Okuhikiiriza Obuheereza Bwaitu obw’Obukama nk’Abajurizi ba Yehova
1 Nk’Abajurizi ba Yehova twine omugisha ogurikukirayo obukuru omu nsi. Nitujwekyera Yehova omu icwero ry’emanja ery’ebihangirwe byona eririkuhozesa abo boona abarikuramibwa nka baaruhanga. (Isa. 41:1, 23; 43:12) Okubaasa kutuhwera kushobororera abantu amatsiko agu twine Yehova atuhaire ebitabo bingi. (1 Pet. 3:15) Ekitabo Watch Tower Publications Index nikituhwera omu kusherura ebi turikuba nitwetenga. Okumanya gye ebicweka byakyo ebikuru nikiija kutuhwera kwetegyereza oku turikubaasa kukikoresa gye.
2 Twena tushemereire kuba nitumanya gye omutwe “Yehova.” Ahansi y’omutwe ogwo omu Index noobaasa kusherura obone ebirikworeka ahu orikubaasa kushanga ebirikukwata aha nshonga ahabw’enki Yehova akirekire obubi kubaho? Kandi noija kushanga mutwe “Eiziina” omuri Index eya 1930-1985 omu ya 1986-2000 n’omu ya hati. Ebirikworeka ah’okwiha byona ebihandikirwe aha eiziina Yehova nibishangwa aho.
3 Ogundi omutwe omukuru ni “Abajurizi ba Yehova.” Ahansi yagwo hariho ebirikworeka ah’okwiha ebirikukwata aha Bajurizi ba Yehova nk’ekibiina. Noomanya oku turikutwara obwegyese obwa ahaiguru okubaaga omutumbi kumanya ekimwitsire okwita omuntu omu kwerwanaho nari obuhwezi kuruga omu gavumenti? Noija kushanga ah’okwiha ebirikukwata aha bibuuzo ebyo ahansi y’omutwe “oku turikutwara—.” Waayeyongyerayo nooshanga orunyiriri rw’ebyafaayo bya Abajurizi ba Yehova ab’omu bunaku obu omu mahanga mingi kandi orunyiriri ruraingwa rw’ebigambirwe aha Bajurizi ba Yehova nirushangwa ahansi y’omutwe “Ebyagambirwe Abandi.”
4 Ebitebyo ebirikukwata aha magara g’abaheereza ba Yehova abeesigwa nibitugumya kandi bitwegyesa. Nibibaasa kutuhwera kuteeraho abaana baitu hamwe n’abu turikwegyesa Baibuli omusingye guhamire. Noija kushanga birikukuratana kurugiirira aha maziina gaabo n’aha mitwe yaabyo ahansi y’omutwe “Ebitebyo Ebirikukwata aha Magara g’Abajurizi ba Yehova.” Emitwe emikye erikukurataho neeza kworeka oku Index erikubaasa kutuhwera omu kibiina omu maka hamwe n’omu kubuurira.
5 Omu Kibiina. Kurabira omuri Yesu Kristo Omutwe gw’ekibiina Ekikristaayo Yehova ahaire ‘omwambari ow’okwesiga’ nari orikureeberera eby’omu ka obujunaanizibwa. (Luka 12:42, 43) Entebeekanisa egi etubaasiise kutunga ebitabo ebirimu obuhabuzi aha ku ‘tushemereire kutwaza omu nju ya Ruhanga.’ (1 Tim. 3:15) Ekikuru eki turikukoresa omu kusherura ebihandiikirwe omu bitabo by’ekibiina n’ekitabo Watch Tower Publications Index. Nikibaasa kukuhwera kita?
6 Ori omwe aha barikutwara ekibiina? Hariho emitwe ebiri erikukwata aha bujunanizibwa bwawe: “Abarikutwara Ekibiina” na “Abareeberezi.” Ahansi y’omutwe “Abarikutwara Ekibiina” hariho ah’okwiha ebirikukwata aha ku baakuhwera abantu batari bamwe na bamwe omu kibiina aha kuha obuhabuzi enkorengana ahagati y’abarikutwara ekibiina obujunaanizibwa bw’abarikutwara ekibiina n’ebindi nk’ebyo. Ebirikworeka ah’okwiha ebirikukwata aha bi baine kuhikiiriza nibishangwa ahansi y’omutwe “Abareeberezi” obu omutwe ogwo nigwo Baibuli erikukoresa yaaba neegamba ahari ebi. Kandi ahansi ya “Abareeberezi” hariho obujunaanizibwa bwabo nk’obwa “Omureeberezi orikwebembera akakiiko k’abareeberezi” “omureeberezi w’obuheereza” n’obwa “omuhandiiki.” Ahansi y’omutwe “Ebibiina” hariho bingi ebirikubaasa kutuhwera.
7 Abaheereza naimwe nimukora omurimo mukuru omu kibiina. Ahansi y’omutwe “Abaheereza” hariho ebirikukwata aha bi mwine kuhikiiriza nk’abaheereza. Noija kushangaho ebirikukwata aha bukuru bw’obuheereza obu orikubaasa kuzamu n’aha ku waakutunga obujunaanizibwa obundi.
8 Neegasira Amaka. Aha bikwatiraine n’ab’omu maka 1 Timoseo 5:4 nihagira hati: “Babanze beegye kworeka okutiina Ruhanga omu bi barikukorera ab’omu maka gaabo.” Buzima okwemanyiiza kutiina Ruhanga omu nkorengana yaitu n’ab’omu maka gaitu n’ekintu eki tushemereire kwega. Omuri eki nitwetenga obuhabuzi kuruga ahari Ruhanga obu okureeberera ab’omu maka gaitu buri obujunaanizibwa bwaitu nk’Abakristaayo. Ekitabo Watch Tower Publications Index nikibaasa kutuhwera kutunga obuhabuzi oburikukwata aha mbeera zitari zimwe na zimwe ezirikubaasa kubaho omu maka.
9 Amaka nigatandika omushaija n’omukazi baagaitwa. (Kut. 2:24) Nooteekateeka aha bushwere? Ahansi y’omutwe “Obushwere” noija kushangaho omutwe omukye “okutoorana ow’okushwer[w]a.” Index kandi eine emitwe emikye “obujunaanizibwa bw’omushaija” na “obujunaanizibwa bw’omukazi” buri gumwe gurikworeka ah’okwiha ebirikubaasa kuhwera abarikwenda kutaaha omu bushwere n’abo abaabutaahiremu. Hariho n’emitwe emikye endiijo nka “okuhurizana” “okukwatanisa” na “obusingye” erikworeka ebirikubaasa kuhwera abari omu bushwere. Habaho oburemeezi omutwe omukye “oburemeezi omu” nigukutwara ah’okwiha obuhabuzi bw’okubushoborora.
10 Abaana n’obuhunguzi kuruga ahari Yehova. (Zab. 127:3) Abazaire nibabaasa kukuza bata abaana baabo ‘barikubeegyeseza omuri Mukama’? (Enf. 6:4) Ekirikukira obukuru n’obuhabuzi obu Yehova arikuha kurabira omu Kigambo kye n’omu mwambari we omwesigwa. Abazaire nibetenga kwetegyereza ebyetengo by’abaana baabo. Obuhabuzi nibabaasa kubusherura omuri Index ahansi y’emitwe “Abaana” na “Eminyeeto.” Kandi shi okwegyesa abaana banyu ebiragiro bya Yehova? Omutwe “Okutendeka Omwana” nigworeka ah’okwiha byona ebirikukwata aha kworora abaana otwariremu n’oku waakubahwera kugira omukago na Yehova hamwe n’okukunda kwega amazima. 1 Pet. 2:2. Okutebeekanisa okushoma Baibuli kw’eka bukiri kare nikihwera amaka kuhama. (Bir. 6:6-9; Isa. 54:13; Efe. 5:25, 26) Ah’okwiha obuhabuzi oburikukwata aha kuhanuura kw’amaka okurungi nohashanga aha ahansi y’omutwe “Amaka.” Omu Index eya hati omutwe omukye “Okwega Baibuli” gwine emitwe endiijo emikye nka “oku kwakuba okw’omugasho” na “oku kwakuba okurikushemeza.”
11 Omu Kubuurira. Okukunda Yehova n’abataahi baitu nikutuhiga kubuurira amakuru marungi g’Obukama. Ku turikukoresa gye Baibuli nitubaasa ‘kumaraho empaka n’ekintu kyona ekirikwetunguura kurwanisa okumanya kwa Ruhanga.’ (2 Kor. 10:5) Ekitabo Watch Tower Publications Index kitebeekanisiibwe kutuhwera omu nshonga egi.
12 Ebirikukwata aha kubuurira kwaitu nibishangwa ahansi y’omutwe omukuru “Okubuurira.” Buri kirikukukwataho nikigambwaho aho otwariremu n’oku itwe tushemereire kukutwara enyanjura okugarukamu abarikuhakana eby’okugamba turikugaba ebitabo okugarukira abu turikwegyesa Baibuli. Nooyenda kushoborora enshonga orikukoresa eby’okureeberaho birungi? Noobaasa kubishanga ahansi y’omutwe “Eby’okureeberaho.”
13 Oine ekyetengo ky’okutandika kwegyesa omuntu Baibuli? Nari hariho ou oine kwonka orikureebeka nk’otarikukura mu by’omwoyo? Ahansi y’omutwe “Abeegi ba Baibuli” hariho emitwe emikye “okutunga” “okuhwera” na “okwegyesa” buri gumwe gwine ah’okwiha ebyakukuhwera kutunga kandi okahwera abeegi ba Baibuli kukura omu by’omwoyo.
14 Okuhikiiriza obuheereza bwaitu obw’Obukama nikireeta okumarwa. (Yoh. 4:34) Ekitabo Watch Tower Publications Index nikibaasa kukuhwera kwejumba omu murimo ogu omurungi n’omu mirimo endiijo omu magara g’Ekikristaayo.