Ebaruha Kuruga aha Kakiiko Akareeberezi

Ab’eishe-emwe na Banyaanyazi-itwe Abakundwa:

Omu butumwa obu Yesu yaahaire ekibiina ky’omuri Sumuruna, akagira ati: ‘Mutatiina ebi murikwija kubonabonesibwamu.’ (Kush. 2:10) Obutumwa obwo obu yaabahaire arikubahiga kutatiina naitwe nibutukwataho abari omu bwire bw’ekiro kya “Mukama.” (Kush. 1:10) Buzima turi omu ‘biro by’akabi kaingi,’ kandi nikitushemeza kureeba abaheereza ba Ruhanga omu nsi yoona barikuguma bari abeesigwa n’obu baraabe nibahikwaho ebirikugyeza okwikiriza kwabo n’obumanzi bwabo.—2 Tim. 3:​1-5.

Kwonka, niki ekirikubaasa kutuhwera kuguma tuhami, tukanga ‘kugaruka enyima’ ahabw’okutiina? (Heb. 10:39) Nikibaasa kutatworobera obutoosha ahabw’okuba nitubaasa kuhiiganisibwa nari tuhakanisibwe. Kwonka nabwo, nituba twine kucwamu. Yaaba twine enshoni nari turi emanzi, nitubaasa kucwamu kushagika Yehova kandi tuhamire aha kihikire. Niki araatuhwere?

Ekigambo kya Ruhanga nikibaasa kukuhwera kugira obumanzi. Kirimu eby’okureeberaho eby’abashaija n’abakazi abaayorekire obumanzi. Ekitabo eki kitebeekanisiibwe kutuhwera kushwijuma abashaija n’abakazi abo n’okuteekateeka aha by’okureeberaho byabo. Waaba nooshoma ebirikubakwataho, shaba Yehova kukuhwera kuteekateeka aha mbeera yaawe n’oburemeezi obu orikutunga hati n’obu orikubaasa kutunga omu biro by’omumaisho. Teekateeka aha ku Yehova arikubaasa kukuhwera kugira obumanzi. Kandi, teekateeka n’aha ku obumanzi obu abashaija n’abakazi abo baayorekire burikubaasa kukuhwera omu miringo egi:

Okukora empinduka. (Yak. 3:17) Obu Yehova yaarekyera aho kusiima Saulo reero akatoorana Daudi owaabaire akiri muto kuba omugabe owaabaire naija kukurataho, Yonasaani akooreka obwesigwa n’obumanzi yaagumizamu naashagika Daudi ou Yehova yaabaire atooraine.

Okuhamira aha mitindo ehikire. (Heb. 11:​32-34) Hanania, Mishaeli, na Azaria bakaba beteekateekire kufeera omu kikoomi ky’omuriro omu mwanywa gw’okwehakana okwikiriza kwabo barikwejumba omu kikorwa ky’okuramya ebishushani.

Okugambira abandi amazima. (Mat. 22:16) Teekateeka ahari Saulo owa Taruso, owaagambire amazima agarikukwata ahari Yesu, arikugagambira abo abaabaire nibateekateeka ngu naija kubahwera kuhiiganisa abakuratsi ba Yesu.

Twine amatsiko ngu ekitabo eki nikiija kukuhwera kwongyera kugira okwikiriza n’obumanzi. (Zab. 27:14) Nitushaba ngu Yehova akuhwere waaba noohwera ab’eka yaawe n’ab’omu kibiina kushagika Obukama bwa Ruhanga baine obumanzi!