Abantu Nibateeraho Munonga Kwihaho Okufa

Rufu n’omuzigu orikutiinisa munonga. Nitumurwanisa n’amaani gaitu goona. Omuntu ou turikukunda yaafa obumwe nitubaasa okutaikiriza. Nari, omuntu yaaba aine amaani g’obunyeeto naabaasa kuteekateeka ngu tarifa ahabw’okugira ngu twine ekyetengo ky’okugumaho ebiro byona.

Baafaraho bakaba nibaikiririza omu kutafa okukira abantu abandi. Bo n’abakozi baabo bakamara obwire bwingi barikuteeraho kwihaho okufa. Ebituuro ebiri nk’enju ebi baabaire bombeka nibihamya ngu bakateeraho kwonka baaremwa.

Omugabe w’Abachaina nawe akateeraho kwihaho okufa arikukoresa omuringo ogundi ogw’okutabura emibazi ei baabaire nibateekateeka ngu eine amaani g’okureetera omuntu kugumaho ebiro byona. Omugabe Qin Shi Huang akaragiira abakozi be abarikutabura emibazi ngu basherure omubazi ogwine amaani g’omutaano ag’okutuubiza kimwe rufu. Kwonka emibazi yoona ei baatabwire ekaba erimu obutwa bwa mercury, kandi kimwe aha bi baatabwire nikibaasa kuba nikyo kyamwitsire.

Omu kyasha 16, omujumbuzi kuruga Spania orikwetwa Juan Ponce de León akaza Caribbean arikusherura eiziba eri baabaire nibateekateeka ngu nirireetera abantu kugaruka kuba eminyeeto. Akajumbura ishaza rya Florida, omuri U.S.A., obu yaabaire nasherura eiziba eryo, kwonka abantu abaabandize kutuura omuri America bakamwita bwanyima y’emyaka mikye. Kandi eiziba eryo na hati taine orarireebire.

Baafaraho, abagabe, n’abajumbuzi boona bakateeraho kwihaho rufu. Mbwenu shi n’oha omuriitwe orikubaasa kugaya ekigyendererwa kyabo n’obu turaabe tutarikusiima emiringo ei baakoreise? Buzima twena nitwenda kugumaho.

MBWENU SHI RUFU NEEBAASA KUSINGURWA?

Ahabw’enki nitwangira kimwe okufa? Baibuli neeshoborora ahabw’enki. Erikugamba aha Muhangi waitu, Yehova Ruhanga,a neegira eti: ‘Akata omu mitima y’abantu ebiteekateeko by’obunaku obutarihwaho.’ (Omubuurizi 3:11) Twine ekyetengo ky’okutuura omu nsi ebiro byona, beitu etari myaka 80 nari n’okukiraho.​—Zaaburi 90:10.

Ahabw’enki Ruhanga yaataire omu mitima yaitu ekyetengo ky’okutuuraho ebiro byona? Mbwenu shi n’ahabw’okwenda kutureetera obusaasi? Ekyo tikirikubaasika. Omu mwanya gw’ekyo, Ruhanga naturaganisa ngu naija kwihaho rufu. Baibuli emirundi mingi neeyoreka oku okufa kuraahweho n’ekiraganiso kya Ruhanga eky’amagara agatahwaho.​—Reeba akabokisi, “Okusingura Rufu.”

Yesu Kristo akagira ati: “Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.” (Yohaana 17:3) N’ahabw’ekyo twine amatsiko ngu okufa nikwija kwihwaho. Kwonka Yesu natuhamiza ngu Ruhanga niwe oraiheho okufa.