Di Teokelase Ngyehyɛleɛ Zo Na Nyia Zolɛ Nvasoɛ

SAA yɛtie Nyamenle, Anwuma nee Aze Belemgbunli ne a, yɛɛ bɛbahola bɛayɛ ngyehyɛleɛ bɛamaa yɛayɛ Gyihova ɛhulolɛdeɛ a. Yɛze kɛ ɔ Ra ne a le Kilisiene asafo ne ati a, yɛɛ eza yɛdi ɛbɛlabɔlɛ nu tileyɛlɛ nwo ngyinlazo mɔɔ ɛha la azo. Awie biala mɔɔ di teokelase ngyehyɛleɛ ɛhye mɔ azo la nyia zolɛ nvasoɛ.

² Bɛmaanle alesama nwunle ye wɔ Yidɛn tola ne anu kɛ ɔwɔ kɛ bɛbɛlɛ bɛ nwo aze bɛmaa tumililɛ. Yɛnwu ɛhye wɔ Nyamenle mɛla ne mɔɔ wɔ Gyɛnɛsese 1:28 nee 2:16, 17 la anu. Ɛnee ɔwɔ kɛ anyewɔzo abɔdeɛ mɔɔ ɛha mɔɔ bɛwɔ azɛlɛ ye azo la amuala bɛlɛ bɛ nwo aze maa alesama, yɛɛ ɛnee ɔwɔ kɛ Adam nee Yive bɛlɛ bɛ nwo aze maa Nyamenle tumililɛ na bɛyɛ ye ɛhulolɛdeɛ. Saa bɛbɛlɛ bɛ nwo aze bɛmaa Nyamenle tumililɛ a, anzodwolɛ bara na ninyɛne ahɔ zo pɛpɛɛpɛ. Nzinlii bɛzile tileyɛlɛ ngyinlazo ne azo wɔ 1 Kɔlentema 11:3. Ɛzoanvolɛ Pɔɔlo hɛlɛle kɛ: “Noko, mekulo kɛ bɛnwu ye kɛ nrenyia biala ati a le Kelaese; raalɛ noko ati a le nrenyia; Kelaese noko ati a le Nyamenle.” Ɛhye kile kɛ saa ɛye Gyihova ɛsie ahane a, awie biala wɔ tileyɛlɛ nwo ngyehyɛleɛ ɛhye abo.

³ Ɛnɛ, menli dɔɔnwo ɛnlie tileyɛlɛ nwo ngyinlazo ne ɛndo nu anzɛɛ bɛnli zo. Duzu ati ɔ? Ngyegyelɛ ne bɔle ɔ bo wɔ Yidɛn wɔ mekɛ mɔɔ alesama awovolɛ mɔɔ limoa la anye fuu kpale kɛ bɛye bɛ nwo bɛavi Nyamenle tumililɛ nee ye tileyɛlɛ bo la. (Gyn. 3:4, 5) Noko bɛ nwo andɔ bɛ. Emomu, bɛraveale Seetan Abɔnsam, sunsum nu abɔdeɛ mɔɔ ati yɛ se la tumililɛ bo. Atuadelɛ mɔɔ limoa la hwenle alesama vile Nyamenle anwo. (Kɔl. 1:21) Ɛhye ati, ɛnɛ, alesama anu dɔɔnwo wɔ amumuyɛnli ne tumililɛ bo.​—1 Dwɔn 5:19.

⁴ Ɔlua Nyamenle Edwɛkɛ ne anu nɔhalɛ ne mɔɔ yɛzukoa na yɛlɛfa yɛali gyima la ati, yɛvi Seetan tumililɛ bo. Kɛ Alasevolɛ mɔɔ yɛyila yɛ nwo zo na bɛzɔne yɛ la, yɛdie yɛto nu kɛ Gyihova a nea yɛ ngoane zo a. Yɛ nee Belemgbunli Devidi yɛ adwenle kɛ Gyihova a nea “debie biala azo a.” (1 Ek. 29:11) Yɛbɛlɛ yɛ nwo aze yɛka kɛ: “Bɛnwu ye kɛ Gyihova le Nyamenle. Ɔdaye a ɔbɔle yɛ a, yɛɛ yɛle ye ɛdeɛ. Yɛle ye menli nee ye adidileka mboane.” (Edw. 100:3) Yɛdie yɛto nu kɛ Gyihova le bedevinli yɛɛ ɔfɛta kɛ yɛbɛlɛ yɛ nwo aze bɔkɔɔ yɛmaa ye ɔluakɛ ɔdaye a ɔbɔle ninyɛne kɔsɔɔti a. (Yek. 4:11) Kɛ nɔhalɛ Nyamenle ne azonvolɛ la, yɛsukoa Gyisɛse Kelaese mɔɔ bɛlɛle ɔ nwo aze maanle Nyamenle la neazo ne.

⁵ Duzu a Gyisɛse zukoale vile amaneɛ mɔɔ ɔnwunle ye wɔ azɛlɛ ye azo la anu a? Hibuluma 5:8 bua kɛ: “Ɔle ralɛ bɔbɔ ɛdeɛ, noko ɔzukoale tieyɛ ɔvile amaneɛ mɔɔ ɔnwunle ye la anu.” Ɛhɛe, Gyisɛse lile nɔhalɛ bɛlɛle ɔ nwo aze maanle ye anwuma Selɛ ne wɔ mekɛ mɔɔ ɛnee ɔlɛnwu amaneɛ bɔbɔ la. Bieko, Gyisɛse anli ɔ ti anwo anyɛ debie biala. Yeambɔ ɔ ti anu yeanga edwɛkɛ biala; anzɛɛ yeamkpondɛ anyunlunyia yeammaa ɔ nwo. (Dwɔn 5:19, 30; 6:38; 7:16-18) Wɔ ye ɛzonlenlɛ gyima ne anu, ɔ nye liele ɔ Ze ɛhulolɛdeɛ ɛyɛlɛ nwo, ɔnva nwo kɛ ɛhye maanle bɛdwazole bɛtiale ye na bɛyɛle ye kpɔdekpɔde la. (Dwɔn 15:20) Ɔbɛlɛle ɔ nwo aze ɔmaanle Nyamenle. Gyisɛse ‘bɛlɛle ɔ nwo aze,’ na bɔbɔ “ɔwule amaneɛnwunlɛ baka zo.” Nyilalɛ mɔɔ vi Gyihova mɔɔ Gyisɛse diele ye bɔkɔɔ anu rale la zonle, ɔbamaa alesama anyia dahuu ngoane, bɛkpogyale ɔdaye mumua ne zo yɛɛ ɔwulale ɔ Ze anyunlunyia.​—Fel. 2:5-11; Hib. 5:9.

TEOKELASE NGYEHYƐLEƐ BIE MƆ MƆƆ ƆWƆ KƐ YƐDI ZO

⁶ Saa yɛbɛlɛ yɛ nwo aze yɛmaa Nyamenle ɔlua ye ɛhulolɛdeɛ mɔɔ yɛbayɛ la azo a, adwenleadwenle nee anyezota dɔɔnwo mɔɔ fa menli mɔɔ kpo kɛ bɛbabɛlɛ bɛ nwo aze bɛamaa Gyihova tumililɛ ne aze la kpa yɛ ti. Yɛ kpɔvolɛ Abɔnsam bɔ mɔdenle dahuu kɛ ɔsɛkye yɛ. Saa yɛko yɛtia ye na yɛfi yɛ ahonle nu yɛbɛlɛ yɛ nwo aze yɛtie Gyihova a, ɔbalie yɛ yɛavi amumuyɛnli ne asa anu.​—Mat. 6:10, 13; 1 Pita 5:6-9.

⁷ Wɔ Kilisiene asafo ne anu, yɛdie Kelaese tileyɛlɛ ne nee tumi mɔɔ yeva yemaa “akɛlɛ nɔhavo nee badwema” ne la yɛto nu. Ɛhye ka yɛ subane nee yɛ nyɛleɛ mɔɔ yɛda ye ali yɛkile yɛ nwo ngoko la. Saa yɛbɛlɛ yɛ nwo aze yɛmaa Nyamenle wɔ asafo ne anu a, ɔbamaa yɛali Nyamenle Edwɛkɛ ne azo wɔ yɛ ɛzonlenlɛ kɔsɔɔti anu. Tieyɛ ɛhye bie a le kɛ yɛbayɛ yɛ ɛzonlenlɛ gyima ne, yɛbahɔ debiezukoalɛ na yɛava yɛ nwo yɛawula nu, yɛ nee mgbanyima ne mɔ avinli bayɛ kpalɛ na yɛali ahyehyɛdeɛ ne ngyehyɛleɛ zo.​—Mat. 24:45-47; 28:19, 20; Hib. 10:24, 25; 13:7, 17.

⁸ Saa yɛtie Nyamenle a, ɔmaa yɛnyia anzodwolɛ nee banebɔlɛ na ninyɛne kɔ zolɛ pɛpɛɛpɛ wɔ Kilisiene asafo ne anu. Gyihova subane ne mɔ da ali wɔ ye menli ne avinli. (1 Kɔl. 14:33, 40) Anwubielɛ mɔɔ yɛnyia ye wɔ Gyihova ahyehyɛdeɛ ne anu la ɛmaa yɛla nzuzulɛ mɔɔ le kɛ Belemgbunli Devidi ɛdeɛ ne bie la ali. Mɔɔ Devidi nwunle ngakyile mɔɔ wɔ Gyihova azonvolɛ nee amumuyɛma avinli la, ɔvale anyelielɛ ɔdeanle nu kɛ: “Anyelielɛ a le menli mɔɔ bɛ Nyamenle a le Gyihova la!”​—Edw. 144:15.

⁹ Wɔ agyalɛ nee abusua ngyehyɛleɛ ne anu, “raalɛ . . . ati a le nrenyia.” Wɔ mekɛ ko ne ala, ɔwɔ kɛ mrenyia bɛlɛ bɛ nwo aze maa Kelaese, yɛɛ Kelaese noko ati a le Nyamenle. (1 Kɔl. 11: 3) Ɔwɔ kɛ yelɛma bɛlɛ bɛ nwo aze maa bɛ hu mɔ na ngakula noko bɛlɛ bɛ nwo aze maa bɛ awovolɛ. (Ɛfɛ. 5:22-24; 6:1) Saa abusua ne anu sonla ko biala fa tileyɛlɛ nwo ngyinlazo ne di gyima a, ɔfa anzodwolɛ ɔba.

¹⁰ Ɔwɔ kɛ kunli di ye tileyɛlɛ ne anwo gyima wɔ ɛlɔlɛ nu ɔfa ɔsukoa Kelaese. (Ɛfɛ. 5:25-29) Saa kunli anva ye tileyɛlɛ ne anli gyima wɔ adenle ɛtane zo anzɛɛ yeantoto ye aze a, ɔ ye nee ɔ mra bava anyelielɛ abɛlɛ bɛ nwo aze amaa ye. Yelɛ le ye boavolɛ, anzɛɛ ɔfɛta ye. (Gyn. 2:18) Saa ɔsi abotane ɔboa ɔ hu na ɔbu ye a, ɔmaa ɔnyia ɔ hu anyunlu ɛlolɛ na ɛhye ye Nyamenle ayɛlɛ. (1 Pita 3:1-4) Saa kunlima nee yelɛma di Baebolo nu folɛdulɛ mɔɔ fale tileyɛlɛ nwo la azo a, bɛyɛ neazo bɛmaa bɛ mra wɔ Nyamenle mɔɔ bɛbɛlɛ bɛ nwo aze bɛamaa ye la anu.

¹¹ Nyamenle mɔɔ yɛbɛlɛ yɛ nwo aze yɛamaa ye la ka kɛzi yɛbu “tumivolɛma” mɔɔ “Nyamenle a ɛva bɛ ɛzie bɛ gyinlabelɛ ngakyile ne mɔ” la noko. (Wlo. 13:1-7) Kɛ maanlema mɔɔ di mɛla zo la, Kilisienema tua adwule, bɛfa ‘Siza ɛdeɛ bɛmaa Siza na bɛfa Nyamenle ɛdeɛ bɛmaa Nyamenle.’ (Mat. 22:21) Bieko, ɔwɔ kɛ yɛdi applicable data protection mɛla ne mɔ azo yɛfa yɛyɛ azɛlɛsinli ne anu gyima mɔɔ yɛbayɛ la anwo ngyehyɛleɛ. Saa yɛbɛlɛ yɛ nwo aze yɛtie tumivolɛma ne wɔ ninyɛne mɔɔ ɛntia Gyihova tenlene mɛla ne mɔ la anu a, yɛbahola yɛava yɛ mɔdenlebɔlɛ nee yɛ anwosesebɛ yɛayɛ edwɛkɛhanlɛ gyima ne.​—Maake 13:10; Gyi. 5:29.

¹² Teokelase ngyehyɛleɛ mɔɔ ɔwɔ kɛ yɛdi zo la ka debie biala mɔɔ yɛyɛ ye wɔ yɛ ɛbɛlabɔlɛ nu la. Yɛfa yɛ diedi ɛnyelɛ ne yɛnwu mekɛ mɔɔ alesama amuala bɛabɛlɛ bɛ nwo aze amaa Gyihova Nyamenle la. (1 Kɔl. 15:27, 28) Nea kɛzi menli mɔɔ fa anyelielɛ die Gyihova tumililɛ ne to nu na bɛbɛlɛ bɛ nwo aze bɛmaa ye dahuu la anye balie na bɛanyia nyilalɛ a!