Edwɛkɛsisilɛ Mɔɔ Tɔ Zo Nwiɔ

1 Devidi ara Sɔlɔmɔn anwo yɛle se kpalɛ wɔ ye belemgbunlililɛ ne anu, na Gyihova ye Nyamenle ne nee ye luale na ɔmaanle ɔyɛle sonlakpole kpalɛ.+

2 Sɔlɔmɔn zoanle maanle bɛhɔvɛlɛle Yizilayɛma amuala, mgbanyima mɔɔ nea menli apenle apenle nee ɛya ɛya nwo zo, ndɛnebuavolɛma, nee Yizilayɛ mgbanyima kɔsɔɔti, mbusua mgbanyima. 3 Akee Sɔlɔmɔn nee asafo ne amuala hɔle ɛleka mɔɔ bɛsonle* la wɔ Gebɛyɔn,+ ɔluakɛ ɛkɛ ne a ɛnee nɔhalɛ Nyamenle ne nyianu ɛdanlɛsua ne wɔ a, ɛdanlɛsua ne mɔɔ Gyihova sonvolɛ Mosisi zile ye wɔ fienemgbole ne anu la. 4 Noko ɛnee Devidi ɛhɔva nɔhalɛ Nyamenle ne Ɛlɛka ne ɛvi Keleate-gyialem+ ɛra ɛleka mɔɔ Devidi ɛziezie ɛmaa ye la; ɛnee yezi ɛdanlɛsua yemaa ye wɔ Gyɛlusalɛm.+ 5 Na bɛvale kɔbele afɔlemokyea ne+ mɔɔ Hɛɛ ara Yulae ara Bɛzalɛle+ yɛle la bɛziele Gyihova ɛdanlɛsua ne anyunlu; na Sɔlɔmɔn nee asafo ne yɛle asɔne wɔ ɔ nyunlu ɛkɛ.* 6 Akee Sɔlɔmɔn bɔle afɔle wɔ ɛkɛ wɔ Gyihova anyunlu, na ɔvale nane 1,000 ɔbɔle ɛyelalɛ afɔle wɔ nyianu ɛdanlɛsua ne kɔbele afɔlemokyea ne+ azo.

7 Zɔhane nɔe ne, Nyamenle yele ɔ nwo hilele Sɔlɔmɔn na ɔzele ye kɛ: “Biza debie mɔɔ ɛkulo kɛ meyɛ memaa wɔ la.”+ 8 Ɔti Sɔlɔmɔn hanle hilele Nyamenle kɛ: “Wɔla ɛlɔlɛ kpundii kpole ali wɔhile me papa Devidi,+ yɛɛ wɔyɛ me belemgbunli wɔzie ɔ gyakɛ anu.+ 9 Ɔti, O, Gyihova Nyamenle, maa ɛwɔkɛ mɔɔ ɛbɔle me papa Devidi la ɛyɛ ɛkɛ,+ ɔluakɛ wɔzie me belemgbunli wɔ menli mɔɔ bɛ nwo zonle kɛ azɛlɛ nwo ɛnwea la azo.+ 10 Ɛhye ati maa me nrɛlɛbɛ nee ndelebɛbo+ maa menva menli menli ɛhye mɔ anyunlu,* ɔluakɛ nwane a bahola abua wɔ menli dɔɔnwo ɛhye mɔ ndɛne a?”+

11 Akee Nyamenle zele Sɔlɔmɔn kɛ: “Kɛmɔ ɛhye a wɔ ahonle kulo na wɔambiza anwonyia, agyapadeɛ yɛɛ enililɛ anzɛɛ menli mɔɔ kpɔ wɔ la ewule,* anzɛɛ wɔambiza ngoane tendenle,* emomu wɔbiza nrɛlɛbɛ nee ndelebɛbo kɛ ɛfa wɔabua me menli ne mɔɔ mezie wɔ belemgbunli wɔ bɛ nwo zo la ndɛne la ati,+ 12 mebava nrɛlɛbɛ nee ndelebɛbo ne meamaa wɔ; noko eza mebava anwonyia nee agyapadeɛ yɛɛ enililɛ mɔɔ arelemgbunli mɔɔ lile ɛ nyunlu la anu biala annyia ye yɛɛ mɔɔ bara ɛ nzi la anu biala noko ɛnrɛnyia ye la meamaa wɔ.”+

13 Ɔti Sɔlɔmɔn vile ɛleka mɔɔ bɛsonle* wɔ Gebɛyɔn+ la rale, ɔvile nyianu ɛdanlɛsua ne anyunlu ɔrale Gyɛlusalɛm; na ɔlile Yizilayɛma anwo zo belemgbunli. 14 Sɔlɔmɔn hɔle zo boɔboale ehwili nee mgbɔnwɔ* dɔɔnwo anloa; ɔnyianle ehwili 1,400 yɛɛ mgbɔnwɔ* 12,000,+ na ɔziele bɛ wɔ ehwili azuamgbole+ ne mɔ azo nee ɛleka mɔɔ bikye belemgbunli ne la wɔ Gyɛlusalɛm.+ 15 Belemgbunli ne maanle dwɛtɛ fufule nee nvutuke bule Gyɛlusalɛm kɛ awolɛ la,+ yɛɛ sida mbaka bule kɛ sikamɔ mbaka mɔɔ wɔ Hyifɛla la.+ 16 Bɛhɛlale Sɔlɔmɔn mgbɔnwɔ ne mɔ bɛvile Yigyibiti,+ na ɛnee belemgbunli ne gualilɛma ne kɔtɔ mgbɔnwɔ ekpunli* ne mɔ kɛ mɔɔ bɛ bolɛ de ala la.+ 17 Ehwili ko biala mɔɔ bɛhɛlale bɛvile Yigyibiti la bolɛ le dwɛtɛ fufule 600, yɛɛ ɛkpɔnwɔ ko biala le dwɛtɛ fufule 150; bɛdabɛ noko bɛkɔtɔne bɛ bɛmaa* Hɛtema nee Selea arelemgbunli ne mɔ amuala.