Oku Twakutandika Kushomesa Baibuli Abu Turaagabire Zaamagaziini
1. Ekigyendererwa kyaitu omuri Apuri na Mei ni kiiha?
1 Omuri Apuri na Mei nitwija kugaba The Watchtower na Awake! twine ekigyendererwa ky’okutandika kwegyesa abantu Baibuli omu katabo Eki Baibuli Erikwegyesa twabagarukira. Ahaifo hariho ebirikubaasa kutuhwera. Mwijuke ngu bishemereire kukoresibwa kurugiirira aha kicweka ki murikubuuriramu kandi mubite omu bigambo byanyu. Oine obugabe kukoresa enyanjura endiijo yaaba niyo erikukukorera gye.
2. Nitubaasa kukoresa tuta empapura ezirikubanza ez’omu katabo Eki Baibuli Erikwegyesa kutandika kwegyesa omuntu Baibuli?
2 Koresa Empapura Ezirikubanza: Kimwe aha bi orikubaasa kugamba waagarukayo n’eki: “Zaamagaziini ezi naakutsigiire nizegyesa ahari Baibuli. Reeba ahabw’enki okushoma Baibuli kiri kikuru.” Shoma Isaaya 48:17, 18; Yohaana 17:3; nari ekindi ekirikubaasa kushoboorora gye enshonga egyo. Bwanyima y’okwanjura akatabo Eki Baibuli Erikwegyesa n’okukaha ou orikubuurira noobaasa kugumizamu oti:
2◼ “Baibuli neetuha amatsiko aga buzima aha biro by’omu maisho.” Mworekye ebiri aha rupapura 4-5 reero omubuuze oti: “Ni kiiha omu birikuraganisibwa aha eki waakwenzire kureeba nikihikiirira?” Yoreka omuntu ogwo eshuura erikugamba aha Byahandiikirwe ebirikukwata aha kuraganisa oku yaatooranaho reero yaakwikiriza omu bigufu gamba aha kacweka kamwe nari bubiri.
2◼ Nari noobaasa kugira oti: “Baibuli neegarukamu ebibuuzo ebirikukirayo obukuru omu magara.” Mworekye ebiri aha rupapura 6 kandi mubuuze yaaba haine ekibuuzo eki yaareebuurize aha biri aha muheru gw’orupapura orwo. Za aha rupapura oruriho eby’okugarukamu kandi omu bigufu gamba aha kacweka kamwe nari bubiri.
2◼ Nari noobaasa kumworeka emitwe eri omu runyiriri rw’ebirimu kandi omubuuze ogwamushemeza. Za aha shuura egyo kandi omu bigufu mworekye oku arikubaasa kwegyesibwa Baibuli.
3. Tukaatandika tuta kwegyesa omuntu Baibuli bwanyima y’okumuha zaamagaziini ezirikugamba aha (a) kweyongyera kusiisikara kw’ensi? (b) maka? (c) kwesiga Baibuli?
3 Mutsigire Ekibuuzo aha Murundi gw’Okubanza: Ekindi eki orikubaasa kukora n’okumutsigira eki muratandikireho. Ou orikubuurira yaaheza kwikiriza zaamagaziini mubuuze ekibuuzo kandi omuraganise kukigarukamu waagaruka. Teeraho kukora entebeekanisa kugarukayo kandi reeba ngu waagarukayo nk’oku mwaragaine. (Mat. 5:37) Waagarukayo mwijutsye ekibuuzo eki waamutsigiire reero omu bigufu oshome kandi ogambe aha kacweka kamwe nari bubiri kuruga omu katabo Eki Baibuli Erikwegyesa oburaije kugarukamu ekibuuzo ekyo. Muhe akatabo ake kugira ngu akuratire mwaba nimushoma. Ebi ni bimwe aha by’okureeberaho.
3◼ Magaziini ei waamuha yaaba neekwata aha kweyongyera kusiisikara kw’ensi noobaasa kugira oti: “Omurundi oguraakurateho nitwija kuhanuura aha ku Baibuli erikugarukamu ekibuuzo eki Ni mpindahinduka ki ezi Ruhanga arikuza kureeta omu nsi?” Waagarukayo koresa ebiri aha rupapura 4-5. Nari noobaasa kubuuza ekibuuzo eki “Ruhanga niwe arikureetaho oburemeezi?” Ku oraagarukeyo mworekye ebiri omu kacweka 7-8 omu shuura 1.
3◼ Magaziini ei waagaba yaaba neekwata aha maka otakarugireyo noobaasa kubuuza oti: “Buri omwe omu ka naabaasa kukora ki okubaasa kwongyera aha kushemererwa kw’eka?” Ku oraagarukeyo gamba aha kacweka 4 omu shuura 14.
3◼ Magaziini ei waagaba yaaba neekwata aha kwesiga Baibuli noobaasa kumutsigira ekibuuzo eki kugira ngu oije kukigarukamu waagarukayo “Baibuli ehikire omu bya sayansi?” Ku oragarukeyo gamba aha kacweka 8 omu shuura 2.
4. Tushemereire kukora ki omuntu yaayanga akatabo Eki Baibuli Erikwegyesa?
4 Aha muheru gwa buri kushoma buuza ekindi kibuuzo ekiraije kugarukwamu waagaruka. Okwega kwaheza kuhama akatabo mukaihe ahi karikutandikira mukahitsye aha muheru. Kwonka shi ogwo omuntu ku yaakwanga akatabo Eki Baibuli Erikwegyesa? Nabwo noobaasa kugumizamu orikumureetera zaamagaziini kandi orikugaaniira nawe ahari Baibuli. Waagumizamu nookora otyo naabaasa kwija kwikiriza kwega Baibuli.
5. Ahabw’enki tushemereire kuteeraho kwegyesa abantu Baibuli twaheza kubaha zaamagaziini?
5 Yesu akaturagiira ‘kuhindura abantu abeegi . . . turikubegyesa.’ (Mat. 28:19, 20) N’ahabw’ekyo ekigyendererwa kyaitu ekikuru omu kuha abantu zaamagaziini n’okwegyesa ab’emitima egororokire amazima. Omuri Apuri na Mei teeraho kutandika kushomesa omuntu Baibuli waaheza kumuha The Watchtower na Awake!