Kɛzi Ɔwɔ Kɛ Yɛsiezie Yɛ Nwo Yɛmaa Ɛzonlenlɛ Nyianu ne La
1. Ɛzonlenlɛ Nyianu ne bodane a le duzu, na kɛzi yɛbahola yɛanyia nvasoɛ kpole yɛavi nu ɛ?
1 Bɛyɛ Ɛzonlenlɛ Nyianu ne kɛ ɔboa yɛ ɔmaa yɛyɛ yɛ ɛzonlenlɛ gyima ne kpalɛ. Debie mɔɔ yɛsuzu nwo titile la a le Belemgbunlililɛ edwɛkpa ne, ɛdoavolɛyɛlɛ nee Nyamenle ndɛnebualɛ ne mɔɔ ɛlɛba la anwo nolobɔlɛ. (Mat. 28:20; Mak. 13:10; 2 Pita 3:7) Saa yɛsiezie yɛ nwo kpalɛ yɛmaa nyianu ɛhye mɔɔ anwo hyia la na yɛmaa mualɛ wɔ ɔ bo a, ɔboa yɛ.
2. Kɛzi yɛbahola yɛaziezie yɛ nwo yɛadie ɛdendɛlɛ ɛ?
2 Ɛdendɛlɛ: Bɛta bɛkile tendɛvolɛ ne ɛleka mɔɔ ɔbanwu edwɛkɛ ne mɔɔ ɛdendɛlɛ ne gyi zo la. Ɛbahola wɔazuzu edwɛkɛ ne anwo, wɔanlea ngɛlɛlera ne mɔɔ bɛhwe adwenle bɛhɔ zo la, na wɔadwenledwenle kɛzi ɛbahola wɔava edwɛkɛ ne wɔali gyima wɔ daselɛlilɛ nu la anwo.
3. Duzu a yɛbahola yɛayɛ yɛava yɛaziezie yɛ nwo yɛamaa kpuyia nee mualɛ adawubɔlɛ a?
3 Kpuyia nee Mualɛ Adawubɔlɛ: Bɛbayɛ foa ɛhye kɛ Watchtower Ɛzukoalɛ la, ɔlɛ mukenye nee adwulaleɛ sikalɛ. Pɛ edwɛkɛtitile mɔɔ wɔ ɛdendɛkpunli ko biala anu la abo, na siezie ɛ nwo kɛ ɛbaha edwɛkɛ sikalɛ mɔɔ si edwɛkɛtitile ne azo la.
4. Kɛzi yɛbahola yɛaziezie yɛ nwo yɛamaa tievolɛma adawubɔlɛ ɛ?
4 Tievolɛma Adawubɔlɛ: Bɛbamaa foa ɛhye kɛ ɛdendɛlɛ la, noko tendɛvolɛ ne bavɛlɛ tievolɛma kɛ bɛmaa mualɛ. Saa ɛpɛ edwɛkɛtitile ne mɔ abo na ɛkenga ngɛlɛlera mɔɔ bɛhwe adwenle bɛhɔ zo la a, ɛbahola wɔamaa kpuyia mɔɔ bɛbabiza la anwo mualɛ. Adiema ne mɔɔ ɛlɛdi foa ɛhye anwo gyima la babɔ mɔdenle biala ɔ nee tievolɛma ali edwɛkɛtitile ne mɔ anwo gyima.
5. Duzu a baboa yɛ yeamaa yɛanyia nvasoɛ dɔɔnwo yɛavi yɛkile ne mɔ anu a?
5 Yɛkile: Foa ne mɔ bie wɔ ɛkɛ a, bɛbayɛ yɛkile wɔ nu bɛava bɛahile kɛzi bɛbava edwɛkɛ ne bɛali gyima wɔ bɛ azɛlɛsinli ne anu la. Ɔwɔ kɛ bɛmaa mgbanyima, nolobɔlɛma mɔɔ bɔ mɔdenle anzɛɛ adekpakyelɛma yɛ yɛkile ne. Ɛlɛsiezie ɛ nwo wɔamaa foa ɛhye a, suzu kɛzi bɛbali nwolɛ gyima la anwo. Saa bɛyɛ edwɛkɛ mɔɔ bɛhile kɛ yɛha la anwo yɛkile a, suzu kɛzi ɛbahola wɔava wɔali gyima wɔ azua ngakyile nu la anwo. Nea nwu ye kɛ ɛlɛ mbuluku anzɛɛ magazine mɔɔ bɛbava bɛayɛ yɛkile ne la bie. Wɔ bɛ Abusua Ɛzonlenlɛ nɔsolɛ ne anu, bɛbahola bɛayɛ yɛkile ne mɔ bie bɛanlea.
6. Adwenle boni mɔ ati a yɛsiezie yɛ nwo yɛmaa Ɛzonlenlɛ Nyianu ne a?
6 Saa yɛsiezie yɛ nwo kpalɛ na yɛsuzu edwɛkɛ mɔɔ bɛbaha la anwo a, ɔmaa Ɛzonlenlɛ Nyianu ne yɛ anyelielɛ. Saa yɛyɛ ye zɔ a, ɔbamaa yɛamaa yɛ nwo ngoko anwosesebɛ. (Wulo. 1:11, 12) Saa yɛnyia mekɛ yɛsiezie yɛ nwo yɛmaa Ɛzonlenlɛ Nyianu ne a, ɔbaziezie yɛ kpalɛ yeamaa yɛayɛ yɛ gyima ne boɛ.—2 Tem. 3:17.