Yehova Akatuhwera Kumanyiira Empinduka n’Okugira Okushemererwa Hoona Ahu Twagiire

Ow’eishe-emwe na munyaanyazi-itwe Kassholms bakaza omu ishomero rya Gileadi omuri 1979, kandi kumara emyaka mingi bakakora empinduka barikwoherezibwa kuheereza omu mahanga nka Iran, Zaire, Tanzania,Uganda, Mauritius na Myanmar. Omu ishomero rya Gileadi, omwegyesa waabo Jack Redford akabaha obuhabuzi obwabahweraire kukora empinduka emirundi mingi omu buheereza bwabo. Ka batugambire.

Mats, banza otugambire oku waayegire amazima.

Mats: Obu twabaire nitutuura omuri Poland omu bwire bw’Orutaro rw’Ensi Yoona II, tata akareeba oburyarya bwingi omu kanisa y’Abanyakaturiki. Kwonka akaba akira kugira ati: “Hashemereire kuba hariho ediini y’amazima!” Bwanyima y’obwire nketegyereza ngu akaba ahikire. Nkaba nkira kugura ebitabo bingi ebyabaire byakoresiibwe. Kimwe aharibyo kikaba kiri ekitabo kya bururu ekirikwetwa The Truth That Leads to Eternal Life. Omutwe gw’ekitabo ekyo gukankwataho munonga naakishoma omu kiro kimwe. Ku naaherize kukishoma nkamanya ngu mboine amazima!

Kuruga omuri Apuri 1972 nkashoma ebitabo bingi eby’Abajurizi ba Yehova, kandi naatunga eby’okugarukamu by’ebibuuzo ebi naabaire nyine ahari Baibuli. Nkehurira nk’omushuubuzi ou Yesu yaagambire omu nfumu ye, owaagurize ebintu bye byona bwanyima y’okubona eruuru y’obuguzi bwingi. Naanye nkashazamu entebeekanisa ei naabaire nyine ey’okuza aha yunivasite kwega eby’obushaho kugira ngu mbaase kugura “eruuru” y’amazima agu naatungire. (Mat. 13:​45, 46) Nkabatizibwa omuri Desemba 10, 1972.

Omu mwaka gumwe, abazaire bangye na murumuna wangye omuto bakaikiriza amazima kandi baabatizibwa. Omuri Gyuraayi 1973, nkatandika obuheereza bw’obutwire. Omuri baapayoniya b’omujinya omu kibiina kyaitu hakaba harimu munyaanyazi-itwe orikwetwa Ann-Catrin owaabaire aboneire kandi arikwebembeza eby’omwoyo. Tukakundana kandi twataaha hamwe omu bushwere omuri 1975. Tukatuura omu tauni nungi Strömsund omuri Sweden kumara emyaka ena, ahu abantu baingi baabaire nibenda kwega Baibuli.

Ann-Catrin: Tata akeega amazima obu yaabaire ari haihi kuheza emishomo ye aha yunivasite omuri Stockholm. N’obu ndaabe naabaire nyine ameezi ashatu gonka, akaba antwara omu nteerane n’omu kubuurira. Ekyo maawe akaba atarikukikunda, kandi akateeraho kworeka ngu Abajurizi ba Yehova tibahikire. Kwonka tarakibaasize n’ahabw’ekyo nawe akahika yaabatizibwa. Aha myaka 13, nkabatizibwa, kandi aha myaka 16 naaba payoniya. Bwanyima y’okuheereza omuri Umeå ahu ababuurizi baabaire nibendwa munonga, nkaba payoniya w’omutaano.

Bwanyima y’okutaaha omu bushwere na Mats, tukatunga okushemererwa kw’okuhwera abantu baingi kumanya amazima. Omwe omuribo akaba ari Maivor, omwishiki omuto owaatsigireho omwoga gwe gw’eby’emizaano, kandi yaakwatanisa na muto wangye omu kuheereza nka baapayoniya. Bakaza omu ishomero rya Gileadi omuri 1984, kandi hati nibaheereza omuri Ecuador nk’abamiisani.

Niki ekyabahweraire kukora empinduka n’okuguma mushemereirwe omu buheereza bw’obumiisani?

Mats: Tukatunga obuheereza busya omu mahanga gatari gamwe emirundi mingi. Kwonka tukateeraho kuguma ‘tutsimbire emizi’ omuri Yesu turikukora eki turikubaasa kumutooreza, okukira munonga obucureezi bwe. (Kol. 2:​6, 7) Nk’eky’okureeberaho, omu mwanya gw’okuteekateeka ngu ab’eishe-emwe b’omu kicweka nibo baabaire baine kutwaza nkaitwe, tukateeraho kwega oku barikutwaza. Tukaba nitwenda kwetegyereza emiteekateekyere yaabo n’entwaza yaabo. Kandi ekyo kikatuhwera kukora empinduka n’okuguma tushemereirwe omu buheereza bwaitu.—Zab. 1:​2, 3.

Ann-Catrin: Omuti kubaasa kuguma nigukura gwine kutunga ekyererezi. Butoosha Yehova akatubeera ‘eizooba.’ (Zab. 84:11) Akatuha ab’eishe-emwe na banyaanyazi-itwe abarikutukunda. Nk’eky’okureeberaho, omu kibiina kikye ekya Tehran, omuri Iran, ab’eishe-emwe bakatworeka obufura nk’obu turikushomaho omu Baibuli. Tukaba nitwenda kuguma omuri Iran, kwonka omuri Gyuraayi 1980, omurimo gwaitu omuri Iran gukeemerezibwa, kandi twaragiirwa kurugayo omu shaaha 48. Tukooherezibwa Zaire (hati erikumanywa nka Congo) erikushangwa omuri Africa.

Nkarira ku naamanyire ngu nituza kuheereza omuri Africa. Ebi naabaire mpuriire ahari Africa nk’enjoka n’endwara bikantiinisa. Kwonka banywani bangye babiri abaabaire baheereize emyaka mingi omuri Africa bakatugira bati: “Timukazayoga! Mutatiina, nimwija kuhakunda.” Kandi bakaba bahikire, ahakuba ab’eishe-emwe na banyaanyazi-itwe abo baine rukundo eyaabuzima. Nangwa ku twaragiirwe kuruga Zaire bwanyima y’emyaka mukaaga ahabw’omurimo gwaitu kuzibirwa, nkeshekyerera ahakuba aha murundi ogwo nkaba ninshaba Yehova ngu, “Nyabura ‘we, niinyenda kuguma omuri Africa.”

Mutungire migisha ki omu buheereza bwanyu?

Mats: Tutungire abanywani baingi abamiisani kuruga omu nsi zitari zimwe. Kandi omu buheereza obumwe tukatunga omugisha gw’okushomesa abeegi baingi obumwe nka 20! Tindyebwa rukundo n’obufura bw’ab’eishe-emwe omuri Africa. Omu kutaayaayira ebibiina omuri Tanzania, tukaba twemereza emotoka ei twabaire nituraaramu haihi n’amaka g’ab’eishe-emwe, kandi bakaba batworeka obufura ‘nangwa n’okukira’ aha kubaasa kwabo. (2 Kor. 8:3) Eky’omutaano ahariitwe bukaba buri bwire bw’ebitebyo. Nyowe na Ann-Catrin tukaba tushutama ahansi buri mwabazyo tugamba aha byabaho omu izooba, reero tusiima Yehova ahabw’okuba naitwe.

Ann-Catrin: Nyowe ntungire okushemererwa ahabw’okumanya ab’eishe-mwe omu mahanga mingi. Twegire endimi nsya otwariiremu orufaasi, Orufaransa, Oruganda, n’Oruswahiri, kandi twegire emitwarize nyingi etarikushushana. Tukatendeka ab’eishe-emwe na banyaanyazi-itwe abasya, twakora nabo omu kuheereza Yehova, kandi twatunga abanywani abaabuzima.—Zef. 3:9.

Kandi tukareeba bihangirwe bya Yehova bingi ebirikushemeza. Buri murundi ogu twabaire twikiriza obuheereza busya okaba nooshusha ngu Yehova akaba atwebembeire omu rugyendo rwaitu. Atwegyeise ebintu ebi twabaire tutarikubaasa kweyegyesa ahabwaitu.

Mutungire buremeezi ki, kandi niki ekibahweraire kugumisiriza?

Mats: Bwanyima y’obwire tukarwara endwara nyingi otwariiremu n’omushwija gw’ensiri. Ann-Catrin akarwara endwara ezaamwetengyeise kushemezibwa ahonaaho. Kandi tukeerarikirira aha mbeera y’abazaire baitu abaabaire baahikire omu myaka ya bukuru, kwonka nitusiima bato baitu abaayehaireyo kubareeberera. Buzima bakahikiiriza obujunaanizibwa obwo n’okushemererwa, okugumisiriza na rukundo. (1 Tim. 5:4) N’obu turaabe twabaire tubooherereza obushagiki, obumwe tukaba twehurira kubi ahabw’okutaba haihi nabo.

Ann-Catrin: Omuri 1983, obu twabaire nituheereza omuri Zaire, nkarwara esheshe. Omushaho akagambira Mats ati: “Mwihe omu ihanga eri erizooba!” Eizooba eryakuratsireho tukatemba enyonyi y’emigugu kuza Sweden ahabw’okuba niyo yaabaire eriho yonka.

Mats: Tukateekateeka ngu obuheereza bwaitu bw’obumiisani bukaba nibuza kuhendera, kandi ekyo kikaturiza munonga. Kwonka n’obu omushaho araabe yaateekateekire ngu Ann-Catrin akaba atarikuza kukira, akarugaho yaakira. Kandi bwanyima y’omwaka gumwe tukagaruka omuri Zaire, twayoherezibwa kuheereza omu kibiina kikye eky’Oruswahiri omuri Lubumbashi.

Ann-Catrin: Obu twabaire turi omuri Lubumbashi, nkarugwamu enda. N’obu turaabe twabaire tutaine entebeekanisa y’okuzaara, okufeerwa omwana waitu kikatushaasha munonga. Kwonka omu bwire bw’obusaasi obwo, Yehova akatuha ekiconco eki twabaire tutarikuteekateeka. Tukatunga abeegi baingi kukira obundi bwona. Omu mwaka gumwe ekibiina kikatunguuka kuruga aha babuurizi 35 bahika 70, kandi abarikwija omu nteerane bakeeyongyera kuruga ahari 40 baahika 220. Yehova akatuha omugisha ahabw’okuteeraho kwaitu kw’okwejumba omu buheereza, kandi ekyo kikampumuriza. Kwonka nabwo nitukira kuteekateeka n’okugamba aha mwana waitu. Twine ekihika ky’okureeba oku Yehova araakirize kimwe obusaasi bw’omu mitima yaitu.

Mats: Bwanyima, Ann-Catrin akatandika kuhwa amaani n’okuruha. Naanye nkashangwamu ekookoro y’amara eri aha idaara rya kana, kandi nkaba nyine kushemezibwa. Kwonka hati ninyehurira gye, kandi na Ann-Catrin naateeraho nk’oku arikubaasa kuheereza Yehova.

Twetegyereize ngu tiitwe twenka abaine oburemeezi. Ahabw’okuba bwanyima y’ekiita bantu ekyabaireho 1994 omuri Rwanda, tukataayaayira abanywani baingi omu nkambi. Ku twareebire okwikiriza kwabo, okugumisiriza n’obufura, kikatwegyesa ngu Yehova aine amaani g’okutuhwera kuraba omu buremeezi bw’emiringo yoona.—Zab. 55:22.

Ann-Catrin: Oburemeezi obundi bukabaho obu twayetwa aha kuheebwayo kw’eitaagi rya Uganda omu 2007. Bwanyima ya puroguraamu tukagyenda na guruupu y’abantu 25 erimu abamiisani n’Ababeseeli turikugaruka Nairobi omuri Kenya. Ku twabaire tutakahikire aha mwatano gwa Uganda na Kenya, loore eyaabaire neeruga omu maisho ekatutomera busyo bwa ntaama. Omushaija owaabaire naatuvuga na banywani baitu bataano bakafeeraho, kandi munyaanyazi-itwe omwe akafa bwanyima y’okuhika omu irwariro. Twine ekihika ky’okugaruka kureeba banywani baitu abo.—Yob. 14:​13-15.

Bwanyima y’obwire nkakira obuhuta obu naatungire. Kwonka nyowe na Mats tukaba turi bamwe aha bashaabazi abaagumiizemu kuteganisibwa ekyekango ekyareetsirweho butandu egyo. Nyowe nkaba nkira kwekanga munonga ekiro, reero nyimuka orikushusha ngu nyine oburwaire bw’omutima. Ekyo kikaba nikintiinisa munonga. Kwonka okushaba Yehova n’Ebyahandiikirwe ebirikuhuumuriza bikatuhwera kwikaikana. Tukatunga n’obuhwezi bw’abashaho obwatuhweraire. Hati titurikwerarikirira munonga, kandi nitushaba Yehova kutuhwera ngu tuhuumurize abaine oburemeezi nk’obwaitu.

Obu waaba nooshoboorora oku obaasize kugumisiririza embeera zigumire, waagira ngu Yehova akabeekorera “nk’amahuri mabisi.” Waaba noomanyisa ki?

Mats: Ebigambo ebyo nibiruga omu nfumu y’Oruswahiri erikugira ngu “Tumebebwa kama mayai mabichi,” ebirikumanyisa ngu “tukeekorerwa nk’amahuri mabisi.” Nk’oku omuntu arikukwata amahuri mabisi n’obwegyendesereza kugira ngu gatakayatika, Yehova atushagikire omu muringo gwa rukundo omu buheereza bwaitu bwona. Tutwire nitutunga byona ebirikwetengyesa nangwa n’okukiraho. Omuringo gumwe oku akozire ekyo, n’okukoresa Akakiiko Akareeberezi kutworeka esaasi.

Ann-Catrin: Niinyenda kugamba aha ky’okureeberaho obu twareeba obushagiki bwa Yehova. Eizooba rimwe bakanteerera esimu barikungira ngu tata ari omu irwariro omuri Sweden, kandi areembire. Mats nibwo yaabaire aherize kukira omushwija gw’ensiri, kandi tukaba tutaine esente z’okututwara omuka. N’ahabw’ekyo tukacwamu kuguza emotoka yaitu. Bwanyima, abantu babiri bakatuteerera esimu. Ey’okubanza ekaba neeruga ow’omushaija n’omukazi we abaahuriire aha mbeera yaitu, kandi bakaba nibenda kushashura esente z’okutwara omwe ahariitwe. Ondiijo akaba ari munyaanyazi-itwe okuzire owaabaire abiikire esente omu kabokusi aku yaarambireho ati: “Ez’okuhwera omuntu oine oburemeezi.” Omu bwire bukye, Yehova akatuhwera kutunga esente ezaabaire nizetengyesa kututwara omuka!—Heb. 13:6.

Mubaasize kwega ki omu myaka 50 ei mumazire omu buheereza obw’obutwire?

Ann-Catrin: Nyegire ngu amaani gaitu nigaruga “omu kutuuza n’omu kwesiga” Yehova. Twayesiga Yehova, orutaro rwaitu niruhinduka orwe. (Isa. 30:15; 2 Bus. 20:​15, 17) Ahabw’okuha Yehova ekirikukirayo oburungi omu buheereza bwaitu, tutungire emigisha ei tutaakubaasize kutunga ahandi hoona.

Mats: Eishomo rikuru erinyegire n’okwesiga Yehova omu mbeera zoona nkategyereza kureeba oku araampwere. (Zab. 37:5) Takaremwaga kuhikiiriza okuraganisa kwe okwo. Na hati nitukireeba okuhikiirira kw’okuragaanisa okwo omu buheereza bwaitu aha Beseeli eya Myanmar.

Twine amatsiko ngu n’abato abarikwenda kwongyera aha buheereza bwabo, Yehova naija kubooreka rukundo nk’ei atworekire. Twine obwesigye ngu ekyo nikiija kubaho baikiriza obuhwezi bwa Yehova obu araabahe kubahwera hoona ahu araaboohereze kumuheereza.