Noobaasa Kwongyera Kugira Obumanzi!

1-3. Niki ekyareeteire ebigambo bya Yesu ebi: “Mwimukye, tugyende,” kuba eby’obumanzi?

“MWIMUKYE, tugyende.” Ebi nibibaasa kuba nibyo bigambo ebirikworeka obumanzi ebiraagambirwe omuntu weena. Noobaasa kwebuuza oti: Ebigambo ebyo nibyoreka bita obumanzi? Nitutunga eky’okugarukamu twayetegyereza owaabigambire n’enshonga ahabw’enki yaabigambiire.—Mat. 26:46.

² Ebigambo ebyo, Yesu Kristo akabigambira abakuratsi be abeesigwa. Kwonka nabwo, akaba yaabibagambiire. (Yohaana 14:31) Kwonka aha murundi ogu, obwire obu yaabigambiiremu bukaba buri bukuru munonga. Akaba ari omu musiri Gesesemaani aheeru y’orurembo Yerusaalemu. Bukaba buri obwire bw’ekiro, kandi Yesu akaba naamanya ngu guruupu y’abashaija abaabaire baine eby’okurwanisa ekaba eriyo neemwizira. Akaba naamanya eki baabaire nibaija kukora. Akaba ari haihi kuhikwaho embeera egumire munonga etakahikaga aha muntu weena, kandi akaba naamanya ngu naija kugirabamu wenka.

³ Yesu tarataireho kuhunga akabi aku yaabaire ayorekyereire. N’obu araabe yaabaire naabaasa kweta baamaraika b’amaani kumurinda, ekyo tarakikozire. (Mat. 26:53) Kureka akagira ati: “Mwimukye, tugyende.” Yesu akaba naaza nkahi? Kukwatwa, akabonabonesibwa reero akaitwa. Ahabw’enki yaabaire ayeteekateekire kukora ekyo? Ahabw’okuba akaba naakunda Ishe n’abakuratsi be.

4-5. Nikimanyisa ki kworeka obumanzi, kandi ahabw’enki ni kikuru kubworeka?

⁴ Hatariho kubangaanisa, Yesu Kristo niwe yaakizireyo kworeka obumanzi. Ori omwe aha bakuratsi be? Kyaba nikwo, naiwe oine obumanzi. Abakristaayo abaabuzima baine kworeka obumanzi. Obunaku obu, turi omu bwire bw’akabi kaingi, n’ahabw’ekyo twine kugira omutwarize ogwo okukira obundi bwona.

⁵ Nikimanyisa ki kworeka obumanzi nk’obu Yesu yaayorekire? Obumanzi obwabuzima tikirikumanyisa okusheka waahikwaho akabi, okuta amagara gawe omu kabi ahu kitarikwetengyesa, nari okuteekateeka ngu tihaine akabi akaraakuhikeho. Tikirikumanyisa okwejumba omu bikorwa by’obushaarizi kworeka ngu oine amaani. (Zab. 11:5) Obumanzi obwabuzima nibutaana aha kukora ebyo. Omuntu oine obumanzi obwabuzima naakora ebihikire omu maisho ga Ruhanga, n’obu embeera zaakuba zigumire zita nari zirikutiinisa.

Noobaasa Kworeka Obumanzi nka Yesu!

6. Eky’okureeberaho kya Yesu nikibaasa kutuhuumuriza kita, twaba nitwehurira tutaine bumanzi?

⁶ Obundi noobaasa kuba nooyebuuza yaaba noobaasa kworeka obumanzi nka Yesu, waagyezibwa. Kyaba nikwo kiri, ijuka ngu Yesu n’omuringaaniza. Nka Ishe, Yesu tarikutushaba kukora ekirikukira aha ki turikubaasa. (Zab. 103:14; Yohaana 14:9) Nk’eky’okureeberaho, obu yaabaire ari omu musiri Gesesemaani, akashaba entumwa ze kuguma nibareeba, kwonka bakamureebya. Kwonka nabwo, akabagira ati: “Omutima gwo nigukunda, kwonka omubiri n’omweremwa.” (Mat. 26:41) Akaba naamanya obweremwa bwabo kandi naiwe naamanya obwawe.

7-8. Yesu ayorekire ata ngu aine obwesigye omu bakuratsi be?

⁷ Yesu akooreka ngu akaba aine obwesigye omu bakuratsi be. Teekateeka aha ku aine kuba yaabahamiize obu yaabagira ati: “Muhuumure [nari mugume,] nyowe nsingwire ensi.” (Yohaana 16:33) Akaba naamanya ngu nibabaasa kumutooreza kandi nikyo baakozire. Kandi, emirundi mingi, Yesu akagambira abandi ebirikubahamiza, yaabahwera kwongyera kugira obumanzi. Nk’eky’okureeberaho, akagambira omushaija owaabaire azingazingirwe kuterarikirira ahakuba ebibi bye bikasaasirwa. (Mat. 9:2) Akagambira omukazi owaabaire ayerarikiriire ahabw’okukwata aha kijwaro kye kutatiina reero yaamureetera kwikaikana. (Mat. 9:​20-22) Akaikainisa abeegi be obu baabaire beerarikiriire. (Mat. 14:27) Kandi bwanyima y’okuzooka, akahamiza entumwa Paulo obu yaabaire ari haihi kwitwa arikumugira ati: “Guma omutima.”—Byak. 23:​9-11.

⁸ Na hati, Omugabe waitu Yesu naatuhamiza kukora nikyo kimwe. Naayenda ngu tugire obumanzi kandi naamanya ngu nitubaasa kukikora. Yehova, atuhaire byona ebirikwetengyesa kutuhwera kugira obumanzi.

Baibuli Neebaasa Kutuhwera eta Kwongyera Kugira Obumanzi?

9. Ekigambo kya Ruhanga nikibaasa kutuhiga kita?

⁹ Yehova ataire omu Kigambo kye eby’okureeberaho bingi ebirikubaasa kutuhwera kwongyera kugira obumanzi. Omu Kigambo kye, nitushangamu ebirikukwata aha bashaija n’abakazi, abato n’abakuzire, kuruga omu mbeera zitarikushushana. Boona bakaba bari “nkaitwe,” baine enyehurira nk’ezaitu nk’oku nabi Eliya yaayehuriire. (Yak. 5:17) Nabo bakaba batahikiriire nkaitwe, bakaba baine obweremwa kandi bakaba nibakora enshobe. Kandi nabo bakatunga oburemeezi butari bumwe na bumwe, baaraba n’omu mbeera zigumire. Kwonka nabwo, bakasingura ebyo byona nk’oku Yesu yaasingwire. Bakooreka obumanzi kandi baatuteeraho eby’okureeberaho birungi ebirikutuhiga na hati.

10-11. Ekitabo eki nikiija kukuhwera kukora ki, kandi noobaasa kukikoresa ota? (Reeba akabokusi “Oku Orikubaasa Kukoresa Ekitabo eki omu Kweyegyesa N’omu Kuramya kw’Eka.”)

¹⁰ Ekitabo eki kitebeekanisiibwe kutuhwera kwongyera kugira obumanzi. Omu mashomo 54 agarikukurataho, noija kureeba oku Yehova yaahweraire abantu abatahikiriire nkaiwe kugira obumanzi obu baabaire nibeetenga. N’ahabw’ekyo shoma buri ishomo, reero oyongyere kucondooza kandi oyege ebirikukwata ahari buri omwe orikugambwaho. Waakora ekyo, noija kwongyera kumanya gye abashaija n’abakazi abo.

¹¹ Reka eby’okureeberaho byabo bikuhwera kwongyera kugira obumanzi kandi obaase kugumisiriza ‘ebiro ebi eby’aha mperu’ ebigumire. (2 Tim. 3:1) Buri izooba, ka tugume nitwijuka ebigambo bya Yehova ebirikutuhamiza biti: “Tindikutsigaho, kandi tindikuhemukaho na kakye.” Nk’oku Paulo yaagizire, ebigambo ebyo nibibaasa kutuhwera ‘kugamba tutarikubangaanisa tuti: [Yehova] niwe muhwezi wangye, tinditiina.’—Heb. 13:​5, 6.