Ndinu Mɔɔ Bɛfa Bɛsi Edwɛkɛ Zo

EDWƐKƐ mɔɔ bɛti nu la boka ngilehilelɛ kpalɛ nwo. Saa ɛti edwɛkɛ bie mɔɔ hyia la anu a, ɔbamaa menli mɔɔ bɛlɛtie wɔ la ahakye. Saa ɛka edwɛkɛ ko ne ala wɔ adenle mɔɔ le ngakyile ekyi la azo a, yemɔ bɔbɔ bamaa bɛade ɔ bo kpalɛ kpalɛ.

Saa wɔ tievolɛma ɛngakye mɔɔ ɛhanle la a, wɔ edwɛkɛ ne ɛnrɛnyia mɔɔ bɛdie bɛdi anzɛɛ kɛzi bɛbɔ bɛ ɛbɛla la azo tumi. Bie a edwɛkɛ titile mɔɔ ɛzile zo la ala a bɛbadwenledwenle nwo a.

Gyihova, yɛ Kilehilevolɛ Kpole ne ɛyɛ kɛzi bɛti edwɛkɛ nu la anwo neazo ɛmaa yɛ. Ɔvale Mɛla Bulu ne ɔmanle Yizilayɛ maanle ne. Ɔluale anwumabɔvolɛ mɔɔ gyi ɔ gyakɛ anu la anwo zo ɔmanle maanle ne dele zɔhane mɛla ne mɔ wɔ Boka Saenae abo. Nzinlii, ɔhɛlɛle ɔmanle Mosisi. (Ade. 20:1-17; 31:18; Mɛla 5:22) Mosisi lile adehilelɛ mɔɔ Gyihova vale manle ye la azo na ɔdinle mɛla ne anu ɔhilele maanle ne kolaa na bɛahɔ ɛwɔkɛ azɛlɛ ne azo, na ɔlua sunsum nwuanzanwuanza ne azo, Mosisi yɛle nwolɛ kɛlɛtokɛ kɛmɔ yɛnwu ye wɔ Mɛla ne 5:6-21 la. Mɛla mɔɔ bɛvale bɛmanle Yizilayɛma la bie a le kɛ bɛbava bɛ ahonle muala, bɛ ɛkɛla muala, nee bɛ anwosesebɛ muala bɛahulo Gyihova na bɛazonle ye. Bɛdinle ɛhye noko anu fane dɔɔnwo. (Mɛla 6:5; 10:12; 11:13; 30:6) Duzu ati ɔ? Ɔluakɛ Gyisɛse hanle kɛ, yemɔ a ɔlumua a yɛɛ ɔle “mɛla titile kpalɛ mɔɔ hyia.” (Mat. 22:34-38) Gyihova luale ngapezonli Gyɛlɛmaya anwo zo hakyele Dwudama fane mɔɔ bo 20 la wɔ kɛzi anyebolo wɔ nu kɛ bɛbadie ye wɔ debie biala mɔɔ yeha yehile bɛ anu la. (Gyɛ. 7:23; 11:4; 12:17; 19:15) Eza Nyamenle luale Yizikeɛle anwo zo hanle ye mɔɔ bo fane 60 la kɛ maanle maanle ne mɔ ‘banwu kɛ medame a mele Gyihova a.’​—Yiz. 6:10; 38:23.

Eza yɛnwu kɛzi bɛti edwɛkɛ nu la wɔ Gyisɛse ɛzonlenlɛ gyima ne anwo kɛlɛtokɛ ne anu. Fa Edwɛkpa nna ne kɛ neazo​—ko biala ka ninyɛne mɔɔ hyia na ɔsi mɔɔ bɛha ye wɔ Edwɛkpa ne ko anzɛɛ mɔɔ bo anu la azo, noko ɔka ye wɔ adenle ngakyile ekyi azo. Wɔ Gyisɛse mumua ne ngilehilelɛ nu, ɔluale ndenle ngakyile zo ɔhanle edwɛkɛ ko ne ala fane dɔɔnwo. (Maake 9:34-37; 10:35-45; Dwɔn 13:2-17) Yɛɛ mekɛ mɔɔ ɛnee Gyisɛse wɔ Ɔlivi Boka ne azo na yeha mekɛ ekyii na yeawu la, ɔdinle edwɛkɛ nu ɔvale ɔzile folɛdulɛ ɛhye mɔɔ hyia la azo: “Yemɔti bɛzinza, ɔboalekɛ bɛnze kenle mɔɔ bɛ Awulae ne kɛra la.”​—Mat. 24:42; 25:13.

Wɔ Daselɛlilɛ Nu. Saa ɛdi menli daselɛ a, wɔ anyelazo a le kɛ bɛbahakye mɔɔ ɛhanle la. Edwɛkɛ mɔɔ bɛti nu kpalɛ la bahola amaa wɔadwu zɔhane bodane ne anwo.

Fane dɔɔnwo ne ala, saa bɛlɛsuzu edwɛkɛ nwo na ɛti nu a, ɔmaa ɔka ahenle ne adwenle nu. Ɛhye ati, saa ɛkenga ngɛlɛlera bie ɛwie a, ɛbahola wɔahwe adwenle wɔahɔ ye foa titile bie azo na wɔabiza kɛ, “Ɛyɛle kɛzi bɛhanle zɔhane edwɛkɛ ne la nzonlɛ ɔ?” wɔava wɔazi zo.

Eza ɛbahola wɔava ɛdendɛmunli ne mɔ mɔɔ li awieleɛ wɔ adawubɔlɛ nu la wɔali gyima kpalɛ. Kɛ neazo la, ɛbahola wɔaha kɛ: “Edwɛkɛ titile mɔɔ me nye la kɛ ɛbahakye wɔ yɛ adawubɔlɛ ne anu la a le . . . ” Akee sia ka ye sikalɛ. Ɔbahola yeayɛ debie zɛhae: “Nyamenle bodane a le kɛ azɛlɛ ne bahakyi ayɛ paladaese. Ye biala anu zɔhane bodane ne bara nu.” Anzɛɛ ɛbahola wɔaha kɛ: “Baebolo ne maa ɔda ali bɔkɔɔ kɛ yɛde mekɛ ɛhye awieleɛ mekɛ ne anu. Saa yɛbanyia yɛ ti wɔ ye ɛzɛkyelɛ ne anu a, ɔwɔ kɛ yɛsukoa mɔɔ Nyamenle kpondɛ avi yɛ ɛkɛ la.” Anzɛɛ: “Kɛ mɔɔ yɛnwu ye la, Baebolo ne fa kɛzi yɛbagyinla abusua nu ngyegyelɛ nloa la anwo folɛdulɛ kpalɛ maa.” Wɔ tɛnlabelɛ bie mɔ anu, ɛbahola wɔadi Baebolo ne anu edwɛkɛ bie anu sikalɛ amaa ahenle ahakye. Nɔhalɛ nu, saa ɛbayɛ ɛhye a, kyesɛ ɛdumua ɛdwenle nwo.

Wɔ sia kɔkpɔla nee Baebolo ɛzukoalɛ ɛyɛlɛ nu, bie a ɛbahola wɔadi kpuyia ne mɔ anu wɔava wɔazi edwɛkɛ zo.

Saa ɔyɛ se ɔmaa awie kɛ ɔbade Baebolo nu ngyinlazo bo anzɛɛ ɔbava yeali gyima a, bie a ɔbahyia kɛ ɛka nwolɛ edwɛkɛ fane dɔɔnwo. Bɔ mɔdenle kɛ ɛbalua ndenle ngakyile zo wɔahilehile nu. Ɔnle kɛ adawubɔlɛ ne wa, emomu ɔwɔ kɛ ɔmaa sukoavo ne anwosesebɛ ɔmaa ɔkɔ zo ɔdwenle edwɛkɛ ne anwo. Kakye kɛ, Gyisɛse luale adenle ɛhye mɔɔ bɛdua zo bɛti edwɛkɛ nu la azo ɔboale ye ɛdoavolɛma ne ɔmanle bɛlile ɛhulolɛ mɔɔ bɛlɛ kɛ bɛbayɛ kpole la azo.​—Mat. 18:1-6; 20:20-28; Luku 22:24-27.

Mekɛ Mɔɔ Ɛlɛmaa Ɛdendɛlɛ. Saa ɛgyinla bama ne azo ɛmaa ɛdendɛlɛ a, tɛ wɔ bodane a le kɛ ɛka edwɛkɛ ala. Ɛkpondɛ kɛ wɔ tievolɛma te ɔ bo, kakye, na bɛfa bɛdi gyima. Amaa wɔadwu ɛhye anwo la, fa kɛzi bɛti edwɛkɛ nu la di gyima kpalɛ.

Noko saa ɛta ɛti edwɛkɛ titile ne mɔ anu a, bie a wɔ tievolɛma ɛnrɛdie wɔ. Kpa edwɛkɛ titile mɔɔ hyia kɛ ɛsi zolɛ la kpalɛ. Ɛhye mɔ ta yɛ edwɛkɛ titile mɔɔ wɔ ɛdendɛlɛ ne gyi zo la, noko bie a edwɛkɛ gyɛne mɔɔ baboa wɔ tievolɛma la noko wɔ nu.

Amaa wɔahola wɔadi edwɛkɛ nu la, ɛbahola wɔalumua wɔabobɔ edwɛkɛ titile ne mɔ wɔ wɔ mukenye ne anu. Ka edwɛkɛ nzinrenzinra mɔɔ bamaa bɛanwu ninyɛne mɔɔ ɛbaha nwolɛ edwɛkɛ la, ɛbahola wɔabiza kpuyia anzɛɛ wɔava neazo sikalɛ mɔɔ ka ngyegyelɛ mɔɔ ɛbali nwolɛ gyima anwo edwɛkɛ la. Ɛbahola wɔaha edwɛkɛ titile mɔɔ wɔ nu la anwo edwɛkɛ na akee wɔadiedia bɛ ngoko ngoko. Akee kilehile ko biala anu wɔ wɔ ɛdendɛlɛ ne anu. Ɛbahola wɔazi edwɛkɛ ne mɔ azo wɔ wɔ ɛdendɛlɛ ne anu ɔlua edwɛkɛ titile ko biala mɔɔ ɛbazia wɔaha nwolɛ edwɛkɛ kolaa na wɔahɔ fofolɛ zo la azo. Anzɛɛ ɛbahola wɔalua neazo mɔɔ maa bɛnwu kɛzi bɛbava edwɛkɛ titile ne bɛali gyima la azo wɔali nwolɛ gyima. Eza ɛbahola wɔazi edwɛkɛ titile ne mɔ azo wɔ wɔ adwulaleɛ ne anu wɔava wɔadi nu, wɔahwe adwenle wɔahɔ zo wɔamaa bɛanwu ngakyile mɔɔ wɔ edwɛkɛ ne anu, wɔabua kpuyia ne mɔ mɔɔ ɛbizale la, anzɛɛ wɔamaa bɛanwu ngyegyelɛ ne mɔ mɔɔ ɛhanle nwolɛ edwɛkɛ la sɔbelɛ.

Mɔɔ boka anwuma ɛke ɛdeɛ ne anwo la a le kɛ, tendɛvolɛ mɔɔ lɛ anwubielɛ la gua ɔ nye aze nea menli mɔɔ bɛwɔ ye tievolɛma ne anu la kpalɛ. Saa ɔyɛ se ɔmaa bie mɔ kɛ bɛbade edwɛkɛ bie abo a, tendɛvolɛ ne nwu ye. Saa edwɛkɛ ne hyia a, ɔkilehile nuhua bieko. Noko bie a edwɛkɛ agbɔkɛ ko ne ala mɔɔ ɔbazi zo la ɛnrɛmaa ɔnrɛdwu ye bodane ne anwo. Dɔɔnwo boka ɛhilehilelɛ nwo tɛla ɛhye. Ɔnle kɛ ɔyɛ kyengye. Bie a ɔbahyia kɛ ɔfa edwɛkɛ bie mɔ ɔwula ye ɛdendɛlɛ ne anu ɛkɛ ne ala. Kɛzi ɛbazukoa kɛ ɛbali tievolɛma ne ngyianlɛ nwo gyima wɔ adenle ɛhye azo la a bahile kɛzi ɛle kilehilevolɛ kpalɛ la.