Orutaro rwa Ukraine Niruza omu Mwaka gwa Kabiri—Baibuli Neeha Matsiko Ki?

Orwakataano, Okwakabiri 24, 2023, nikwo kuhendera kw’omwaka gumwe kwiha obu orutaro rwa Ukraine rwatandika. Kurugiirira aha ripoota ezimwe, abaserukare ba Ukraine na Russia nka 300,000 baitsirwe nari baahutaazibwa, kandi abantu baabutoosha nka 30,000 nibateeberezibwa kuba nibo baitsirwe. Kwonka omubaro nigubaasa kuba nigukiraho.

Eky’obusaasi, tihariho ekirikworeka ngu orutaro niruza kuhendera juba.

• “Omwaka guriyo niguhendera kwiha obu amahe ga Russia gataahirira Ukraine, kwonka tihariho bumanyiso oburikworeka ngu emparana eri haihi kuhwaho. Tihaine ekirikworeka ngu orubaju rumwe nirwija kusingura orutaro oru, kandi tihariho n’ekirikworeka ngu embaju zombi nizaija kwikirizana kuruhendera.”—Amakuru aha NPR (radiyo y’eihanga ey’orweteeraine), Okwakabiri 19, 2023.

Abantu baingi baine amaganya ahabw’obusaasi n’okubonabona ebireetsirweho orutaro oru n’ezindi nyingi omu nsi yoona. Baibuli neeha matsiko ki? Entaro shi niziija kuhitsya obunaku zihendere?

Orutaro oruraahendere entaro zoona

Baibuli neegamba aha rutaro oruraacungure abantu, beitu kutari kubacwekyereza. Orutaro oru ni Haramagedoni, kandi nirwetwa ‘orugamba rw’ekiro kikuru kya Ruhanga ow’Obushoboorozi Bwona.’ (Okushuuruurwa 16:14, 16) Ruhanga naija kukoresa orutaro oru kuhendera obutegyeki bw’abantu, obureetsireho entaro nyingi ezirikukyengyeza abantu. Kumanya oku orutaro rwa Haramagedoni ruraarugyemu obusingye obw’obutwire, shoma ebicweka ebi:

• “Orutaro rwa Haramagedoni Niki?”

• “Haramagedoni n’Amakuru Marungi!”