Obushaarizi Tiburikubaasa Kumaraho Oburemeezi

Abantu nyamwingi obunaku obu nibateekateeka ngu kihikire kwejumba omu by’obushaarizi kubaasa kumaraho obutabanguko nari haaba hariho oburemeezi obwine kushoboororwa. Kwonka emiteekateekyere nk’egyo neetaanira kimwe n’enyegyesa za Yesu Kristo n’eky’okureeberaho kye. Yetegyereze bimwe aha bi yaagambire n’ebi yaakozire.

Ebi Yesu yaagambire

Yesu omu Rubazo rwe rw’aha Rushozi orurikumanywa munonga, akeegyesa ngu ekiniga, obwinazi, n’obushaarizi tibirikubaasa kumaraho obutaikirizana. Teekateeka aha by’okureeberaho ebi.

• “Byona ebi mwenda ngu abantu babagirire, naimwe mube nikwo mwabagirira.” (Matayo 7:12; Luka 6:31) Ekiragiro eki, ekirikukira kwetwa Ekiragiro ky’Okutwarizana Gye,a nikituhiga kutwariza abandi nk’oku turikwenda batutwarize. Ahabw’okugira ngu tihariho n’omwe orikwenda kutwarizibwa omu muringo gw’obushaarizi, mbwenu shi ekyo tikishemereire kutuhiga kutwariza abantu boona omu muringo gw’ekitiinisa kandi ogw’embabazi n’obu twakuba tutarikwikirizana nabo?

• “Omuntu weena orikuteera oruhi rw’omushaya gwa buryo, omuhindurire ogwa bumosho.” (Matayo 5:38, 39; Luka 6:29) Yesu akaba atarikwegyesa ngu tushemereire kwikiriza abandi ngu batutwarize kubi. Kureka, akaba naashoboorora emiteekateekyere egwire ei abeebembezi b’ediini baabaire nibashagika ngu kihikire okuhoora enzigu. Akaba naayegyesa abakuratsi be ngu omu mwanya gw’okuhoora enzigu baatwarizibwa kubi, bateereho kutwaza omu muringo gw’obucureezi.b

• “Mukunde abazigu baanyu.” (Matayo 5:43, 44; Luka 6:27) Yesu akeegyesa ngu tushemereire kugirira abarikutwanga nari abarikututwariza kubi embabazi. Akaba atari kumanyisa ngu tushemereire kushagika emitwarize yaabo mibi.c Kwonka, twayoreka embabazi abarikutwanga, nikibaasa kubareetera kwikaikaikana kandi kibahige kutworeka embabazi.

Ebi Yesu yaakozire n’ebi araije kukora

Yesu akeegyesa ngu obushaarizi tiburikubaasa kumaraho oburemeezi kandi akagyendera aha bi yaayegyeise. Aha kiro eki yaakwatiirweho, omwe aha barukatsi be akateeraho kumurwanirira kwonka Yesu akagira ati: ‘Garura rurara yaawe omu kyobati kyayo; ahakuba boona abatwara rurara, nibaija kwitwa rurara.’ (Matayo 26:52) Yesu akooreka abazigu be rukundo arikusaasira abaabaire nibamubonabonesa, kandi akabashabira!—Luka 23:33, 34; 1 Petero 2:23.

Baibuli neeraganisa ngu Yesu, Mukama w’Obusingye juba naija kwihiraho kimwe obushaarizi bwona. (Isaaya 9:6, 7) Kubaasa kumanya ebirikukiraho aha nyentsya nungi egi, shoma ekicweka eki “Oku Entaro n’Obutabanguko Biraahweho.”