Abanyasaayansi Bairiize Haihi Eshaaha y’Eizooba ry’Okucwekyerera—Baibuli Neegamba Ki?

Okwokubanza 24, 2023, abanyasaayansi bakagira ngu Eshaaha y’Eizooba ry’Okucwekyereraa hati eri haihi na shaaha mukaaga z’ekiro, ekirikujwekyera emperu y’ensi.

“Eshaaha y’Eizooba ry’Okucwekyerera neejwekyera akagwe akari haihi kugwera abantu, akairiire haihi na mukaaga ez’ekiro Orwakabiri, ahabw’ebiriyo nibibaho nk’orutaro omuri Ukraine, okutiinatiinisa kw’orutaro rw’ebirwaniso by’obutwa, n’embeera mbi y’obwire.”—Amakuru ga AFP International Text Wire.
“Orwakabiri abanyasaayansi bakagira ngu ‘Eshaaha y’Eizooba ry’Okucwekyerera’ neeburayo obutikitiki 90 kuhika ahari mukaaga ez’ekiro, ekireeteire abantu kwirira haihi na Haramagedoni kukira ira.”—Amakuru ga ABC.
“Guruupu y’abanyasaayansi omu nsi barabwire ngu okugumizamu kubaho kw’abantu kuri aha rutezyo kukira ira.”—Orupapura rw’Amakuru The Guardian.

Mbwenu shi emperu y’abantu n’ensi yaitu eyiriire haihi? Twine kutiina shi ekiraabeho omu biro by’omumaisho? Baibuli neegamba ki?

Ekiraabeho omu biro by’omumaisho

Kurugiirira ahari Baibuli, ‘ensi yo neegumaho obutwire bwona’ kandi hariho abantu abarikwija ‘kugituuramu ebiro byona.’ (Omubuurizi 1:4; Zaaburi 37:29) N’ahabw’ekyo abantu tibarikwija kucwekyereza ensi yaitu, nari kugireetera kuba etarikubaasa kutuurwamu.

Kwonka, Baibuli neegamba aha mperu. Nk’eky’okureeberaho, neegira ngu “ensi egi neehwaho.”—1 Yohaana 2:17.

Kubaasa kumanya eki Baibuli erikuba neemanyisa ku erikugamba aha mperu y’ensi, shoma ekicweka, “Is the World Coming to an End? What Is the Apocalypse?”
Kubaasa kumanya eki Baibuli erikugamba aha bwire obu ebintu ebimwe biraabeho omu nsi, shoma ekicweka, “When Will the World End?”

Okuguma n’emiteekateekyere mirungi

Baibuli neebaasa kutuhwera kuguma twine emiteekateekyere mirungi n’obu ensi eraabe erimu oburemeezi hati. Mu muringo ki?

Baibuli neetuha obuhabuzi oburikukora. (2 Timoseo 3:16, 17) Nk’eky’okureeberaho, shoma ekicweka, “How to Control Worry” kureeba oku Baibuli erikubaasa kukuhwera kuguma oine emiteekateekyere mirungi n’omu mbeera zigumire.
Baibuli neeha amatsiko agarikwesigwa ag’ebiro by’omumaisho. (Abarooma 15:4) Neeshoboorora gye ebirikubaho hati n’ebiraabeho omu biro by’omumaisho, ekirikutuhwera kuguma twine obwesigye n’obu haraabe hariho oburemeezi.

Kubaasa kugasirwa omu bwijwire omu Baibuli, nitukuhiga hati kwejumba omu mushomo gwaitu ogwa Baibuli ogutari gw’okushashurira.

a “Eshaaha y’Eizooba ry’Okucwekyerera n’entebeekanisa etairweho kurabura abantu aha ku turi haihi kucwekyereza ensi yaitu, turikukoresa entunguuka y’ebya saayansi. N’entebeekanisa y’akamanyiso, erikutwijutsya oburemeezi obu twine kugonjoora twaba turi ab’okugumaho aha nsi egi.”—Ekigombe kya Bulletin of the Atomic Scientists.