Ebibuuzo Kuruga omu Bashomi
Omurimo gw’okubuurira oguriho obunaku obu nigwija kuhendera ryari?
Yesu akagira ngu: “[Amakuru marungi] ag’Obukama nigaija kugambwa omu nsi zoona okuba eky’okuhamya aha mahanga goona, obwo nibwo emperu erihika.” (Mat. 24:14) Ekigambo ky’Orugriika teʹlos ekyavunwirwe nka “emperu” omu mushororongo ogu, ogwa 6 na 13, nikimanyisa emperu y’ensi ya Sitaane eraabeho ahari Haramagedoni. (Kush. 16:14, 16) N’ahabw’ekyo nituza kugumizamu nitubuurira amakuru marungi, kuhitsya obu Haramagedoni eraabe eri haihi kutandika. Ekyo nikihindura aha nyetegyereza yaitu ey’enyima aha nshonga egi.
Enyima, tubaire nitumanya ngu nituza kurekyera aho kubuurira amakuru marungi okubonabona kwingi ku kuraatandikye bwanyima y’okucwekyerera kwa Babulooni Orukuru. (Kush. 17:3, 5, 15, 16) Tubaire nitwikiriza ngu omu bwire obwo “omwaka gwa [Yehova] ogw’embabazi” ogw’akamanyiso nibwo guraahendere. (Isa. 61:2) Kandi tubaire nituteekateeka ngu abaraahonokeho omu bwire obwo n’abo aboorekire ngu bahamire ahari Yehova okubonabona kwingi kutakatandikire. Tubaire nitubagyeragyeranisa n’Abayudaaya abahonokireho aha kucwekyerera kwa Yerusaalemu omu gwa 607 Y.A. Bakaba batairweho akamanyiso bukiri kare ku nibaija kuhonokaho ahabw’okuba bakaba nibaramya Yehova, barikwanga ebibi. (Ezk. 5:11; 9:4) Kwonka okugyeragyeranisa okwo tikurikuhikaana n’ebigambo bya Yesu ebiri omu Matayo 24:14, ebirikworeka ngu abantu nibabaasa kwija kuba bakiine omugisha gw’okwikiriza amakuru marungi, harikuburayo obwire bukye emperu ekahika, ahari Haramagedoni.
Enyetegyereza nsya egi eya Matayo 24:14 neetureetera kuhindura oku tubaire nitwetegyereza obutumwa oburi nk’Orubaare obwagambirweho omu Okushuuruurwa 16:21. Okwongyera kucondooza aha nshonga egyo kworekire ngu emishororongo egyo neikirizana. Mu muringo ki? Eky’okugarukamu nikireebekyera omu ku abantu barikutwara amakuru g’Obukama. Entumwa Paulo akahandiika ngu aha “bantu abarikujunwa,” amakuru marungi gari ‘nk’omugaju ogw’amagara.’ Kwonka aha bazigu ba Ruhanga n’amakuru mabi, agari ‘nk’omugaju gw’okufa.’ (2 Kor. 2:15, 16) Nibanga obutumwa bw’Obukama ahakuba nibworeka ngu ensi erikutegyekwa Sitaane ni mbi, kandi ku eri haihi kucwekyerezibwa.—Yoh. 7:7; 1 Yoh. 2:17; 5:19.
Kandi orubaare rw’akamanyiso nirwija kuba ruri ‘ruhango munonga.’ Eki nikibaasa kumanyisa ngu omu kubonabona kwingi, omurimo gw’okubuurira nigwija kuba niguhonda aha mutwe, ahakuba eiziina rya Yehova niriija kugambwaho kukira obundi bwona. (Ezk. 39:7) Mbwenu shi omu bwire obwo, bwanyima y’okuhwerekyerera kwa Babulooni Orukuru, abantu abamwe nibaija kwikiriza amakuru marungi nk’omugaju murungi? Ekyo nikibaasa kwija kubaho. Nibabaasa kwijuka nari bakyetegyereze ngu Abajurizi ba Yehova batwire nibaranga ngu ediini z’ebishuba niziija kucwekyerezibwa.
Ekyo nikishushana n’ekyabaireho omuri Misiri bwanyima y’Ebibonaboneso Ikumi. Yehova ku yaaherize kucwera orubanja baaruhanga ba Misiri, ‘omutwe muhango gw’abantu’ abaabaire batari Baisraeli bakeegaita aha bantu ba Ruhanga. (Kur. 12:12, 37, 38) Nibabaasa kuba baacwiremu kugyenda nabo bwanyima y’okureeba okuhikiirira kw’Ebibonaboneso Ikumi ebi Musa yaagambire.
N’ahabw’ekyo, buri omwe weena oraacwemu kuza aha rubaju rwa Yehova bwanyima y’okucwekyerera kwa Babulooni Orukuru naija kuba akiine omugisha gw’okutwariza gye barumuna ba Kristo abaraabe bakiri omu nsi. (Mat. 25:34-36, 40) Kwonka omugisha gw’okubarwa nk’entaama nigwija kuhwaho harikuburayo obwire bukye Haramagedoni ekatandika, entoore abaraabe bakiri omu nsi ku baraatwarwe omu iguru.
Enyetegyereza nsya egi neetuhwera kumanya gye rukundo ya Yehova ey’omutaano n’embabazi ze. Buzima Yehova “tarikwenda muntu weena kuhwerekyerera, kureka naayenda ngu boona bahikye aha kweteisa.”—2 Pet. 3:9.