Okwirirana Haihi n’eky’Oburungi Bwaitu!

1-2. Niki eki Yehova arikureeba nka kikuru, kandi naayenda ngu tukore ki?

KIMWE aha bintu ebi Yehova arikutwara nka bikuru n’oku turikutwariza bataahi baitu. Yesu akeegyesa ngu tushemereire kukunda bataahi baitu nk’oku turikwekunda. (Mat. 22:37-39) Ekyo nikitwariramu n’okugirira embabazi abatarikuheereza Yehova. Twakora ekyo, nituba nitutooreza Yehova Ruhanga ahakuba ‘eizooba rye naarijwisiza ababi n’abarungi, kandi naagwisiza enjura abahikiriire n’abatahikiriire.’—Mat. 5:45.

² N’obu Yehova araabe naakunda abantu boona, naakundira kimwe abarikukora ebintu ebihikire. (Yoh. 14:21) Naayenda ngu tumutooreze. N’ahabw’ekyo, naayenda ngu ‘tukunde munonga’ ab’eishe-emwe na banyaanyazi-itwe kandi ‘tukundane buzima.’ (1 Pet. 4:8; Rom. 12:10) Rukundo egyo neeshushana n’ei turikugirira omunyabuzaare waitu nari omunywani ou turikukunda munonga.

3. Twine kumanya ki ahari rukundo?

³ Rukundo eri nk’ekimuri ky’omu nju ekiine kureebererwa kugira ngu kikure gye. Entumwa Paulo akahabura Abakristaayo ati: “Okukundana kugumeho.” (Heb. 13:1) Yehova naayenda ngu tugume tugirire abandi rukundo. Omu kicweka eki nituza kugamba ahabw’enki twine kwongyera kwirira haihi ab’eishe-emwe bagyenzi baitu n’oku turikubaasa kugumizamu nitukikora.

ENSHONGA EZIRIKUTUREETERA KWONGYERA KWIRIRANA HAIHI

4. Nk’oku kirikushoboororwa omuri Zaaburi 133:1, nitubaasa kuguma tuta nitusiima obumwe bwaitu bw’Ekikristaayo? (Reeba n’ebishushani.)

⁴ Shoma Zaaburi 133:1. Nitwikirizana n’omuhandiiki wa Zaaburi owaagizire ngu okunywana abarikukunda Yehova ni “kirungi” kandi ‘nikishemeza.’ Kwonka, nk’oku omuntu arikubaasa kuremwa kureeba omugasho gw’omuti murungi ogu arikureeba buri izooba, nitubaasa kuremwa kureeba oburungi bw’obumwe bwaitu obw’Ekikristaayo. Nitureeba ab’eishe-emwe na banyaanyazi-itwe haihi buri izooba, obundi emirundi mingi omu saabiiti. Nitubaasa kugumizamu tuta turikubareeba nk’ab’omuhendo? Rukundo ei twiniire ab’eishe-emwe na banyaanyazi-itwe neija kweyongyera kuhama twateekateeka oku buri omwe ari ow’omuhendo omu kibiina n’ahariitwe.

5. Rukundo ei twine neebaasa kukwata eta aha bandi?

⁵ Bamwe abarikwija omu nteerane zaitu omurundi gw’okubanza, nibakwatwaho munonga rukundo ei twine. Ekyo kyonka nikibaasa kubareetera kumanya ngu turi Abakristaayo ab’amazima. Yesu akagira ati: “Ku muriguma nimukundana, nibwo abantu boona baribamanya ku muri abeegi bangye.” (Yoh. 13:35) Teekateeka aha kyabaire ahari Chaithra, owaabaire ari omwegi wa yunivasite kandi arikwega Baibuli n’Abajurizi ba Yehova. Akaikiriza ku baamwetsire kwija aha ruteerane oruhango. Bwanyima y’okwija aha ruteerane omurundi gw’okubanza, akagambira orikumwegyesa Baibuli ati: “Abazaire bangye tibakaangwanga omu kifuba. Kwonka aha ruteerane rwanyu oruhango, abantu 52 bakangwa omu kifuba omu izooba rimwe! Nkeetegyereza ngu Yehova naankunda arikukoresa ab’eishe-emwe na banyaanyazi-itwe. Niinyenda kuba omu ka egyo.” Chaithra akagumizamu naatunguuka kandi akabatizibwa omu 2024. Abarikwija omu nteerane zaitu omurundi gw’okubanza baareeba nitutwarizana gye kandi turikukundana, nikibahiga kwenda kuheereza Yehova.—Mat. 5:16.

6. Nitugasirwa tuta twirira haihi ab’eishe-emwe na banyaanyazi-itwe?

⁶ Okuba haihi n’ab’eishe-emwe na banyaanyazi-itwe nikiturinda. Paulo akeehanangiriza Abakristaayo bagyenzi be ati: “[Mugumyane] obutoosha . . . hatagira n’omwe omuriimwe owaagangaazibwa obugobya bw’ekibi.” (Heb. 3:13) Twahwa amaani tukatandika kuhaba kuruga omu muhanda gw’okuhikiirira, Yehova naabaasa kukoresa omwe aha b’eishe-emwe kutuha obuhwezi oburikwetengyesa. (Zab. 73:2, 17, 23) Obuhwezi nk’obwo buzima n’obw’oburungi bwaitu.

7. Rukundo eine kakwate ki n’obumwe? (Abakolosai 3:13, 14)

⁷ Nitutunga emigisha mingi ahabw’okuba n’ab’eishe-emwe abarikuteeraho munonga kworekana rukundo. (1 Yoh. 4:11) Nk’eky’okureeberaho, rukundo neetuhiga kugumizamu ‘nitugumisiririzana,’ kandi ekyo nikyongyera aha bumwe bwaitu. (Shoma Abakolosai 3:13, 14; Efe. 4:2-6) N’ahabw’ekyo, rukundo ei turikworekana omu nteerane zaitu terikushangwa ahandi hoona.

TUHAANE EKITIINISA

8. Yehova naatuhwera ata kugira obumwe?

⁸ Yehova niwe arikutubaasisa kugira obumwe omu nsi yoona. Eki nikibaasika n’obu twakuba tutahikiriire. (1 Kor. 12:25) Baibuli neegira ngu, ‘nitwegyesibwa Ruhanga okukundana.’ (1 Tes. 4:9) Ekirikumanyisa ngu Yehova naakoresa Ebyahandiikirwe kutwegyesa kyenyini eki twine kukora kubaasa kwirirana haihi. Nitubaasa kwegyesibwa Ruhanga twashwijuma gye ebi arikutwegyesa kandi tukabigyenderaho. (Heb. 4:12; Yak. 1:25) Kandi ekyo nikyo Abajurizi ba Yehova barikuteeraho kukora.

9. Nitwegyera ki omu Abarooma 12:9-13 aha bikwatiraine n’okuhaana ekitiinisa?

⁹ Ekigambo kya Ruhanga nikitwegyesa kita kwirirana haihi? Yetegyereze eki Paulo yaagambire aha nshonga egi, nk’oku kirikworekwa omu Abarooma 12:9-13. (Kishome.) Akagira ngu “omu kuhaana ekitiinisa, buri muntu ateekateekye ahari mugyenzi we okumweshumba.” Ekyo nikitwariramu ki? Twine kuteera orutambwe rw’okubanza omu kugirira abandi embabazi turikusaasirana, turikukunira abagyenyi, turikuba efura, kandi tukabakorera n’ebindi bintu ebirungi. (Efe. 4:32) Toine kutegyereza ow’eishe-emwe nari munyaanyazi-itwe kuba niwe yaabanza kukwirira haihi. Yehabure kukora ekyo. Yesu akagira ati: ‘Okugaba nikureeta okushemererwa okukira okuheebwa.’—Byak. 20:35.

10. Nitubaasa kworeka tuta obweziriki omu “kuhaana ekitiinisa”? (Reeba n’ekishushani.)

¹⁰ Ekirikushemeza, bwanyima ya Paulo kutuhiga kuteera orutambwe rw’okubanza omu kuhaana ekitiinisa, ahonaaho akoongyeraho ati: “Omu bweziriki mutaba abeeremwa.” Omuntu omweziriki naaba ari omwekambi kandi arikukora n’amaani. Yaaheebwa obujunaanizibwa, tarikweziringa kubuhikiriza. Enfumu 3:27, 28 nihatuhiga hati: “Ebirungi ebiri omu bushoboorozi bwawe, otaribiima ababishemereire.” Twareeba omuntu oine eki akyenire, nitukora eki turikubaasa kumuhwera. Titurikweziringa kugira eki twakora, nari kuteekateeka ngu omuntu ondiijo naija kukora aha nshonga.—1 Yoh. 3:17, 18.

11. Niki ekirikubaasa kutuhwera kwirirana haihi?

¹¹ Omuringo ogundi oku turikubaasa kworeka ngu nituhaana ekitiinisa n’okurahuka kusaasira abarikutugwisa kubi. Abaefeso 4:26 nihagira hati: ‘Eizooba rirekye kurenga mukiine’ ekiniga. Ahabw’enki? Omushororongo 27 nigugira ngu okukora ekyo nikiija kuha “Sitaane omwanya.” Butoosha Yehova naakoresa Ekigambo kye kutuhiga kusaasirana. Abakolosai 3:13 nihatuhiga kugumizamu nitusaasirana tutaireho bushonshorekye. Okwehuzya enshobe z’abagyenzi baitu ni kimwe aha bintu ebirikutuhwera kwirirana haihi. Twakora tutyo ‘niturinda obumwe bw’omwoyo, tuteerainwe omurunga gw’obusingye.’ (Efe. 4:3) Omu bugufu, okusaasirana nikwongyera aha bumwe n’obusingye omu kibiina.

12. Yehova naatuhwera ata kubaasa kusaasira abandi?

¹² Amazima gari ngu, nitubaasa kugumirwa kusaasira abatugwisize kubi. Kwonka nikibaasika ahabw’okuhwerwa omwoyo gurikwera. Ebyahandiikirwe nibituhiga ‘kugirirana embabazi, kuba abeeziriki, n’okugira omuhimbo.’ Omwoyo gurikwera nigutuhiga kugira omuhimbo n’okuba abeeziriki. N’ahabw’ekyo nigubaasa kutuhwera kutwarizana gye n’okusaasirana. Egi niyo nshonga ahabw’enki nitweshengyereza Yehova kutuhwera.—Luk. 11:13.

‘MUREKYE KWEBAGANISAMU’

13. Niki ekirikubaasa kutureetera kwebaganisamu?

¹³ Ekibiina kirimu “abantu” b’emiringo yoona ab’obukomooko butarikushushana. (1 Tim. 2:3, 4) Twaba tutegyendesereize, ekyo nikibaasa kutureetera kwebaganisamu omu bi turikucwamu, nk’omu nshonga z’okujwara n’okweboneza, eby’obujanjabi, n’eby’okweshemeza. (Rom. 14:4; 1 Kor. 1:10) Ahabw’okugira ngu Ruhanga atwegyeise kukundana twine kwegyendesereza kuteenegyeza emiteekateekyere yaitu nk’erikukira ey’abandi.—Fil. 2:3.

14. Niki eki tushemereire kuteeraho kukora, kandi ahabw’enki?

¹⁴ Kandi nitubaasa kuhezaho okwebaganisamu omu kibiina turikuteeraho kuhuumuriza abandi, kandi tukabagumya obwire bwona. (1 Tes. 5:11) Omu myaka mikye enyima, abantu baingi abaabaire batakibuurira nari abaihirwe omu kibiina babaasize kugarukira Yehova. Nitubaakiira n’omuhimbo! (2 Kor. 2:8) Yetegyereze ekyabaireho obu munyaanyazi-itwe omwe yaagaruka aha Kyombeko ky’Obukama bwanyima y’emyaka ikumi atakibuurira. Akagira ati: “Buri omwe akankwata omu ngaro yaandamutsya ashemereirwe.” (Byak. 3:19) Ebikorwa bikye ebyo eby’embabazi bikamukwataho bita? Akoongyeraho ati: “Kikaandeetera kwehurira ngu Yehova akaba naampwera kugaruka kugira okushemererwa.” Twateeraho kugumya abandi, Kristo naabaasa kutukoresa kuruhuura “abaruhire n’abaremereirwe.”—Mat. 11:28, 29.

15. Ni mu muringo ki ogundi oku turikubaasa kwongyera kureetaho obumwe? (Reeba n’ekishushani.)

¹⁵ Nitubaasa n’okwongyera kureetaho obumwe omu kibiina kurabira omu migambire yaitu. Yobu 12:11 nihagira hati: “Okutu tikutaanisa ebigambo, nk’oku akanwa kamanya eby’okurya?” Nk’oku omuteeki murungi arikuroza aha by’okurya kuhamya yaaba binuzire atakabigaburiire abandi, naitwe nikwo twine kuteekateeka n’obwegyendesereza aha bi turaagambe. (Zab. 141:3) Butoosha twine kuhamya ngu ebi turikuza kugamba nibyombeka, nibiruhuura kandi nibigasira abarikubihurira.—Efe. 4:29.

16. Ni baahi abashemereire kwongyera kuteeraho kukoresa ebigambo ebirikwombeka?

¹⁶ Abazaire na baanyineeka baine kuteeraho kukoresa ebigambo ebirikwombeka omu migambire yaabo. (Kol. 3:19, 21; Tit. 2:4) Abareeberezi nabo baine kuba abariisa abarikuruhuura kandi bakahuumuriza obusyo bwa Yehova. (Isa. 32:1, 2; Gal. 6:1) Ijuka enfumu y’omu Baibuli erikugira eti: “Ekigambo ekigambiirwe omu bunaku bwakyo ka ni kirungi!”—Enf. 15:23.

MUKUNDANE ‘OMU BIKORWA N’OMU MAZIMA’

17. Nitubaasa kworeka tuta ngu rukundo ei twiniire ab’eishe-emwe na banyaanyazi-itwe n’eyaabuzima?

¹⁷ Entumwa Yohaana akatuhiga ati: “Turekye kukundana omu bigambo nari aha rurimi, kureka tukundane omu bi turikukora n’omu mazima.” (1 Yoh. 3:18) Nitwenda kukunda ab’eishe-emwe na banyaanyazi-itwe twihire aha mutima. Ekyo nitubaasa kukikora tuta? Turikumara obwire n’ab’eishe-emwe na banyaanyazi-itwe. Twakora ekyo nitwongyera kwirirana haihi kandi twongyera kukundana. N’ahabw’ekyo sherura oburyo bw’okumara obwire n’ab’eishe-emwe omu nteerane n’omu buheereza. Taho obwire bw’okutaayaayira abandi. Twakora ekyo, nitworeka ngu ni ‘nitwegyesibwa Ruhanga kukundana.’ (1 Tes. 4:9) Kandi, nitwija kugumizamu nitureeba oku “kiri kirungi kandi ekirikushemeza, ab’eishe-emwe kutuura hamwe nibakwatanisa!”—Zab. 133:1.