Edwɛkɛsisilɛ Mɔɔ Tɔ Zo Nwiɔ

3 Sɔlɔmɔn bɔle ɔ bo kɛ ɔsi Gyihova sua ne+ wɔ Gyɛlusalɛm wɔ Molaya Boka ne azo,+ ɛleka mɔɔ Gyihova yele ɔ nwo hilele ye papa Devidi,+ wɔ ɛleka mɔɔ Devidi zieziele wɔ Gyibɛsenli Ɔnan+ ma ɛwosolɛ ɛleka ne la. 2 Ɔbɔle ɔ bo kɛ ɔsi sua ne wɔ kenle mɔɔ tɔ zolɛ nwiɔ wɔ siane mɔɔ tɔ zolɛ nwiɔ, wɔ ye tumililɛ ɛvolɛ nna ne azo. 3 Na nɔhalɛ Nyamenle ne sua ne adiabo mɔɔ Sɔlɔmɔn wulale la tendenle le kubit 60 yɛɛ ye tɛtɛlɛ le kubit 20,+ kɛ mɔɔ ɛzuzudeɛ* dɛba ne de la. 4 Abenlana ne mɔɔ wɔ ɔ nyunlu la tendenle le kubit 20, ɔ nee sua* ne tɛtɛlɛ sɛ, yɛɛ ye anwumahɔlɛ le kubit 20;* na ɔholole nvutuke tagyee ɔguale ɔ kunlu amuala.+ 5 Ɔvale dwunipa ndaboa ɔzɛle sua kpole ne anu amuala, akee ɔholole nvutuke kpalɛ ɔguale nwolɛ,+ na ɔlile mrɛlɛ mbaka+ nee kyeenyi adwinli ɔguale nwolɛ.+ 6 Eza ɔvale awolɛ ngɛnlɛma mɔɔ sonle bolɛ la ɔduoduale sua ne anwo;+ na nvutuke+ mɔɔ ɔvale ɔyɛle gyima ne la le nvutuke mɔɔ bɛ nee ye vi Paveeyem. 7 Ɔholole nvutuke ɔguale sua ne, mgbunla ne mɔ, anlenkɛ ne anyunlu, ye bane ne mɔ yɛɛ nlenkɛ ne mɔ anwo;+ na ɔlile kyɛlɔbe adwinli ɔguale bane ne mɔ anwo.+

8 Akee ɔyɛle Nwuanzanwuanza Nu Nwuanzaanwu* ekpumgbunli* ne;+ ye tendenle nee sua mumua ne tɛtɛlɛ sɛ, ɔle kubit 20 yɛɛ ye tɛtɛlɛ le kubit 20. Ɔholole nvutuke kpalɛ talɛnte* 600 ɔguale nwolɛ.+ 9 Nvutuke mɔɔ bɛvale bɛyɛle pɛlɛko ne mɔ la ɛlomboɛ le hyikɛle* 50; na ɔholole nvutuke ɔguale anwuma ekpumgbunli ne mɔ anwo.

10 Akee ɔyɛle kyɛlɔbe nwiɔ ɔziele Nwuanzanwuanza Nu Nwuanzaanwu ekpumgbunli* ne anu, na ɔholole nvutuke ɔguale nwolɛ.+ 11 Kyɛlɔbe ne mɔ andɛba ne mɔ+ amuala tendenle le kubit 20; kyɛlɔbe ne mɔɔ limoa la andɛba ne ko tendenle le kubit nnu na ɔka sua ne bane ne, yɛɛ ɔ ndɛba ko ne noko tendenle le kubit nnu na ɔka kyɛlɔbe ɛhendeɛ ne andɛba ne mɔ ko. 12 Na kyɛlɔbe ɛhendeɛ ne andɛba ne ko tendenle le kubit nnu na ɔka sua ne bane ne, yɛɛ ɔ ndɛba ko ne noko tendenle le kubit nnu na ɔka kyɛlɔbe ne mɔɔ limoa la andɛba ne mɔ ko. 13 Kyɛlɔbe ɛhye mɔ andɛba ne mɔ mɔɔ bɛdɛlɛdɛlɛ nu la le kubit 20; na bɛgyigyi ɛkɛ yɛɛ bɛ nye kile ekpumgbunli kpole* ne anwo lɔ.

14 Eza ɔvale nyɛma buluwu, boane enrinli buluwu nee kɔkɔlɛ afonla, ebo yɛɛ ɛdanlɛ kpalɛ ɔyɛle mgbɛnu ɛdanlɛ,+ na ɔlile kyɛlɔbe adwinli ɔguale nu.+

15 Akee ɔyɛle mpila nwiɔ+ wɔ sua ne anyunlu, bɛ ndendenle le kubit 35, na tile ne mɔɔ wɔ pila ko biala azo la le kubit nnu.+ 16 Na ɔyɛle kyeenyi mɔɔ le kɛ ndweabane la na ɔvale ɔguale mpila ne mɔ ati zo, na ɔyɛle pɔmegelanate 100 ɔsosɔle kyeenyi ne mɔ. 17 Ɔvale mpila ne mɔ ɔzieziele ɛzonlenlɛsua ne anyunlu, ko gyi fema zo* yɛɛ ko gyi bɛne zo;* ɔvɛlɛle mɔɔ gyi fema zo la Gyeeken* yɛɛ mɔɔ gyi bɛne zo la Bowaze.*