N’obu Ndaabe Naabaire Nyine Enshoni, Nkaba Omumiisani

Nkazaarwa omuri 1951 omuri Vienna, Austria, omu ka y’Abakaturiki. Nkaba nyine enshoni, kwonka nkaba niinyikiririza omuri Ruhanga kandi ndikushaba obutoosha. Obu naabaire nyine emyaka mwenda, tata akatandika kwega Baibuli n’Abajurizi ba Yehova, kandi bwanyima na maawe akamwegaitaho.

Omu bwire bukye tukegaita aha kibiina kya Döbling omuri Vienna. Tukakora ebintu bingi hamwe nk’eka. Tukaba tushoma kandi twega Baibuli hamwe, tuza omu nteerane z’ekibiina, kandi tuhwera n’aha nteerane empango. Obu naabaire nkiri muto, tata akampwera kukunda munonga Yehova. Butoosha akaba ashaba Yehova ngu nyowe na murumuna wangye tube baapayoniya. Kwonka omu bwire obwo, tikyo kyabaire kiri ekigyendererwa kyangye.

OKUTANDIKA KUHEEREZA OMU BUHEEREZA OBW’OBUTWIRE

Nkabatizibwa omu 1965, nyine emyaka 14. Kwonka, kikaba nikiingumira kubuurira abu ntarikumanya. Nkaba ninyehurira nk’ow’ahansi aha bandi, kandi ndikwenda ngu ab’orwingano rwangye baankunde. N’ahabw’ekyo bwanyima y’obwire bukye mperize kubatizibwa, nkatandika kumara bwingi n’abaabaire batarikuheereza Yehova. N’obu ndaabe naabaire ninkunda kuba nabo, omuntu wangye w’omunda akaba naanshinja ahabw’okumara obwire bwingi n’abantu abo. Kwonka kikaba nikingumira kurekyera aho kumara obwire nabo. Niki ekyampweraire?

Omu bwire obwo, omwishiki orikwetwa Dorothée ow’emyaka 16 akeegaita aha kibiina kyaitu. Nkatangaara ku naareebire omujinya ogu yaabaire aine omu kubuurira enju aha nju. Nkaba ndi muto ahari we, kwonka nkaba ntarikwejumba munonga omu kubuurira. Nkateekateeka nti: ‘Abazaire bangye n’Abajurizi ba Yehova, kwonka Dorothée niwe wenka Omujurizi wa Yehova omu ka yaabo. Naatuura na nyina orwaire, kwonka butoosha naaba ari omu kubuurira!’ Eky’okureeberaho kye kikampiga kwongyera kukorera Yehova bingi. Omu bwire bukye nyowe na Dorothée tukaheereza hamwe nka baapayoniya. Omu kubanza, tukaheereza nka baapayoniya abahwezi, bwanyima twaba baapayoniya ab’obutwire. Ahabw’okugira ngu Dorothée akaba aine omujinya, naanye nkamutooreza. Akampwera kutandika kwegyesa omwegi wangye wa Baibuli ow’okubanza. Bwanyima y’obwire, nkaba ntakitiina kugaaniira n’abantu enju aha nju, aha ruguuto, n’omu mbeera ezindi.

Omu mwaka gw’okubanza ndi payoniya ow’obutwire, ow’eishe-emwe kuruga Austria orikwetwa Heinz akaija omu kibiina kyaitu. Akaba ayegiire amazima omuri Canada obu yaabaire ataayaayiire mukuru we, owaabaire ari Omujurizi wa Yehova. Heinz akaba ayohereziibwe omu kibiina kyaitu omuri Vienna nka payoniya ow’omutaano. Ku naamureebire naamukunda. Kwonka akaba naayenda kuba omumiisani, kandi nyowe ntaine kigyendererwa ekyo. N’ahabw’ekyo omu kubanza, tindamworekire ngu nkaba mwiniire enyehurira. Kwonka bwanyima, nyowe na Heinz tukatandika kweriima, twataaha omu bushwere reero twatandika kuheereza hamwe nka baapayoniya omuri Austria.

OKUGIRA EKIGYENDERERWA KY’OKUBA OMUMIISANI

Heinz akaba naakira kungambira ngu aine ekyetengo ky’okuba omumiisani. N’obu araabe yaabaire atarikungyemesereza, akaba ambuuza ebibuuzo ebirikumpiga ati: “Mbwenu shi obu tutaine baana, ahabw’enki tutarikwongyera aha buheereza bwaitu?” Ahabw’okugira ngu nkaba nyine enshoni, nkaba ntiinire kuba omumiisani. N’amazima nkaba ndi payoniya, kwonka nkaba ninteekateeka ngu tindikubaasa kuba omumiisani. Kwonka, Heinz akaguma naampwera kuteekateeka aha kuba omumiisani. Akampiga munonga kuta omutima aha kufayo aha bantu omu mwanya gw’okuguta aha kwerarikirira. Obuhabuzi bwe bukampwera munonga.

Mporampora, nkatandika kugira ekyetengo ky’okuba omumiisani, reero twaijuza foomu y’okuza omu ishomero rya Gileadi. Kwonka, ow’eishe-emwe owaabaire naaheereza aha ofiisi y’eitaagi akangira ngu ni kirungi kubanza naayega gye Orungyereza. Bwanyima y’okumara emyaka eshatu ndikuteeraho kwega Orungyereza, kikatutangaaza ku twashabirwe kuza kuheereza omu kibiina ekirikukoresa orurimi rwa Yugoslavia orurikumanywa nka Serbo-Croatian omuri Salzburg, Austria. Tukabuurira omu kicweka ekyo kumara emyaka mushanju, otwariiremu n’omwaka gumwe turikutaayaayira ebibiina. N’obu orurimi rwa Serbo-Croatian rwabaire rugumire, tukatunga abeegi ba Baibuli baingi.

Reero omu 1979 tukashabwa kuza kuhuumuraho omuri Bulgaria. Omurimo gw’okubuurira gukaba guzibiirwe omu eihanga eryo. N’ahabw’ekyo titurayejumbire omu kubuurira obu twabaire turiyo. Kwonka tukabaasa kutwarira banyaanyazi-itwe bataano ebitabo bikye bwesherekye abaabaire nibatuura omuri Sofia, orurembo rukuru rw’eihanga eryo. Nkaba ntiinire, kwonka Yehova akampwera omu buheereza obwo oburikushemeza. Okureeba oku banyaanyazi-itwe baabaire baine obumanzi n’okushemererwa n’obu baraabe baabaire bari omu kabi k’okuteebwa omu kihome, kikampa obumanzi bw’okukora ekirikukirayo oburungi omu bujunaanizibwa bwona obu naahairwe omu kibiina kya Yehova.

Bwanyima, tukagaruka twijuza foomu y’okuza omu ishomero rya Gileadi, kandi aha murundi ogwo, tukaikirizibwa. Tukaba nitumanya ngu nituza kuza omu ishomero ry’Orungyereza omuri United States. Kwonka omuri Novemba 1981, ekibiina kikatandikaho Ishomero rya Gileadi aha eitaagi rya Germany omuri Wiesbaden. N’ahabw’ekyo tukaza omu ry’Orugyamani, orwabaire nirunyorobera kwetegyereza. Mbwenu shi tukoherezibwa kuheereza nkahi?

OKUHEEREZA OMU EIHANGA ERIRIMU ENTARO NYINGI

Tukoherezibwa omuri Kenya! Kwonka, ofiisi y’eitaagi rya Kenya ekatubuuza yaaba twabaire nitubaasa kwikiriza kuza kuheereza omuri Uganda. Emyaka nka ikumi enyima, Idi Amin n’eihe rye bakaba baihireho gavumenti eyaabaire eriho. Omu myaka eyaakuratsireho, abantu baingi bakaitwa kandi abandi baabonabonesibwa munonga. Reero omu 1979, Idi Amin akaihwaho. Ningira noobaasa kwetegyereza ahabw’enki naabaire ntiinire kuza omu eihanga nk’eryo eryabaire ririmu entaro nyingi. Kwonka ishomero rya Gileadi rikaba ritutendekire kwesiga Yehova. N’ahabw’ekyo tukaikiriza.

Embeera omu Uganda ekaba eri ey’obutabanguko. Heinz akagamba aha mbeera egyo omu Yearbook eya 2010 ati: “Ebintu bingi, . . . nk’amaizi n’eby’empurizana, bikasiisikara. . . . Okuteera amasasi n’obushuma bikaba bikanyire, na munonga omu kiro. . . . Buri omwe akaba aguma omu ka, aine amatsiko kandi arikushaba ngu hatakaagira owabataahirira nyekiro.” N’obu haraabe haabaire hariho oburemeezi obwo bwona, ab’eishe-emwe bakagumizamu nibatunguuka omu by’omwoyo!

Omu 1982, nyowe na Heinz tukahika omuri Kampala orurembo rukuru rwa Uganda. Ameezi ataano ag’okubanza, tukaba nitutuura omu ka ya Sam na Christina Waiswa n’abaana baabo bataano n’abanyabuzaare baabo bana. Ow’eishe-emwe na Munyaanyazi-itwe Waiswa n’eka yaabo bakaba nibakira kurya rimwe omu izooba, kwonka bakaba beeteekateekire kurya naitwe bikye ebi baabaire baine. Obwire obu twamazire n’eka ya Waiswa, nyowe na Heinz tukeega amashomo marungi agatuhweraire omu buheereza bwaitu bw’obumiisani. Nk’eky’okureeberaho, tukeega oku twine kubiika amaizi turikukoresa makye omu kunaaba reero agu twabaire tunyumunguzamu nigo twabaire tukoresa kuboneza toireti. Bwanyima omu 1983, nyowe na Heinz tukatunga enju y’okutuuramu omu mwanya ogwabaire gwine oburinzi omuri Kampala.

Tukakunda munonga kubuurira omuri Kampala. Ninyijuka ngu omu kwezi kumwe tukagaba magaziini ezirikurenga omu 4,000! Kwonka ekyatushemeize munonga n’okureeba oku abantu baabaire nibakunda amazima. Bakaba nibaha Ruhanga ekitiinisa kandi barikwenda kugaaniira ahari Baibuli. Nyowe na Heinz, buri omwe akaba aine abeegi ba Baibuli abaabaire bari ahagati ya 10 na 15. Kandi tukeegyera bingi aha beegi baitu ba Baibuli. Nk’eky’okureeberaho, n’obu baraabe baabaire batambura kuza omu nteerane buri saabiiti, bakaba batarikwetomboita, kandi butoosha bakaba bashemereirwe.

Omu 1985 na 1986, hakagaruka habaho entaro ibiri omu Uganda. Tukaba nitukira kureeba abaana abaabaire baba baine embundu mpango barikukoresibwa nk’abaserukare, kandi bakaba baza aha mihanda kucaaka buri omwe owaabaire aba naarabaho. Omu bwire obwo, tukashaba Yehova kutuha okwetegyereza n’omutima gwikaikaine twaba nitusherura abarikwenda kumanya amazima. Kandi Yehova akagarukamu okushaba kwaitu. Ahonaaho ku twabaire tubugana omuntu owaahurikiza obutumwa bw’Obukama, tukaba turekyera aho kutiina.

Tukaba nitukunda n’okubuurira abashuhuuki. Nk’eky’okureeberaho, tukatandika kwegyesa Murat na Dilbar Ibatullin, omushaija n’omukazi we abaabaire nibaruga Tatarstan (ey’omuri Central Russia). Murat akaba ari omushaho. Murat n’omukazi bombi bakabatizibwa kandi okuruga obwo batwire nibaheereza Yehova. Bwanyima, nkabugana Tatjana Vileyska, omukazi owaabaire naaruga Ukraine, kandi akaba naateekateeka kweita. Tatjana ku yaaherize kubatizibwa, akagaruka Ukraine kandi bwanyima akahwera omu kuvunuura ebitabo byaitu omu rurimu rwa Ukraine.a

OBUJUNAANIZIBWA BUSYA

Omu 1991 obu nyowe na Heinz twabaire turi omu kahuumuro omuri Austria, ofiisi y’eitaagi ekatuhandiikira erikutumanyisa ngu nituza kutunga obujunaanizibwa busya omuri Bulgaria. Bwanyima y’obutegyeki bw’Abakomunisiti omuri burugwa-izooba bwa Europe kurugaho, Abajurizi ba Yehova omuri Bulgaria bakaikirizibwa kugaruka kubuurira. Nk’oku naaba naagambire, nyowe na Heinz tukaba tutwire ebitabo omu eihanga eryo bwesherekye obu omurimo gwaitu gwabaire gwemereziibwe. Kwonka hati niho baabaire nibatwohereza kubuurira.

Tukamanyisibwa kutagaruka omu Uganda. N’ahabw’ekyo tituragarukire omu ka yaitu y’abamiisani kupakira ebintu byaitu nari kusiibura banywani baitu, kureka tukaza aha Beseeli omuri Germany, twatunga emotoka, reero twaza Bulgaria. Tukoherezibwa omu guruupu y’ababuurizi nka 20 omuri Sofia.

Tukatunga oburemeezi busya omuri Bulgaria. Eky’okubanza, tukaba tutarikumanya orurimi. Okwongyera ahari ekyo, ebitabo byonka ebyabaire bishohoziibwe omu rurimi rw’Oruburigaria ni The Truth That Leads to Eternal Life n’Ekitabo Kyangye eky’Ebitebyo by’Omu Baibuli. N’ahabw’ekyo kikatugumira kutunga abeegi ba Baibuli. N’obu haraabe haabaire hariho oburemeezi obwo, guruupu yaitu nkye ey’Abajurizi ba Yehova kandi eyaabaire eine omujinya ekaguma neetunguuka. Ekanisa y’Abasodokisi ku yaakireebire, oburemeezi bwatandika.

Omu 1994, gavumenti ekaiha ediini y’Abajurizi ba Yehova omu biragiro byayo kandi yaatandika kugitwara nk’akadiini akatarikwikirizibwa. Ab’eishe-emwe abamwe bakakomwa. Ab’eby’amakuru bakatandika kujanjaaza ebishuba ngu Abajurizi ba Yehova nibaita abaana baabo, kandi ngu nibabeihabeiha bagyenzi baabo kweita. Nyowe na Heinz kikatugumira munonga kubuurira. Tukaba tukira kubugana abantu enshaarizi abaabaire baatugambira kubi, batwetera abaserukare, kandi obumwe baturekyera ebintu. Kikaba kitarikubaasika kutunga ebitabo omu eihanga eryo, kandi kikaba kigumire n’okupangisa emyanya y’okugiriramu enteerane. Nangwa n’abaserukare bakemereza oruteerane rwaitu rumwe. Nyowe na Heinz tukaba tutamanyiriire kureeba abantu abaine rwango nk’egyo ahariitwe. Embeera egyo ekaba neetaana n’ey’omu Uganda ahu abantu baabaire nibakunda kuhurikiza n’okwega Baibuli. Niki ekyatubaasiise kugumisiriza empinduka ezo?

Tukatunga okushemererwa omu kushashaanuka n’ab’eishe-emwe na banyaanyazi-itwe. Bakaba baine okushemererwa ahabw’okumanya amazima n’ahabw’obuhwezi obu twabahaire. Twena tukaguma nituhwerahwerana kandi twine obumwe. Embeera ezo zikatwegyesa ngu nitubaasa kugira okushemererwa omu bujunaanizibwa bwona obu turikutunga twaguma nitufayo aha bantu.

Kwonka, bwanyima y’obwire, embeera ekahinduka. Ekibiina kyaitu kikagaruka kwikirizibwa omu biragiro omuri 1998, kandi omu bwire bukye, ebitabo bingi bikatandika kushohozibwa omu rurimi rwa Bulgaria. Reero omu 2004 ekyombeko ky’eitaagi ekisya kikaheebwayo. Hati, omuri Bulgaria hariyo ebibiina 57, n’ababuurizi 2,953. Omwaka gw’obuheereza oguhwaire, abantu abarikuhika 6,475 nibo baizire aha Kiijutsyo. N’obu omu kubanza omuri Sofia haraabe haabaire hariyo banyaanyazi-itwe bataano bonka, hati hariyo ebibiina mwenda! Buzima tureebire ‘orikukira boona obuto . . . arikurugwamu oruganda.’—Isa. 60:22.

OKUGUMISIRIZA OKUGYEZIBWA

Ntwire nyine amagara mabi. Okumara emyaka mingi, mbaasize kugira ebizimba bingi, otwariiremu n’eky’omu mutwe. Nkatunga obujanjabi bw’okwomya ebizimba ebyo kandi nkamara eshaaha ikumi n’ibiri ndikushemezibwa omuri India kubaasa kunyihamu ekizimba omu mutwe. Nkaguma aha Beseeli ya India kuhitsya obu naakizire, bwanyima twagaruka omu buheereza bwaitu omuri Bulgaria.

Bwanyima, Heinz akatandika kuteganisibwa endwara y’akarande etari ya butoosha erikushiisha emwe aha mitsi y’obwonko. Akaba naagumirwa kugyenda, kugamba, kandi arikutetema. Endwara egyo ku yaagumiizemu, nkongyera kugira obujunaanizibwa bw’okumureeberera. Obumwe embeera ekaba endenga, kandi nyerarikirira aha ku ebintu biraabe. Kwonka, ow’eishe-emwe omuto owaabaire naayetwa Bobi butoosha akaba abuurira na Heinz. Bobi akaba atarikushwara ahabw’oku Heinz yaabaire naagamba nari ahabw’okutetema kwe. Obu naabaire mba ntarikubaasa kuhwera Heinz, butoosha nkaba nyesiga Bobi kumpwera. N’obu nyowe na Heinz turaabe twacwiremu kutazaara abaana omu busingye obu, tukeehurira ngu Yehova akatuha Bobi nk’omwana waitu!—Mak. 10:​29, 30.

Bwanyima Heinz akarwara ekookoro. Eky’obusaasi omushaija wangye omukundwa akafa omu 2015. Bwanyima ya Heinz kufa, nkeehurira nk’otakiine burinzi; kandi kikangumira kukiikiriza ngu akaba atakiriho. Kwonka niimuteekateekaho munonga, kandi nooshusha ngu akiriho ahuriire! (Luk. 20:38) Ninkira kwijuka ebigambo bye by’embabazi n’obuhabuzi obu yaabaire naampa buri izooba. Niinyesiimisa emyaka yoona ei twamazire nituheereza hamwe omu bwesigwa.

NINSIIMA YEHOVA AHABW’OBUSHAGIKI BWE

Yehova ampweraire kugumisiririza oburemeezi bwangye bwona. Kandi akampwera kusingura enshoni n’okuba omumiisani orikukunda abantu. (2 Tim. 1:7) Hati ninsiima Yehova ahakuba nyowe na murumuna wangye turi omu buheereza obw’obutwire. We na iba, nibaheereza omuri Europe barikutaayaayira ebibiina ebirikukoresa Orusabiya. Ebi tata yaashabire Yehova tukiri bato byona bikahikiirira!

Okweyegyesa Baibuli nikimpwera kugira obusingye obu Yehova arikuha. Omu bwire obugumire, nyegire ‘kwezirika kushaba,’ nk’oku Yesu yaakozire. (Luk. 22:44) Yehova agarukiremu okushaba kwangye kurabira omu bikorwa by’embabazi na rukundo ei banywani bangye barikunyoreka omu kibiina ekiri omuri Nadezhda, Sofia. Nibantaayaayisa, tumara hamwe obwire kandi nibansiima. Ekyo nikindeetera okushemererwa kwingi.

Ninkira kuteekateeka aha kuzooka, nteera akashushani ndikureeba abazaire bangye beemereire omumaisho g’enju yaitu, barikureebeka gye nk’oku baabaire bari obu baataaha omu bushwere. Nindeeba murumuna wangye arikutebeekanisa eky’okurya. Niinteera akashushani Heinz ayemereire haihi n’embaraasi ye. Okuteekateeka aha bintu nk’ebi nikimpwera kweihamu ebiteekateeko bibi kandi nikimpwera kusiima Yehova.

Ku ndikuteekateeka aha bi ndabiremu, nkagaruka nkateekateeka n’aha biro by’omumaisho, ninyikirizana n’ebigambo bya Daudi ebiri omuri Zaaburi 27:​13, 14: “Nkaagwire enshazi, kuri ntaraikiriize kureeba oburungi bwa [Yehova] omu nsi y’abahuriire. Tegyereza [Yehova], gira amaani, guma omutima. Eego otegyereze [Yehova].”