Titukabaga Twenka

1-2. (a) Ahabw’enki nitubaasa kuhamya ngu titurikubaasa kuraba omu buremeezi twenka? (b) Nituza kugamba ahari ki omu kicweka eki?

TWAHIKWAHO oburemeezi bw’amaani, nitubaasa kwehurira nk’abari twenka omu bwato bukye aha nyanja y’eihunga. Kwonka, titurikuraba omu buremeezi obwo twenka. Tataitwe ow’omu iguru owa rukundo naareeba embeera ezi turikurabamu kandi naaraganisa kutuhwera. Naahuumuriza abaheereza be abarikumuhamiraho ati: “Ninyija kukuhwera.”—Isa. 41:10.

² Omu kicweka eki, nituza kureeba oku Yehova arikutuhwera (1) arikutwebembera, (2) arikutureeberera, (3) arikuturinda, kandi (4) akatuhuumuriza. Yehova naatuhamiza ngu n’obu twakuhikwaho oburemeezi burikwingana ki, tarikwija kutwebwa, nari kututsigaho. N’ahabw’ekyo tituri twenka.

YEHOVA NAATWEBEMBERA

3-4. Yehova naatwebembera ata? (Zaaburi 48:14)

³ Shoma Zaaburi 48:14. Yehova naamanya ngu niwe ahikire kutwebembera. Naayebembera ata abaheereza be obunaku obu abarikumuhamiraho? Kimwe aha bi arikukoresa ni Baibuli. (Zab. 119:105) Naagikoresa kutuhwera kucwamu n’okugira emitwarize erikutureetera kwongyera kugira okushemererwa hati, n’amagara agatahwaho omu biro by’omumaisho.a Nk’eky’okureeberaho, naatwegyesa kutabiika enziika, okuba ab’amazima omuri byona ebi turikukora, n’okukundira kimwe abandi twihire aha mutima. (Zab. 37:8; Heb. 13:18; 1 Pet. 1:22) Twagira emitwarize nk’eya Ruhanga, nituba abazaire barungi, abashaija n’abakazi abarikutwarizana gye, kandi nituba abanywani barungi.

⁴ Kandi Yehova akahandiikisa omu kigambo kye ebirikukwata aha bantu abaabaire baine oburemeezi n’enyehurira nk’ezaitu. (1 Kor. 10:13; Yak. 5:17) Twashoma ebirikubakwataho, tukagyendera aha mashomo agu turikubeegyeraho, nitugasirwa omu miringo nk’ebiri. Ogw’okubanza, nitwetegyereza ngu tituri twenka, ahakuba hariho abandi abaahikirweho oburemeezi nk’obwaitu, kandi bakabugumisiriza. (1 Pet. 5:9) Ogwa kabiri, nitwega oku turikubaasa kwemera oburemeezi bwaitu.—Rom. 15:4.

5. Yehova naakoresa baahi kutwebembera omu muhanda gw’amagara?

⁵ Yehova naakoresa n’ab’eishe-emwe bagyenzi baitu kutwebembera.b Nk’eky’okureeberaho, abareeberezi ba saketi nibataayaayira ebibiina obutoosha kubigumya. Embazo ezi barikuha nizihamya okwikiriza kwaitu, kandi zituhwera kuguma twine obumwe. (Byak. 15:40–16:5) Abareeberezi omu kibiina nibafayo aha mbeera za buri mubuurizi. (1 Pet. 5:​2, 3) Abazaire nibahwera abaana baabo kukura omu by’omwoyo, barikubahwera kugira okubaasa kw’okuteekateeka n’okugira emitwarize mirungi. (Enf. 22:6) Kandi banyaanyazi-itwe abakuzire omu by’omwoyo nibahwera banyaanyazi-itwe abato barikubateeraho eky’okureeberaho kirungi, barikubaha obuhabuzi oburikukora, kandi bakabagumya.—Tit. 2:​3-5.

6. Twine kukora ki kugasirwa omu buhabuzi bwa Yehova?

⁶ Yehova akozire ekirikwetengyesa kutuha obuhabuzi. Nitubaasa kworeka tuta ngu nitusiima ebi atukoreire? Enfumu 3:​5, 6 nihagira hati: “Yesigye [Yehova] n’omutima gwawe gwona, orekye kwegamira okwetegyereza kwawe ahabwawe.” Twakora tutyo, naija “kutebeekanisa emihanda [yaitu] yoona” arikutuhwera kwetantara oburemeezi bwingi, reero twongyere kugira okushemererwa. Buzima nitusiima Yehova ahabw’okutuha obuhabuzi oburikutugasira!—Zab. 32:8.

YEHOVA NAATUREEBERERA

7. Yehova naatureeberera mu muringo ki? (Abafilipi 4:19)

⁷ Shoma Abafilipi 4:19. Oihireho okutwebembera omu by’omwoyo, Yehova naatuha omugisha twateeraho kutunga eby’okurya, ebijwaro n’oburaaro. (Mat. 6:33; 2 Tes. 3:12) N’obu kiraabe kiri eky’obuhangwa kuteekateeka munonga aha by’okwebaisaho, Yehova naatuhiga kuterarikirira ekirenga aha nshonga nk’ezo. (Mat. 6:25.) Ahabw’enki? Ahakuba tarikwija kutsigaho abaheereza be abeesigwa na munonga baaba baine ebi bakyenire. (Mat. 6:8; Heb. 13:5) Nitubaasa kumwesiga ahakuba niwe arikuturaganisa ngu naija kutureeberera.

8. Yehova akakorera ki Daudi?

⁸ Teekateeka aha ku Yehova yaahweraire Daudi. Yehova akareeberera Daudi n’abashaija be emyaka yoona ei baamazire bahungire arikubaha eby’okubabaisaho. Daudi ku yaateekateekire aha ku Yehova yaamureebereire, akahandiika ati: “Nkaba ndi omutsigazi, mbwenu ndi omugurusi, kwonka tinkareebaga ohikiriire atsigirweho, n’obu baakuba abaana be nibashaba ak’okurya.” (Zab. 37:25) Obundi naiwe noobaasa kuba oreebire oku Yehova arikureeberera abaheereza be abeesigwa.

9. Yehova naareeberera ata abaheereza be baahikwaho ekihikiirizi? (Reeba n’ebishushani.)

⁹ Yehova naareeberera abaheereza be na baahikwaho ekihikiirizi. Nk’eky’okureeberaho, ku haabaireho enjara omu kyasha ky’okubanza, Abakristaayo ab’omu byanga ebindi bakooherereza ab’eishe-emwe bagyenzi baabo obuhwezi. (Byak. 11:​27-30; Rom. 15:​25, 26) Abaheereza ba Ruhanga nibakora nikyo kimwe obunaku obu. Haabaho ekihikiirizi, Yehova naahiga abaheereza be kuhayo ebirikwetengyesa nk’eby’okurya, amaizi, ebijwaro, n’emibazi kuhwera abarikutuura omu myanya egyo. Ab’eishe-emwe abarikukora aha by’okwombeka nibahuunduza amaka agasiisikaire n’Ebyombeko by’Obukama. Kandi abaheereza ba Yehova nibarahuka kuhuumuriza abahikirweho oburemeezi barikubagumya omu nyehurira n’omu by’omwoyo.c

10-11. Nooyegyera ki aha byahikire ahari Borys?

¹⁰ Kandi Yehova naareeberera n’abatakatandikire kumuheereza. Naitwe, nitusherura oburyo bw’okubagirira embabazi. (Gal. 6:10) Kaingi ekyo nikiha obujurizi. Teekateeka aha kyabaire ahari Borys, mukuru w’eishomero orikutuura omuri Ukraine. N’obu Borys araabe yaabaire atari Mujurizi wa Yehova, akaba naatwariza gye abeegi be abaabaire bari Abajurizi ba Yehova omu muringo gw’embabazi kandi arikuha ekitiinisa enyikiriza zaabo. Borys ku yaacwiremu kuhungira omu mwanya gw’eihanga ogundi ahabw’orutaro, ab’eishe-emwe bakamuhwera. Bwanyima, Borys akaza aha Kiijutsyo ky’okufa kwa Yesu. Borys akagira ati: “Abajurizi ba Yehova nimbasiima munonga ahabw’okuba bakanfaho.”

¹¹ Naitwe nitubaasa kutooreza Tataitwe ow’omu iguru omunyambabazi turikutwariza gye abantu boona otwariiremu n’abatari Bajurizi ba Yehova. (Luk. 6:​31, 36) Twine amatsiko ngu twateeraho kukunda abantu nikiija kubahiga kuhinduka abeegi ba Kristo. (1 Pet. 2:12) Kyona ekiraarugyemu, nitwija kutunga okushemererwa okurikuruga omu kuha abandi.—Byak. 20:35.

YEHOVA NAATURINDA

12. Yehova naaraganisa kurinda ata abaheereza be nka guruupu? (Zaaburi 91:​1, 2, 14)

¹² Shoma Zaaburi 91:​1, 2, 14. Obunaku obu, Yehova naaraganisa kuturinda omu by’omwoyo. Tarikubaasa kwikiriza Sitaane kushiisha okuramya okw’amazima. (Yoh. 17:15) Kandi nitubaasa kugira obwesigye ngu omu ‘kubonabona kwingi’ Yehova naija kuhikiiriza eki yaaraganiise, arikuturinda omu by’omwoyo n’omu by’omubiri.—Kush. 7:​9, 14.

13. Yehova naarinda ata buri muheereza we?

¹³ Yehova naarinda ata buri muheereza we? Naakoresa Ebyahandiikirwe kutuhwera kutaanisa ekihikire n’ekigwire. (Heb. 5:14) Twagyendera aha misingye eri omu Kigambo kya Ruhanga, nitwerinda kuhikwaho akabi omu by’omwoyo n’omu by’omubiri. (Zab. 91:4) Ekindi, Yehova naakoresa ekibiina kuturinda. (Isa. 32:​1, 2) Twakwatanisa n’abarikukunda Yehova kandi abarikugyendera aha misingye ye, nibatuhiga kumariirira kwetantara ebintu ebitahikire.—Enf. 13:20.

14. (a) Ahabw’enki Yehova atarikuzibira oburemeezi kutuhikaho? (b) Zaaburi 9:10 neetuhamiza ki? (Reeba n’obugambo obw’ahansi.)

¹⁴ Ira, obumwe Yehova akaba arinda abantu be kutahikwaho akabi. Kwonka ekyo akaba atarikukikora omu buri mbeera. Naitwe obumwe nituhikwaho “ebihikiirizi.” (Mub. 9:11) Kandi, Yehova atwiire naikiriza abaheereza be kuhiiganisibwa n’okwitwa kugira ngu ayorekye ngu Sitaane n’omubeihi. (Yob. 2:​4-6; Mat. 23:34) Nikwo kiri na hati. N’obu Yehova araabe atarikwihaho oburemeezi bwaitu, nitubaasa kugira obwesigye ngu tarikwija kutsigaho abarikumukunda.d—Zab. 9:10.

YEHOVA NAATUHUUMURIZA

15. Yehova naatuhuumuriza ata arikukoresa okushaba, Ekigambo kye, n’Abakristaayo bagyenzi baitu? (2 Abakorinso 1:​3, 4)

¹⁵ Shoma 2 Abakorinso 1:​3, 4. Obumwe nituhikwaho embeera ezirikutureetera amaganya n’okwerarikirira. Mbwenu shi embeera ezo nizikureetera kwehurira nk’ori wenka? Gira obwesigye ngu Yehova naamanya oku orikwehurira kandi ‘naatuhuumuriza omu busaasi bwaitu bwona.’ Mu muringo ki? Twamushaba, naatuha ‘obusingye bwe oburengire okwetegyereza kw’omuntu weena.’ (Fil. 4:​6, 7) Nitutunga n’okuhuumurizibwa twashoma Baibuli. Neetuhamiza ngu Yehova naatukunda, neetuha obwengye, amatsiko, kandi neetugumya. Kandi twaza omu nteerane nitushangayo ab’eishe-emwe na banyaanyazi-itwe abarikutukunda kandi twega ebintu ebirikutugumya.

16. Nooyegyera ki aha ky’okureeberaho kya Nathan na Priscilla?

¹⁶ Kubaasa kwetegyereza oku Yehova arikukoresa Ekigambo kye kuhuumuriza abantu kandi akabagumya yetegyereze ebyahikire ahari Nathan na Priscilla, abarikutuura omuri United States. Emyaka mikye enyima, bakacwamu kuza ahu ababuurizi b’Obukama barikwendwa munonga. Nathan naagira ati: “Tukaba twine obwesigye ngu Yehova naija kutuha omugisha ahabw’okucwamu kwaitu.” Kwonka, bwanyima y’okuhika omu buheereza bwabo obusya, bakagira amagara mabi n’oburemeezi omu by’entaatsya. Empereruka bakagaruka owaabo, kandi baaguma baine oburemeezi omu by’entaatsya. Nathan naagira ati: “Nkaba niinyebuuza ahabw’enki Ruhanga ataratuhaire emigisha nk’oku twabaire nituteekateeka. Nangwa nkatandika n’okuteekateeka ngu obundi haine ekintu kibi eki naakozire.” Ku haahingwireho obwire, Nathan na Priscilla bakeetegyereza ngu Ruhanga akaba atabatsigireho. Nathan naayongyera ati: “Omu bwire obwo obugumire, Baibuli ekatubeera omunywani omunyabwengye orikuhuumuriza kandi orikutuha obuhabuzi. Ku twateekateekire aha ku Yehova yaatuhweraire kugumisiriza oburemeezi omu mwanya gw’okuta omutima aha buremeezi kikatuhwera kugira obwesigye ngu naija kugumizamu naatuhwera.”

17. Munyaanyazi-itwe Helga akatunga ata okuhuumurizibwa? (Reeba n’ekishushani.)

¹⁷ Ab’eishe-emwe na banyaanyazi-itwe nibabaasa kutuhuumuriza. Mu muringo ki? Teekateeka aha ky’okureeberaho kya Helga, orikutuura omuri Hungary. Akamara emyaka mingi arikwemera oburemeezi bw’emiringo etari emwe ekyamureeteire amaganya n’okwereeba nk’otaine mugasho. Kwonka ku arikuteekateeka aha by’enyima, naareeba oku Yehova yaamuhuumuriize arikukoresa ekibiina kye. Naagira ati: “Yehova atwire naampwera naaba mpwairemu amaani ahabw’okureeberera omwana wangye orwaire, okukora munonga kwebaisaho, n’ebigyezo ebindi. Atwire naahikiiriza ekiraganiso kye eky’okumpumuriza omu myaka 30 ehingwire. Naakira kungumya kurabira omu bigambo by’abandi eby’embabazi. Ninkira kutunga obutumwa aha simu, kaada nari ebigambo by’okusiimwa omu bwire obuhikire.”

18. Nitubaasa kuhuumuriza tuta abandi?

¹⁸ Twine omugisha gw’okutooreza Ruhanga waitu turikuhuumuriza abandi. Ekyo nitubaasa kukikora tuta? Turikubahurikiza gye, turikugamba nabo omu muringo ogurikubahuumuriza, kandi tukagira eki twakora kubahwera. (Enf. 3:27) Nituteeraho kuhuumuriza boona abarikuganya, otwariiremu n’abo abatakatandikire kuheereza Yehova. Bataahi baitu baaba nibaganya, barwaire, nari beerarikiriire, nitubataayaayira, tubahurikiza kandi tubagambira obutumwa oburikubagumya oburikwegamira ahari Baibuli. Twatooreza Yehova “Ruhanga w’okuhuumuriza kwona,” nitubaasa kuhwera Abakristaayo bagyenzi baitu kwemera amaganya, kandi tubaasa kureetera abatarikuheereza Yehova kukunda okuramya okushemeire.—Mat. 5:16.

BUTOOSHA YEHOVA NAABA AYETEEKATEEKIRE KUTUHWERA

19. Yehova naatukorera bintu ki, kandi nitubaasa kumutooreza tuta?

¹⁹ Yehova naafayo munonga ahari boona abarikumukunda. Tarikututsigaho twahikwaho oburemeezi. Yehova naareeberera abaheereza be abeesigwa, nk’oku omuzaire owa rukundo arikufayo aha mwana we. Naatuhabura, atureeberera, aturinda, kandi atuhuumuriza. Nitutooreza Tataitwe ow’omu iguru owa rukundo twashagika abandi kandi tukabagumya baahikwaho oburemeezi. N’obu twakuhikwaho emirabanamu n’ebirikutureetera amaganya, nitubaasa kugira obwesigye ngu Yehova naaba ari hamwe naitwe. Ahakuba niwe yaaraganiise ati: “Otatiina ahabw’okuba nkwine, otahahaaza omutima.” (Isa. 41:10) Eki ka nikitugumya! Buzima tituri twenka.