‘Gamba Ekigambo kya Ruhanga Otaine Bwoba’
1 Obumwe nootiina kugamba aha nyikiriza yaawe ku orikutunga akagisha ori aha murimo nari aha ishomero? Nikikugumira okubuurira abanyabuzaare abataahi nari abantu abu otarikumanya? N’enki ekiraatuhwere twena kukoresa buri kagisha ‘kugamba ekigambo kya Ruhanga tutaine bwoba’?—Fil. 1:14.
2 Otakaatiina: Okaaguma ohunami obwo orikureeba nibabeiherera munywani waawe ow’ahamara nari omunyabuzaare? Yehova Munywani waitu ow’ahamara abeihereirwe okumara enkumi z’emyaka. Twine omugisha gw’omutaano ogw’okujuririra Ruhanga waitu ow’amaani! (Isa. 43:10-12) Okugirira Yehova rukundo mpango nikutuhwera kuhwamu okutiina kandi kutuhiga kubuurira amazima n’obumanzi.—Byak. 4:26, 29, 31.
3 Ijuka ngu obutumwa obu turikutwarira abantu n’amakuru marungi. Nigaija kureetera abarikugaikiriza ebirungi ebitarihwaho. Okuteekateeka aha mugasho gw’okubuurira beitu hatari ahariitwe nari aha barikutuhakanisa nikwija kutuhwera kubuurira n’obumanzi.
4 Eky’Okureeberaho ky’Abandi: Eby’okureeberaho eby’abandi abaarinzire obwesigwa bakagamba ekigambo kya Ruhanga bataine bwoba nibitugaruramu amaani. Nk’eky’okureeberaho n’obumanzi Enoka akarangirira orubanja rwa Yehova aha basiisi abaabaire batarikutiina Ruhanga. (Yuda 14, 15) N’obwesigwa Noa akabuurira abantu abaabaire batarikufayo. (Mat. 24:37-39) Abakristaayo ab’omu kyasha ky’okubanza abaabaire bari ‘babisi kandi bateegyesiibwe’ bakagumizamu kubuurira n’obu baraabe baahiiganisiibwe munonga. (Byak. 4:13, 18-20) Ebitabo byaitu nibikira kuba birimu ebitebyo ebirikukwata aha magara g’abantu abaasingwire okutiina obwisho kandi bakahinduka ababuurizi ab’omujinya ahabw’okworeka okwikiriza omuri Yehova.
5 Okuteekateeka aha ku abaheereza abeesigwa aba ira abaahikirweho oburemeezi baatwarize nikutugarukamu amaani. (1 Bag. 19:2, 3; Mak. 14:66-71) ‘Bakagira obumanzi omuri Ruhanga waitu’ baabuurira bataine bwoba. N’ahabw’ekyo naitwe nitubaasa!—1 Tes. 2:2.