ƐZUKOALƐDEƐ 14

Maa Edwɛkɛ Titili Ne Mɔ Ɛla Ali

Hibuluma 8:1

MƆƆ ƆHYIA KƐ ƐYƐ: Boa wɔ tievolɛma ne maa bɛli wɔ ɛdendɛlɛ ne anzi, na maa bɛnwu kɛzi edwɛkɛ titili biala mɔɔ wɔ nu la nee wɔ bodane yɛɛ wɔ edwɛkɛtile ne yia la.

KƐZI ƐBAYƐ YE LA:

Nyia bodane. Suzu wɔ ɛdendɛlɛ ne anwo nea saa ye bodane a le kɛ ɔmaa bɛade edwɛkɛ bie, bɛalie bɛali, anzɛɛ ɔmaa bɛ anwosesebɛ a. Akee di nwolɛ gyima maa ɔ nee ye ɛyia. Nea kɛ edwɛkɛ titili biala mɔɔ wɔ nu la boa maa ɛdwu wɔ bodane ne anwo.

Biza ɛ nwo kɛ: ‘Kpuya boni a me nye la kɛ me tievolɛma ne babiza a? Na saa bɛnyia nwolɛ mualɛ a, kpuya bieko boni a bɛbahola bɛabiza a?’ Hyehyɛ wɔ edwɛkɛ ne wɔ zɔhane adenle ne azo amaa wɔ tievolɛma ahola ali ɛ nzi, bɛade mɔɔ ɛlɛka la abo na bɛalie wɔ edwɛkɛ ne bɛado nu.
Si wɔ edwɛkɛtile ne azo. Twe adwenle kɔ wɔ edwɛkɛtile ne azo fane dɔɔnwo ɔlua edwɛkɛ agbɔkɛ titili mɔɔ wɔ nu mɔɔ ɛbazi zo wɔ wɔ ɛdendɛlɛ ne anu la azo.
Maa wɔ edwɛkɛ titili ne mɔ anu ɛla ɛkɛ na ɔyɛ sikalɛ. Kpa edwɛkɛ titili mɔɔ nee wɔ edwɛkɛtile ne yia la ala. Nea kɛ ɛbahola wɔahilehile nu kpalɛ wɔ mekɛ nloa. Te wɔ edwɛkɛ titili ne mɔ azo, maa bɛnwu edwɛkɛ titili ne mɔ. Ɛwie ko a gyinla na wɔahɔ fofolɛ zo na maa ɔ muala ɛdoɔdoa zo kɛnlɛma.

Ɛbahola wɔabobɔ wɔ edwɛkɛ titili ne mɔ azo wɔ wɔ mukenye ne anu amaa yeaboa wɔ tievolɛma yeamaa bɛali ɛ nzi anzɛɛ bobɔ zo bieko wɔ wɔ adwulaleɛ ne anu amaa bɛahakye.