Obuhwezi bw’Abahumire
Nikiteberezibwa ngu omu nsi yoona harimu abantu obukaikuru 43 abahumire, n’abatarikuhweza gyea obukaikuru 295. Eky’obusaasi, baingi aharibo nibatwarizibwa kubi.
Ruhanga naareeba ata abantu abahumire? Baibuli neebagambaho ki? Kandi Abajurizi ba Yehova bakozire ki kubahwera?
Oku Ruhanga arikureeba abahumire
Baibuli neegira ngu Yehovab naafayo munonga aha bantu abahumire. Naayenda ngu baatwarizibwe gye kandi bagasirwe omu bwegyese obu arikuha. Kandi naabaraganisa nyentsya nungi.
Ekyahandiikirwe: “Orikuhabya empumi, akagiiha omu muhanda akyeenwe.”—Eky’Ebiragiro 27:18.
Eki kirikumanyisa: Ira, Ebiragiro ebi Ruhanga yaahaire abantu be bikaba nibirinda abahumire kutatwarizibwa kubi.
Ekyahandiikirwe: ‘Ruhanga tarikushoroora mu bantu.’—Ebyakozirwe 10:34.
Eki kirikumanyisa: Ruhanga naareeba abantu abahumire nk’ab’omuhendo nk’oku arikureeba abarikuhweza gye.
Ekyahandiikirwe: Yesu ‘akahumuura abahumire baingi.’—Luka 7:21.
Eki kirikumanyisa: Yesu okuhuumura abahumire obu yaabaire ari omu nsi, kikooreka eki Obukama bwa Ruhanga buraije kukora omu biro by’omumaisho.
Ekyahandiikirwe: ‘Amaisho g’empumi nigaija kuhumuurwa.’—Isaaya 35:5.
Eki kirikumanyisa: Yehova naaraganisa ngu Obukama bwe ku buraabe nibutegyeka ensi omu bwire butari bwa hare, abaraabe bahumire nibaija kuhumuurwa.
Oku Abajurizi ba Yehova barikuhwera abahumire
Omu nsi yoona, Abajurizi ba Yehova nibagambira abahumire obutumwa oburikuha amatsiko. Ekyo nitukikora tuta?
Nitushoza Baibuli, ebitabo by’okukoresa omu kwega Baibuli, vidiyo zitari zimwe, otwariiremu ebitabo eby’enyuguta empango, ebya braille n’ebikwatsirwe omu maraka kuhwera abahumire n’abatarikuhweza gye.
Nitugira enteerane z’Ekikristaayo ezi buri omwe arikwikirizibwa kubamu, otwariiremu n’abahumire.
Twine entebeekanisa y’okwegyesa omuntu Baibuli orikuhwerwa ondiijo butunu.c
Tikirikukwetengyesa kushashurira ebintu ebi. Ahabw’enki? Yesu akaragiira ati: “Mukaheerwa busha, naimwe muheere busha.”—Matayo 10:8.
Abajurizi ba Yehova nibafayo munonga aha bantu abahumire. Abarikutwegaitaho omu kuramya Ruhanga nibatunga abanywani abarikubafaho. Yetegyereze ebi bamwe aha Bajurizi ba Yehova abahumire bagambire.
Talita Alnashi, owa Sweden, akazaarwa atarikuhweza gye. Manya oku abazaire be baamwegyeise Baibuli n’oku we n’eka ye baagasiirwe omu buhwezi bwa banywani baabo.
James Ryan, owa United States, akazaarwa afiire amatu kandi bwanyima yaahuma. Manya oku arikutunga okushemererwa n’okumarwa.
Cynthia Pablo, owa Philippines, afiire amatu kandi ahumire. Abakristaayo bagyenzi be bakamuhwera bata omu bwire bugumire obw’ekigwererezi kya COVID-19? Tunga eby’okugarukamu omu kicweka “Congregation Supports Deaf and Blind Sister During Pandemic.”
Ni bikoreso ki ebi twine ebirikuhwera abahumire kwega Baibuli?
Ebitabo bya Braille. Nitushoza Baibuli eya braille yoona nari ebicweka byayo omu ndimi nyingi. (Kubaasa kutunga endimi ezo, reeba akabokusi “Baibuli ya New World Translation eya braille.”) Kandi nitushohoza ebitabo bya braille bingi ebirikwegamira ahari Baibuli. Tushohweize akatabo akaine omutwe Learn to Read Braille kuhwera abarikwenda kwega braille. Katebeekanisiibwe kuhwera abahumire kwega kushoma braille barikuhwerwa omuntu orikuhweza.
Kubaasa kutunga ebitabo bya braille ebiteirwe, gamba n’omwe aha Bajurizi ba Yehova nari shaba kutaayaayirwa.
Za aha jw.org, kubaasa kwihaho ebitabo ebirikushomwa ekyoma kya notetaker.d
Ebitabo eby’enyuguta mpango n’eby’aha mukura ebirikuhangutsibwa. Ebitabo eby’enyuguta mpango biriho kubaasa kuhwera abatarikuhweza gye. Kandi omukura gwaitu jw.org gutebeekanisiibwe gye kubaasisa omuntu kuhangutsya ebigambo. Kandi na JW Library app neebaasa kuhangutsya enyuguta.
Kubaasa kutunga ebitabo eby’enyuguta empango, gamba n’omwe aha Bajurizi ba Yehova nari oshabe kutaayaayirwa.
Noobaasa kwiha aha jw.org ekitabo eky’enyuguta mpango ekirikubaasa kuteerwa.
Ebitabo ebikwatsirwe omu maraka. Baibuli ya New World Translation ekwatsirwe omu maraka omu ndimi ezirikurenga 200. Ekindi, bingi aha bitabo ebirikuhwera abantu kwega Baibuli nabyo bikwatsirwe omu maraka. Ebikwatsirwe omu maraka nibikira kuba birimu n’enshoboorora y’ebishushani.
Hurikiza nari oyiheyo eby’amaraka aha jw.org n’aha app ya JW Library.
Noobaasa kwiha aha jw.org ebitabo ebirikubaasa kushomwa puroguraamu za kompyuta ezirikushoma ebiri aha sikuriini nari ebyoma ebirikuhwera abatarikuhweza gye kuhurikiza ebitabo ebyo.e
Vidiyo ezirimu amaraka agarikushoboorora ebirikworekwa.f Abajurizi ba Yehova nibashohoza vidiyo ezirimu amaraka agarikushoboorora ebirikworekwa omu ndimi ezirikurenga 100. Vidiyo ezi nizihwera abantu kwetegyereza obuhabuzi bwa Baibuli n’okubugyenderaho.
Reeba zimwe aha vidiyo nk’ezo ezirimu amaraka agarikushoboorora ebirikworekwa:
Enteerane n’emikoro. Twine ebibiina omu nsi yoona ahu turikuteeranira buri saabiiti kubaasa kwega ahari Yehova n’okumuramya. Kandi nitutebeekanisa n’enteerane empango buri mwaka ahu turikwongyera kwega Baibuli. Aha nteerane ezirimu vidiyo nituteeraho kushohoza n’amaraka agarikushoboorora ebikworekwa. Aha nteerane zaitu kyaba nikibaasika nituvunuurira abarikuba bahumire kandi bafiire n’amatu turikukoresa omuringo gw’obumanyiso ogurikumanywa nka tactile interpreting. Nitwakiira boona kandi titurikushoroora muntu weena.
Yega ebirikukwata aha nteerane zaitu empango ez’ebiro bishatu ezirikubaho buri mwaka.
Ija aha mukoro ogurikukirayo obukuru ogw’okwijuka okufa kwa Yesu ogurikubaho buri mwaka.
José Luis Ayala naatuura omuri Mexico. Akazaarwa afiire amatu kandi bwanyima akahuma amaisho aha myaka 29. Yetegyereze oku yaagasiirwe omu nteerane zaitu n’oku zimuhweraire kuba omwegyesa murungi wa Baibuli.
a “Okutahweza gye” nikimanyisa ngu omuntu tarikubaasa kureeba gye n’obu yaakujwara ebirahure kandi eki nikimuteganisa yaaba naakora emirimo ya butoosha. Omu kicweka eki “empumi” nibatwariramu abatarikureeba na kakye hamwe n’abo abatarikuhweza gye.
b Yehova n’eiziina rya Ruhanga. (Zaaburi 83:18) Reeba ekicweka “Yehova n’Oha?”
c Noobaasa kwohereza okushaba kwawe kugira ngu omwe aha Bajurizi ba Yehova akworekye ekirikutwarirwa omu mushomo ogu ogw’okwega Baibuli ahabwa busha.
d Notetaker n’ekyoma ekirikubaasa kworeka ebigambo omu muringo gwa braille nari kikashoma ebirikworekwa aha sikuriini omu iraka nari byombi. Ekyoma ekyo nikiguma nikihindahindura enyuguta za braille kuhikaana n’ebiriyo nibishomwa. N’ahabw’ekyo waaba oine ekyoma eki nooba otarikwetenga omugugu gw’ebitabo bya braille ebiteirwe.
e Puroguraamu za kompyuta ezirikushoma ebiri aha sikuriini hamwe n’ebyoma ebirikushoma ebitabo nibyatura ebigambo omu iraka eririkuhurirwa birikukoresa eiraka rya kompyuta yaabyo nari eiraka ry’ekitabo erikwasirwe. Puroguraamu ezi nizihwera abarikuzikoresa kusherura ebicweka by’ekitabo ebi barikwenda.
f Amaraka agarikushoboorora ebiri omu vidiyo nigateebwa omu vidiyo kushoboorora ekiriyo nikiba aha sikuriini.