“Bɛnlea Kɛzi Bɛtie Edwɛkɛ La Boɛ”

EDWƐKƐ ɛdielɛ hyia kpalɛ wɔ debie ɛzukoalɛ nu. Ɔbahola yeanyia anyelazo mɔɔ awie lɛ kɛ ɔbanyia ngoane la azo tumi. Mɔɔ Gyihova ɛlɛsiezie ɔ nwo alie ye menli avi Yigyibiti akɛlɛ ɛzonlenlɛ bo la, ɔluale Mosisi anwo zo ɔvale adehilelɛ mɔɔ saa bɛdi zo a ɔbamaa bɛalie bɛ belamunli mralɛ bɛavi anwumabɔvolɛ sɛkyevolɛ ne asa nu la ɔmanle Yizilayɛ mgbanyima. (Ade. 12:21-23) Mgbanyima ne mɔ noko hanle edwɛkɛ ne hilele awuke ko biala anu amra. Bɛhanle ye bɛ nloa. Ɛnee ɔwɔ kɛ menli ne tie ye boɛ. Duzu a bɛyɛle a? Baebolo ne bɔ amaneɛ kɛ: “Na kɛmɔ [Gyihova] zele Mosisi nee Aalɔn la, zɔhane ala yɛɛ Yizilayɛma yɛle a.” (Ade. 12:28, 50, 51) Ɛhye manle bɛliele Yizilayɛma wɔ nwanwane adenle zo.

Ɛnɛ, Gyihova ɛlɛsiezie yɛ amaa ɛlielɛ kpole bie. Ɔwɔ kɛ yɛtie adehilelɛ mɔɔ ɔfa ɔmaa yɛ la kpalɛ. Ɔfa adehilelɛ ɛhye mɔ ɔmaa wɔ asafo ayia ne mɔ abo. Asoo ɛlɛnyia ayia ɛhye mɔ azo nvasoɛ kpalɛ? Dɔɔnwo gyi kɛzi ɛtie edwɛkɛ la azo.

Asoo ɛfa edwɛkɛ titile mɔɔ wɔ adehilelɛ mɔɔ bɛfa bɛmaa wɔ ayia ne mɔ abo la ɛsie? Asoo ɔle wɔ subane kɛ dapɛne biala ɛbakpondɛ ndenle mɔɔ ɛbalua zo wɔava adehilelɛ mɔɔ bɛfa bɛmaa la wɔali gyima wɔ wɔ ɛbɛlabɔlɛ nu anzɛɛ wɔaha nwolɛ edwɛkɛ wɔahile awie mɔ ɔ?

Siezie Wɔ Ahonle

Amaa yɛanyia adehilelɛ mɔɔ bɛfa bɛmaa wɔ Keleseɛne ayia bo azo nvasoɛ la, ɔwɔ kɛ yɛsiezie yɛ ahonle. Mɔɔ zile wɔ Dwuda Belemgbunli Gyɛhɔhyafate mekɛ zo la maa yɛnwu deɛmɔti ɛhye hyia la. Gyɛhɔhyafate vale akɛnrasesebɛ gyinlanle nɔhalɛ ɛzonlenlɛ nzi. ‘Ɔzɛkyele ɛleka ne mɔ mɔɔ menli mɔɔ ɛnze Nyamenle la sonle la wɔ Dwuda maanle ne anu’ na ɔmanle ye mgbanyima, Livaema nee ɛsɔfo ne mɔ hɔhilehilele menli mɔɔ wɔ Dwuda azuamgbole ne mɔ azo la Gyihova Mɛla ne. “Noko yeanzɛkye ɛleka ne mɔ mɔɔ menli mɔɔ ɛnze Nyamenle la sonle la.” (2 Edk. 17:6-9; 20:33) Ɛnee awozonle ɛzonlenlɛ nee Gyihova mɔɔ bɛsonle ye wɔ adenle mɔɔ ɛnfɛta azo wɔ awozonle ɛzonlenlɛ ɛleka ne la ɛzɔ ndinli yemɔti bɛangola ɔ bo tu.

Duzu ati a adehilelɛ mɔɔ Gyɛhɔhyafate vale manle bɛ la annyia bɛ nwo zo tumi angyɛ ɛ? Kɛlɛtokɛ ne toa zo kɛ: ‘Ɛnee menli ne ɛtɛsieziele bɛ ahonle ɛtɛmanle bɛ ze mɔ Nyamenle ne.’ Bɛdele noko bɛanva bɛanli gyima. Bie a bɛdele nganeɛ kɛ ɔyɛ se kɛ bɛbahɔ Gyɛlusalɛm ɛzonlenlɛ sua ne anu bɛahɔbɔ afɔle. Kɛzi ɔde ye biala la, ɛnee bɛnlɛ diedi.

Amaa yɛanzia yɛangɔnli Seetan ewiade ne anzi la, ɔwɔ kɛ yɛsiezie yɛ ahonle ne yɛmaa ɔtie adehilelɛ mɔɔ Gyihova ɛlɛfa amaa yɛ ɛnɛ la. Adenle boni azo? Adenle titile ko a le asɔneyɛlɛ. Ɔwɔ kɛ yɛyɛ asɔne kɛ Nyamenle ɛmaa yɛva anyezɔlɛ yɛlie adehilelɛ mɔɔ ɔfa ɔmaa yɛ la yɛdo nu. (Edw. 27:4; 95:2) Ɛhye baboa yɛ yeamaa yɛahile yɛ mediema mɔɔ ɔnva nwo kɛ bɛtɔ sinli la, bɛmaa Gyihova fa bɛ di gyima wɔ ye menli ne ɛhilehilelɛ nu la anwo anyezɔlɛ. Ɔbamaa yɛayɛ Gyihova mo wɔ ninyɛne fofolɛ mɔɔ yɛlɛsukoa nee adenle mɔɔ yɛnyia kɛ yɛbamaa anyezɔlɛ mɔɔ yɛlɛ yɛmaa ninyɛne dɛba mɔɔ yɛzukoa la ayɛ kpole la anwo. Amaa yɛ nye alie Nyamenle ɛhulolɛdeɛ ɛyɛlɛ nwo bɔkɔɔ la, yɛyɛ asɔne kɛ: “O Gyihova, kilehile me wɔ adenle ne. . . . Maa me ahonle ɛyɛ ko na ɔzulo wɔ duma.”​—Edw. 86:11, NW.

Fa Wɔ Adwenle Sie Zo

Edwɛkɛ mɔɔ yɛngola yɛndie ye kpalɛ la gyi ninyɛne dɔɔnwo azo. Bie a adwenleadwenle ɛvo yɛ nwo zo. Bie a dede nee menli mɔɔ ɛlɛdi akɔneaba la bahola ahwehwe yɛ adwenle. Saa yɛ nwo ɛnva yɛ a ɔbamaa yeayɛ se kɛ yɛbava yɛ adwenle yɛazie edwɛkɛ ne azo. Ngakula noko ta gyegye bɛ awovolɛ. Duzu a bahola aboa yɛ yeamaa yɛava yɛ adwenle yɛazie gyimalilɛ ne azo a?

Yɛ nye boa kpalɛ wɔ ninyɛne mɔɔ yɛfa yɛ adwenle yɛsie zo la anu. Nea tendɛvolɛ ne amaa yeaboa wɔ yeamaa wɔava wɔ adwenle wɔazie edwɛkɛ ne azo. Saa ɔbɔ ngɛlɛlera bie na ɛze ye bɔbɔ a, buke na nea nuhua wɔ mekɛ mɔɔ ɔlɛkenga la. Koati kɛ ɛbado ɛ nye wɔ ɛleka biala mɔɔ dede wɔ anzɛɛ menli ɛlɛdi akɔneaba la. Saa ɛ nye twehwe wɔ adwenle kɔ edwɛkɛ biala azo a, ɛnrɛde edwɛkɛ mɔɔ bɛlɛka wɔ bama ne azo la amuala.

Saa “adwenleadwenle” maa ɔyɛ se kɛ ɛbava wɔ adwenle wɔahɔ gyimalilɛ ne azo a, sɛlɛ Gyihova kɛ ɔmaa ɛnyia adwenle nee ahonle mɔɔ bamaa wɔadie la. (Edw. 94:19; Fel. 4:6, 7) Saa ɔbahyia a, yɛ ye fane dɔɔnwo. (Mat. 7:7, 8) Gyihova a ɛyɛ asafo ayia ne mɔ anwo ngyehyɛleɛ ɛmaa yɛ a. Ɛbahola wɔanyia anwodozo kɛ ɔkpondɛ kɛ ɛnyia zolɛ nvasoɛ.​—1 Dwɔn 5:14, 15.

Ɛdendɛlɛ Ɛdielɛ

Bie a ɛbahola wɔahakye edwɛkɛ titile mɔɔ ɛdele ye wɔ ɛdendɛlɛ bie mɔ anu la. Noko, ɛdendɛlɛ ɛdielɛ ɛngyi edwɛkɛ titile mɔɔ ɛbahɛlɛ la ala azo. Ɛdendɛlɛ le kɛ adendulɛ la. Ɛbanwu ninyɛne ngɛnlɛma wɔ adenle zo ɛdeɛ, noko ɛleka mɔɔ ɛlɛkɔ la a hyia a, bodane ne. Bie a tendɛvolɛ ne ɛlɛbɔ mɔdenle amaa tievolɛma ade edwɛkɛ bie abo anzɛɛ yeamaa bɛayɛ nwolɛ debie.

Suzu ɛdendɛlɛ mɔɔ Dwɔhyua manle hilele Yizilayɛ maanle ne mɔɔ bɛhɛlɛ ye wɔ Dwɔhyua 24:1-15 la anwo nea. Ɛnee ye bodane a le kɛ ɔmaa menli ne agyinla nɔhalɛ ɛzonlenlɛ nzi kpundii ɔlua bɛ nwo mɔɔ bɛbahwe ye bɔkɔɔ bɛavi maanle mɔɔ ɛbɔ bɛ ɛyia awozonle ɛzonlenlɛ ne anwo la azo. Duzu ati a ɛnee ɛhye hyia a? Awozonle ɛzonlenlɛ mɔɔ ɛnee ɛbu la vale gyinlabelɛ kpalɛ mɔɔ maanle ne lɛ wɔ Gyihova anyunlu la dole esiane nu. Menli ne diele Dwɔhyua edwɛkɛ na bɛhanle kɛ: ‘Yɛnrɛgyakyi Gyihova yɛnrɛzonle awozonle fee! Yɛbazonle Gyihova.’ Na bɛyɛle ye zɔ!​—Dwɔh. 24:16, 18, 31.

Ɛlɛtie ɛdendɛlɛ a, bɔ mɔdenle kɛ ɛbanwu ye bodane ne. Suzu kɛzi edwɛkɛ titile mɔɔ tendɛvolɛ ne ka la boa maa ɛdwu bodane zɔhane anwo la. Biza ɛ nwo kɛ, duzu a edwɛkɛ ne kpondɛ kɛ meyɛ a?

Edwɛkɛ Ɛdielɛ Wɔ Adawubɔlɛ Mekɛ

Ɛzonlenlɛ Nyianu ne foa bie mɔ, Ɛzinzalɛ Arane Ɛzukoalɛ ne, nee Asafo Baebolo Ɛzukoalɛ ne le kpuyia nee mualɛ mɔɔ gyi Baebolo ne azo.

Wɔ adenle bie azo, saa adawubɔlɛ ne ɛlɛkɔ zo na ɛtie a, ɔle kɛ ɛboka nwolɛ a bɛlɛbɔ adawu ne a. Amaa wɔanyia zolɛ nvasoɛ bɔkɔɔ la, tie ye kpalɛ. Nea kɛzi adawubɔlɛ ne ɛlɛkɔ ye la. Yɛ kɛzi ahenle mɔɔ ɛlɛnea zo la ɛlɛsi edwɛkɛtile ne nee edwɛkɛ titile ne azo la nzonlɛ. Bua ye kpuyia ne mɔ wɔ wɔ adwenle nu. Saa awie mɔ ɛlɛkilehile edwɛkɛ ne nee kɛzi ɔfane yɛ nwo la anu a, anrɛɛ tie. Saa ɛyɛ kɛzi awie mɔ ɛlɛkilehile edwɛkɛ ne anu la nzonlɛ a, ɔbamaa wɔanyia nwolɛ ndelebɛbo kpole wɔ adenle ngakyile zo. Fa ɛ nwo wula adawubɔlɛ ne anu na da wɔ diedi ne ali.​—Wulo. 1:12.

Ɛdumua ɛsukoa ninyɛne mɔɔ bɛbava bɛali gyima la kolaa na wɔahɔ a, ɔbamaa wɔava wɔ adwenle wɔazie adawubɔlɛ ne azo na wɔali mualɛ ngakyile ne mɔ anzi. Saa wɔ tɛnlabelɛ ne maa ɔyɛ se kɛ ɛbazukoa ninyɛne ne kpalɛ a, yeanyɛ boɛ fee la, fa mekɛ ekyii kenga nuhua nwu nwolɛ edwɛkɛ ekyi kolaa na wɔahɔ debiezukoalɛ. Saa ɛyɛ ɛhye a ɔbamaa adawubɔlɛ ne aboa wɔ kpalɛ.

Kɛzi Bɛtie Edwɛkɛ Wɔ Nyianu Bo

Ɔyɛ a ninyɛne mɔɔ twehwe adwenle la dɔɔnwo wɔ maangyebakyi nee maanzinli nyianu bo tɛla asafo debiezukoalɛ bo. Ɛhye bahola amaa edwɛkɛ ne ɛdielɛ ayɛ se. Duzu a bahola aboa yɛ a?

Mɔɔ hyia la a le kɛ ɛbala wɔalie ɛ menle kpalɛ wɔ nɔe ne. Kolaa na gyimalilɛ ne abɔ ɔ bo alehyenlɛ biala la, maa edwɛkɛtile ne ɛdɛnla wɔ adwenle nu. Nea edwɛkɛtile ko biala na bɔ mɔdenle kɛ ɛbanwu edwɛkɛ mɔɔ bɛbaha wɔ nwolɛ la. Fa wɔ Baebolo ne di gyima kpalɛ. Menli dɔɔnwo ɛnwu kɛ, saa bɛkɛlɛ edwɛkɛ titile ne mɔ a, ɔboa bɛ ɔmaa bɛfa bɛ adwenle bɛsie gyimalilɛ ne azo. Kɛlɛ adehilelɛ mɔɔ ɛkulo kɛ ɛfa ɛdi gyima wɔ wɔ ɛbɛlabɔlɛ nee daselɛlilɛ nu la. Saa bɛlɛkɔ nyianu ne abo anzɛɛ sua nu alehyenlɛ biala a, bɛzuzu nuhua edwɛkɛ ekyi anwo. Ɛhye baboa wɔ yeamaa edwɛkɛ ne aha ɛ ti anu.

Kɛzi Bɛtete Ngakula Bɛmaa Bɛtie

Keleseɛnema awovolɛ bahola aboa bɛ mra​—bɔbɔ ngakula ngyikyi​—bɛamaa bɛanwu nrɛlɛbɛ mɔɔ bamaa bɛanyia “ngoanelielɛ” ɔlua asafo debiezukoalɛ, maangyebakyi nee maanzinli nyianu mɔɔ bɛ nee bɛ bahɔ la azo. (2 Tem. 3:15) Kɛmɔ asolo kakula biala tɛnlabelɛ la ati, ɔhyia nwunu na bɛaboa bɛ bɛamaa bɛazukoa kɛzi bɛtie edwɛkɛ kpalɛ la. Bie a nzuzulɛ mɔɔ doa zo la baboa wɔ.

Bɛwɔ sua nu a, yɛ ngyehyɛleɛ maa ngakula ngyikyi ne mɔ ɛdɛnla aze koonwu na bɛgenga anzɛɛ bɛnlea nvoninli mɔɔ wɔ yɛ Keleseɛne mbuluku ngakyile ne mɔ anu la. Mmafa nwɔhoalilɛ ninyɛne ɛdielie ngakula ne mɔ anye wɔ ayia ne mɔ abo. Kɛmɔ ɛnee ɔde wɔ tete Yizilayɛ la, zɔhane ala a ɛnɛ ngakula ba ayia ne mɔ abo ‘amaa bɛadie mɛla ne’ na bɛazukoa a. (Mɛla 31:12) Awovolɛ bie mɔ fa mbuluku mɔɔ bɛlɛsukoa la bie maa ngakula ngyikyi bɔbɔ. Saa ngakula ne mɔ ɛlɛnyi a, boa bɛ maa bɛziezie bɛ nwo bɛmaa gyimalilɛ mɔɔ tievolɛma kola fa bɛ nwo wula nu la.

Ngɛlɛlera ne maa yɛnwu kɛ Gyihova mɔɔ yɛbadie ye na yɛali ye edwɛkɛ zo la bɔ abusua. Yɛkola yɛnwu ɛhye wɔ edwɛkɛ mɔɔ Mosisi hanle hilele Yizilayɛma la anu: “Meva ngoane nee ewule, yɛɛ saleɛ nee munzule mezie bɛ nyunlu. Zɔhane ati bɛva ngoane.  . . Bɛhulo [Gyihova] bɛ Nyamenle ne, bɛdie ɔ ne na bɛdudu bɛhisa ye.” (Mɛla 30:19, 20) Ɛnɛ, saa yɛbanyia Nyamenle anyunlu ɛlolɛ nee dahuu ngoane a, ɔwɔ kɛ yɛtie adehilelɛ mɔɔ Gyihova fa maa la na yɛfa yɛdi gyima. Nea kɛzi ɔhyia kɛ yɛbadie Gyisɛse folɛdulɛ ɛhye a: “Bɛnlea kɛzi bɛtie edwɛkɛ la boɛ”!​—Luku 8:18, NW.