Nooza Kworeka ota ngu Noosiima Ekitambo?

1-2. Ekitambo kya Yesu nikituhiga kukora ki, kandi ahabw’enki? (2 Abakorinso 5:​14, 15) (Reeba n’ekishushani.)

NOOYEHURIRA ota waaba okwatiirwe omu bishenyuka by’ekyombeko hakagira omuntu owaija kubikwihamu? Omuntu ogwo n’obu yaakuba ajunire abantu abandi omu bishenyuka nibyo bimwe, hatariho kubangaanisa nooba nooyenda kumusiima kubaasa kworeka ngu nootwara eki yaakukorera nk’eky’omuhendo.

² Nk’oku tureebire omu kicweka eky’enyima, titurikubaasa kweiha omu buremeezi obwareetsirweho ekibi eki twahungwire. Kwonka ekitambo kya Yesu nikituhwera (1) kusaasirwa ebibi, (2) kugira amatsiko g’okukizibwa kuruga omu kibi n’obutahikiirira, kandi (3) n’okutugarukanisa na Ruhanga. N’ekirugiremu twine amatsiko g’okutuuraho ebiro byona omu nsi ya Yehova ensya. Buzima ekitambo nikyoreka rukundo ei Yesu atwiniire, kandi rukundo egyo akaba agiiniire abantu n’obu yaabaire atakaizire omu nsi. (Enf. 8:​30, 31) Entumwa Paulo akahandiika ngu “okukunda kwa Kristo nikwo kutugyema.” (Shoma 2 Abakorinso 5:​14, 15.) Ekyo nikimanyisa ngu twine kworeka ngu nitusiima rukundo ya Yesu kandi tworekye ngu titurikutwara ekitambo nk’ekitaine mugasho.

3. Ahabw’enki buri muntu naasiima ekitambo omu muringo ogurikutaana aha gw’ondiijo?

³ Mbwenu shi ekitambo kya Yesu nikiza kukuhiga mu muringo ki? Eky’okugarukamu kyawe nikibaasa kutaana n’eky’omuntu ondiijo. Kubaasa kushoboorora ahabw’enki, teera akashushani abantu bashatu baatandika orugyendo barikuza omu mwanya gumwe kwonka buri muntu yaatandikira orugyendo rwe omu mwanya ogutarikushushana n’ogw’ondiijo. Emihanda ei baraarabemu terikushushana. Nikyo kimwe, embeera y’omukago gwawe na Yehova niyo eraakuhwere kucwamu omuhanda ogu oraatoore kuhika aha kigyendererwa kyawe ky’okworeka ngu noosiima ekitambo. N’ahabw’ekyo ekicweka eki nikiza kugamba aha guruupu y’abantu ab’emiringo eshatu: (1) Abeegi ba Baibuli, (2) Abakristaayo ababatiziibwe, kandi (3) abahabire kuruga omu kibiina.

ABEEGI BA BAIBULI

4. Yehova naayetegyereza ki yaaba naareeba abeegi ba Baibuli?

⁴ Waaba ori omwegi wa Baibuli, teekateeka ahari eki: Oku orikutwara amakuru marungi nikworeka ngu ori omwe aha bu Yehova arikweyiriza haihi kuba banywani be. (Yoh. 6:44) ‘Yehova niwe arikugyeza emitima.’ Ekyo nikimanyisa ngu naayetegyereza okuteeraho kwawe kwega ebirikumukwataho, kandi naashemererwa kureeba nookora empinduka kuhikaana n’emitindo ye. (Enf. 17:3; 27:11) Ekitambo nikikuhwera kugira omukago murungi na Yehova. (Rom. 5:​10, 11) N’ahabw’ekyo, otarikitwara nk’ekitaine mugasho.

5. Abeegi ba Baibuli nibabaasa kugyendera bata aha buhabuzi oburi omu Abafilipi 3:16?

⁵ Waaba ori omwegi wa Baibuli, noobaasa kworeka ota ngu noosiima ekitambo? Orikukuratira obuhabuzi obu entumwa Paulo yaahaire Abafilipi arikugira ati: “Amazima agu tuhikiremu, tube nigo twagyenderamu.” (Fil. 3:16) Envunuura ya Baibuli endiijo neegamba aha mushororongo ogwo eti: “Twine kuguma nitugyendera omu muhanda ogu turimu hati.” Kuhikaana n’obuhabuzi obwo, otaikiriza ekintu kyona kukuremesa kutunguuka kugyendera omu muhanda gw’amagara.—Mat. 7:14; Luk. 9:62.

6. Abeegi ba Baibuli nibabaasa kukora ki baagumirwa kwetegyereza enyegyesa emwe, nari kucwa omuze ogu Baibuli erikujumiirira? (Eky’Ebiragiro 30:​11-14) (Reeba n’ekishushani.)

⁶ Mbwenu shi ku waakugumirwa kwikiriza enyegyesa ya Baibuli ei oherize kwega? Condooza aha nyegyesa egyo kandi oshabe Yehova kukuhwera kugyetegyereza gye. (Zab. 86:11) Waagumizamu noogumirwa kugyetegyereza, banza oyehe obwire, ahakuba noobaasa kwija kugyetegyereza bwanyima. Kwonka otarekyera aho kwega Baibuli. Mbwenu shi ku waakugumirwa kucwa omuze ogu Baibuli erikujumiirira? Ijuka ngu Yehova tarikushaba abantu abatahikiriire kukora ebintu ebi batarikubaasa. Buzima naiwe noobaasa kugyendera aha mitindo ye. (Shoma Eky’Ebiragiro 30:​11-14.) Kandi Yehova naaraganisa kukuhwera. (Isa. 41:​10, 13; 1 Kor. 10:13) N’ahabw’ekyo otahanika. Omu mwanya gw’okuta omutima aha buremeezi obu orikubugana hati, gute aha kusiima Yehova ahabwa byona ebi akukoreire otwariiremu n’entebeekanisa y’ekitambo. Kandi ku oraayongyere kukunda Yehova noija kwetegyereza ngu ‘ebiragiro bye tibirikurutsya.’—1 Yoh. 5:3.a

7. Abato abarikukurira omu mazima nibabaasa kuteekateeka ahari ki?

⁷ Kandi shi abato abariyo nibakurira omu mazima? Naimwe muri abeegi ba Baibuli. Nangwa muri abeegi ba Baibuli ab’omuhendo munonga aha bazaire baanyu. Baibuli neegira eti: “Mwirire haihi Ruhanga, nawe abone kubairira haihi.” (Yak. 4:8; 1 Bus. 28:9) Waateera orutambwe rw’okubanza omu kwirira haihi Yehova nawe naija kukwirira haihi. Yehova naakutaho mutima tihabw’okugira ngu okuriire omu ka y’Abajurizi be kyonka, kureka naayeyiriza haihi buri muntu okwe, kandi naayenda ngu naiwe omwirire haihi obe munywani we. Mbwenu shi niki ekiraakuhwere kugira omukago guhami na Yehova? N’ekitambo, ekintu eki otaine kukwata eijaga. (Rom. 5:​1, 2) N’ahabw’ekyo otakagiire aha Kiijutsyo ky’omwaka ogu, banza oteekateekye aha ki Yehova na Yesu baakukoreire. Reero ekyo nikiija kukuhiga kuhika aha bigyendererwa byawe eby’omwoyo eby’okworeka ngu noosiima ekitambo eki Ruhanga yaahaireyo kurabira omu Mwana we.b

ABAKRISTAAYO ABABATIZIIBWE

8. Abakristaayo ababatiziibwe boorekire bata ngu nibaikiririza omu kitambo?

⁸ Ku oraabe ori Omukristaayo obatiziibwe, oyorekire ngu noikiririza omu kitambo omu miringo mingi. Nk’eky’okureeberaho, okakora empinduka kubaasa kwirira haihi Yehova n’okugyendera aha mitindo ye. Nooyorobera ekiragiro kya Yesu eky’okuhindura abantu abeegi orikubagambira ebi orikwikiriza. Okeehayo ahari Yehova kandi waabatizibwa. Waahakanisiibwe ahabw’okuhamira aha kuramya okw’amazima? (2 Tim. 3:12) Okugumisiriza kwawe omu bwesigwa nikworeka rukundo ei oiniire Yehova n’okusiima oku oine ahabw’ekitambo eki yaahaireyo kurabira omu Mwana we.—Heb. 12:​2, 3.

9. Abakristaayo ababatiziibwe baine kwetantara kabi ki?

⁹ Itwe Abakristaayo ababatiziibwe haine akabi aku twine kwetantara. Bwanyima y’obwire nitubaasa kurekyera aho kusiima ekitambo. Ekyo nikibaasa kubaho kita? Teekateeka aha Bakristaayo ba Efeso ab’ekyasha ky’okubanza. Yesu akabasiima ahabw’okugumisiriza kwabo. Kwonka bwanyima akabagira ati: “Nyine eki ndikufa naiwe, okareka okukunda kwawe okw’okubanza.” (Kush. 2:​3, 4) Nk’oku ebigambo bya Yesu birikworeka, bwanyima y’obwire, Abakristaayo nibabaasa kutandika kuramya Yehova nk’omugyenzo beitu hatari ahabwa rukundo. Omuntu nk’ogwo naabaasa kuba naashaba, arikuza omu nteerane, kandi arikwejumba omu kubuurira kwonka arikubikora ahabw’okuhikiiriza omukoro. Omuntu ogwo naaba atakihigwa rukundo ei ainiire Yehova. Mbwenu shi noobaasa kukora ki waareeba ngu rukundo ei oiniire Yehova etandikire kutuuba?

10. Noobaasa kugyendera ota aha buhabuzi obu Paulo yaahaire Timoseo? (1 Timoseo 4:​13, 15)

¹⁰ Entumwa Paulo akahiga Timoseo kuba ‘omweziriki’ omu buheereza bwe obw’Ekikristaayo kandi ngu ‘abe nibwo yaataho omutima.’ (Shoma 1 Timoseo 4:​13, 15.) Noobaasa kugyendera aha buhabuzi obwo orikuteekateeka aha ku orikubaasa kureetera okuramya kwawe kuguma ‘nikutagata.’ (Rom. 12:11) Nk’eky’okureeberaho, teeraho kutebeekanisa gye enteerane kugira ngu obaase kutaho omutima zaaba nizigyenda omu maisho. Nari noobaasa kugasirwa omu kweyegyesa Baibuli orikuza omu mwanya ogutarimu eby’okukuteganisa kugira ngu obaase kuteekateeka gye aha bi waayega. Nk’oku orikuguma nooyongyera enku omu muriro kugira ngu gugume nigwaka, noobaasa kuguma nookora ebintu ebyo kugira ngu ogume noosiima byona ebi Yehova akuhaire, otwariiremu n’ekitambo. Noobaasa kukoresa obwire bw’Ekiijutsyo kuteekateeka aha migisha ei Abajurizi ba Yehova turikwesiimira. Ekyo nikiija kukuhwera kwongyera kusiima ekitambo ekirikukuhwera kugira omukago murungi na Yehova.

11-12. Mbwenu shi waahurira otaine mujinya gw’okuza kubuurira nikimanyisa ngu tokiine mwoyo gwa Ruhanga? Shoboorora. (Reeba n’ekishushani.)

¹¹ Waayetegyereza ngu tokiine mujinya gw’okuramya okw’amazima nk’ogu waabaire oine, otahwa amaani nari okateekateeka ngu tokiine mwoyo gwa Ruhanga. Ijuka eki entumwa Paulo yaahandiikiire Abakorinso aha bikwatiraine n’obuheereza bwe arikugira ati: ‘Kwonka ku ndaabe nimbuurira ngyemirwe, na mbwenu nshemereire kubuurira ahabw’okukwatsibwa engiri egyo.’ (1 Kor. 9:17) Mbwenu shi akaba naamanyisa ki?

¹² Obumwe Paulo akaba ahurira ataine kihika ky’okuza omu kubuurira. Kwonka akaba amaririire kugumizamu naabuurira n’obu obumwe yaabaire ahurira ataine muhimbo gw’okuzayo. Naiwe noobaasa kumutooreza. Mariirira kukora ekihikire n’obu waakuba noohurira otaine muhimbo gw’okukikora. N’ahabw’ekyo shaba Yehova akuhwere ‘kukunda ebi arikusiima n’okubikora.’ (Fil. 2:13) Guma oine bingi by’okukora omu ntebeekanisa yaawe y’eby’omwoyo. Kandi gira obwesigye ngu ebi orikukora nibiija kukwata aha nyehurira zaawe, reero rukundo ei oiniire Yehova eyongyere kuhama.

13. Nitubaasa kugumizamu tuta nitweshwijuma kureeba yaaba ‘turi omu kwikiriza’?

¹³ Twine kuguma nitweshwijuma kureeba yaaba nitukikuratira obuhabuzi oburi omu 2 Abakorinso 13:5 aharikugira hati: “Mweshwijume mureebe ku muraabe muri omu kwikiriza, kandi mwegyeze mwenka.” Butoosha twine kuguma nitwebuuza ebibuuzo nk’ebi: ‘Ninyebembeza eby’obukama omu magara gangye?’ (Mat. 6:33) ‘Eby’okweshemeza ebi ndikwejumbamu nibyoreka ngu niinyanga ekibi?’ (Zab. 97:10) ‘Nindeetaho obusingye n’obumwe omu b’eishe-emwe bagyenzi bangye?’ (Efe. 4:​2, 3) Ekiijutsyo nikituhwera kwongyera kuteekateeka aha ntebeekanisa ya Yehova ey’ekitambo, n’okweshwijuma kuhamya ngu turiho ahabwa Kristo hatari ahabwaitu.

ABAHABIRE KURUGA OMU KIBIINA

14. Niki ekirikubaasa kureetera Abakristaayo abamwe kuhaba bakaruga omu kibiina kya Yehova?

¹⁴ Abakristaayo abamwe barekyeire aho kukwatanisa n’ekibiina n’obu baraabe baheereize Yehova kumara obwire buraingwa. Ahabw’enki ekyo nikibaho? Abamwe nibasingurwa ‘amaganya g’amagara aga.’ (Luk. 21:34) Abandi bakateerwa entsibo ahabw’ebigambo, nari ebikorwa by’ab’eishe-emwe bagyenzi baabo. (Yak. 3:2) Abandi bakakora ebibi by’amaani kandi nibeeziringa kushaba obuhwezi. Kyona ekyabaireho, noobaasa kukora ki waaba waahabire okaruga omu kibiina kya Yehova? Kandi entebeekanisa ya Yehova eya rukundo ey’ekitambo neebaasa kukuhiga kukora ki?

15. Yehova naayoreka ata ngu naafayo aha ntaama ezihabire zikaruga omu kibiina? (Ezekieli 34:​11, 12, 16)

¹⁵ Teekateeka oku Yehova arikwehurira yaareeba ab’eishe-emwe abahabire kuruga omu kibiina. Tarikubagirira ekiniga kandi tarikubeehuzya. Kureka naasherura entaama ezibuzire, aziriisa, kandi azihwera kumugarukira. (Shoma Ezekieli 34:​11, 12, 16.) Mbwenu shi naiwe Yehova nikyo ariyo naakukorera? Eego! Kandi ahabw’okugira ngu oriyo nooshoma ekicweka eki nikyoreka ngu nooyenda kumushemeza. Nk’oku Yehova yaareebire ekiri omu mutima gwawe kandi akakureeta omu mazima, na hati naakikureebamu ebirungi kandi naayenda ngu ogarukye omu kibiina.

16. Niki ekirikubaasa kuhwera entaama ezihabire kugaruka ahari Yehova? (Reeba n’ekishushani.)

¹⁶ Akatabo Return to Jehovah karimu ebigambo ebirikugumya ebirikugira biti: “Gira obwesigye ngu Yehova ayeteekateekire kukuhwera waaba nooteeraho kumugarukira. Naija kukuhwera kusingura okwerarikirira, obusaasi n’okugira obusingye oburikuruga omu kugira omutima ogutarikweshinja. Kandi ekyo nikiija kukuhwera kugaruka kuheereza Yehova ori n’Abakristaayo bagyenzi baawe.” Ijuka ngu abareeberezi baine ekihika ky’okukuhwera. Nibabaasa kuba “nk’omwanya ogw’okwekingaho omuyaga, n’obwegamo bw’eihunga.” (Isa. 32:2) Kubaasa kumanya yaaba noosiima ekitambo yebuuze oti: ‘Nimbaasa kukora ki hati kutereeza enshonga zangye na Yehova?’ (Isa. 1:18; 1 Pet. 2:25) Nk’eky’okureeberaho, noobaasa kubaho omu nteerane butunu aha Kyombeko ky’Obukama. Noobaasa kuhikiirira omwe aha bareeberezi kandi omushabe obuhwezi omu by’omwoyo oburikutwariramu okwegyesibwa Baibuli kumara akaire. Waakora otyo, noobaasa kugira obwesigye ngu Yehova naija kukuha omugisha ahabw’okuteeraho kumugarukira n’okworeka ngu noosiima ekitambo ky’Omwana we.

NOIJA KUKORA KI?

17-18. Nitubaasa kukoresa gye tuta obwire bwaitu Ekiijutsyo ky’omwaka ogu kitakahikire?

¹⁷ Yesu akagira ngu ekitambo kikaheebwayo kugira “ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yoh. 3:16) Ekitambo niyo ntebeekanisa ya Yehova ey’okutujuna kuruga omu buremeezi bw’ekibi n’okufa. Buzima titurikwenda kukikwata eijaga. (Rom. 3:​23, 24; 2 Kor. 6:1) Harikuburayo ebiro bikye Ekiijutsyo kikahika, nituza kutwara obwire kuteekateeka ahari rukundo ei Yehova na Yesu baatworekire, kandi rukundo egyo eine kutuhiga kworeka okusiima kwaitu.

¹⁸ Mbwenu shi noobaasa kworeka ota ngu noosiima ekitambo? Eky’okugarukamu kyawe nikibaasa kutaana n’eky’ondiijo. Kwonka gira obwesigye ngu Yehova naija kukuha omugisha ahabw’okuteeraho kuba omwe aha ab’eishe-emwe na banyaanyazi-itwe omu nsi yoona abatarikubaho “ahabwabo bonka, kureka ahabw’Ogwo owaabafeereire.”—2 Kor. 5:15.