Edwɛkɛ Mɔɔ li Amozi Mɔɔ Bɛ Nee Menli Mɔɔ Kulo Kɛ Bɛsɔne Bɛ Suzu Nwolɛ La

Gyihova Alasevolɛ maangyebakyi nee maanzinli nyianu bo a bɛsɔne menli a. Wɔ ɛzɔnenlɛ ɛdendɛlɛ ne awieleɛ, tendɛvolɛ ne maa menli mɔɔ kulo kɛ bɛsɔne bɛ la dwazo na bɛfa ɛnelɛ kpole mɔɔ nuhua la ɛkɛ ne la bɛye kpuya nwiɔ ɛhye mɔ anloa:

1. Asoo wɔnlu ɛ nwo wɔvi wɔ ɛtane nwo, wɔyila ɛ nwo zo wɔmaa Gyihova na wɔlie wɔdo nu kɛ ɔbalua Gyisɛse Kelaese anwo zo a yealie wɔ ngoane ɔ?

2. Asoo ɛte ɔ bo kɛ wɔ ɛzɔnenlɛ ne da ye ali kɛ ɛle Gyihova Alasevolɛ ne mɔ mɔɔ nee Gyihova ahyehyɛdeɛ ne a tu la anu ko ɔ?

Mualɛ ngɛnlɛma mɔɔ menli mɔɔ kulo kɛ bɛsɔne bɛ fa ye kpuya ɛhye mɔ anloa la kile diedi mɔɔ bɛlɛ ye wɔ ɛkpɔnedeɛ ne anu mɔɔ ‘bɛka ye bɛ nloa’ wɔ bagua nu la na eza ɔkile kɛ bɛyila bɛ nwo zo bɔkɔɔ bɛmaa Gyihova. (Wlo. 10:9, 10) Ɛhye ati, menli mɔɔ kulo kɛ bɛsɔne bɛ la bahulo kɛ bɛkɛlimoa bɛkɛva asɔneyɛlɛ bɛkɛzuzu kpuya ɛhye mɔ anwo amaa bɛavi bɛ ahonle nu bɛaye ɔ nloa.

Asoo wɔyila ɛ nwo zo wɔmaa Gyihova wɔ asɔneyɛlɛ nu, na wɔbɔ ɛwɔkɛ kɛ ɛbazonle ɔ ngomekye ala na wɔamaa ye ɛhulolɛdeɛ ɛyɛlɛ nwo ahyia wɔ kpalɛ wɔ wɔ ɛbɛlabɔlɛ nu ɔ?

Akee wɔde ɔ bo bɔkɔɔ mɔɔ saa ɛnyia nwolɛ adenle ne a ɛbamaa bɛazɔne wɔ ɔ?

Tɛladeɛ boni a fɛta maa ɛzɔnenlɛ a? (1 Tim. 2:9, 10; Dwɔn 15:19; Fel. 1:10)

Ɔwɔ kɛ yɛfa “mɛlɛbɛnwoaze nee adwenle mɔɔ anu la ɛkɛ la” yɛwula adɛladeɛ amaa yɛahile kɛ ‘yɛsonle Nyamenle.’ Yemɔti, ɔnle kɛ bɛdabɛ mɔɔ bɛmaa bɛazɔne bɛ la wula azulebialɛ tɛladeɛ mɔɔ maa bɛ nwo gua ɛkɛ anzɛɛ tɛladeɛ mɔɔ bɛhɛlɛhɛlɛ nu anzɛɛ bɛdɔlɔdɔlɔ nu la. Ɔwɔ kɛ tɛladeɛ mɔɔ bɛbawula la anye te, ɔle bɔkɔbɔkɔ, ɔle kpalɛ na ɔfɛta ɔmaa gyimalilɛ ne.

Saa bɛlɛsɔne awie a kɛzi ɔwɔ kɛ ɔyɛ ye nyɛleɛ ɛ? (Luku 3:21, 22)

Gyisɛse ɛzɔnenlɛ ne le neazo maa Kilisienema ɛnɛ. Ɛnee ɔze kɛ ɛzɔnenlɛ le debie mɔɔ anwo hyia na ɛhye lale ali wɔ ye nyɛleɛ nu. Ɛhye ati, ɔnle kɛ bɛka ɛzelekɛ, bɛdi nwɔhoa, bɛbia azule anzɛɛ bɛyɛ nyɛleɛ biala mɔɔ bahwe adwenle avi kɛzi zɔhane mekɛ ne anwo hyia la azo a; yɛɛ ɔnle kɛ Kilisienenli mɔɔ bɛzɔne ye fofolɛ la memaa ɔ sa zo anzɛɛ wuluwulu kɛ asɛɛ yeli konim kpole bie la. Ɛzɔnenlɛ le anyelielɛ mekɛ ɛdeɛ, noko ɔwɔ kɛ bɛda zɔhane anyelielɛ ne ali wɔ enililɛ nu.

Kɛzi debiezukoalɛ mɔɔ ɛbahɔ ye dahuu nee asafo ne mɔɔ ɛ nee ye badu la baboa wɔ amaa wɔali ɛ nwo zo mɔɔ wɔyila wɔmaa Gyihova la anwo gyima ɛ?

Saa bɛsɔne wɔ bɛwie a, duzu ati a ɔhyia kɛ ɛyɛ ngyehyɛleɛ ɛsukoa debie na ɛkɔ daselɛlilɛ dahuu ɛ?

ADEHILELƐ MAA ASAFO NU MGBANYIMA

Saa nolobɔlɛnli bie mɔɔ bɛtɛsɔnenle ye la kulo kɛ bɛsɔne ye a, ɔwɔ kɛ bɛmaa ye anwosesebɛ bɛmaa ɔsia ɔneɛnlea “Kpuya Mɔɔ Bɛbizebiza Menli Mɔɔ Kulo Kɛ Bɛsɔne Bɛ La” anu kpalɛ. Ɔwɔ mukelɛ 185-207. Ɔwɔ kɛ bɛtwe ye adwenle bɛkɔ “Nolobɔlɛnli Mɔɔ Bɛtɛsɔnenle Ye La Nrɛlaleɛ” ne azo. Ɔbɔ ɔ bo wɔ mukelɛ 182, na ɔkilehile kɛzi ɔbahola yeaziezie ɔ nwo na ɔ nee mgbanyima ne mɔ ayia la anu. Kɛ mɔɔ bɛhilehile nu wɔ ɛkɛ ne la, ɔbahola yeanlea mɔɔ yehɛlɛ la azo yɛɛ ɔbahola yeanlea buluku ne anu wɔ mekɛ mɔɔ bɛlɛsuzu nwolɛ la. Noko, nwolɛ ɛngyia kɛ awie nee ye bazuzu kpuya ne mɔ anwo kolaa na ɔ nee mgbanyima ne mɔ ayia.

Ɔwɔ kɛ awie biala mɔɔ ɔkulo kɛ bɛsɔne ye la ka nwolɛ edwɛkɛ kile mgbanyima avinli ngitanwodivolɛ ne. Saa ahenle mɔɔ kulo kɛ bɛsɔne ye la nyia mekɛ kenga “Kpuya Mɔɔ Bɛbizebiza Menli Mɔɔ Kulo Kɛ Bɛsɔne Bɛ La” wie a, mgbanyima avinli ngitanwodivolɛ ne babiza ye saa yelua asɔneyɛlɛ zo yɛyila ɔ nwo zo yemaa Gyihova kɛ ɔbayɛ Ye ɛhulolɛdeɛ a. Saa ahenle ɛyila ɔ nwo zo ɛwie a, akee mgbanyima avinli ngitanwodivolɛ ne bayɛ ngyehyɛleɛ yeamaa mgbanyima ne mɔ anu nwiɔ nee ye azuzu “Kpuya Mɔɔ Bɛbizebiza Menli Mɔɔ Kulo Kɛ Bɛsɔne Bɛ La” anwo. Ɔwɔ kɛ bɛmaa kpanyinli gyɛne di foa nwiɔ ne anu ko biala anwo gyima. Ɔngyia kɛ bɛkendɛ too bɛbɔ maangyebakyi anzɛɛ maanzinli nyianu nwo nolo kolaa na bɛ nee bɛ azuzu nwo.

Bɛbahola bɛahyɛ foa nwiɔ ne mɔ anu nwiɔ na bɛava dɔnehwele ko bɛali ko biala anwo gyima, noko saa ɔhyia kɛ bɛfa mekɛ dɔɔnwo bɛdi nuhua bie anwo gyima a debie biala ɛngola ɛnzi bɛ adenle. Ɔwɔ kɛ bɛfa asɔneyɛlɛ bɛbɔ ko biala abo na eza bɛfa bɛwie. Saa bɛlɛsuzu kpuya ne mɔ anwo a, ɔnle kɛ ahenle mɔɔ kulo kɛ bɛsɔne ye la anzɛɛ mgbanyima ne mɔ maa bɛ nwo pele bɛ. Ɔwɔ kɛ mgbanyima mɔɔ bɛbava bɛawula bɛ sa la maa ɛhye dimoa wɔ bɛ ngyehyɛleɛ nu.

Ɔle kpalɛ kɛ bɛ nee menli mɔɔ kulo kɛ bɛsɔne bɛ la anu ko biala bɛazuzu edwɛkɛ ne anwo, ɔnle kɛ bɛfa menli dɔɔnwo bɛbɔ nu. Saa mgbanyima ne mɔ maa ɔye kpuya ko biala anloa a, ɔbamaa bɛanwu ye kpalɛ saa amgba ɔfɛta ɔmaa ɛzɔnenlɛ a. Bieko, ɛhye bamaa ahenle mɔɔ kulo bɛ bɛsɔne ye la ahola adendɛ. Kunli nee yelɛ bahola abɔ nu ayɛ.

Saa ɔle adiema raalɛ a, ɔwɔ kɛ bɛyɛ ye wɔ ɛleka mɔɔ menli bɛanwu bɛ noko bɛnrɛde mɔɔ bɛlɛsuzu nwo la. Saa ɔbahyia kɛ bɛfa awie ko bɛboka nwo a, ɔwɔ kɛ ahenle yɛ asafo nu kpanyinli anzɛɛ sonvolɛ. Ɛhye bagyinla foa ne mɔɔ bɛbazuzu nwo la azo kɛ mɔɔ bɛhilehile nu wɔ ɛdendɛkpunli ne mɔɔ doa zo la anu la.

Wɔ asafo mɔɔ mgbanyima anzo fee wɔ nu la anu, bɛkola bɛmaa asafo nu sonvolɛ mɔɔ ye adwenle nu la ɛkɛ anzɛɛ lɛ nwunu la nee ye suzu kpuya mɔɔ wɔ “Foa 1: Kilisienema Diedi” ne anu la anwo. Mgbanyima ala a ɔwɔ kɛ nee ye suzu “Foa 2: Kilisienema Ɛbɛlabɔlɛ” ne anwo a. Saa asafo ne ɛnlɛ mediema mrenyia mɔɔ fɛta la a, bie a bɛbaha bɛahile maangyebakyi zo neavolɛ ne bɛamaa yeanlea saa asafo mɔɔ bikye bɛ la bahola aboa a.

Saa ɔle kakula ekyi a ɔwɔ kɛ ye awovolɛ (ne mɔ) mɔɔ bɛle diedima la tɛnla nuhua bie. Saa awovolɛ (ne mɔ) ɛnrɛnyia adenle a, ɔbagyinla foa ne mɔɔ bɛ nee ye ɛlɛsuzu nwolɛ la azo, (ɔwɔ kɛ mgbanyima nwiɔ anzɛɛ kpanyinli ko nee sonvolɛ ko) nee ye suzu foa biala anwo.

Mgbanyima ne mɔ banlea anwu ye kɛ awie mɔɔ kulo kɛ bɛsɔne ye la ɛnyia mɔlebɛbo Baebolo ngilehilelɛ ne anwo ndelebɛbo mɔɔ fɛta la. Bieko, bɛbahulo kɛ bɛnwu ye saa nɔhalɛ ne sonle bolɛ maa ye na ɔbu Gyihova ahyehyɛdeɛ ne kpalɛ a. Saa ahenle ɛnde mɔlebɛbo Baebolo ngilehilelɛ ne mɔ abo a, mgbanyima ne mɔ bayɛ ngyehyɛleɛ amaa yeanyia moalɛ mɔɔ bamaa yeafɛta yeamaa ɛzɔnenlɛ nzinlii la. Ɔbahyia kɛ bɛmaa bie mɔ mekɛ dɔɔnwo amaa bɛahile kɛ daselɛlilɛ sonle bolɛ maa bɛ anzɛɛ amaa bɛabɛlɛ bɛ nwo aze bɛamaa ahyehyɛdeɛ ne anu ngyehyɛleɛ ne mɔ. Ɔwɔ kɛ mgbanyima ne mɔ nwu kɛzi bɛbava dɔnehwele ko anzɛɛ mɔɔ bo zɔ la bɛali gyima wɔ foa ko biala anu la, amaa bɛanwu ye bɔkɔɔ saa ahenle ɛziezie ɔ nwo ɛmaa ɛzɔnenlɛ a. Ɔwɔ nuhua kɛ bɛbahola bɛali mekɛ dɔɔnwo wɔ kpuya bie mɔ anwo bɛadɛla bie mɔ ɛdeɛ, noko akee ɔwɔ kɛ bɛsuzu kpuya ne mɔ kɔsɔɔti anwo.

Saa bɛwie foa ne mɔɔ tɔ zo nwiɔ la a, mgbanyima ne mɔ mɔɔ bɛyele bɛ la bayia na bɛazi kpɔkɛ saa ɔwɔ kɛ bɛsɔne ye anzɛɛ ɔnle kɛ bɛsɔne ye a. Mgbanyima ne mɔ bazuzu awie ko biala ndetelɛ, ye mɔdenlebɔlɛ nee ye tɛnlabelɛ nwo. Yɛkulo kɛ yɛnwu kɛ bɛ nee Gyihova lɛ agɔnwolɛvalɛ yɛɛ bɛte Baebolo nu ngilehilelɛ mɔɔ anwo hyia la abo. Ɔlua ɛlɔlɛ nu mɔɔ bɛbavi bɛaboa bɛ la azo, menli mɔɔ kulo kɛ bɛsɔne bɛ la bɛanyia moalɛ na bɛava bɛ nwo bɛawula ɛzonlenlɛ gyima ne mɔɔ anwo hyia mɔɔ bɛziezie bɛ bɔkɔɔ kɛ bɛyɛ la anu.

Ɛhye anzi, ɔwɔ kɛ mgbanyima ne mɔ mɔɔ bɛyele bɛ la anu ko anzɛɛ bɛ mu nwiɔ nee ye yia na bɛmaa ɔte kɛ ɔfɛta kɛ bɛsɔne ye anzɛɛ ɔnfɛta. Saa ɔfɛta a ɔwɔ kɛ mgbanyima ne mɔ nee ye suzu “Edwɛkɛ Mɔɔ li Amozi Mɔɔ Bɛ Nee Menli Mɔɔ Kulo Kɛ Bɛsɔne Bɛ Suzu Nwolɛ La” anwo. Ɔwɔ mukelɛ 206-207. Saa ahenle ɛtɛsukoale Nyia Anyelielɛ Dahuu! buluku ne ɛtɛwiele a, ɔwɔ kɛ mgbanyima ne mɔ maa ye anwosesebɛ kɛ ɔdoa zo wɔ ye ɛzɔnenlɛ ne anzi. Bɛha bɛhile ye kɛ bɛbahɛlɛ kenle mɔɔ bɛbazɔne ye la wɔ ye Congregation’s Publisher Record ne azo. Bɛhakye ye kɛ mgbanyima ne mɔ die ɔ nwo edwɛkɛ ɛhye mɔ amaa ahyehyɛdeɛ ne ahɔ zo ali ɛzonlenlɛ nu ninyɛne mɔɔ Gyihova Alasevolɛ di nwolɛ gyima wɔ ewiade amuala la anwo gyima amaa yeava ɔ nwo yeawula sunsum nu gyimalilɛ nu na yeanyia sunsum nu moalɛ. Bieko, mgbanyima ne mɔ bɛahola ahakye nolobɔlɛma fofolɛ kɛ bɛfa awie biala anwo edwɛkɛ mɔɔ bɛlɛ la bɛdi gyima kɛ mɔɔ Gyihova Alasevolɛ Global Data Protection Policy ngyehyɛleɛ ne mɔɔ wɔ jw.org azo kile la. Ɔwɔ kɛ bɛyɛ ɛhye wɔ mitini bulu anzɛɛ mɔɔ ɛndwu zɔ la anu.

Ɛvolɛ ko wɔ nolobɔlɛnli ne ɛzɔnenlɛ ne anzi, ɔwɔ kɛ mgbanyima nwiɔ yia ye na bɛfa nzuzulɛ mɔɔ baboa ye nee anwosesebɛmaanlɛ bɛmaa ye. Ɔwɔ kɛ mgbanyima ne mɔ anu ko yɛ ye ekpunli zo neavolɛ ne. Saa ahenle mɔɔ bɛzɔne ye fofolɛ la le kakula ekyi a, ɔwɔ kɛ ye awovolɛ mɔɔ bɛle diedima la boka nwo. Ɔwɔ kɛ ayia ne yɛ anyelielɛ na ɔmaa anwosesebɛ. Mgbanyima ne mɔ nee ye bazuzu ye sunsum nu anyuhɔlɛ nwo na bɛava nzuzulɛ mɔɔ baboa ye yeamaa yeahɔ zo yeayɛ bɛtianwo debiezukoalɛ, dahuu Baebolo ɛgengalɛ, dapɛne dapɛne abusua ɛzonlenlɛ, dahuu debiezukoalɛ ɛhɔlɛ nee mualɛ ɛmaanlɛ yɛɛ daselɛlilɛ ɛhɔlɛ la bɛamaa ye. (Ɛfɛ. 5:15, 16) Saa ɔtɛsukoale Nyia Anyelielɛ Dahuu! buluku ne ɔtɛwiele a, ɔwɔ kɛ mgbanyima ne mɔ yɛ ngyehyɛleɛ maa awie nee ye sukoa. Ɔwɔ kɛ mgbanyima ne mɔ fi ɛlɔlɛ nu kanvo ye. Saa bɛtu ye folɛ anzɛɛ bɛmaa ye nzuzulɛ wɔ debie ko anzɛɛ nwiɔ anwo a, yemɔ ala le kpalɛ.