Orutaro rw’Ensi Yoona shi Niruteekwa Kubaho?—Baibuli Neegamba Ki?

Omu myaka 30 ehingwire, abantu baingi batwire nibateekateeka ngu amahanga gongyeire kugira obuteeka n’okukwatanisa. Kwonka, emiteekateekyere egi eriyo neehinduka ahabw’ebiriyo nibibaho.

• “Orutaro nirubaasa kutaraakira omu mahanga agandi ahabw’okurwanagana kwa Israeli na Hezbollah aha nsharo ya Lebanon, obwo orutaro rwa Gaza rurikugyenda omu maisho.”—Orupapura rw’amakuru Reuters, Okwokubanza 6, 2024.

• “Guruupu z’amahe ezirikushagikwa Iran ziriyo nizitaahirira ebicweka bingi, obwo Iran egarukire yaatandika kukora ebirwaniso by’obutwa, kandi eine n’obushagiki bwa Russia na China. Eki kitiiniise munonga amahanga g’Oburugwa Izooba.”—Orupapura rw’amakuru The New York Times, Okwokubanza 7, 2024.

• “Russia neegumizamu kucwekyereza emyanya mingi omuri Ukraine.”—Amakuru ga UN, Okwokubanza 11, 2024.

• “China ahabw’okwongyera kugaigahara n’okugira amaani omu by’amahe, Taiwan okwongyera kwetunguura, na China okwongyera kugira obutaikirizana na U.S. nikibaasa kurugamu emihondano y’amaani.”—Orupapura rw’amakuru The Japan Times, Okwokubanza 9, 2024.

Haine eki Baibuli erikugamba aha mihondano ei turikureeba omu nsi hati? Emihondano egi neija kurugamu orutaro rw’ensi yoona?

Baibuli ekagamba kare aha biriyo nibibaho

Baibuli teragambire butunu aha rutaro nanka aha zi turikureeba nizibaho hati. Kwonka, ekagamba aha kujanjaara kw’entaro eziriyo nizibaho hati, kandi ezirikwiha “obusingye omu nsi.”—Okushuuruurwa 6:4.

Ekitabo kya Baibuli ekya Danieli kikagira ngu ‘omu bunaku bw’emperu,’ amahanga agarikuhayahayana gakaba nigaija kutsindikana, nari kwenda kworeka orikukiza amaani. Okurwana oku kukaba nikwija kutwariramu okworeka amaani omu by’amahe n’okushohoza “eby’obuguzi bwingi,” nari esente nyamwingi.—Danieli 11:40, 42, 43.

Orutaro oruriyo nirwija

Baibuli neeyoreka ngu embeera z’ensi niziija kubanza zaasiisikara munonga zitakabaire nungi. Yesu akagira ngu hakaba nihaija kubaho “okubonabona kwingi okutakabahoga okwiha aha kuhangwa kw’ensi.” (Matayo 24:21) “Okubonabona kwingi” okwo nikwija kuhendera kurugiremu orutaro rwa Haramagedoni, orurikumanywa nk’orutaro “orw’ekiro kikuru kya Ruhanga ow’Obushoboorozi Bwona.”—Okushuuruurwa 16:14, 16.

Kwonka, Haramagedoni neija kujuna abantu, beitu kutari kubacwekyereza. Ruhanga arikukoresa orutaro orwo, naija kwihiraho kimwe obutegyeki bw’abantu, obureetsireho entaro nyingi ez’akabi. Okumanya oku orutaro rwa Haramagedoni ruraarugyemu obusingye obw’obutwire, shoma ebicweka ebi:

• “Orutaro rwa Haramagedoni Niki?”

• “Haramagedoni n’Amakuru Marungi!”