Edwɛkɛsisilɛ Mɔɔ Tɔ Zo Nwiɔ

2 Akee Sɔlɔmɔn hanle kɛ bɛzi sua bɛmaa Gyihova duma ne+ na bɛzi sua* bɛmaa ye belemgbunlililɛ ne.+ 2 Sɔlɔmɔn yele gyimayɛvoma* 70,000, menli 80,000 mɔɔ bɛaze awolɛ wɔ awoka ne mɔ azo,+ yɛɛ menli 3,600 mɔɔ bɛanlea bɛ nwo zo la.+ 3 Eza Sɔlɔmɔn dole Taya Belemgbunli Haelam nrɛlaleɛ+ kɛ: “Kɛ mɔɔ ɛmaanle me papa Devidi sida mbaka ɛmaanle ɔzile sua* ɔdɛnlanle nu la, yɛ bie maa medame noko.+ 4 Kɛkala, mesi sua meamaa Gyihova me Nyamenle ne duma, meade nwolɛ meamaa ye, meayela ayilevuanlɛ+ wɔ ɔ nyunlu, na eza meava paano ne mɔɔ bɛgua ye ekpunli ekpunli* la meamaa ye,+ yɛɛ ɛyelalɛ afɔlebɔdeɛ ne mɔ, nwonlomɔ nee nɔsolɛ,+ wɔ Ɛnwomenlelielɛ kenle,+ siane fofolɛ+ yɛɛ yɛ Nyamenle Gyihova ɛvoyialilɛ mekɛ ne mɔ anu.+ Ɔle mɛla mɔɔ Yizilayɛma bɛali zolɛ dahuu a. 5 Sua ne mɔɔ mesi la bayɛ kpole, ɔluakɛ yɛ Nyamenle ne le bedevinli tɛla nyamenle gyɛne biala. 6 Na nwane a kɛhola kɛzi sua kɛmaa ye a? Ɔluakɛ ɔnzo anwuma nee anwuma anwuma nehane,+ ɔti mame bɔbɔ a le nwane mɔɔ ɔwɔ kɛ mesi sua memaa ye a? Mɔɔ mebahola meayɛ la a le kɛ mebazi ɛleka mɔɔ mebakpu afɔlebɔdeɛ meamaa ye la. 7 Ɔti fa dwinvolɛ mɔɔ ɛbe wɔ kɛzi bɛfa nvutuke, dwɛtɛ fufule, kɔbele,+ bulalɛ, boane enrinli buluwu nee kɔkɔlɛ afonla, ebo nee nyɛma buluwu bɛdi adwinli na eza ɔze kɛzi bɛse ninyɛne la bɛlɛ me. Ɔ nee me dwinvolɛma mɔɔ bɛbe mɔɔ me papa Devidi kpale bɛ la bɛayɛ gyima wɔ Dwuda nee Gyɛlusalɛm.+ 8 Na maa bɛva sida, dwunipa+ nee alegum mbaka+ bɛvi Lɛbanɔn bɛrɛlɛ me, ɔluakɛ meze ye wienyi kɛ wɔ sonvolɛma ɛbe wɔ Lɛbanɔn mbaka ɛpɛlɛ nu.+ Me sonvolɛma nee wɔ sonvolɛma babɔ nu ayɛ gyima+ 9 na bɛakpondɛ mbaka dɔɔnwo kpalɛ bɛamaa me, ɔluakɛ sua ne mɔɔ mesi la bayɛ kpole kpalɛ. 10 Na nea! Mebamaa wɔ sonvolɛma ne mɔɔ bapɛ mbaka ne la aleɛ:+ hwitii kɔɔ* 20,000, baale kɔɔ 20,000, nwanye baate* 20,000 yɛɛ nwole baate 20,000.”

11 Ɛhye ati Taya Belemgbunli Haelam hɛlɛle kɛlata ɛhye hɔmaanle Sɔlɔmɔn kɛ: “Kɛmɔ Gyihova kulo ye menli ne la ati, yezie wɔ bɛ belemgbunli.” 12 Akee Haelam hanle kɛ: “Ayɛlɛyelɛ ɛha Gyihova, Yizilayɛ Nyamenle ne mɔɔ bɔle anwuma nee aze* la, ɔluakɛ yemaa Belemgbunli Devidi ralɛ nrenyia mɔɔ ze nrɛlɛbɛ,+ ɔ nye gyi ɔ ti anwo na ɔlɛ ndelebɛbo,+ mɔɔ ɔbazi sua yeamaa Gyihova na yeazi bie yeamaa ye belemgbunlililɛ ne la. 13 Ɔti melɛsoa Haelam-ebae, dwinvolɛ mɔɔ ɛbe na ɔze gyima kpalɛ,+ 14 mɔɔ ye mame le Danenli na ye papa vi Taya la; yebe wɔ nvutuke, dwɛtɛ fufule, bulalɛ, awolɛ, mbaka, boane enrinli buluwu nee kɔkɔlɛ afonla, nyɛma buluwu, ɛdanlɛ kpalɛ yɛɛ ebo+ mɔɔ bɛfa bɛdi gyima la ɛyɛlɛ nu. Ɔkola ɔse debie biala na ɔdi adwinli biala mɔɔ ɛbaha kɛ ɔli la.+ Ɔ nee wɔ dwinvolɛma mɔɔ bɛbe nee me menle Devidi mɔɔ le wɔ papa la dwinvolɛma mɔɔ bɛbe la bayɛ gyima. 15 Ɔti maa me menle ɛva hwiiti, nwole nee nwanye ne mɔ mɔɔ ɔvale ɔbɔle ye sonvolɛma ne ɛwɔkɛ la ɛrɛla.+ 16 Na yɛbapɛ mbaka dodo biala mɔɔ ɛbahyia nwolɛ la yɛavi Lɛbanɔn,+ na yɛbakyekye bɛ avile yɛalua nyevile nye yɛara Dwɔpa;+ na wɔava wɔavi ɛkɛ ne wɔahɔ Gyɛlusalɛm.”+

17 Akee Sɔlɔmɔn dianle nyɛvolɛ mɔɔ wɔ Yizilayɛ azɛlɛ ne azo la amuala,+ wɔ menli mɔɔ ye papa Devidi dianle bɛ la anzi,+ na ɛnee bɛ dodo le 153,600. 18 Ɔti ɔmaanle bɛ nuhua 70,000 yɛle gyimayɛvoma,* 80,000 zele awolɛ+ wɔ awoka ne mɔ azo yɛɛ 3,600 nleanle menli ne anwo zo maanle bɛyɛle gyima ne.+