Orutaro Omuri Middle East—Baibuli Neegamba Ki?

Abantu boona omu nsi yoona beerarikiriire ahabw’orutaro rwa United States, Israeli, na Iran. Mbwenu shi orutaro orwo niruza kweyongyera ruhike n’aha mahanga agandi? Gavumenti shi nizibaasa kumaraho entaro, reero zireeteho obusingye omu nsi?

Abarikwetegyereza obunabi bwa Baibuli nibeebuuza yaaba orutaro oruri omu Middle East ruraabe entandikiro y’orutaro rwa Haramagedoni, orurikugambwaho omu kitabo kya Okushuuruurwa.

Baibuli neegamba ki?

Mbwenu shi gavumenti z’abantu niziija kumaraho orutaro oruri omu Middle East?

Baibuli neegira eti: “Mutaryesiga abanyiginya, n’obu yaakuba omuntu, otaine kuhwera kwona.”—Zaaburi 146:3.

Titurikumanya yaaba gavumenti ziraabaase kureetaho obusingye buringaniire omuri Middle East. Kwonka Baibuli neegira ngu tihariho mutegyeki, gavumenti nari ekibiina ky’abantu ekirikubaasa kumaraho entaro, reero kikareetaho obusingye obwabuzima. Ruhanga wenka niwe arikubaasa kumaraho ‘entaro okuhika aha muheru gw’ensi.’—Zaaburi 46:9.

• Kubaasa kumanya ebirikukiraho shoma Omunaara gw’Omurinzi ogwine omutwe “Entaro Niziija Kuhwaho—Zita?”

Mbwenu shi orutaro rw’omuri Middle East niruhikiiriza obunabi?

Baibuli neegira eti: ‘Nimwija kuhurira engamba n’okurangaanwa kwazo. . . . Eihanga niriija kuteera erindi ihanga, n’obugabe buteere obundi bugabe.’—Matayo 24:6, 7.

Orutaro rw’omuri Middle East oruriho hati ni kamwe aha bumanyiso oburikworeka “obunaku obu ensi egi erihweraho” kandi nirutuhamiza ngu turi ‘omu biro by’emperu.’ (Matayo 24:3; 2 Timoseo 3:1) Entaro ezi turikureeba obunaku obu nizooreka ngu Ruhanga ari haihi kugira eki yaakora kumaraho entaro n’oburemeezi obundi obureetaire abantu kubonabona.

• Kubaasa kumanya ebirikukiraho shoma ekicweka “Akamanyiso ‘k’Ebiro by’Emperu’ Nari ‘Obwire bw’Emperu’ ni Kaahi?”

Mbwenu shi Haramagedoni neija kutandikira omuri Middle East?

Baibuli neegira eti: “Yaabateeranira omu mwanya ogurikwetwa Haramagedoni omu Ruheburaayo.”—Okushuuruurwa 16:16.

Orutaro rwa Haramagedoni ti rutaro oruraabeho ahagati ya gavumenti z’abantu okutandikira omuri Middle East. Kureka n’orutaro rw’ensi yoona oruraabeho ahagati ya gavumenti z’abantu na Ruhanga.

• Kubaasa kumanya ebirikukiraho shoma ekicweka “Orutaro rwa Haramagedoni Niki?”

Niki ekirikubaasa kutuhwera kuguma twikaikaine omu biro ebi ebigumire?

Baibuli neegira eti: “Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza, kandi musiime.”—Abafilipi 4:6.

Yehovaa Ruhanga naayenda ngu tumushabe. Ahabw’okugira ngu Ruhanga naatutaho omutima, naija kuhurikiza okushaba kwaitu kandi atuhwere kwikaikana. (1 Petero 5:7) Omuringo gumwe ogu arikukora ekyo n’okutuhwera kwetegyereza ahabw’enki hariho entaro, obu ziraije kuhwaho n’eki araije kukora kumaraho obusaasi n’okubonabona.—Okushuuruurwa 21:3, 4.

• Kubaasa kumanya ebirikukiraho oku Ruhanga arikutuhwera, shoma ekicweka “Nimbaasa Kutunga Ebigambo Birikuhuumuriza omu Baibuli?.”