Oine Obuhame Obuhikire?

1, 2. (a) Twena twine kwega kukora ki, kandi ahabw’enki? (b) Nituza kwega ki omu kicweka eki?

TWENA twine kwega kushwijuma amakuru nari obutumwa kubaasa kumanya ekihikire. (Enfumu 3:21-23; 8:4, 5) Kitari ekyo, nikiija kworobera Sitaane n’ensi egi embi kutuhabisa. (Abaefeso 5:6; Abakolosai 2:8) Buzima, kubaasa kuhika aha mazima genyine, twine kutunga obuhame. Enfumu 18:13 nihagira hati: “Ogarukamu atabandize kuhurira [ebihikire] kyoreka obushema bwe n’okuhemuka.”

² Omu kicweka eki, nitwija kureeba ekirikutureetera kugumirwa kutunga obuhame obuhikire n’okuhika aha kucwamu gye. Nitwija n’okureeba emisingye ya Baibuli n’eby’okureeberaho ebiraatuhwere kushwijuma obutumwa obu turikutunga.

‘OTAIKIRIRIZA ERYO’ BURI KIGAMBO

3. Ahabw’enki twine kugyendera aha musingye oguri omu Enfumu 14:15? (Reeba ekishushani aha kutandika.)

³ Obunaku obu, nitutunga amakuru kuruga omu mbaju zoona. Kurabira aha Intaneeti, tiivi, n’endiijo miringo. Nitubaasa n’okugatunga kuruga ahari banywani baitu, aha simu, nari kompyuta. Obumwe amakuru aga nigaba gari maingi nooba nooshusha ngu tigaraahweyo. N’ahabw’ekyo twine kwegyendesereza. Banywani baitu obundi nibaba baine ebigyendererwa birungi, kwonka abamwe nibabuzya ebishuba nari niboongyeramu ebyabo. Ni musingye ki ogw’omu Baibuli ogurikubaasa kutuhwera kumanya amakuru agahikire? Ebiri omu Enfumu 14:15 nibigira biti: “Otaine bwengye aikiririza eryo, kwonka omwerinzi ayetegyereza ahu arikuraba.”

4. Ebiri omu Abafilipi 4:8, 9 nibituhwera bita omu kutoorana ebi turaashome, kandi ahabw’enki ni kikuru kutunga ebihikire? (Reeba na akabokisi “Ebimwe Ebirikutuhwera Kutunga Ebihikire.”)

⁴ Kubaasa kucwamu gye, twine kutunga obuhame obuhikire. N’ahabw’ekyo, twine kwegyendesereza twaba nitutoorana eby’okushoma. (Shoma Abafilipi 4:8, 9.) Titushemereire kushiisha obwire bwaitu turikureeba amakuru aha mikura ya Intaneeti etarikwesigwa nari turikushoma obutumwa obu barikutwoherereza oburikujanjaaza orugambo. Okukira munonga ni kikuru kwetantara emikura ey’abeehagwire aha mazima erikushagika emiteekateekyere yaabo. Nibaba nibenda kukiikamya amazima n’okutuubya okwikiriza kw’abaheereza ba Ruhanga. Obutumwa obutarikwesigwa nibutureetera kucwamu kubi. Toshemereire kuteekateeka ngu torikubaasa kuhabisibwa amakuru agatahikire.​—1 Timoseo 6:20, 21.

5. Abaisraeli bakaikiriza kishuba ki, kandi eki kikabareetera kwehurira bata?

⁵ Okujanjaaza ebitahikire nikubaasa kureetaho oburemeezi. Obu Musa yaabaire naayebembera Abaisraeli, abashaija 12 bakaza kutata Ensi Eyaaraganisiibwe. Entatsi 10 bakagaruka n’amakuru mabi. (Okubara 13:25-33) Ebi baareebire, bakoongyeramu ebyabo ebitahikire ekyareeteire abantu ba Yehova kugira obwoba n’okuhwa amaani. (Okubara 14:1-4) Ahabw’enki abantu baatiinire? Obundi bakaikiriza ngu ebi baabagambiire bihikire ahakuba baingi aha ntatsi bakagamba ebirikushushana. N’ahabw’ekyo bakanga kuhurikiza ebintu birungi ebi entatsi ibiri zaagambire aha Nsi Eyaaraganisiibwe. (Okubara 14:6-10) Omu mwanya gw’okumanya amazima genyine kandi bakeesiga Yehova, bakacwamu kwikiriza ebitebyo bitahikire.

6. Ahabw’enki tutashemereire kutangaara twahurira abantu nibagamba ebitahikire aha baheereza ba Yehova?

⁶ Twine kwegyendesereza munonga twagira ebi twahurira ebi abandi barikugamba aha baheereza ba Yehova. Ijuka ngu Sitaane omuzigu waitu naayetwa “omuregi w’ab’eishe-emwe.” (Okushuuruurwa 12:10) Yesu akaturabura ngu abarikutuhakanisa nibaija ‘kutubeiherera’ n’ekigambo kyona ekibi. (Matayo 5:11) Okurabura okwo twakutwara nka kukuru, titurikwija kutangaara twahurira abaheereza ba Yehova barikubagambaho kubi.

7. Tushemereire kwebuuza ki tutakoohereize obutumwa?

⁷ Nookunda kwoherereza banywani baawe obutumwa aha kompyuta nari aha simu? Ku orikuhurira ekyakushemeza nari waakishoma omu makuru, nooyehurira nk’ow’amakuru orikuba naayenda kukijanjaaza ahonaaho? Otakohereize obutumwa banza oyebuuze oti: ‘Nimpamya ngu n’amazima? Nyine obuhame obuhikire?’ Waaba otarikuhamya, noobaasa kuba oriyo noojanjaaza ebishuba. N’ahabw’ekyo waaba otarikuhamya ngu obutumwa buhikire otabwohereza. Bwihemu omu simu!

8. Abarikutuhakanisa babaasize kukora ki omu mahanga agamwe, kandi nitubaasa kushagika tuta ebishuba byabo tutakigyendereire?

⁸ Hariho enshonga endiijo ahabw’enki nikibaasa kuba eky’akabi kwohereza obutumwa tutabandize kuteekateeka. Omu mahanga agamwe, omurimo gwaitu gw’okubuurira tigurikwikirizibwa. Abarikutuhakanisa nibabaasa kujanjaaza ebishuba bagyendereire kututiinatiinisa nari kutureetera kuteesiga ab’eishe-emwe. Teekateeka aha kyabaireho omuri Soviet Union. Abaporiisi aba KGB, bakajanjaaza ebishuba ngu ab’eishe-emwe abarikumanywa munonga beehakaine Abajurizi ba Yehova.a (Reeba obugambo obw’ahansi.) Eky’obusaasi, baingi bakaikiriza ebishuba ebi baaruga omu kibiina kya Yehova. N’obu baingi aharibo bwanyima baagarukire, kwonka abamwe tibaragarukire. Bakaikiriza ebishuba ebyo byashiisha okwikiriza kwabo. (1 Timoseo 1:19) Nitubaasa kwetantara tuta akagwe nk’ako? Yanga kujanjaaza amakuru agatahikire nari agataine buhame. Otaikiriza buri kimwe eki barikukugambira. Omu mwanya gw’ekyo, hamya ngu oine obuhame.

AMAKURU G’EKITEGA

9. Niki ekindi ekirikutureetera kugumirwa kutunga amakuru agahikire?

⁹ Obumwe nitubaasa kugambirwa amazima g’ekitega. Kandi obundi tibarikutugambira byona. Eki nikitureetera kugumirwa kutunga amazima genyine. Titurikubaasa kwesiga eki abantu baatugambira kyaba kirimu ebihikire bikye! Nitubaasa kukora ki kutahabisibwa amazima g’ekitega?​—Abaefeso 4:14.

10. Ahabw’enki Abaisraeli abamwe baabaire bari haihi kurwanisa bagyenzi baabo, kwonka niki ekyabahwereire kutabarwanisa?

¹⁰ Nitubaasa kugira eki twayegyera aha Baisraeli abaabaire nibatuura omu burengyerwa izooba bw’Omugyera Yorudaani, obu Yoshua yaabaire akiriho. (Yoshua 22:9-34) Bakahurira ngu Abaisraeli b’omu burugwa izooba bw’Omugyera Yorudaani bombekire eitambiro haihi n’omugyera ogwo. Bimwe aha bi baagambiirwe bikaba bihikire, kwonka ebindi bikaba bitahikire. Eki kikareetera Abaisraeli b’omu burengyerwa izooba kuteekateeka ngu bagyenzi baabo ab’omu burugwa izooba baagomeire Yehova, n’ahabw’ekyo bakatebeekanisa kubarwanisa. (Shoma Yoshua 22:9-12.) Abaisraeli b’oburengyerwa izooba, bakabanza kwohereza abashaija kutunga obuhame obuhikire. Abashaija abo bakamanya ngu ekihikire niki? Abaisraeli b’oburugwa izooba eitambiro eri baayombekire rikaba ritari ry’okuramizaho baaruhanga b’ebishuba. Kureka bakaba baaryombekire nk’ekiijutsyo kworeka buri omwe ngu nibaramya Yehova. Abaisraeli aba baine kuba baashemereirwe ahabw’okugira ngu tibaragiire kurwanisa bagyenzi baabo, kureka bakatwara obwire kumanya amazima goona.

11. (a) Mefiboshesi akatwarizibwa ata omu muringo gutari gw’oburingaaniza? (b) Niki ekyabaire nikiza kuhwera Daudi kutwariza gye Mefiboshesi?

¹¹ Naitwe obumwe nitubaasa kugira obusaasi abantu baatugambaho ebitahikire gye. Eki nikyo kyahikire ahari Mefiboshesi. Omugabe Daudi akaba efura yaamuha ekibanja kyona ekyabaire kiri ekya ishenkuru Saulo. (2 Samueli 9:6, 7) Kwonka bwanyima Daudi akahurira ebyabaire bitari birungi ebirikukwata ahari Mefiboshesi. Tarabandize kuhamya yaaba ebi yaahuriire n’amazima, kandi buri kimwe eki Mefiboshesi yaabaire aine akakimwaka. (2 Samueli 16:1-4) Bwanyima Daudi ku yaagambire nawe, akamanya ngu ekaba eri enshobe, reero yaacwamu kumugarurira ebintu ebi yaamwakire. (2 Samueli 19:24-29) Ku ogire ngu Daudi akatwara obwire kumanya amazima, Mefiboshesi akaba atarikwija kuhikwaho obutari buringaaniza obwo.

12, 13. (a) Yesu akakora ki ku baamugambireho ebitahikire? (b) Omuntu yaatubeiherera nitubaasa kukora ki?

¹² Noobaasa kukora ki omuntu yaakugambaho ebishuba? Eki kikahika ahari Yesu na Yohaana Omubatizi. (Shoma Matayo 11:18, 19.) Yesu we akakora ki? Tarakoreise obwire bwe n’amaani ge kushoboororera abantu ngu ebi barikumugambaho n’ebishuba. Kureka, akahiga abantu kusherura ebihikire. Yesu akaba naayenda ngu bate omutima aha bi yaabaire naakora n’ebi yaayegyeise. Akagira ati: “Obwengye busiimirwa aha mirimo yabwo.”​—Matayo 11:19.

¹³ Yesu akatwegyesa eishomo ki erikuru? Obumwe abantu nibabaasa kutugambaho ebitahikire, kandi kitureetere kwerarikirira ngu eiziina ryaitu niriza kusiisikara. Kwonka oku turikutwaza nikubaasa kworeka abandi kyenyine eki turi. Nka Yesu, emitwarize yaitu mirungi neebaasa kworeka ngu ebi barikutugambaho tibihikire.

NOOYEYESIGA?

14, 15. Ahabw’enki tutashemereire kwesiga okwetegyereza kwaitu?

¹⁴ Twaheza kureeba ngu nikibaasa kutooroba kutunga amazima agarikwesigwa. Oburemeezi obundi n’okugira ngu tituhikiriire. Nitubaasa kuba tumazire emyaka mingi nituheereza Yehova, kitureetere kugira obwengye omu miringo etari emwe n’emwe. Abandi nibabaasa kutuha ekitiinisa ahabw’okugira ngu nitucwamu gye. Eki nikibaasa kuturugiramu oburemeezi?

¹⁵ Eego. Nitubaasa kutandika kwesiga okwetegyereza kwaitu. Nitubaasa kwikiriza emiteekateekyere yaitu n’enyehurira zaitu kututegyeka twaba nitucwamu. Nitubaasa kutandika kuteekateeka ngu nitwetegyereza embeera n’obu twakuba tutaine buhame. Buzima eki n’eky’akabi munonga! Baibuli neeturabura ngu titushemereire kwesiga okwetegyereza kwaitu.​—Enfumu 3:5, 6; 28:26.

16. Ow’eishe-emwe naabaasa kweshanga mu mbeera ki, kandi eki nikibaasa kureetera owaamureeba kuteekateeka ki?

¹⁶ Nk’eky’okureeberaho, ka tugire ngu omureeberezi orikwetwa Tom omazire obwire omu buheereza, omwabazyo gumwe yaaza aha hoteeri yaareeba John ashutami n’omukazi ondiijo otari mukazi we. Kandi nikireebeka baashemereirwe. Tom naabareeba nibasheka kandi nibeegwa omu kifuba. Eki kimwerarikiriza reero ayebuuza ati: ‘John n’omukazi we shi nibaza kugaitururwa? Kandi shi abaana baabo?’ Tom akaba yaareebire embeera nk’ezi nizibaho. Mbwenu ku ogire ngu niiwe Tom, okaayehuriire ota?

17. Tom akeetegyereza ki bwanyima, kandi eki nitubaasa kukyegyeraho ki?

¹⁷ Kwonka kiteekateekyeho! N’obu Tom araabe naateekateeka ngu John tari mwesigwa aha mukazi we, kwonka shi aine obuhame obuhikire? Bwanyima, omu mwabazyo ogwo, Tom ateerera John esimu, kandi amanya ngu omukazi ogwo ni munyaanya, owaija kuruga hare. Kandi bamazire emyaka mingi batarikureebana. Ahabw’okugira ngu munyaanya yaaba aine obwire bukye, John yaacwamu ngu baze kuriira hamwe omu hoteeri. Omukazi we tiyaabaasa kubeegaitaho. Tom ashemererwa ahabw’okugira ngu tihaine omuntu ondiijo ou yaaba yaagambiire eki yaareeba! Eki nitukyegyeraho ki? N’obu twakuba tumazire obwire bwingi nituheereza Yehova, twine kubanza twamanya amazima tutakahamize ekintu kyona.

18. Niki ekirikubaasa kutureetera kurahuka kwikiriza ebitahikire byagambwa aha b’eishe-emwe?

¹⁸ Nikibaasa kutugumira kumanya gye ekibaireho, embeera yaaba neetwariramu ow’eishe-emwe ou tutarikukwatanisa gye nawe. Twaguma nituteekateeka aha butaikirizana obu twine, nitubaasa kutandika kwekyengyera ow’eishe-emwe. Reero, twahurira ekintu kibi ekirikumukwataho, nitubaasa kwenda kurahuka kukiikiriza, n’obu twakuba tutaine buhame. Eki nikitwegyesa ki? Twagira emiteekateekyere etahikire aha b’eishe-emwe, nitubaasa kwikiriza ebigwire ebitaine buhame. (1 Timoseo 6:4, 5) Titushemereire kugira eihari nari emiteekateekyere mibi kuguma omu mitima yaitu. Ijuka ngu Yehova naayenda ngu tukunde ab’eishe-emwe bagyenzi baitu, kandi tubasaasire twihire aha mutima.​—Shoma Abakolosai 3:12-14.

EMISINGYE YA BAIBULI NEIJA KUTURINDA

19, 20. (a) Ni misingye ki ya Baibuli erikubaasa kutuhwera kumanya ekihikire? (b) Nituza kwega ki omu kicweka ekirikukurataho?

¹⁹ Obunaku obu, tikyorobi kutunga amazima agarikwesigwa n’okumanya ekihikire. Ahabw’enki? Ahakuba nitutunga amakuru gatahikire nari ag’ekitega kandi tituhikiriire. Niki ekirikubaasa kutuhwera? N’emisingye eri omu Ekigambo kya Ruhanga! Nk’eky’okureeberaho, omusingye gumwe niguturabura ngu twagarukamu tutabandize kuhurira [ebihikire] nikyoreka obushema. (Enfumu 18:13) Ogundi nigutuhwera kumanya ngu titushemereire kwikiririza eryo tutabandize kuhamya yaaba n’amazima. (Enfumu 14:15) N’obu twakuba tumazire obwire buraingwa nituheereza Yehova, titushemereire kwesiga okwetegyereza kwaitu. (Enfumu 3:5, 6) Emisingye ya Baibuli neija kutuhwera twafayo kugikoresa kumanya ebihikire n’omu kucwamu gye.

²⁰ Kwonka hariho endiijo nshonga ahabw’enki kitoorobi kumanya ebihikire. Itwe abantu niturahuka kucwera bagyenzi baitu emanja kurugiirira aha bi turikureeba. Omu kicweka ekirikukurataho, nituza kushwijuma embeera ezimwe ezirikubaasa kutureetera kukora enshobe egi, n’oku turikubaasa kugyetantara.