Okurwana Nikwija Kuhendera Ryari?—Baibuli Neegamba Ki?

“Hati nibwo bwire bw’okwemereza orutaro n’okururemesa okujanjaara. Hati nibwo bwire bw’okwezibirira kimwe,” bikagambwa Omuhandiiki Omukuru ow’Amahanga Ageeteeraine António Guterres aha bikwatiraine na Iran kutaahirira Israeli aha Rwamukaaga, Okwakana 13, 2024.

Okurwana omuri Asia n’eky’okureeberaho ky’okurwana okwijwire omu nsi.

“Ensi etwire erimu emihondano mingi y’obushaarizi kuruga obu habaho Orutaro rw’Ensi Yoona Orwa Kabiri, kandi entaro ezi niziteganisa abantu obuhumbi 2, nikyo kimwe kya kana eky’abantu omu nsi yoona.”—Bikagambwa Akakiiko k’Eby’okwerinda ak’Amahanga Ageeteeraine, Okwokubanza 26, 2023.

Amahanga agarimu entaro nigatwariramu Israeli, Gaza, Syria, Azerbaijan, Ukraine, Sudan, Ethiopia, Niger, Myanmar, na Haiti.a

Okurwana oku nikwija kuhendera ryari? Abeebembezi ensi nibabaasa kureetaho obusingye? Baibuli neegamba ki?

Ensi eijwiremu entaro

Entaro eziri omu nsi hati, nizooreka ngu muheru y’entaro zoona eri haihi kubaho. Entaro ezi nizihikiiriza obunabi bwa Baibuli oburikukwata aha bwire obu turimu. Obwire obu Baibuli neebweta ‘emperu’ y’entebeekanisa y’ensi egi embi.—Matayo 24:3.

• ‘Nimwija kuhurira [entaro n’amakuru agarikukwata aha ntaro]. Eihanga niriija kuteera erindi eihanga, n’obugabe buteere obundi bugabe.’—Matayo 24:6, 7.

Shoma ekicweka, “Akamanyiso ‘k’Ebiro by’Emperu’ Nari ‘Obwire bw’Emperu’ ni Kaahi?” kureeba oku entaro eziriho hati zirikuhikiiriza obunabi bwa Baibuli.

Orutaro oruraahendere entaro zoona

Baibuli neegamba aha kuhendera kw’emihondano y’abantu. Eki nikiija kubaho kita? Eki tikirikwija kureetwaho amaani g’abantu, kureka Haramagedoni, n’orutaro “orw’ekiro kikuru kya Ruhanga ow’Obushoboorozi Bwona.” (Okushuuruurwa 16:14, 16) Ruhanga naija kukoresa orutaro oru kuhikiiriza ekiraganiso kye, eky’abantu okwesiimira omu busingye obw’ebiro byona.—Zaaburi 37:10, 11, 29.

Okwega ebirikukiraho aha rutaro rwa Ruhanga orw’okuhendera entaro zoona, shoma ekicweka, “Orutaro rwa Haramagedoni Niki?”