Mokanwo

Kilisiene Awovolɛ Nrɛlaleɛ:

Kɛ awovolɛ la, ɛkulo kɛ ɛboa ɛ mra ne mɔ mɔɔ bɛsonle bolɛ la ɛmaa bɛkulo Gyihova na bɛyila bɛ nwo zo bɛmaa ye. Duzu a ɛbahola wɔayɛ wɔava wɔaziezie bɛ wɔamaa ɛzɔnenlɛ a? Mekɛ boni a ɔfɛta kɛ bɛtu agyakɛ ɛhye mɔɔ anwo hyia la ɛ?

Gyisɛse hanle hilele ye ɛdoavolɛma kɛ: “Bɛyɛ maanle maanle kɔsɔɔti anu menli me ɛdoavolɛma, bɛzɔne bɛ.” (Mat. 28:19) Ɔlua ɛhye ati, debie titili mɔɔ maa awie fɛta maa ɛzɔnenlɛ la a le kɛ ɔbayɛ ɛdoavolɛ​—awie mɔɔ te Kelaese ngilehilelɛ ne abo, ɔdie ɔdi na eza ɔfa ɔdi gyima la. Ɛhye le debie mɔɔ kakula ekyi bɔbɔ bahola ayɛ a.

Yɛ neazo kpalɛ maa ɛ mra, na fa Gyihova ngilehilelɛ ne wula bɛ ahonle nu. (Dit. 6:6-9) Fa edwɛkɛ mɔɔ wɔ Nyia Anyelielɛ Dahuu! buluku ne anu la kilehile bɛ Baebolo nu mɔlebɛbo nɔhalɛ ne na kile bɛ kɛzi bɛbazuzu Baebolo ngyinlazo nwo nee kɛzi bɛbava bɛabɔ bɛ ɛbɛla la. Boa bɛ maa bɛhola bɛva bɛ edwɛkɛ bɛhilehile bɛ diedi ne anu. (1 Pita 3:15) Ndelebɛbo nee anwosesebɛmaanlɛ mɔɔ bɛbanyia bɛavi wɔ ɛkɛ nee mɔɔ bɛbanyia bɛavi bɛtianwo debiezukoalɛ, abusua ɛzonlenlɛ, asafo debiezukoalɛ nu yɛɛ agɔnwolɛma kpalɛ ɛkɛ la bamaa bɛafɛta ɛzɔnenlɛ na bɛayɛ dɔɔnwo. Boa bɛ maa bɛva sunsum nu bodane bɛzie bɛ nye zo.

Mrɛlɛbulɛ 20:11 ka kɛ: “Kakula bɔbɔ, bɛdua ye nyɛleɛ zo a bɛnwu ye a, saa ye subane nwo te na ɔtenrɛ a.” Nyɛleɛ boni mɔ a bahile kɛ kakula bie, nrenyia anzɛɛ raalɛ, ɛrayɛ Gyisɛse Kelaese ɛdoavolɛ na yefɛta ɛzɔnenlɛ a?

Ɔwɔ kɛ kakula mɔɔ kulo kɛ bɛsɔne ye la bu ye awovolɛ. (Gyi. 5:29; Kɔl. 3:20) Baebolo ne ka ye wɔ Gyisɛse mɔɔ ɛnee ɛnyia ɛvolɛ 12 la anwo kɛ: “Ɔhɔle zo ɔbɛlɛle ɔ nwo aze ɔmaanle [ye awovolɛ].” (Luku 2:51) Nɔhalɛ nu, ɔnle kɛ ɛ nye da kɛ ɛ ra ne bayɛ kakula mɔɔ di munli. Noko awie mɔɔ kulo kɛ bɛsɔne ye la bɔ mɔdenle sukoa Gyisɛse neazo ne, na menli nwu ye kɛ ɔbɛlɛ ɔ nwo aze ɔmaa ye awovolɛ.

Eza ɔbanyia ɛhulolɛ kɛ ɔbazukoa Baebolo nu nɔhalɛ ne. (Luku 2:46) Asoo ɛ ra ne kulo kɛ ɔkɔ debiezukoalɛ na ɔmaa mualɛ? (Edw. 122:1) Ɔ nye die dahuu Baebolo ɛgengalɛ nee bɛtianwo debiezukoalɛ nwo ɔ?​—Mat. 4:4.

Kakula mɔɔ kulo kɛ bɛsɔne ye la bɔ mɔdenle fa Belemgbunlililɛ ne dimoa. (Mat. 6:33) Ɔze kɛ ɔle ye ɛzonlelilɛ kɛ ɔbaha ye diedi ne anwo edwɛkɛ yeahile awie mɔ. Ɔfa ɔ nwo ɔwula ɛzonlenlɛ gyima ne foa ngakyile ne mɔ anu yɛɛ ɔnze nyiane kɛ ɔbamaa ye kilehilevolɛma nee ɔ gɔnwo mɔ sukuluma anwu kɛ ɔle Gyihova Dasevolɛ. Ɔnva ye gyimalilɛ wɔ Yɛ Ɛbɛlabɔlɛ Nee Yɛ Ɛzonlenlɛ Nyianu ne anu ɔnli nwɔhoa.

Eza ɔbabɔ mɔdenle kɛ ɔbakpo agɔnwolɛvalɛ ɛtane amaa ɔ nwo ade wɔ ɛbɛlabɔlɛ nu. (Mrɛ. 13:20; 1 Kɔl. 15:33) Ɛhye bala ali wɔ edwɛne, vidio, tɛlevihyɛne zo gyimalilɛ nee nwɔhoa mɔɔ ɔkulo yɛɛ kɛzi ɔfa Yintanɛte ne ɔdi gyima la anu.

Menli dɔɔnwo ɛyɛ mɔdenle mɔɔ bɛ awovolɛ ɛbɔ la anwo debie, ɛva nɔhalɛ ne ɛyɛ bɛ ɛdeɛ na bɛfɛta ɛzɔnenlɛ wɔ bɛ ngakula nu. Ɔrɛla ye kɛ Gyihova bayila mɔdenle mɔɔ ɛlɛbɔ kɛ ɛboa ɛ mra wɔamaa bɛadwu bodane ɛhye mɔɔ anwo hyia wɔ Gyihova ɛzonlenlɛ nu anwo la azo.

Nolobɔlɛnli Mɔɔ Bɛtɛsɔnenle Ye La Nrɛlaleɛ:

Ɔle nwolɛ adenle kɛnlɛma kɛ ɛbazonle wɔ asafo ne anu kɛ nolobɔlɛnli mɔɔ bɛtɛsɔnenle ye la. Ɛfɛta nganvolɛ wɔ sunsum nu anyuhɔlɛ mɔɔ wɔnyia ye la anwo. Nyamenle Edwɛkɛ ne mɔɔ wɔzukoa la ɛmaa wɔnyia nɔhalɛ ndelebɛbo, na zɔhane ndelebɛbo ne ɛmaa wɔnyia ye ɛwɔkɛ ne mɔ anu diedi.​—Dwɔn 17:3; Hib. 11:6.

Bie a, kolaa na ɛ nee Gyihova Alasevolɛ azukoa la, ɛnee ɛwɔ asɔne bie anu, anzɛɛ ɛnee ɛ nye ɛnlie ɛzonlenlɛ biala anwo fee. Bie a ɛnee ɛyɛ nyɛleɛ bie mɔɔ tia Baebolo ngyinlazo la. Noko kɛkala wɔlua ɛ nwo mɔɔ wɔnlu la azo wɔla wɔ diedi ali, ɛhye kile nyane kpole mɔɔ wɔli wɔ ɛbɛlatane mɔɔ ɛvale ɛ nwo ɛwulale nu mekɛ bie anu la anwo na wɔbɔ kpɔkɛ kɛ ɛyɛ mɔɔ sɔ Nyamenle anye la.​—Gyi. 3:19.

Noko bie a, “sumunli wɔ ngakula nu” yɛɛ wɔzukoa ngɛlɛlera nwuanzanwuanza ne a. Yemɔti, yeammaa wɔambɔ ɛbɛla mgbane mgbane yɛɛ wɔanva ɛ nwo wɔanwulowula ɛtaneyɛlɛ mɔɔ anyebolo wɔ nu la anu. (2 Tim. 3:15) Wɔbɔ mɔdenle wɔkpo atipɛnema ngyegyelɛ nee ngyegyelɛ mɔɔ maa bɛyɛ ninyɛne mɔɔ ɛnzɔ Gyihova anye la. Wɔlua nɔhalɛ ɛzonlenlɛ mɔɔ ɛgyi ɔ nzi kpundii nee wɔ Kilisiene diedi ne mɔɔ ɛka nwolɛ edwɛkɛ ɛkile awie mɔ la azo wɔla wɔ diedi ne ali. Bɛtete wɔ wɔ Kilisienema ɛzonlenlɛ gyima ne anwo. Kɛkala wɔzi kpɔkɛ kɛ ɛsonle Gyihova kɛ nolobɔlɛnli mɔɔ bɛtɛsɔnenle ye la.

Kɛzi ɔde ye biala la, saa wɔ ngakula nu a bɛhilele wɔ Gyihova ndenle anzɛɛ nzinlii a ɛranwunle ye bɔbɔ a, kɛkala ɛlɛsuzu ninyɛne nwiɔ mɔɔ anwo hyia wɔ wɔ sunsum nu anyuhɔlɛ ne anu, mɔɔ le bɛnwozoyilalɛ nee ɛzɔnenlɛ la anwo. Ɛ nwo zo mɔɔ ɛyila wɔamaa Gyihova la kile kɛ ɛka wɔahile ye wɔ asɔneyɛlɛ nu kɛ ɛtu ɛ nwo amuala wɔamaa ye na wɔazonle ɔ ngomekye dahuu. (Mat. 16:24) Ɛ nwo zo ɛyilalɛ zɔhane anwo sɛkɛlɛneɛ ne a le kɛ bɛbava wɔ bɛawula nzule nu bɛazɔne wɔ. (Mat. 28:19, 20) Ɔlua ɛ nwo zo ɛyilalɛ nee wɔ ɛzɔnenlɛ ne azo, ɛbarayɛ Gyihova Nyamenle sonvolɛ mɔɔ fɛta a. Nwolɛ adenle kɛnlɛma boni ɛne!

Noko, kɛ mɔɔ Baebolo ne mɔɔ wɔzukoa la ɛmaa wɔnwu ye la, ɛhye mɔɔ ɛbayɛ la bamaa wɔayia ngyegyelɛ dɔɔnwo. Kakye kɛ, Gyisɛse ɛzɔnenlɛ ne anzi mekɛ ekyi bie anu, “sunsum ne vale Gyisɛse hɔle fienemgbole ne anu, na Abɔnsam zɔle ye nleanle.” (Mat. 4:1) Bɛsɔne wɔ kɛ Kelaese ɛdoavolɛ bɛwie a, maa ɛ nye ɛla kɛ ɛbayia sɔnea dɔɔnwo. (Dwɔn 15:20) Sɔnea ne bayɛ ngakyile dɔɔnwo. Bie a wɔ abusua ne badwazo atia wɔ. (Mat. 10:36) Ɛ gɔnwo mɔ sukuluma, ɛ gɔnwo mɔ mɔɔ ɛ nee bɛ dule la yɛɛ wɔ gyimayɛvoma bahola agolo ɛ nwo. Noko kakye Gyisɛse edwɛkɛ mɔɔ wɔ Maake 10:29, 30 la dahuu: “Nɔhalɛ nu meka meahile bɛ kɛ, awie biala ɛnle ɛkɛ mɔɔ yegyakyi sua anzɛɛ mediema mrenyia anzɛɛ mediema mraalɛ anzɛɛ mame anzɛɛ papa anzɛɛ mralɛ anzɛɛ azɛlɛ wɔ me nee edwɛkpa ne ati mɔɔ ɔnrɛnyia bɛ mɔnwo 100 kɛkala wɔ mekɛ ɛhye anu​—azua, mediema mrenyia, mediema mraalɛ, mame mɔ, mralɛ nee azɛlɛ mɔɔ kpɔdekpɔdeyɛlɛ boka nwo​—nee dahuu ngoane wɔ mekɛ ne mɔɔ ɛlɛba la anu a.” Ɔti kɔ zo bɔ mɔdenle bikye Gyihova kpalɛ na fa ye tenlene ngyinlazo ne mɔ bɔ wɔ ɛbɛla.

Saa ɛkulo kɛ bɛsɔne wɔ a, ka nwolɛ edwɛkɛ kile mgbanyima avinli ngitanwodivolɛ ne. Kpuya ne mɔ mɔɔ doɔdoa edwɛkɛ ɛhye azo la a mgbanyima ne mɔ nee wɔ bazuzu nwo amaa bɛanwu ye saa ɛfɛta kɛ bɛsɔne wɔ a. Ɛ ngomekye ɛbahola wɔabɔ ɔ bo wɔanleɛnlea kpuya ɛhye mɔ anu wɔava wɔaboka ɛ ti anwo debie mɔɔ ɛsukoa ye dahuu la anwo.

Saa ɛlɛsiezie ɛ nwo a, nyia mekɛ kenga Ngɛlɛlera ne mɔ na dwenledwenle nwolɛ. Ɛkulo a, ɛbahola wɔahɛlɛ ninyɛne mɔɔ ɛ nye die nwo la wɔ buluku ɛhye anu anzɛɛ ɛleka gyɛne. Saa ɛ nee mgbanyima ne mɔ ɛlɛsuzu nwo a ɛbahola wɔanlea edwɛkɛ ne mɔ mɔɔ ɛhɛlɛle la anzɛɛ wɔabuke buluku ɛhye anu. Saa ɛnde kpuya bie mɔ abo a, biza ahenle mɔɔ nee wɔ ɛlɛsukoa Baebolo ne la anzɛɛ mgbanyima ne mɔ maa bɛboa wɔ.

Saa ɛ nee mgbanyima ne mɔ ɛlɛsuzu nwo a, mmate nganeɛ kɛ ɔwɔ kɛ ɛfa edwɛkɛ tendenle anzɛɛ mɔɔ le kpomgbondee la ɛye kpuya bie mɔ anloa. Ɛdawɔ mumua ne wɔ edwɛkɛ sikalɛ mɔɔ ɛbava wɔaye ɔ nloa la le kpalɛ kpole. Saa ɛlɛye kpuya ne dɔɔnwo anloa a, eza ɔle kpalɛ kɛ ɛbahwe adwenle wɔahɔ Baebolo nu edwɛkɛ ko anzɛɛ nwiɔ mɔɔ kile Ngɛlɛlera mɔɔ wɔ mualɛ ne gyi zolɛ la azo.

Saa ɛtɛnyianle mɔlebɛbo Baebolo ngilehilelɛ ne anu ndelebɛbo dɔɔnwo a, mgbanyima ne mɔ bayɛ ngyehyɛleɛ amaa baboa wɔ na wɔahola wɔava ɛdawɔ mumua ne wɔ edwɛkɛ wɔahilehile kɛzi ɛte Ngɛlɛlera ne mɔ abo la anu kpalɛ na nzinlii wɔafɛta wɔamaa ɛzɔnenlɛ.

[Asafo nu mgbanyima ɛyɛ ye nzonlɛ: Kɛzi bɛ nee menli mɔɔ kpondɛ kɛ bɛsɔne bɛ la suzu edwɛkɛ ne mɔ anwo la anwo adehilelɛ wɔ mukelɛ 208-212.]