Ebibuuzo Kuruga omu Bashomi
Omuhandiiki wa Enfumu 30:18, 19 akagira ngu “emitwarize y’omushaija aha mwishiki” ‘ekaba erengire okwetegyereza kwe.’ Akaba naamanyisa ki?
Baingi nibeebuuza eki ebigambo ebyo birikumanyisa otwariiremu n’abacondooza abamwe. Ebigambo ebyo omu Baibuli eya New World Translation nibigira biti: “Hariho ebintu bishatu ebirengire okwetegyereza kwangye [nari ebirikuntagaaza], kandi ni bina ebi ntarikwetegyereza. Emizeereerere y’empungu omu mwanya, emigyendere y’enjoka aha rukiri, emigyendere y’emeeri aha nyanja, n’emitwarize y’omushaija aha mwishiki.”—Enf. 30:18, 19.
Enyimaho tubaire nitwetegyereza ebigambo “emitwarize y’omushaija aha mwishiki” nk’ebirikumanyisa ekikorwa kibi. Ahabw’enki? Emishororongo eyetooroire ebigambo ebi neegamba aha bintu “ebitahaaga.” (Enf. 30:15, 16) Kandi omushororongo ogwa 20 nigugamba aha “mukazi enshambani” orikugira ngu, “tiinyine eki naashobya.” N’ahabw’ekyo tukateekateeka ngu nk’oku empungu erikuzeereerera omu mwanya, oku enjoka erikugyendera aha rukiri n’oku emeeri erikugyendera aha nyanja, omushaija naabaasa kukora ekintu habure owaakimanya. Kurugiirira aha nyetegyereza egyo, tukateekateeka ngu ebigambo “emitwarize y’omushaija aha mwishiki” nibimanyisa ekintu kibi, kandi ngu bikaba nibimanyisa omutsigazi orikubeihabeiha omwishiki muto otaine eki arikumanya akahendera abyamire nawe.
Kwonka hariho enshonga nungi ey’okwikiriza ngu ebigambo ebyo nibimanyisa ebintu birungi. Omuhandiiki akaba naatangaarira ebintu ebyo.
Ebigambo eby’Oruheburaayo ebyakoresiibwe nibimanyisa ekintu kirungi. Kurugiirira ahari Theological Lexicon of the Old Testament, ekigambo eky’Oruheburaayo ekyavunwirwe “ebirengire okwetegyereza kwangye” omu Enfumu 30:18 “nikimanyisa embeera ei omuntu arikureeba nk’etari ya butoosha, etarikubaasika, kandi erikutangaaza.”
Omuhangu orikwetwa Crawford H. Toy owa Harvard University omuri America akashoborora ngu ebigambo ebyo tibirikumanyisa ekintu kibi. Akagira ati: “Omuhandiiki akaba naashoboorora oku ebintu ebi yaagambireho birikutangaaza.”
N’ahabw’ekyo kihikire kugira ngu ebigambo ebiri omu Enfumu 30:18, 19 nibishoboorora ebintu ebirikutangaaza nangwa ebirengire okwetegyereza kwaitu. Nk’omuhandiiki wa Baibuli, naitwe nitutangaara kureeba oku empungu erikuzeereera omu mwanya, oku enjoka etaine maguru erikugyendera aha rukiri, oku emeeri erikuremeera erikugyendera aha nyanja n’oku omutsigazi muto n’omwishiki muto barikubaasa kukundana, kandi bakesiimira amagara bari kumwe