Amagara Gaawe Goorekyereire Nkahi?
• Abantu baingi beemariire munonga omu by’amagara ga butoosha baahika n’aha butafayo kuteekateeka ei boorekyereire.
• Baibuli netuhuguura erikutumanyisa ebintu ebirikushemeza ebiri haihi kubaho. Kandi neeturabura aha muhondando ogurikwija kubaho omu bigombe by’abantu omu nsi yoona. Itwe okubaasa kugasirwa n’okwetantara akabi, okucwamu kurungi nikikuru munonga.
• Hariho abantu abarikumanya ebi Baibuli erikugamba kandi bateeraho kubigyenderaho kwonka kandi bareka okwerarikirira aha- by’amagara kubahuzya baruga omu muhanda oguhikire.
• Nooshemerererwa omuhanda ogu amagara gaawe goorekyereire? Ku orikuteera puraani aha bi oraakore, nooteekateeka oku biraije kukwata aha bigyendererwa byawe eby’omu maisho?
[Akabikisi/Ekishushani ekiri aha rupapura 9]
Ekikuru Munonga Ahariiwe Niki?
Ebintu ebi ebirikukurataho noobiha mwanya ki? Biteho enamba kurugiirira aha ku biri bikuru.
Bingi ahari byo biine omwanya gwabyo oguhikire omu magara, kwonka waaba oine kutooranaho, niki ekirikubanza? ekyakabiri? n’okweyongyerayo.
․․․ Eby’okweshemeza
․․․ Omurimo gwangye
․․․ Amagara gangye
․․․ Okushemererwa kwangye
․․․ Ou nshweraine nawe
․․․ Abazaire bangye
․․․ Abaana bangye
․․․ Eka nungi, ebijwaro birungi
․․․ Okuba orikukirayo omuri kyona eki ndikukora
․․․ Okuramya Ruhanga
[Akabokisi aha rupapura 10, 11]
Ebi Orikutooranaho Buzima Nibikuhitsya ei Orikwenda Kuza?
TEEKATEEKA AHA BIBUUZO EBI
EBY’OKWESHEMEZA: Eby’okweshemeza ebi ndikutooranaho nibinduhuura? Birimu okujagarara okurikubaasa kuhitsya amagara gangye omu kabi ninga shi okundetera okuba ekimuga? N’omuringo ‘gw’okuzaana’ ogurimu okushemererwa shana kumara eshaaha nkye kwonka ogurikubaasa kureeta obusaasi obw’obutwire? N’obu eby’okweshemeza ebi ndikutooranaho byakuba biboneire, nimbimaramu obwire bwingi mbura kutunga obwire burikumara omu bintu ebirikukira obukuru?
OMURIMO GWANGYE: Ningukora nk’omuringo gw’okweyemerezaho, nari buzima ndi omuhuuku wagwo? Nigunkwata munonga, guta amagara gangye omu kabi? Ninkunda okukora eshaaha ezirengire aha zirikwetengwa nari ninkunda okumara obwire n’ou nshweraine nawe nari abaana bangye? Ou ndikukorera ku yaakwenda ngu nkore omurimo ogutarikwikirizana n’omuntu wangye ow’omunda nari shi obutoosha oguraashwekyerere eby’omwoyo, niinyija kugukora okugira ngu ntabingwa?
AMAGARA GANGYE: Amagara ningatwara ntyontyo, nari obutoosha ninfayo okugarinda kutasiisikara? Eby’amagara gangye nibyo ndikukira kugambaho? Oku ndikugatwara nikworeka okufayo aha b’omu ka yangye?
OKUSHEMERERWA KWANGYE: Eki nikyo ndikubanza kuteekateekaho? Okweshemeza ninkwebembeza okukira okushemererwa kw’ou nshweraine nawe nari okw’eka yangye? Omuringo gu ndikusheruriramu okweshemeza nigwo gushemereire omuramya wa Ruhanga ow’amazima?
OU NSHWERAINE NAWE: Nyamunyonyi wangye nimutwara nka munywani wangye kyaba nikingasha bwonka? Nimpereza ou nshweraine nawe ekitiinisa, nk’omuntu okishemereire buzima? Okwikiririza omuri Ruhanga nikukwata aha ku ndikutwazamu ou nshweraine nawe?
ABAZAIRE BANGYE: Ku ndaabe nkiri muto, ninyorobera abazaire bangye—mbagarukamu omu muringo gw’ekitiinisa, nkora emirimo ei mpairwe, ngaruka omu ka aha shaaha ezibataireho, nyetantara ebigombe bibi n’emitwarize ei barikunzibira? Ku ndaabe ndi mukuru, ninyorobera abazaire bangye, mbaha ekitiinisa, mbaheereza obuhwezi obushemereire bwaba nibwetegwa? Omuringo gu ndikukorengana nabo nigwebemberwa ebyangye nari n’obuhabuzi bw’Ekigambo kya Ruhanga?
ABAANA BANGYE: Nimpurira nyine obujunaanizibwa okwegyesa abaana bangye emicwe eshemeire, nari nimburekyera ab’amashomero kuba nibo baabikora? Nintwara obwire kuba n’abaana bangye nari ninteekateeka ngu eby’okuzaanisa, Tiivi, nari ngu kompyuta nibyija kuguma bibahugize? Obutoosha nimpana abaana bangye ku barikwanga kufayo aha bi Ruhanga arikutwijutsya, nari nimbahana baakora ebirikunkwatsa ekiniga bwonka?
EKA NUNGI, EBIJWARO BIRUNGI: N’enki ekirikundetera kucwamu oku ndareebeke omu njwara hamwe n’ebintu ebi nyine—n’eki kiraakore aha bataahi, aha burungi bw’eka yangye, n’okugira ngu ndi omuramya wa Ruhanga?
OKUBA ORIKUKIRAYO OMURI BURI KI NDIKUKORA: Ninkitwara nka kikuru okukora ebintu omu muringo oguhikire? Nintaho agangye goona okuba orikukirayo? Nikinkora kubi omuntu ondiijo yaakora kurungi kunkira?
OKURAMYA RUHANGA: Okusiimwa Ruhanga nikikuru ahariinye okukira okusiimwa ou nshweraine nawe, abaana bangye, abazaire bangye, nari shi ou ndikukorera? Okubaasa kugumya amagara marungi, ninta obuheereza bwangye ahari Ruhanga omu mwanya gwa kabiri nkigyendereire?
N’OBWEGYENDESEREZA, TEEKATEEKA AHA BUHABUZI BWA BAIBULI OBU
Ruhanga aine mwanya ki omu magara gaawe?
Omubuurizi 12:13: “Tiina Ruhanga, oyorobere ebiragiro bye; ahakuba ekyo kyonka nikyo omuntu ashemereire kukora.”
YEBUUZE: Amagara gangye nigooreka ngu nintwara ebintu nk’oku Omubuurizi 12:13 rwagamba? Okworobera ebiragiro bya Ruhanga nikwo kurikundetera okucwamu oku ndikuhikiiriza obujunaanizibwa bwangye aha ka, aha murimo, nari aha ishomero? Nari ebyetengo ebindi ninga emirabanamu y’omu magara niyo erikuncweramu oku ndateekanise obwire bw’okuramya Ruhanga?
Oine nkorengana ki na Ruhanga?
Enfumu 3:5, 6: “Yesigye MUKAMA n’omutima gwawe gwona, orekye kwegamira okwetegyereza kwawe ahabwawe. Omwemere omu mitwarize yaawe yoona, nawe aryaguma naatebeekanisa emihanda yaawe yoona.”
Matayo 4:10: “Oramye Mukama Ruhanga waawe; obe niwe waaheereza wenka.”
YEBUUZE: Oku nikwo ndikuhurira aha birikukwata ahari Ruhanga? Ebi ndikukora buriijo, hamwe n’oku ndikushobororamu oburemeezi, nibyoreka okwesiga Ruhanga hamwe n’okumwemariraho nk’okwo?
Okushoma n’okwega Baibuli nibikuru kwingana ki ahariiwe?
Yohaana 17:3: “Aga nigo magara agatahwaho, okumanya Iwe Ruhanga omwe ow’amazima, n’[o]gwo ou waatumire Yesu Kristo.”
Yebuuze: Omwanya ogu ndikuha okushoma Ekigambo kya Ruhanga n’okukyecumintirizaho nikworeka ngu buzimazima niinyikiriza eki?
Okubaho omu nteerane z’Ekikristaayo nikikuru kita ahariiwe?
Abaheburaayo 10:24, 25: “Kandi ka tuteekateekye oku twakwezirikisana kukundana n’okukora ebirungi, tutarikureka kuteeranira hamwe, . . . nk’oku murikureeba ngu ekiro ekyo kiri haihi n’okuhika, mweyongyere kutwaza mutyo.”
Zaaburi 122:1: “Nkashemererwa ku bangambiire ngu tugyende omu nju ya MUKAMA.”
YEBUUZE: Oku ndikutwaza amagara gangye nikworeka okusiima obuhabuzi oburikushangwa omu Kigambo kya Ruhanga? Omu mwezi oguhweire, haine enteerane z’Ekikristaayo ezi naagurukire ntazemu ahabw’okureka ebindi bintu kunzibira?
Oine omuzimbwe gw’okubuurira abandi ebirikukwata ahari Ruhanga n’ebigyendererwa bye?
Matayo 24:14: “Engiri egi ey’obukama eryagambwa omu nsi zoona okuba eky’okuhamya . . . , obwo nibwo emperu erihika.”
Matayo 28:19, 20: “N’ahabw’ekyo mugyende omu mahanga goona, muhindure abantu abeegi, . . . nimubegyesa kworobera byona ebi nabaragiire.”
Zaaburi 96:2: “Mweshongorere MUKAMA, musiime eiziina rye, mworekye okujuna kwe buri kasheeshe.”
Yebuuze: Omurimo ogu buzimazima gwine omwanya gwagwo ogugushemereire omu magara gangye? Ebi ndikukora omu murimo ogu nibyoreka buzima ngu nimpamya obukuru bw’obunaku obu turimu?