Oruburi rwa Rufu

Okufa n’ekintu eki abantu baingi barikutiina kugambaho. Kwonka nabwo, titurikubaasa kwetantara okufa. Kandi hoona okufa nikureeta obusaasi bwingi.

Tihaine orikubaasa kugira ngu ayetebeekanisiize okufa kw’omuzaire we, omukazi we, omushaija we nari omwana we. Okufa nikubaasa kubaho ahonaaho nari omuntu naabaasa kumara obwire buraingwa arwaire arugyeho afe. Oba omuntu yaafa mu muringo ki, okufa n’ekintu eki tutarikubaasa kwetantara kandi ekirikureeta obusaasi bwingi.

Antonio, owaafeereirwe ishe ahabw’okutomerwa motoka, naagira ati: “Nikiba kiri nk’oku omuntu yaakukinga enju yaawe yoona akatwara ebishumuruzo byayo. Nooba otarikubaasa kutaaha omunju egyo. Nooguma noijuka oku yaabaire eri. Eki n’ekintu kisya eki oine kwikiriza. Nangwa nobu waakuteeraho kukyehuzya, ahabw’okugira ngu nikireebeka nk’ekitari ky’oburingaaniza nooba otaine ky’okukora.”

Dorothy nawe owaafeereirwe iba aha myaka 47, akateeraho kusherura eby’okugarukamu. N’obu araabe yaabaire ayegyesa abaana eby’ediini aha sande ngu nitugumizamu kuba abahuriire bwanyima y’okufa. Beitu akaba atakatungaga eby’okugarukamu ebihikire. Akabuuza omwebembezi waabo ow’ediini ati: “Omuntu naagumizamu kuba ohuriire bwanyima y’okufa?” Akamugarukamu ati: “Ekyo tihaine orikukimanya, twine kutegyereza tukareeba.”

Mbwenu shi n’ekifubiro ngu tugume “tutegyereize tureebe ekiraabeho”? Hariho oku turikubaasa kumanya yaaba okufa niyo muheru?