Ebaruha Kuruga aha Kakiiko Akareeberezi
TURIKUKURATIRA eky’okureeberaho kya Yesu, nitushaba Ruhanga twihire aha mutima tuti: “Eiziina ryawe ryezibwe.” Ekyetengo kyaitu ky’okuhikaanisa amagara gaitu n’okushaba okwo nikireebekyera omu mitwarize yaitu nk’Abajurizi ba Yehova. Buzimazima, okumanya eiziina rya Ruhanga kwonka tikirikumara. Tushemereire kukoresa buri mugisha okuhimbisa eiziina eryo. Buzima, omugisha ogurikukirayo oburungi ogu buri omwe omuriitwe arikubaasa kutunga n’ogw’okwetwa Omujurizi wa Yehova.—Mat. 6:9; Isa. 43:10.
Barikuhikaana n’ebiri omuri Zaaburi 110:3, abantu ba Yehova, beekundiire nibejumba omu murimo ogu Yehova yaagizire ngu gwine kukorwa. Ahabw’enki abantu b’emyaka n’emiringo etari emwe n’emwe barikwejumba munonga omu murimo gw’okubuurira? Enshonga enkuru n’ahabw’okuba nibakunda Ruhanga kandi bamaririire kumuheereza. Eky’Ebiragiro 6:5, 6 nizituragiira kukunda Yehova ‘n’omutima gwaitu gwona, n’amagara gaitu goona kandi n’amaani gaitu goona.’ Rukundo egi erikurugira kimwe aha mutima netureetera kukoresa obwire bwaitu, amaani gaitu, n’ebintu byaitu okushagika Obukama bwa Ruhanga, ekirikutwariramu okwejumbira kimwe omu buheereza nk’oku embeera zaitu zirikutubaasisa.
Rukundo ei Yehova ainiire abantu niyo erikutuma yaaturagiira kubuurira amakuru marungi ag’Obukama bwe omu nsi yoona. Tarikwenda ngu omuntu weena ahwerekyerere, kureka naayenda ngu boona beeteise, barekye emihanda yaabo emibi, bahindukire Omuhangi waabo kugira ngu batungye amagara agatahwaho. (2 Pet. 3:9) Yehova naagira ati: “Tinshemerererwa kufa kw’omubi, kureka omubi okureka omuhanda gwe akaba ohuriire.” (Ezk. 33:11) Ku turikuba turi omu kubuurira, nituba turi obuhame bwa rukundo ei Yehova ainiire abantu. Hatariho kubanganisa, eki ni kimwe aha birikwongyera aha kushemererwa n’okumarwa, ebi turikugira ku turikwejumba omu murimo ogu omukuru.
Rukundo yaitu mpango ei twiniire Yehova kandi nereebekyera omu ku turikutwara Ekigambo kye, Baibuli Ekirikwera, ei yaahandiikiise omwoyo we. Kuri hatariho Baibuli, titwakubaasize kumanya Ruhanga nari kumwirira haihi, nk’oku Yakobo 4:8 rurikutushaba kukora. Kandi titwakumanyire ahabw’enki turiho, hamwe n’ebirikwija kubaho omu biro by’omu maisho. Titwakumanyire ngu tatenkuriitwe Adamu niwe burugo bw’oburemeezi obu twine. (Rom. 5:12) Kandi titukaamanyire rukundo mpango ya Ruhanga omu kuhayo Omwana we omwe nyamunegyere kutubeera ekitambo. Omu miringo mingi endiijo, Yehova naatuha aha kumanya, obwengye, n’okwetegyereza ebi aine. Ka nitusiima munonga ekiconco eki atuhaire, Ekigambo kye eki yaahandiikiise omwoyo we! Okusiima oku twine ahabw’ekiconco eki nikutuhiga ‘kwegurira obwire’ bw’okushoma, okwega n’okucumitiriza aha bigambo bye. (Efe. 5:15, 16, NW; Zab. 1:1-3) Titushemereire kuburwa obwire bw’okwega Ekigambo kya Ruhanga buri izooba. Kureka, rukundo ei twiniire Ruhanga eshemereire kutureetera kukunda Ekigambo kye, ekiraatubaasise kweyongyera kumumanya n’okuhamya rukundo ei tumwiniire.
Kuruga omu Baibuli, twegire ngu Adamu ku yaasiisire ahari Yehova, akata baijukuru be boona, naitwe otutwariiremu, omu mbeera etarimu matsiko. Kwonka Ruhanga akaba naabaasa kuteeraho abantu omuhanda kuruga omu mbeera egyo, kandi akakikora, yaataho entebeekanisa kugira ngu ekigyendererwa kye ahabw’ensi kiije kihikiirire.—Kut. 3:15.
Hatariho kubanganisa, buri omwe omuriitwe aine ekyetengo ky’amaani eky’okuhimbisa eiziina rya Ruhanga waitu. Ku turikweyongyera kumanya oburungi bwa Ruhanga Yehova, nitukwatanisa nawe hamwe n’ekibiina kye omu kumanyisa eiziina rye erikuru n’ebigyendererwa bye. Twine obwesigye ngu naatusiima kandi atuha emigisha hati, kandi ngu aryatuha n’amagara agatahwaho omu nsi ensya.
Itwe ab’Akakiiko Akareeberezi, nitwenda kuhamiza mwena ab’eishe-emwe abakundwa ngu nitubakunda. Kandi nitwenda kubasiima munonga ahabw’okuteeraho kukoresa obwire obutsigaireyo kuhitsya amakuru marungi aha bantu baingi nk’oku kirikubaasika ‘okubonabona kwingi’ kutakabaireho. (Kush. 7:14) Omu kukora mutyo, nimubaha omugisha ogu naimwe mwatungire, ogw’okutunga okumanya okurikukwata ahari Ruhanga n’ahari Kristo, okurikuhitsya omu magara agatahwaho.—Yoh. 17:3.
Niitwe Ab’eishe-emwe bataahi baanyu,
Akakiiko Akareeberezi ak’Abajurizi ba Yehova