Maa Ɛ Nye Ɛlie Nyamenle Edwɛkɛ Ne Anwo

ANYELIELƐ a le ‘awie mɔɔ anye die Gyihova mɛla ne anwo la.’ Zɔhane sonla ne kenga Nyamenle Edwɛkɛ ne “alehyenlɛ nee aledwolɛ.” (Edw. 1:1, 2) Asoo ɛ nye die nwolɛ zɔhane? Kɛ ɔkɛyɛ na wɔamaa anyelielɛ mɔɔ Nyamenle Edwɛkɛ ne maa ɛnyia la ayɛ kpole ɛ?

Gyihova Ɛlɛtendɛ A Tie

Mmakenga edwɛkɛ agbɔkɛ ne ala. Pɛ edwɛkɛ ne mɔɔ ɛlɛkenga la anwo nvoninli. Yɛ kɛ ɛte menli mɔɔ bɛwɔ nu la ane. Saa ɛlɛkenga Baebolo adile mɔɔ lumua la a, tie Gyihova ane wɔ mekɛ mɔɔ ɔlɛda debie mɔɔ bɛyɛ bɛamaa azɛlɛ ne ayɛ ɛleka kpalɛ mɔɔ sonla badɛnla la ali la. Tie ye wɔ mekɛ mɔɔ ɔlɛka yeahile ɔ Ra ne, Dwinvolɛ Mɔɔ Ɛbe, kɛ mekɛ ɛdwu kɛ bɛbɔ alesama mɔɔ lumua la. Pɛ mɔɔ zile la anwo nvoninli: Adam nee Yive dele atua, Nyamenle buale bɛ ndɛne, na nzinlii ɔvoanle bɛ ɔvile Paladaese. (Mɔlebɛbo, adile 1-3) Mekɛ mɔɔ ɛlɛkenga kɛ ɛnelɛ bie vi anwuma lale Gyisɛse Kelaese ali kɛ Nyamenle Ara mɔɔ ɔkulo ye, na Nyamenle zoanle ye kɛ ɔrava ye ngoane ɔdo aze ɔmaa alesama la, nea kɛzi ɔbayɛ nwanwane a. (Mat. 3:16, 17) Bɔ mɔdenle kɛ ɛbanwu mɔɔ ɛzoanvolɛ Dwɔn yɛle wɔ mekɛ mɔɔ ɔdele kɛ Gyihova ɛlɛka kɛ: “Kɛkala, meyɛ ninyɛne kɔsɔɔti fofolɛ” la. (Yek. 21:5) Nɔhalɛ nu, saa ɛkenga Nyamenle Edwɛkɛ ne wɔ adenle ɛhye azo a ɔyɛ anyelielɛ!

Kɔ zo kenga kɛlɛtokɛ ne mɔɔ vi sunsum nu la na ɛbanwu kɛ Gyihova le tumivolɛ kpole mɔɔ ɔ nwo yɛ ɛzulolɛ a. Ɛbabikye Ahenle mɔɔ kulo yɛ na ɔse yɛ anwunvɔne la. Saa yɛbɔ mɔdenle kɛ yɛyɛ ye ɛhulolɛdeɛ a, ɔboa yɛ na ɔkile yɛ mɔɔ yɛyɛ a yɛ ɛbɛlabɔlɛ ne badenrɛ amaa yɛ la.​—Dwɔh. 1:8; Edw. 8:1; Aye. 41:10.

Saa ɛfa mekɛ dɔɔnwo ɛkenga Baebolo ne na ɛnyia ɛhulolɛ mɔɔ Nyamenle lɛ maa wɔ la anwo nrɛlɛbɛ dɔɔnwo a, ɔbamaa ɛ kunlu adwo ɛ nwo kpalɛ. Noko ɛ nye balie adɛla ɛhye. Saa mɔɔ ɛkenga la maa ɛnwu debie mɔɔ ɔbaboa wɔ yeamaa wɔali ngyegyelɛ nwo gyima nrɛlɛbɛ nu a, ɛbade nganeɛ kɛ edwɛndolɛnli ne mɔɔ ɔhanle kɛ: “Wɔ mɛla ne mɔ yɛ nwanwane; yemɔti mefa me ahonle muala medi zolɛ” la. (Edw. 119:129) Saa ɛdawɔ noko ɛnwu Ngɛlɛlera ne anu ngyinlazo bie mɔɔ ɔbaboa wɔ yeamaa wɔaziezie wɔ nzuzulɛ nee mɔɔ ɛkulo la wɔ adenle kpalɛ zo a, ɛ nye balie kpole.​—Aye. 55:8, 9.

Baebolo ne maa yɛ ɛbɛlabɔlɛ kpalɛ nwo adehilelɛ mɔɔ bɔ yɛ nwo bane ɔfi esiane nwo na ɔkile yɛ adenle kpalɛ ne. Mekɛ mɔɔ yɛlɛkenga la, yɛnwu ye kɛ Gyihova le Selɛ mɔɔ ze esiane mɔɔ wɔ nu kɛ yɛbali yɛ nwonane atiakunluwɔzo ɛtane ne anzi la. Ɔngulo kɛ yɛnwu amaneɛ wɔ ngyegyelɛ mɔɔ bavi ye ɛbɛla kpalɛ nwo ngyinlazo ne mɔɔ yɛbakpo anu ara la bie. Ɔdwenle yɛ nwo kpalɛ na ɔkulo kɛ yɛ ɛbɛla wie yɛ boɛ. Ye Edwɛkɛ ne mɔɔ yɛbagenga la baboa yɛ yeamaa yɛ nye alie nyilalɛ mɔɔ yɛnyia kɛ ɔle yɛ Nyamenle nee yɛ anwuma Selɛ la anwo.

Kenga Baebolo Ne Alehyenlɛ Biala

Edwɛndolɛnli ne hanle wɔ awie mɔɔ kenga Nyamenle Edwɛkɛ ne dahuu la anwo kɛ: “Ɔkpazi debie biala anu.” (Edw. 1:3) Ɔnva nwo kɛ yɛnli munli, na yɛde Seetan ewiade ɛtane ye anu, yɛɛ Abɔnsam ɛlɛbɔ mɔdenle kɛ ɔkye yɛ yeame la, saa yɛkenga Nyamenle Edwɛkɛ ne dahuu na yɛfa yɛyɛ gyima a, ɔbamaa yɛali konim wɔ debie biala mɔɔ fane yɛ nee Gyihova abusuabɔlɛ ne anwo la anu.

Kɛmɔ ngyehyɛleɛ dɛba ɛhye ɛlɛmia yɛ la ati, saa yɛnyia Bɔvolɛ ne adwenle wɔ mekɛ ekyi bie anu kenle biala bɔbɔ a, ɔbahola yeamaa yɛ anwosesebɛ. Bɛdabɛ mɔɔ bɛ diedi ne ati bɛguale bɛ efiade la asa hanle tɛkese mɔɔ ɔyɛ a ɔfinde edwɛkɛ mɔɔ wɔ adwelie ngɛlata nu la ala. Bɛpepɛle mɔɔ bɛnyianle la, bɛhyele bɛguale bɛ ti anu, na bɛdwenledwenlenle nwolɛ. Ɔnva nwo tɛnlabelɛ mɔɔ bɛwɔ nu la, bɛbɔle mɔdenle kɛ bɛkɛnyia Nyamenle Edwɛkɛ ne anu ndelebɛbo na Gyihova yilale bɛ. (Mat. 5:3, NW) Noko akee, yɛ nuhua dɔɔnwo lɛ fanwodi mɔɔ tɛla ɛhye la. Ɔnle kɛ yɛfa yɛsie yɛ ti anu kɛ Baebolo ne ngyɛnu bie mɔɔ yɛbagenga ye ndɛndɛ kenle ko biala la bayɛ nwanwane debie bie amaa yɛ. Noko, saa yɛyɛ ngyehyɛleɛ kpalɛ yɛkenga Baebolo ne dahuu, yɛdwenledwenle nwo na yɛfa yɛdi gyima wɔ yɛ ɛbɛlabɔlɛ nu a, yɛbanyia nyilalɛ.

Nɔhalɛ nu, ngyehyɛleɛ kpalɛ mɔɔ yɛbayɛ bɔbɔ la bahola azɛkye. Saa ɔba ye zɔhane a, ɔwɔ kɛ yɛyɛ ninyɛne mɔɔ hyia kpalɛ la. Kɛ neazo la, ɔnrɛra ye ɛlɛ kɛ yɛ nye fuu yɛnrɛnlo nzule kenle ko anzɛɛ kenle nwiɔ. Ɛhye ati, ɔnva nwo debie biala mɔɔ ɔbazi wɔ yɛ asetɛnla nu kenle biala la, ɔwɔ kɛ yɛnyia mekɛ yɛno nɔhalɛ nzule ne.​—Gyi. 17:11.

Kenga Nyamenle Edwɛkɛ Ne Amuala

Wɔgenga Baebolo ne amuala ɔ? Ɔbu bie mɔ anye kɛ bɛbagenga Mɔlebɛbo kɔdwu Yekile amuala bɛawie. Yemɔti, menli dɔɔnwo mɔɔ ɛnee kpondɛ kɛ bɛkenga Baebolo ne amuala la bɔle ɔ bo gengale Keleseɛnema Giliki Ngɛlɛlera ne. Duzu ati ɔ? Ɔluakɛ bie a bɛnwunle kɛ kɛmɔ bɛkpondɛ kɛ bɛfa Kelaese agyakɛ la ati Baebolo mbuluku ɛhye mɔ fane bɛ nwo. Anzɛɛ bie a bɛnwunle kɛ Keleseɛnema Giliki Ngɛlɛlera ne anzo​—ɛkyɛ Baebolo ne anu nna a, ɔle kpole ekyi ɔtɛla ko. Noko bɛwiele zɔhane mbuluku 27 ne kenga la, bɛhɔle Hibulu Ngɛlɛlera ne mɔɔ le mbuluku 39 la azo, bɛbɔle ɔ bo bɛgengale na bɛ nye liele nwolɛ. Bɛkawie Hibulu Ngɛlɛlera ne la, ɛnee bɛyɛ ngyehyɛleɛ mɔɔ maa bɛkenga Baebolo ne dahuu a. Yemɔti, bɛtoa zo bɛkenga Keleseɛnema Giliki Ngɛlɛlera ne bieko, na bɛtɛgyakyile ye ɛgengalɛ. Ɔrɛla ye kɛ ɛbamaa Nyamenle Edwɛkɛ ne ɛgengalɛ ayɛ wɔ subane dahuu.

Ɛze awie wɔ wɔ abusua anzɛɛ asafo ne anu mɔɔ ɔnze kenga ɔ? Duzu ati ɛndu ɛ nwo ɛmmaa ɛngenga Baebolo ne dahuu ɛngile ye a? Ɛbanyia nvasoɛ, na ɔdaye noko ɔbanyia nvasoɛ wɔ mekɛ mɔɔ ɔlɛdwenledwenle mɔɔ ɔdele la anwo na yeava yeali gyima wɔ ye ɛbɛlabɔlɛ nu la.​—Yek. 1:3.

Ɔdwu mekɛ ne bie a, ɛbahulo kɛ ɛbayɛ ninyɛne titile bie wɔaboka wɔ Baebolo ɛgengalɛ ne anwo. Ɛhye mɔ bie bahola amaa ɛ nye alie abusuabɔlɛ mɔɔ wɔ Baebolo ne foa ngakyile ne mɔ anu la anwo kpalɛ. Saa bɛyɛ ɛleka wɔ wɔ Baebolo ne anu mɔɔ ɔtwe adwenle ɔkɔ ngyɛnu gyɛne zo a, ɛhye bamaa wɔanwu tetedwɛkɛ nwo ninyɛne dɔɔnwo nee edwɛkɛ gyɛne mɔɔ ɔ nee bɛ le ko la. Ɛhye mɔ baboa wɔ yeamaa wɔanwu tɛnlabelɛ mɔɔ ɔmanle bɛhɛlɛle edwɛndolɛ ne mɔ nee ngɛlata mɔɔ Gyisɛse Kelaese ɛzoanvolɛ ne mɔ hɛlɛle la. Insight on the Scriptures bamaa wɔanyia menli, ɛleka ngakyile, nee subane ngakyile mɔɔ bɛha nwolɛ edwɛkɛ wɔ Baebolo ne anu la anwo edwɛkɛ dɔɔnwo. Mgbondabulɛ ɛleka ne mɔ maa yɛnwu Baebolo ngapezo mɔɔ ɛpe zo, ɔkile yɛ arelemgbunli nee ngapezoma mɔɔ ɛnee wɔ ɛkɛ wɔ mekɛ ko ne ala anu, na ɔkile mekɛ fɔɔnwo mɔɔ Baebolo nu edwɛkɛ dɔɔnwo sisile la.

Saa ɛdwenledwenle mɔɔ ɛsukoa la anwo a, ɔbamaa wɔade deɛmɔti ninyɛne bie mɔ zile wɔ Nyamenle menli avinli la abo. Eza noko ɛbanwu deɛmɔti Gyihova nee ye menli lile kɛmɔ ɔyɛle la. Ɛbanwu kɛzi Gyihova bu arane ne mɔ, menli nee sonla ko biala nyɛleɛ la. Ɛhye bamaa wɔanwu kɛzi Gyihova dwenle ninyɛne nwo la.

Saa ɛpɛ ɛleka mɔɔ Baebolo nu tetedwɛkɛ ne mɔ sisile la anwo nvoninli a, ɔbamaa ɛ nye alie nwolɛ kpole. Baebolo nu azɛkɛlata ne mɔ bamaa wɔanwu kɛzi azɛlɛ bie de nee ndenle mɔɔ deda ɛleka bie mɔ la ndendenle. Kɛ neazo la, nienwu a ɔbayɛ kɛ Yizilayɛma pɛle Nyevile Kɔkɔlɛ ne a? Kɛzi ɛnee Ɛwɔkɛ Azɛlɛ ne kpole de ɛ? Mɔɔ Gyisɛse ɛlɛyɛ ye azɛlɛ ye azo ɛzonlenlɛ gyima ne la, adenle tendenle nyɛ a ɔdiale a? Ninyɛne boni mɔ a Pɔɔlo nwunle bɛ wɔ ye edwɛkpatɛlɛvolɛ adendulɛ ne anu a? Azɛkɛlata nee azɛlɛ nwo edwɛkɛ mɔɔ bɛha la bamaa wɔanwu nwolɛ edwɛkɛ dɔɔnwo na yeamaa wɔade mɔɔ ɛlɛkenga la abo kpalɛ. Nienwu a ɛbanyia Baebolo azɛlɛ ne mɔ anwo azɛkɛlata a? Azɛkɛlata dɔɔnwo wɔ “See the Good Land” buluku ne anu. Bie mɔ wɔ New World Translation of the Holy Scriptures ne anu. Azɛkɛlata kɛyɛ 70 a wɔ Insight ne mɔ anu a, na bɛhyehyɛ azɛkɛlata nwo edwɛkɛ wɔ foa ne mɔɔ lumua la anzi. Fa Watch Tower Publications Index ne kpondɛ azɛkɛlata gyɛne. Saa ɛnlɛ ɛhye mɔ bie a, maa azɛkɛlata ne mɔ mɔɔ ba Ɛzinzalɛ Arane ne anu la ɛboa wɔ wɔ Baebolo ɛgengalɛ ne anu.

Wɔ Hibulu Ngɛlɛlera ne anu, Belemgbunli Devidi hanvole Gyihova kɛ: “O Nyamenle, wɔ adwenle ne mɔ sonle bolɛ maa me! Bɛ muala bɛbɔ nu a ɔle kpole kpalɛ!” (Edw. 139:17) Wɔ Keleseɛnema Giliki Ngɛlɛlera ne anu, ɛzoanvolɛ Pɔɔlo hanvole Gyihova ɔluakɛ ɔmanle ‘ye wienyi ne dale yɛ ahonle nu, amaa yɛanwu Nyamenle anyunlunyia ne mɔɔ ɛlɛta Kelaese anyunlu la.’ (2 Kɔl. 4:6) Devidi dɛnlanle aze ɛvolɛ dɔɔnwo kolaa na Pɔɔlo ara, noko bɛ mu nwiɔ bɛ nye liele Nyamenle Edwɛkɛ ne anwo. Zɔhane ala a saa ɛdawɔ noko ɛnyia mekɛ ɛkenga mɔɔ Gyihova ɛva ɛmaa wɔ wɔ ye Edwɛkɛ ne mɔɔ bɛvale sunsum bɛhɛlɛle la anu a, ɛ nye balie a.