalɛ zɔhane mɔ mɔɔ sonle bolɛ la wɔanvea ɛ nwo! (Fa toto Gyɛlɛmaya 20:9 anwo.) Saa Baebolo nu nɔhalɛ ne sosɔ ndinli wɔ yɛ ahonle nu a, yɛnrɛhola yɛnrɛmua yɛ nloa. (Luku 6:45) Yɛte nganeɛ kɛ Gyisɛse ɛdoavolɛma mɔɔ limoa mɔɔ hanle kɛ: “Yɛnrɛhola yɛnrɛgyakyi ninyɛne mɔɔ yɛnwu ye nee mɔɔ yɛde la anwo edwɛkɛ ɛhanlɛ” la. (Gyi. 4:20) Yɛkulo nɔhalɛ ne kpole kpalɛ ɔti yɛkulo kɛ yɛka nwolɛ edwɛkɛ yɛkile menli dodo biala mɔɔ yɛbahola la. w24.05 15 ¶5; 16 ¶7

Yɛle Gyihova menli, ɔti yɛka edwɛkpa ne yɛkile awie mɔ ɔluakɛ yɛkulo yɛ anwuma Selɛ ne yɛɛ yɛkulo kɛ yɛboa awie mɔ yɛmaa bɛbanwu ye. Noko ɔyɛ se ɔmaa bie mɔ kɛ bɛ nye balie edwɛkɛhanlɛ gyima ne anwo. Duzu ati ɔ? Bie mɔ se nyiane kpalɛ yɛɛ bɛnlie bɛnli kɛ bɛbahola kilehile. Bie mɔ noko anye ɛnlie nwo kɛ bɛbahɔ awie mɔ sua nu wɔ mekɛ mɔɔ bɛtɛfɛlɛ bɛ wɔ ɛkɛ ne la. Bie mɔ noko sulo kɛ bie a menli bava bɛ nwo ɛya. Bɛtetele bie mɔ noko kɛ ɔnle kɛ bɛmaa awie biala nee bɛ nyia edwɛkɛ. Ɔnla aze ɔmmaa mediema ɛhye mɔ kɛ bɛbaha edwɛkɛ ne bɛahile menli mɔɔ bɛnze bɛ la. Asoo ninyɛne zɛhae mɔ bie maa ɔyɛ se kɛ ɛ nye balie daselɛlilɛ nwo ɔ? Saa zɔhane ɔde a, mmamaa ɛ sa nu to. Bie a anwodozo zɔhane mɔɔ ɛnlɛ la kile kɛ ɛbɛlɛ ɛ nwo aze na ɛngulo kɛ ɛtwe menli adwenle ɛba ɛ nwo zo, yɛɛ ɛngulo kɛ ɛ nee awie biala su kpolera. Awie biala noko ɛngulo kɛ awie mɔ bava ɔ nwo ɛya, titili wɔ mekɛ mɔɔ ɔlɛbɔ mɔdenle kɛ ɔyɛ bɛ boɛ la. Wɔ anwuma Selɛ ne ze ngyegyelɛ mɔɔ ɛlɛyia la kpalɛ na ɔkulo kɛ ɔfa moalɛ mɔɔ ɛhyia la ɔmaa wɔ.—Aye. 41:13. w24.04 14 ¶1-2

Saa ɛlɛkenga Baebolo ne a, kɛ anrɛɛ ɛbabɔ mɔdenle kɛ ɛbava debie biala mɔɔ wɔgenga la wɔali gyima ɛkɛ ne ala la, kpa bodane dodo mɔɔ ɛbahola wɔadwu nwo la. Sɔ ɛhye nea: Kɛlɛ ninyɛne mɔɔ ɔwɔ kɛ ɛdi nwolɛ gyima la na akee kpa nuhua ko anzɛɛ nwiɔ dimoa di nwolɛ gyima; gyakyi mɔɔ ɛha la maa mekɛ fofolɛ. Nienwu a ɛbabɔ ɔ bo a? Ɛbahola wɔava bodane mɔɔ ɔnrɛyɛ se kɛ ɛbadwu nwo la wɔabɔ ɔ bo. Anzɛɛ ɛbahola wɔali debie mɔɔ ɔhyia kpalɛ kɛ ɛnyia anyuhɔlɛ wɔ nu la anwo gyima. Saa ɛsi mɔɔ ɛkulo kɛ ɛdi nwolɛ gyima la anwo kpɔkɛ ɛwie a, akee yɛ neɛnleanu wɔ yɛ mbuluku ne mɔ anu. Yɛ wɔ bodane ne anwo asɔne, sɛlɛ Gyihova kɛ ɔmaa ‘ɛnyia ɛhulolɛ ne yɛɛ anwosesebɛ ne na ɛhola ɛyɛ.’ (Fel. 2:13) Akee kɔ zo fa mɔɔ wɔzukoa la bɔ wɔ ɛbɛla. Saa ɛdwu wɔ bodane mɔɔ limoa la anwo a, bie a ɔbamaa wɔanyia ɛhulolɛ kɛ ɛbali fofolɛ nwo gyima. Nɔhalɛ nu, saa ɛnwu kɛ wɔhola wɔyɛ nzenzaleɛ bie anzɛɛ wɔnyia anyuhɔlɛ wɔ Kilisiene subane bie anu a, bie a ɔnrɛyɛ se ɔnrɛmaa wɔ kɛ ɛbayɛ nzenzaleɛ wɔ ninyɛne gyɛne nu. w24.09 6 ¶13-14

Bie a ninyɛne mɔɔ ɛyɛle ye dɛba ne mɔɔ bodale awie mɔ la ɛlɛgyegye wɔ. Duzu a bahola aboa wɔ a? Yɛ biala mɔɔ ɛbahola la di ngyegyelɛ ne anwo gyima, bie a le kɛ ɛbavi wɔ ahonle nu wɔakpa kyɛlɛ. Sɛlɛ Gyihova kɛ ɔboa menli mɔɔ wɔ nyɛleɛ ne gyegyele bɛ la. Ɔbahola yeaboa ɛdawɔ mumua ne nee menli mɔɔ wɔgyegye bɛ la yeamaa bɛagyinla kpundii na bɛanyia anzodwolɛ bieko. Sukoa debie fi nvonleɛ mɔɔ ɛyɛle ye dɛba la anu na nyia ɛhulolɛ kɛ ɛbamaa Gyihova ava wɔ ali gyima wɔ adenle mɔɔ ɔkulo kɛ ɔfa wɔ ɔdi gyima la azo. Nea Dwona neazo ne. Kɛ anrɛɛ Dwona bahɔ ɛleka mɔɔ Nyamenle hilele ye kɛ ɔhɔ wɔ Nenɛvɛ la, ɔbɔle ɔ ti wɔ ɛlɛka gyɛne. Gyihova denrɛle Dwona na ɔzukoale debie ɔvile ye nvonleɛ ne anu. (Dwona 1:​1-4, 15-17; 2:​7-10) Gyihova anye ɔ nye anvi Dwona anwo. Nyamenle maanle ye nwolɛ adenle bieko kɛ ɔhɔ Nenɛvɛ, na mekɛ ɛhye ɛdeɛ Dwona angyilegyinla nwolɛ fee. Ɔnlunle ɔ nwo wɔ nvonleɛ mɔɔ ɔyɛle la anwo ɛdeɛ, noko yeammaa yemɔ anzi ye adenle kɛ ɔbalie gyimalilɛ mɔɔ Gyihova ɛlɛfa amaa ye la yeado nu.—Dwona 3:​1-3. w24.10 8-9 ¶10-11

Gyihova ɛmpɛ yɛ kakɛ anzɛɛ yɛ ɛtane ne mɔ anu ala, emomu ɔkyikyi ɔfi ɛkɛ. Saa bɛka kɛ bɛpɛ kakɛ bie anu a, bie a mɔɔ ba yɛ adwenle nu la a le kɛ bɛva pɛne bɛpɛ nuhua. Noko saa ɛnea a, ɛbahola wɔanwu ezukoa dodo mɔɔ bɛpɛ nu la. Noko akee debie mɔɔ bɛkyikyi la le ngakyile. Amaa yɛade ndonwo ɛhye abo la, ɔwɔ kɛ yɛkakye kɛ ɛnee ɔnyɛ se kɛ awie bava nzule akyikyi ɛnke mɔɔ ɛnee menli fa kɛlɛ debie wɔ tete ne la. Ahenle bahola ava emiane abɔ nzule nu na yeava yeakyikyi deɛ ne mɔɔ bɛhɛlɛ la yeavi ɛkɛ. Ɔti saa ‘bɛkyikyi’ kakɛ bie a, ɔkile kɛ ɔ bo zo ɛminli bɔkɔɔ. Saa awie nea a, ɔnrɛnwu ɔ bo zo ne bɔbɔ. Ɔle kɛ asɛɛ bɛangɛlɛ ɛhwee wɔ ɛkɛ ne bɔbɔ. Kɛmɔ yɛze kɛ Gyihova ɛmpɛ yɛ ɛtane ne mɔ anu ala, emomu eza ɔkyikyi ɔfi ɛkɛ ne bɔkɔɔ la ati, nea kɛzi ɔmaa yɛ nye die a!—Edw. 51:9. w25.02 10 ¶11

Saa awie mɔ bua yɛ mgbɔvodɛne anzɛɛ bɛ nee yɛ anli ye boɛ a, yɛnyia anwodozo kɛ Gyihova ze nɔhalɛ ne. Zɔhane anwodozo ne bahola aboa yɛ yeamaa yɛagyinla nzisi nloa ɔluakɛ yɛze kɛ ye biala anu Gyihova bali ninyɛne nwo gyima. Saa yɛgyakyi debie biala yɛmaa Gyihova a, ɔnrɛmaa yɛnrɛva awie mɔ anwo ɛya anzɛɛ yɛnrɛkpɔ bɛ. Zɔhane nganeɛdelɛ ne mɔ bahola amaa yɛayɛ ninyɛne yɛamaa yeabo zo, yeazɛkye yɛ anyelielɛ anzɛɛ yɛ nee Gyihova agɔnwolɛvalɛ ne. Nɔhalɛ nu, yɛnrɛhola yɛnrɛli Gyisɛse neazo ne anzi pɛpɛɛpɛ. Ɔdwu mekɛ ne bie a yɛbayɛ debie anzɛɛ yɛbaha edwɛkɛ bie na nzinlii yɛanlu yɛ nwo. (Gye. 3:2) Yɛɛ nzisi bie mɔ bahola amaa yɛali nyane na yɛ rɛle abɔ wɔ yɛ ngoane mekɛ kɔsɔɔti anu. Saa ɛhye bie ɛdo wɔ a, nyia anwodozo kɛ Gyihova ze mɔɔ ɛlɛkɔ nu la. Gyisɛse mɔɔ ɔdaye noko bɛ nee ye anli ye boɛ la bahola ade wɔ edwɛkɛ ne abo. (Hib. 4:​15, 16) Ɔyɛ yɛ fɛ kɛ Gyihova tu yɛ folɛ kpalɛ mɔɔ baboa yɛ yeamaa yɛagyinla nzisi nloa la. w24.11 6 ¶12-13

Amaa bɛanyia “dahuu ngoane” la, ɔwɔ kɛ bɛda ye ali kɛ bɛlɛ diedi wɔ Gyisɛse anu. (Dwɔn 3:​16-18, 36; 17:3) Dwuuma dɔɔnwo anlie Gyisɛse ngilehilelɛ ne mɔɔ fale “Nyamenle gyima” fofolɛ bie anwo la ando nu. Bɛbizale ye kɛ: “Nwanwane gyima boni a ɛbayɛ wɔahile yɛ na yɛalie wɔ yɛali a?” (Dwɔn 6:30) Bɛhanle kɛ bɛ nenyia mɔ mɔɔ ɛnee de aze wɔ Mosisi mekɛ zo la asa hanle mana, yemɔ a ɛnee le paano mɔɔ bɛdi ye kenle ko biala a. (Nih. 9:15; Edw. 78:​24, 25) Ɔti ɛnee paano mɔɔ bɛbanyia bɛali la ala a bɛlɛdwenle nwo a. Na mekɛ mɔɔ Gyisɛse hanle “nɔhalɛ paano mɔɔ vi anwuma” mɔɔ yemɔ bamaa bɛanyia dahuu ngoane la anwo edwɛkɛ la, bɛangyegye bɛ nwo kɛ bɛbabiza ye mɔɔ ye edwɛkɛ ne abo kile la. (Dwɔn 6:32) Ɛnee bɛ adwenle amuala wɔ aleɛ mɔɔ bɛbanyia la azo ɔti bɛandie dahuu ngoane nwo edwɛkɛ mɔɔ ɛnee Gyisɛse ɛlɛbɔ mɔdenle aha ahile bɛ la. w24.12 5-6 ¶10-11

Saa ɛ ra ne kɔ sukulu a, ɔbazukoa abɔdeɛ gyɛne nee kɛzi ko biala de la anwo debie. Kɛ neazo la, kɛzi mbaka bie mɔ de la yɛ nwanwane. Baka ne kpakye ngane kɛyɛ nwiɔ anzɛɛ nsa. Akee mɔɔ ɛkpakye la anu ko biala bakpakye ngane gyɛne yɛɛ ngane zɔhane mɔ noko bakpakye dɔɔnwo aboka nwo. Bɛfɛlɛ ɛhye fractal. Kɛ abɔdeɛ gyɛne dɔɔnwo noko de la ɛne. Noko nwane a yɛle ninyɛne ngɛnlɛma ɛhye mɔ a? Saa ɛ ra ne dwenle kpuya ɛhye anwo kpalɛ a, ɔbamaa yealie yeali kɛ Nyamenle a bɔle debie biala a. Ɛbahola wɔabiza ye kɛ, “Saa Nyamenle a bɔle yɛ a, asoo ɛnlie ɛnli kɛ eza ɔbamaa yɛ ɛbɛlabɔlɛ nwo adehilelɛ mɔɔ yɛdi zo a ɔbamaa yɛ nye alie ɔ?” Akee ɛbahola wɔaha wɔahile ye kɛ adehilelɛ kpalɛ zɔhane wɔ Baebolo ne anu. w24.12 16 ¶8

Sunsum ne maanle ɛzoanvolɛ Pɔɔlo hɛlɛle kɛlata hɔmaanle bɛ kɛ bɛye ɛtanevolɛ bie mɔɔ ɔtɛnunle ɔ nwo la bɛvi asafo ne anu. (1 Kɔl. 5:13) Kɛzi ɛnee ɔwɔ kɛ menli mɔɔ bɛwɔ asafo ne anu la nee ye di ɛ? Pɔɔlo hanle hilele bɛ kɛ bɛ nee ye “mmatu.” Duzu a ɛnee ye edwɛkɛ ne kile a? Pɔɔlo hilele nu kɛ ɔnle kɛ ‘bɛ nee sonla zɛhae di debie bɔbɔ.’ (1 Kɔl. 5:11) Saa ɛ nee awie ɛlɛdi debie a ɔnyɛ se kɛ bɛbabɔ adawu. Ɔti ɔda ali kɛ ɛnee Pɔɔlo ɛlɛkile kɛ ɔnle kɛ asafo ne nee ye bɔ nu dielie bɛ nye anzɛɛ yɛ debie gyɛne biala. Ɛhye babɔ asafo ne anwo bane avi ye nyɛleɛ ɛtane ne anwo. (1 Kɔl. 5:​5-7) Eza ɔbamaa nrenyia ne anwu ɛtane kpole mɔɔ yeyɛ yetia Gyihova la na yemɔ bamaa yeali nyane na yeanlu ɔ nwo. w24.08 15 ¶4-5

Wɔ Yizilayɛ, ɛnee bɛdi Mgbɔdalɛ Kenle ne ɛvolɛ biala. Wɔ zɔhane kenle ne, ɛsɔfo kpanyinli ne fa nane bɔ afɔle maa menli ne. Nɔhalɛ nu, nane afɔlebɔlɛ ne angola amkpɔda awie biala ɛtane bɔkɔɔ ɔluakɛ nane nee sonla ɛnzɛ. Noko saa Yizilayɛma mɔɔ bɛnlu bɛ nwo la bɔ afɔle mɔɔ Gyihova hilele kɛ bɛbɔ la a, ɔmaa ɔnyia ɛhulolɛ kɛ ɔbava bɛ ɛtane yeahyɛ bɛ. (Hib. 10:​1-4) Ngyehyɛleɛ zɔhane maanle bɛnwunle kɛ bɛle ɛtanevolɛma. Noko ɛnee Gyihova ze ngyehyɛleɛ mɔɔ ɔbayɛ yeamaa bɛaye alesama ɛtane bɛavi ɛkɛ bɔkɔɔ la. Ɔyɛle ngyehyɛleɛ ɔmaanle bɛvale ye kulovolɛ Ralɛ ne “bɛbɔle afɔle kokye kɛ ɔzoa menli dɔɔnwo ɛtane.” (Hib. 9:28) Gyisɛse rale amaa “yeava ye ngoane yeayɛ ɛkpɔnedeɛ yealie menli dɔɔnwo.”—Mat. 20:28. w25.02 4 ¶9-10

“Sunsum ne kulo, noko nwonane ne le bɛtɛɛ.” (Mat. 26:41b) Edwɛkɛ ɛhye mɔɔ Gyisɛse hanle la kile kɛ ɔte yɛ sinlidɔlɛ ne mɔ abo. Noko eza kɔkɔbɔlɛ wɔ ye edwɛkɛ ne anu: Mmadie ɛ nwo ɛdi somaa. Kolaa na Gyisɛse aha zɔhane edwɛkɛ ne la, ye ɛdoavolɛma ne vale anwodozo hanle kɛ bɛnrɛkpo bɛ Menle ne ɛlɛ. (Mat. 26:35) Ɛnee bɛlɛ adwenle kpalɛ. Noko yeamba bɛ adwenle nu kɛ saa bɛyia ngyegyelɛ a bɛ anwodozo ne bahola aha aze ndɛndɛ. Ɛhye ati, Gyisɛse vale edwɛkɛ mɔɔ wɔ ɛnɛ tɛkese ne anu la bɔle bɛ kɔkɔ. Mɔɔ ɔyɛ alɔbɔlɛ la a le kɛ, ɛdoavolɛma ne angɔ zo anzinza. Mɔɔ bɛhyele Gyisɛse la, asoo bɛhɔle zo bɛbetanle ɔ nwo anzɛɛ ɛzulolɛ hanle bɛ ɔmaanle bɛnriandile? Kɛmɔ ɛdoavolɛma ne angɔ zo anzinza la ati, debie mɔɔ bɛhanle kɛ bɛnrɛyɛ ye ɛlɛ la a bɛyɛle a—bɛkpole Gyisɛse.—Mat. 26:56. w24.07 14 ¶1-2

Adam nee Yive asa la ɛsie ahane a, eza bɛ nee bɛ Ze Gyihova agɔnwolɛvalɛ ne mɔɔ sonle bolɛ la zɛkyele. Kolaa na Adam nee Yive ayɛ ɛtane la, ɛnee bɛboka Nyamenle abusua ne anwo. (Luku 3:38) Noko mɔɔ bɛyɛle Gyihova anwo anzosesebɛ la, bɛyele bɛ bɛvile abusua ɛhye anu kolaa na bɛabɔ ɔ bo kɛ bɛwo mralɛ. (Gyn. 3:​23, 24; 4:1) Kɛ mɔɔ yɛle bɛ bo zo amra la ati, ɔwɔ kɛ bɛsiezie yɛ nee Gyihova avinli. (Wlo. 5:​10, 11) Wɔ adenle fofolɛ zo, ɔwɔ kɛ yɛ nee ye nyia agɔnwolɛvalɛ kpalɛ. Buluku bie hanle kɛ, Giliki edwɛkɛkpɔkɛ mɔɔ bɛhile ɔ bo “bɛziezie yɛ avinli” la kola kile kɛ “ɛ nee kpɔvolɛ bie fa agɔnwolɛ.” Mɔɔ ɔyɛ nwanwane la a le kɛ, Gyihova a limoale dudule nwolɛ agyakɛ kɛ ɔyɛ ɛhye a. Kɛzi ɔyɛle ye ɛ? Ɔluale mgbɔdalɛ ngyehyɛleɛ ne mɔɔ ɔyɛle amaa ɔ nee alesama mɔɔ ɛyɛ ɛtane la anyia agɔnwolɛvalɛ kpalɛ bieko la azo. Ɔyɛle ngyehyɛleɛ amaa yɛ sa aha mɔɔ Adam minlinle ye la bieko. Na debie mɔɔ ɔvale ɔduale nwolɛ kakɛ la noko bolɛ le kɛ mɔɔ vile Adam asa la pɛpɛɛpɛ. w25.02 3-4 ¶7-8

Ɛzoanvolɛ Pɔɔlo hanle kɛ, “ahwibɛnyunlu ɛhye mɔɔ menli dɔɔnwo ɛva ɛmaa sonla zɔhane la ɛyɛ boɛ.” (2 Kɔl. 2:​5-8) Wɔ adenle fofolɛ zo, nrenyia ne mɔɔ vale ye papa aye ne la nyianle ndeanlɛ ne azo nvasoɛ. (1 Kɔl. 5:1) Nvasoɛ boni ɔ? Ɔmaanle nrenyia ne nlunle ɔ nwo. (Hib. 12:11) Pɔɔlo hanle hilele asafo ne kɛ: “Ɔwɔ kɛ bɛfa bɛkyɛ ye bɔkɔɔ na bɛkyekye ɔ rɛle” na “bɛmaa ɔnwu ye kɛ amgba bɛkulo ye.” Yɛ ye nzonlɛ kɛ, tɛ mɔɔ ɛnee Pɔɔlo ɛlɛkile la a le kɛ bɛbalie nrenyia ne wɔ asafo ne anu ala. Ɛnee Pɔɔlo kulo kɛ eza bɛdua bɛ edwɛkɛ nee bɛ nyɛleɛ zo bɛkile kɛ bɛva bɛhyɛ ye na amgba bɛkulo ye. Ɛhye bamaa adiema nrenyia ne anwu ye kɛ bɛ nye ɛlie kɛ yezia yera asafo ne anu la. w24.08 15 ¶4; 16-17 ¶6-8

Ɛnee ɛzoanvolɛ Pɔɔlo bahola ava anwodozo aha mɔɔ ɔhyia kɛ awie yɛ amaa yeahola yeagyinla kpundii la. Ɔhakyele Kilisienema kɛ saa bɛgyi sɔnea ngakyile nloa a, ɔnle kɛ bɛfa bɛ nwo bɛto bɛ nwo zo, emomu ɔwɔ kɛ bɛfa bɛ nwo bɛto Gyihova anwo zo. Ɛnee Pɔɔlo kola fa akɛnrasesebɛ ka kɛ: “Gyihova le me boavolɛ; menrɛzulo.” (Hib. 13:6) Yɛ mediema bie mɔ gyi kpɔdekpɔdeyɛlɛ nloa kɛkala. Yɛbahola yɛayɛ asɔne yɛamaa bɛ yɛɛ ɔdwu mekɛ ne bie a yɛbava ninyɛne mɔɔ bɛhyia nwo la yɛamaa bɛ. Noko Baebolo ne ka ye wienyi kɛ “bɛdabɛ mɔɔ bɛkulo kɛ bɛfa nyamenlezonlenlɛ kpalɛ bɛbɔ bɛ ɛbɛla kɛ Kelaese Gyisɛse ɛdoavolɛma la amuala, bɛbayɛ bɛdabɛ noko kpɔdekpɔde.” (2 Tim. 3:12) Ɛhye ati, ɔwɔ kɛ yɛ muala yɛsiezie yɛ nwo yɛmaa mɔɔ la yɛ nyunlu la. Maa yɛhɔ zo yɛva yɛ nwo yɛdo Gyihova anwo zo bɔkɔɔ na yɛlie yɛli kɛ ɔbaboa yɛ yeamaa yɛagyinla sɔnea biala anloa. Wɔ mekɛ kpalɛ nu, ɔbamaa ye azonvolɛ nɔhavoma amuala anwo adɔ bɛ.—2 Tɛs. 1:​7, 8. w24.09 13 ¶17-18

Duzu a boale Kɔlentema ɔmaanle bɛzɔnenle bɛ a? (2 Kɔl. 10:​4, 5) Nyamenle Edwɛkɛ ne nee sunsum nwuanzanwuanza ne a boale bɛ ɔmaanle bɛyɛle nzenzaleɛ mgbole wɔ bɛ ɛbɛlabɔlɛ nu a. (Hib. 4:12) Kɔlentema mɔɔ liele Gyisɛse anwo edwɛkpa ne dole nu la holale gyakyile subane nee nyɛleɛ ɛtane mɔɔ bie a le nzabolɛ, awuleyɛlɛ nee mrenyia mɔɔ fa bɛ gɔnwo mɔ mrenyia la. (1 Kɔl. 6:​9-11) Yɛ ye nzonlɛ kɛ ɛnee Kɔlentema bie mɔ lɛ subane mɔɔ ɛsosɔ ndinli wɔ bɛ nu mɔɔ ɔwɔ kɛ bɛgyakyi ɛdeɛ, noko yeamba bɛ adwenle nu ɛlɛ kɛ ɔbayɛ se somaa yeamaa bɛ kɛ bɛbahola bɛayɛ Kilisienema. Bɛbɔle mɔdenle ɛsesebɛ amaa bɛahola bɛava adenle ɛdenraa ne mɔɔ kɔ dahuu ngoane nu la azo. (Mat. 7:​13, 14) Ɔnla aze ɔmmaa wɔ kɛ ɛbali subane anzɛɛ nyɛleɛ ɛtane bie azo amaa wɔafɛta ɛzɔnenlɛ ɔ? Mmamaa ɛ sa nu to! Sɛlɛ Gyihova kɛ ɔva ye sunsum nwuanzanwuanza ne ɔboa wɔ amaa wɔakpo debie biala mɔɔ ɔnle kpalɛ la. w25.03 6 ¶15-17

Gyihova ɛbɔ ɛwɔkɛ kɛ ɔbamaa yɛ nrɛlɛbɛ amaa yɛanwu kɛ saa kpɔkɛ bie mɔɔ yɛlɛsi la bazɔ ɔ nye a. “Ɔfi atiakunlukɛnlɛma nu ɔmaa menli kɔsɔɔti” nrɛlɛbɛ zɛhae mɔɔ “ɔnva nwolɛ ɛya” a. Saa ɛyɛ asɔne ɛsɛlɛ Gyihova kɛ ɔhile wɔ adenle a, tie mualɛ mɔɔ ɔbava yeamaa wɔ la kpalɛ. Kɛ neazo la: Saa ɛlɛtu adenle na ɛminli a, bie a ɛbabiza ekulomeni bie wɔamaa yeaboa wɔ. Noko saa ahenle ɛtɛmaanle wɔ mualɛ a, asoo ɛbavi ɔ nwo ɛkɛ ne wɔahɔ? Kyɛkyɛ. Ɛbadie adehilelɛ mɔɔ ɔbava yeamaa wɔ la kpalɛ. Zɔhane ala a saa ɛsɛlɛ Gyihova kɛ ɔmaa wɔ nrɛlɛbɛ a, bɔ mɔdenle kɛ ɛbanwu mualɛ ne, ɔlua Baebolo ne anu mɛla nee ngyinlazo ngakyile mɔɔ fale wɔ tɛnlabelɛ ne anwo mɔɔ ɛbanwu ye la azo. Kɛ neazo la, saa ɛlɛsi kpɔkɛ kɛ ɛbahɔ gyimalilɛ bie abo anzɛɛ ɛnrɛhɔ a, ɛbahola wɔazuzu mɔɔ Baebolo ne ka ye wɔ anyelielɛ mgbane mgbane, agɔnwolɛ ɛtane nee kɛzi ɔhyia kɛ yɛbava Belemgbunlililɛ ne yɛalimoa ninyɛne mɔɔ yɛkulo la anyunlu la anwo.—Mat. 6:33; Wlo. 13:13; 1 Kɔl. 15:33. w25.01 16 ¶6-7

Ayezaya ngapezo ne maa yɛnwu ngakyile kpole mɔɔ wɔ kɛzi bɛdabɛ mɔɔ bɛwɔ sunsum nu paladaese ne anu la asetɛnla de nee kɛzi bɛdabɛ mɔɔ bɛnle nu la ɛdeɛ ne de anu la. Gyihova fa sunsum nu ninyɛne mɔɔ ye azonvolɛ hyia amaa bɛahola bɛazonle ye la molozo maa bɛ. Yeva ye sunsum nwuanzanwuanza ne, ye Edwɛkɛ ne yɛɛ sunsum nu aleɛ ngakyile yemaa yɛ amaa yɛahola ‘yɛali debie, yɛanlo nzule, na yɛali fɛlɛko.’ (Fa toto Yekile 22:17 anwo.) Noko ‘ɛhɔne nee nzuhɔne’ ku menli mɔɔ bɛnle sunsum nu paladaese ne anu la yɛɛ ‘bɛbɔ anyiemgba.’ Bɛnnyia sunsum nu aleɛ bɛnli. (Emɔso 8:11) Gyihova fi atiakunlukɛnlɛma nu fa ninyɛne mɔɔ Ye menli hyia nwo, mɔɔ sunsum nu aleɛ boka nwo la maa bɛ. (Dww. 2:​21-24) Ɔdua Baebolo ne nee yɛ mbuluku mɔɔ gyi Baebolo ne azo, yɛ wɛbsaete ne, yɛ debiezukoalɛ ne mɔ nee nyianu ngakyile ne mɔ azo a ɔyɛ zɔ a. Yɛkola yɛdi sunsum nu aleɛ ɛhye mɔ kenle ko biala, na ɛhye ati, yɛte kpɔkɛ wɔ sunsum nu yɛɛ yɛ nwo tɔ yɛ. w24.04 21 ¶5-6

Saa ɛkulo kɛ ɛ nee awie tu a, ɛbahola wɔayɛ ngyehyɛleɛ ɛ nee ye ayia wɔ ɛleka mɔɔ menli dɔɔnwo wɔ la amaa bɛabɔ adawu anzɛɛ ɛbavɛlɛ ye wɔ fonu zo. Maa ahenle ɛnwu adwenle mɔɔ ɛlɛ la wienyi. (1 Kɔl. 14:9) Saa nwolɛ bahyia a, maa ahenle mekɛ maa ɔva ɔdwenle mualɛ mɔɔ ɔbava yeamaa wɔ la anwo. (Mrɛ. 15:28) Yɛɛ saa ahenle anye ɛnlie nwo kɛ ɔ nee wɔ badu a, te ye edwɛkɛ bo. Na saa awie ka kile wɔ kɛ ɔkulo wɔ ɛ? Bie a ɛnee ɔhyia akɛnrasesebɛ kpalɛ na ahenle ahola aha ahile wɔ, ɔti da ɛbulɛ ali kile ye. Saa ɛhyia mekɛ mɔɔ ɛfa wɔazuzu nwo wɔanlea kɛ ɛ nee ye badu anzɛɛ ɛ nee ye ɛnrɛdu a, ka kile ye. Noko bɔ mɔdenle kɛ ɛnrɛmaa mualɛ ne ɛnrɛhyɛ. (Mrɛ. 13:12) Saa ɛ nye die nwo a, ɛ nee ye ɛzuzu kɛzi ɛte nganeɛ nee mɔɔ ɛ nye la ye ade wɔ bɛ ɛdulɛ ne anu la anwo. Bie a mɔɔ ɛ nye la ye ade la le ngakyile fi mɔɔ ahenle anye la ye ade la anwo. w24.05 23-24 ¶12-13

Mɔɔ ɔbayɛ kɛ ɛnee Devidi tɛde kakula la, ɔhɔle Yizilayɛ sogyama azokoɛleɛ. Ɔnwunle kɛ sogyama ne ahonle ɛdu kpalɛ ɔluakɛ ɛnee Filisitianli kakanyinli bie mɔɔ bɛfɛlɛ ye Golayate la ɛra kɛ ɔbagolo “Yizilayɛma mɔɔ ɛra baho la anwo.” (1 Sa. 17:​10, 11) Kɛmɔ sogyama ne vale bɛ adwenle ziele kakanyinli ne nee ye agolobɛnwo ne azo la ati a ɔmaanle ɛzulolɛ hanle bɛ a. (1 Sa. 17:​24, 25) Noko Devidi vale ye adwenle ziele debie gyɛne zo. Ɔnwunle kɛ tɛ Yizilayɛ sogyama ne angomekye a ɛnee Golayate ɛlɛgolo bɛ nwo a, emomu ɛnee ɔlɛgolo “tease Nyamenle ne ɛlɔne mɔɔ ɛra baho la anwo.” (1 Sa. 17:26) Ɛnee Gyihova a Devidi ɛlɛdwenle ɔ nwo kpalɛ a. Devidi nyianle anwodozo kɛ Nyamenle ne mɔɔ boale ye wɔ mekɛ mɔɔ ɛnee ɔle mboaneneavolɛ la baboa ye bieko wɔ tɛnlabelɛ ɛhye anu. Kɛmɔ ɛnee ɔze ye wienyi kɛ Nyamenle boka ɔ nwo la ati, ɔ nee Golayate hɔhonle na ɔlile konim—1 Sa. 17:​45-51. w24.06 21 ¶7

Dwenle kɛzi yɛnzonle Gyihova a anrɛɛ yɛ ɛbɛlabɔlɛ bayɛ la anwo. Saa yɛyɛ ye zɔ a, ɔbamaa yɛahɔ zo yɛali nɔhalɛ na yɛaha edwɛkɛ ɛhye mɔɔ edwɛndolɛnli ne hanle la bie: “Noko mame, Nyamenle mɔɔ mebikye ye la le kpalɛ maa me.” (Edw. 73:28) Kɛmɔ yɛrayɛ “tease nee nɔhalɛ Nyamenle ne ngɛkɛlɛ” la ati, yɛbahola yɛagyinla ngyegyelɛ biala mɔɔ yɛbayia ye wɔ awieleɛ mekɛ ɛhye anu la anloa. (1 Tɛs. 1:9) Yɛ Nyamenle ne le Awie mɔɔ ɔwɔ ɛkɛ ne amgba mɔɔ ɔboa bɛdabɛ mɔɔ bɛsonle ye la a. Ɔ nee ye azonvolɛ luale wɔ tete ne yɛɛ ɛnɛ noko ɔ nee yɛ lua. Ɔnrɛhyɛ, anwongyelelɛ kpole mɔɔ tɛla biala la bara azɛlɛ ye azo. Noko Gyihova baboa yɛ. Ɔrɛla ye kɛ yɛ muala yɛbanyia “akɛnrasesebɛ kpole na yɛaha kɛ: ‘Gyihova le me boavolɛ; menrɛzulo.’”—Hib. 13:​5, 6. w24.06 25 ¶17-18

Baebolo ne bobɔ mrenyia mɔɔ bo 40 mɔɔ bɛlile belemgbunli wɔ Yizilayɛ la aluma. Arelemgbunli mgbalɛ mɔɔ wɔ nu bɔbɔ la yɛle ninyɛndane bie mɔ. Suzu belemgbunli kpalɛ Devidi anwo. Gyihova hanle kɛ: ‘Me sonvolɛ Devidi vale ye ahonle muala ɔ nee me luale na ɔyɛle mɔɔ le kpalɛ wɔ me nye zo la.’ (1 Arl. 14:8) Noko zɔhane nrenyia ne nee raalɛ bie mɔɔ bɛgya ye la bɔle adwɔmane ɛbɛla na ɔbɔle adwenle ɔmaanle bɛhunle raalɛ ne ahu ne wɔ konle nu. (2 Sa. 11:​4, 14, 15) Bieko, arelemgbunli mɔɔ bɛanli nɔhalɛ la anu dɔɔnwo yɛle ninyɛne mgbalɛ bie mɔ. Fa Rilihɔbowam kɛ neazo. Wɔ Gyihova anye zo, “ɔyɛle ɛtane.” (2 Ek. 12:14) Noko mɔɔ Nyamenle hanle hilele Rilihɔbowam kɛ ɔmaa Yizilayɛ mbusua bulu ne ɛde bɛ nwo ɛvi ye belemgbunlililɛ ne anwo la, ɔdiele. Eza ɔliele azuamgbole mɔɔ wɔ ye maanle ne anu la anwo bane amaa yeabɔ Gyihova menli ne anwo bane. (1 Arl. 12:​21-24; 2 Ek. 11:​5-12) Duzu a ɛnee Gyihova gyinla zo bu belemgbunli bie kɛ ɔdi nɔhalɛ anzɛɛ ɔnli nɔhalɛ wɔ Ɔ nye zo a? Ɔnleɛnle mɔɔ wɔ bɛ ahonle nu, kɛzi bɛnlunle bɛ nwo nee kɛzi bɛbetanle nɔhalɛ ɛzonlenlɛ nwo la. w24.07 20 ¶1-3

Na ngakula mɔɔ bɛzɔne bɛ—bɛdabɛ mɔɔ bɛtɛdile ɛvolɛ 18—mɔɔ bɛbayɛ ɛtane kpole la noko ɛ? Mgbanyima eku ne bayɛ ngyehyɛleɛ bɛamaa mgbanyima nwiɔ ayia kakula ne nee ye Kilisiene awovolɛ. Mgbanyima ne mɔ babiza awovolɛ ne mɔ ninyɛne mɔɔ bɛlimoa bɛyɛ bɛboa bɛ ra ne amaa yeanlu ɔ nwo la. Saa kakula ne ɛlɛda subane kpalɛ ali na awovolɛ ne mɔ ɛlɛboa ye bɛamaa yeanlu ɔ nwo a, bie a mgbanyima nwiɔ ne bazi kpɔkɛ kɛ ɔngyia kɛ bɛbamaa kɔmatii ayia ye nee ye awovolɛ. Ɔluakɛ mgbanyima ne mɔ ze kɛ Gyihova ɛmaa awovolɛ ɛnwu kɛ ɔle bɛ ɛzonlelilɛ kɛ bɛbavi ɛlɔlɛ nu bɛadenrɛdenrɛ bɛ mra. (Dit. 6:​6, 7; Mrɛ. 6:20; 22:6; Ɛfɛ. 6:​2-4) Ɛhye anzi, ɔyɛ a mgbanyima ne mɔ banlea kɛ saa awovolɛ ne mɔ ɛlɛfa moalɛ mɔɔ kakula ne hyia la amaa ye a. Na saa kakula mɔɔ bɛzɔne ye la kɔ zo yɛ ɛtane kpole na ɔnnu ɔ nwo ɛ? Yemɔ mgbanyima nsa bayia ye nee ye awovolɛ. w24.08 24 ¶18

Yɛ muala yɛze kɛ saa awie kyɛ yɛ debie a ɔmaa yɛ nye die. Noko saa yɛdayɛ mumua ne yɛkyɛ awie debie a, yemɔ ɔmaa yɛ nye die kpalɛ. Kɛmɔ Gyihova bɔle yɛ wɔ adenle ɛhye azo la ati, ɔmaa yɛnyia nwolɛ adenle yɛyɛ ninyɛne mɔɔ maa yɛ nye die la. Saa yɛdwenle ndenle ngakyile mɔɔ yɛbahola yɛalua zo yɛahyɛ awie mɔ debie la anwo na yɛkyɛ bɛ debie a, ɔmaa yɛ nye die. Asoo ɔnyɛ nwanwane kɛ Gyihova bɔle yɛ wɔ adenle ɛhye azo la ɔ? (Edw. 139:14) Ngɛlɛlera ne maa yɛnwu kɛ yɛkyɛ debie a ɔmaa yɛ nye die ɔti ɔnyɛ nwanwane kɛ Baebolo ne ka kɛ Gyihova le “anyelielɛ Nyamenle ne” la. (1 Tim. 1:11) Ɔdaye a ɔlimoale ɔhyɛle debie a yɛɛ awie ɛngyɛ debie ɛndɛla ye. Kɛ mɔɔ ɛzoanvolɛ Pɔɔlo hanle la, “ɔlua ɔ nwo zo a yɛlɛ ngoane na yɛkɔ yɛba na yɛwɔ ɛkɛ a.” (Gyi. 17:28) Nɔhalɛ nu, “ahyɛlɛdeɛ kpalɛ biala nee ɛlolɛdeɛ biala mɔɔ di munli la” vi Gyihova ɛkɛ. (Gye. 1:17) Bie a yɛ muala yɛkulo kɛ yɛnwu kɛzi yɛkyɛ debie a ɔmaa yɛ nye die kpole la. Yɛbahola yɛayɛ ye zɔ saa yɛsukoa Gyihova ahunlunyele ne a.—Ɛfɛ. 5:1. w24.09 26 ¶1-4

Saa azonvolɛ bie mɔ nea subane ngakyile mɔɔ ɔwɔ kɛ awie nyia na yeafɛta kɛ kpanyinli la a, bie a bɛbade nganeɛ kɛ bɛnrɛfɛta ɛlɛ. Noko kakye kɛ Gyihova nee ye ahyehyɛdeɛ ne anye ɛnla kɛ ɛbanyia subane ɛhye mɔ amuala pɛpɛɛpɛ. (1 Pita 2:21) Yɛɛ Gyihova sunsum ne mɔɔ tumi kpole wɔ nu la a baboa wɔ yeamaa wɔanyia subane ɛhye mɔ a. (Fel. 2:13) Subane fɔɔnwo bie wɔ ɛkɛ mɔɔ ɛkulo kɛ ɛnyia anyuhɔlɛ wɔ nu ɔ? Fa nwolɛ asɔneyɛlɛ to Gyihova anyunlu. Yɛ zɔhane subane ne anwo neɛnleanu, na biza mgbanyima ne mɔ bie ninyɛne mɔɔ ɛyɛ a ɛbanyia anyuhɔlɛ la. Kɔ zo yɛ ninyɛne mɔɔ bamaa wɔafɛta kɛ kpanyinli la! Sɛlɛ Gyihova kɛ ɔtete wɔ ɔmaa ɛhola ɛzonle ye na ɛboa asafo ne. (Aye. 64:8) Gyihova ɛyila wɔ wɔ mɔdenle mɔɔ ɛlɛbɔ kɛ ɛbafɛta kɛ kpanyinli la azo. w24.11 25 ¶17-18

Ɔnle kɛ yɛ nuhua ko biala te nganeɛ kɛ kɛmɔ yeva ɛvolɛ dɔɔnwo yezonle Gyihova la ati, ɔwɔ kɛ Gyihova se ye anwunvɔne. Nɔhalɛ nu, Gyihova anye sɔ mekɛ tendenle mɔɔ yɛva yɛli nɔhalɛ yɛmaa ye la. Ɔvale ɔ Ra ne ɔmaanle kɛ ahyɛlɛdeɛ ala, tɛ kɛ yɛ gyima mɔɔ yɛyɛ yɛmaa ye la anwo ahatualɛ. Saa yɛka kɛ kɛmɔ yɛyɛ ninyɛne dɔɔnwo yɛmaa Gyihova la ati, ɔwɔ kɛ ɔse yɛ anwunvɔne a, ɛnee yɛlɛka kɛ Kelaese ewule ne azo ɛnlɛ nvasoɛ. (Fa toto Galeehyeama 2:21 anwo.) Ɛnee Pɔɔlo ze kɛ tɛ ninyɛne dɔɔnwo mɔɔ ɔbayɛ la a bamaa yeahola yeanyia Nyamenle anyunlu ɛlolɛ a. Ɛnee akee, duzu ati a ɔyɛle gyima ɛsesebɛ wɔ Gyihova ɛzonlenlɛ nu a? Yeanyɛ kɛ ɔfa yeahile kɛ ɔwɔ kɛ Gyihova se ye anwunvɔne, emomu, ɔyɛle ɔvale ɔhilele kɛ ɔ nye sɔ Gyihova ɛlolɛ kpole ne. (Ɛfɛ. 3:7) Yɛkɔ zo yɛfa mɔdenlebɔlɛ yɛsonle Gyihova kɛ mɔɔ Pɔɔlo yɛle la, tɛ kɛ yemɔ bamaa Gyihova aze yɛ anwunvɔne la ati ɔ, emomu yɛfa yɛda yɛ anyezɔlɛ ali. w25.01 27 ¶5-6