Twena Nitubaasa Kugira Eki Twakora omu Kuhindura Abantu Abeegi
1 Omuntu okuhinduka omwegi tikirikuruga aha kuteeraho kw’omuntu omwe. Yehova naabaasa kukoresa ‘abarikukorera hamwe nawe’ kuhwera abarikwega Baibuli okuhama omu by’omwoyo. (1 Kor. 3:6-9, NW) Buri omwe omuriitwe naabaasa kuhwera abasya kurabira omu kugarukamu ebibuuzo omu nteerane z’Ekikristaayo hamwe n’omu kugira emitwarize mirungi ekirikuha obuhame ngu omwoyo wa Ruhanga naakora omu magara gaitu. (Yoh. 13:35; Gal. 5:22, 23; Efe. 4:22, 23) N’enki ekindi ekirikubaasa kukorwa okuhwera abasya?
2 Nk’Ekibiina: Twena nk’ekibiina nitubaasa kworeka ngu nitufayo aha basya abarikwija omu nteerane turikubahikaho tukabaramusya kandi tukaganiira nabo enteerane zitakatandikire na zahwa. Omushaija omwe arikwijuka omurundi gwe gw’okubanza kwija omu nteerane akagira ati: “Omu izooba rimwe nkabugana abantu abaine rukundo eya buzima abu naabaire ntakareebahoga abarikukira abu naabaire narabugaine omu kanisa ei naakuriiremu. Nkakireeba butunu ngu naabona amazima.” Akabatizibwa bwanyima y’emyezi mushanju okuruga obu yaaza omu ruteerane rwe rw’okubanza.
3 Siima omwegi oyihire aha mutima nk’oku araagyende naayeyongyera kukora gye omu by’omwoyo. Omwegi ogwo agumisiriize okuhakanisibwa? Naija omu nteerane butoosha? Ayehangaine yaagira eki yaagarukamu omu ruteerane? Yaatandikire kuha embazo omu Ishomero ry’Obuheereza nari kubuurira n’ekibiina? Musiime ahabw’okukora gye omu by’omwoyo. Eki nikiija kumugaruramu amaani.—Enf. 25: 11.
4 Iwe nk’Orikumwegyesa Baibuli: Ababuurizi abamwe babaasize kuhwera abu barikwegyesa Baibuli okumanya abari omu kibiina barikushaba ababuurizi abandi kugyenda nabo baaba nibaza kwegyesa omwegi ogwo. Rahuka kweta omwegi kwija omu nteerane z’ekibiina. Yaatandika kwija teeraho kumwanjura aha bandi. Aine omuze mubi ogu arikurwanisa katugire nk’okureetsa? Omu ka yaabo hariho orikuteeraho kumuremesa kwega Baibuli? Nikibaasa kumugasira yaaganiiraho n’omubuurizi owaarabire omu buremeezi nk’obwo.—1 Pet. 5:9.
5 Abasya nibeetenga obuhwezi omu by’omwoyo kuruga omu kibiina. Twena nitubaasa kubahwera kuhama turikubooreka ngu buzima nitubafaho.