MAA BƐYƐ ƐDOAVOLƐMA
ƐZUKOALƐDEƐ 10
Bɔ Kpɔkɛ
Ngyinlazo: “Yɛbɔle kpɔkɛ kɛ yɛnrɛva Nyamenle edwɛkpa ne angome yɛnrɛmaa bɛ, emomu yɛbava yɛ nwo noko yɛamaa bɛ, ɔluakɛ bɛrayɛle yɛ alɔvolɛ.” —1 Tɛs. 2:8.
Mɔɔ Gyisɛse Yɛle La
1. Nea VIDIO ne, anzɛɛ kenga Dwɔn 3:1, 2. Akee suzu kpuya ɛhye mɔ anwo:
Ɛnea a duzu ati a Nekɔdimɛse hɔle Gyisɛse ɛkɛ ne nɔsolɛ nu a?—Nea Dwɔn 12:42, 43.
Kɛzi Nekɔdimɛse mɔɔ ɔ nee ye yiale nɔsolɛ nu la kile kɛ ɛnee Gyisɛse ɛbɔ kpɔkɛ kɛ ɔmaa yeayɛ ɛdoavolɛ ɛ?
Duzu A Yɛsukoa Yɛfi Gyisɛse Ɛkɛ A?
2. Kɛmɔ yɛkulo menli la ati yɛbɔ kpɔkɛ kɛ yɛbaboa bɛ yɛamaa bɛayɛ ɛdoavolɛma.
Sukoa Gyisɛse
3. Ɛ nee wɔ Baebolo sukoavo ne ɛzukoa wɔ mekɛ nee ɛleka mɔɔ baboa ye la. Bie a ɔbahulo kenle fɔɔnwo bie wɔ dapɛne ne anu anzɛɛ mekɛ fɔɔnwo bie wɔ alehyenlɛ ne anu. Asoo ɔ nye balie nwo kɛ ɔbazukoa debie wɔ ye gyima nu, ye sua nu anzɛɛ ɛleka gyɛne ɔ? Saa ɔkɛyɛ boɛ a, ɛ nee ye ɛzukoa wɔ ɛleka nee mekɛ mɔɔ baboa ye kpalɛ la.
4. Bɛzukoa dahuu. Saa ɛbadu adenle a, mmagyakyi debiezukoalɛ ne. Emomu, nea kɛ:
a. Ɛbahola wɔayɛ debiezukoalɛ ne wɔ mekɛ gyɛne nu wɔ dapɛne ne anu ɔ?
b. Ɛbahola wɔalua fonu anzɛɛ videoconference zo wɔayɛ debiezukoalɛ ne ɔ?
d. Ɛbahola wɔamaa nolobɔlɛnli gyɛne ayɛ debiezukoalɛ ne ɔ?
5. Yɛ asɔne kɛ ɛbanyia subane kpalɛ. Saa wɔ sukoavo ne debiezukoalɛ ne ɛngɔ zo dahuu anzɛɛ ɔnva mɔɔ ɔlɛsukoa la ɔnyɛ gyima kpalɛ bɔbɔ a, sɛlɛ Gyihova kɛ ɔboa wɔ ɔmaa ɛhɔ zo ɛboa ye. (Fel. 2:13) Bie a wɔ sukoavo ne lɛ subane mgbalɛ dɔɔnwo; sɛlɛ moalɛ mɔɔ bamaa wɔava wɔ adwenle wɔazie yemɔ azo la.