Ebi Byona Nibimanyisa Ki?

YESU KRISTO akagira ati: “Omuheru gw’obusingye obu” guryamanyirwa aha ntaro, enjara, orufu, hamwe n’emitsitsa.—Matayo 24:1-8, NW; Luka 21:10, 11.

Okwiha omu gwa 1914 amagara gatwire nigashiishwa entaro ahagati y’amahanga n’ahagati y’enganda, obutoosha ekirikureetwa abakuru b’amadiini kwejwanzya omu by’obutegyeki, kandi na munonga obwahati ebikorwa by’obuzahambuuki ni bingi munonga.

N’obu haraabe hariho entunguuka omu bya sayansi, abantu baingi omu nsi yoona nibaitwa enjara. Buri mwaka obukaikuru n’obukaikuru bw’abantu nibafa ahabw’okuburwa eby’okurya.

Orufu, nari endwara ezirikuturira ezijanjaire hoona, nazo ni kamwe aha bumanyiso obu Yesu yaahaire. Bwanyima y’Orutaro rw’Okubanza orw’Ensi Yoona, muyego ekaita abantu barikurenga 21,000,000. Obutashushana n’endwara zimwe ezaira ezaabaire ziita abantu omu kicweka kimwe kyonka, ekahika omu mahanga mingi nangwa n’omu birwa bya hare omu nsi yoona. Sirimu hati neita abantu omu nsi yoona, kandi endwara nk’akakonko, omushwija gw’ensiri, ekiirukano, n’omuraramo, nizigumizamu kwita abantu omu nsi ezikirikutunguuka.

Nk’oku kirikworekwa, nihabaho obukumi n’obukumi bw’emitsitsa etarikwinganisa amaani buri mwaka. N’obu haraabe hariho ebyooma ebirikubaasa kwejunisibwa okumanya ebirikukwata aha mitsitsa hamwe n’okumanyisa abantu ai eraarabe, ebihikiirizi omu myanya erimu abantu baingi ebirikureetwa emitsitsa nibikira kuhurirwa omu makuru.

Baibuli nayo ekaragura eti: “Omanye eki ngu omu biro by’aha mperu, haryabaho ebiro by’akabi kaingi, ahakuba abantu baryaba abarikwekunda abakunzi b’empiiha, abanyamaryo, abarikwemanya, abarikujumiirana, abarikugomera abazaire baabo, entasiima, abatarikwera, abatarikukunda baabo, abatarikwenda kugarukana n’abandi, abarikubeihererana, abatarikweyangisa, enshaarizi, abarikwanga ebirungi, abarikureebyana, engangaazi, abarikwekuza, abarikukunda kweshemeza bonka okukira Ruhanga, abarikuhamya emigyenzo y’ediini, bakahakanisa obushoboorozi bwayo. Abantu nk’abo obeetantare.”—2 Timoseo 3:1-5.

Torikwikiriza ngu turi omu ‘biro by’akabi kaingi ebigumire’?

Waayetegyereize ngu abantu nibekunda, n’abakunzi b’empiiha ekirengyesereize kandi ku nibatwarwa amaryo?

N’oha otarikwikiriza ngu ensi eijwiremu abantu abarikwefaho bonka, kandi entasiima abatarikwenda kugarukana n’abandi, abatarikwera?

Noomanya ngu okugomera abazaire hamwe n’okutakundana kweyongyeire munonga, hatari mu bicweka bimwe-na-bimwe byonka kureka omu nsi yoona?

Hatariho kubangaanisa nooreeba ngu turi omu nsi esingwirwe okukunda okweshemeza kandi etarimu kukunda ebirungi. Okwo nikwo Baibuli erikushoborora emitwarize eyaabaire neija kubaho omu “biro by’aha mperu.”

Hakiriyo ekirikwetengwa okubaasa kworeka obunaku obu tutwiremu? Yesu akaragura ngu omu bunaku obu, amakuru marungi g’Obukama bwa Ruhanga garyabuurirwa omu nsi yoona. (Matayo 24:14) Ekyo kiriyo nikikorwa?

Magaziini erikwetwa Watchtower, akatabo akarikwegyesa eby’omu Baibuli akarikurangirira amakuru marungi g’Obukama bwa Yehova, nikateerwa obutoosha omu ndimi nyingi okukira magaziini ezindi zoona.

Buri mwaka, Abajurizi ba Yehova nibahayo eshaaha ezirikurenga aha kasiriira barikubuurira abantu aha Bukama bwa Ruhanga.

Ebitabo ebirikwegyesa Baibuli obwahati nibiteerwa Abajurizi ba Yehova omu ndimi nka 400, hoona n’omu ndimi ezirikushomwa abantu b’omu byaro hamwe n’obugombe bukye bw’abantu. Abajurizi ba Yehova bahikire omu nsi zoona n’amakuru marungi; baabuuriire omu birwa hamwe n’omu bicweka ebikye munonga ebitarikumanywa n’omu by’obutegyeki. Omu nsi ezirikukira obwingi, nibagumizamu n’entekanisa y’okushomesa Baibuli obutoosha.

Buzima kwo, amakuru marungi g’Obukama bwa Ruhanga nigabuurirwa omu nsi yoona, ti habw’okuhindura ensi, kureka okuba eky’okuhamya. Abantu hoona-hoona barikuheebwa omugisha gw’okworeka yaaba nibafayo aha Muhangi w’eiguru n’ensi kandi yaaba baraije kworobera ebiragiro bye nari kworeka rukundo ahari bataahi baabo.—Luka 10:25-27; Okushuuruurwa 4:11.

Jubajuba, Obukama bwa Ruhanga nibuza kushemeza ensi bugiihemu obubi bwona kandi bugihindure ekibanja kya Ruhanga.—Luka 23:43.

[Akabokisi akari aha rupapura 6]

Ebiro by’Aha Mperu y’Enki?

Ebi ti biro by’aha mperu y’abantu. Ahari abo abarikukora ebi Ruhanga akunda, Baibuli neebaha amatsiko ngu baryagumaho ebiro byona.—Yohaana 3:16, 36; 1 Yohaana 2:17.

Ebi ti biro by’aha mperu y’ensi. Ekigambo kya Ruhanga nikiraganisa ngu ensi egi etwirwemu abantu eryagumaho ebiro byona.—Zaaburi 37:29; 104:5; Isaaya 45:18.

Kureka, ebi n’ebiro by’aha mperu y’omurembe ogu ogwijwiremu obwinazi, ogutarimu rukundo hamwe n’abo abarikugyenda n’emitwarize yaayo.—Enfumu 2:21, 22.

[Akabokisi/Ekishushani ekiri aha rupapura 7]

Buzima kwo Baibuli n’Ekigambo kya Ruhanga?

Emirundi mingi, abarangi omu Baibuli bakahandiika bati: “Oku nikwo MUKAMA arikugamba naagira ati.” (Isaaya 43:14; Yeremia 2:2) Na Yesu Kristo, Omwana wa Ruhanga, akahamya ngu ‘akaba atarikugamba ebye ahabwe.’ (Yohaana 14:10) Baibuli yo yonka neegira eti: ‘Ebyahandiikirwe byona, bihandiikisiibwe omwoyo wa Ruhanga.’—2 Timoseo 3:16.

Tihariho kindi kitabo ekiteirwe omu ndimi nyingi—ezirikurenga omu 2,200, nk’oku kyayorekirwe ripoota ya United Bible Societies. Tihariho kindi kitabo ekijanjaire omu muhendo muhango guti—hati Baibuli ezirikurenga omu busiriira buna ziri omu mikono y’abantu. Ekyo tikyo waakuteekateekire aha butumwa bwa Ruhanga aha bantu boona?

Okwetegyereza ebirikukiraho omu bwijwire aha buhame ngu Baibuli ekahandiikisibwa omwoyo wa Ruhanga, reeba akatabo The Bible—God’s Word or Man’s?, akahandiikirwe Abajurizi ba Yehova.

Waashoma Baibuli kandi okeetegyereza ngu buzima n’Ekigambo kya Ruhanga, noija kugasirwa munonga.

[Akabokisi/Ekishushani ekiri aha rupapura 8]

Obukama bwa Ruhanga n’Enki?

N’obutegyeki obw’omu iguru obu Yehova, Ruhanga ow’amazima, kandi Omuhangi w’eiguru n’ensi ataireho.—Yeremia 10:10, 12.

Baibuli neeyoreka gye ngu Yesu Kristo niwe ou Ruhanga ahaire obushoboorozi bw’okutegyeka. (Okushuuruurwa 11:15) Obu yaabaire ari omu nsi, Yesu akooreka ngu akaba yaatungire obushoboorozi kuruga ahari Ruhanga—obushoboorozi obwamubaasiise kucureeza omuyaga hamwe n’enyanja, okutamba endwara za buri muringo, kandi hamwe n’okuzoora abafu. (Matayo 9:2-8; Mako 4:37-41; Yohaana 11:11-44) Oburangi bwa Baibuli bukaranga ngu Ruhanga akaba naija kumuha “obutegyeki, ekitiinisa n’obukama, ngu abantu b’amahanga goona, n’enganda zoona z’endimi zitari zimwe bagume bamuheereze.” (Danieli 7:13, 14) Obutegyeki obwo nibwetwa Obukama bw’omu iguru; Yesu Kristo hati naategyeka ayemi omu iguru.

[Ekishushani ekiri aha rupapura 7]

Okubuurira kw’engiri omu nsi yoona