Amakuru g’Obukama Na. 37

Obutumwa bw’Abantu omu Nsi Yoona

Omuheru gw’Ediini z’Ebishuba Guri Haihi!

▪ Ediini z’ebishuba nizo ziiha?

▪ Niziza kumarwaho zita?

▪ Omuheru gwazo nigwija kukukwataho guta?

Ediini z’Ebishuba Nizo Ziiha?

Nooteganisibwa ebihagaro ebirikukorwa omu iziina ry’ediini? Entaro, obuzahambuuki n’obushomankuzi ebirikwejumbwamu abo abarikwegambaho ngu nibaheereza Ruhanga, noobireeba nk’obutari buringaaniza? Ahabw’enki ediini zirikureebeka nk’obukomooko bw’oburemeezi bwingi?

Ti kugira ngu ediini zoona nizikomookaho oburemeezi. Kureka, oburemeezi nibukomooka omu diini z’ebishuba zonka. Yesu, omunyadiini rugambwa akooreka ngu ediini z’ebishuba nizireetera abazirimu kukora ebihagaro nk’oku “omuti omubi gwana ebyana [ebijuma] bibi.” (Matayo 7:15-17) Ediini z’ebishuba nizaana bijuma ki?

Ediini z’Ebishuba . . .

◼ NIZEETAATSYA OMU BY’OBUTEGYEKI N’OMU NTARO: Akatabo akarikwetwa Asiaweek nikagira kati: “Omuri Asia n’omu bicweka ebindi, abebembezi abarikukunda munonga kuguma omu butegyeki ni bejunisa ediini okwetungira ebyabo.” Ekirugiremu, akatabo ako nikarabura kati: “Ensi eri haihi kwijura eiraro.” Omwebembezi rurangaanwa ow’ediini emwe omuri Amerika akagira ati: “Mwine kwita abatemu okubaasa kubazibira kwita abantu.” Eki yaatensize n’eki: “Mubaite boona omu iziina rya Mukama.” Kwonka Baibuli yo neegira eti: “Omuntu weena ku agira ati: Ninkunda Ruhanga, haza naayanga mugyenzi we, n’omubeihi.” (1 Yohaana 4:20) Yesu akagira ati: “Mukunde abazigu baanyu, kandi mushabire n’abarikubahiiga.” (Matayo 5:44) Mbwenu, n’ediini zingahi ezi orikumanya ezi abashomi baazo batarikwejumba omu ntaro?

NIZIJANJAAZA ENYEGYESA Z’EBISHUBA: Ediini ezirikukira obwingi nizeegyesa ngu hariho ekintu ekiruga omu muntu aha kufa kwe, kikagumizamu kubaho. Barikukoresa enyegyesa egi, abeebembezi b’ediini nyingi ahari ezi nibashaba abashomi baabo esente ngu bashabire abantu baabo abafiire. Kwonka Baibuli yo neeyegyesa ekirikutaana n’ekyo. Neegira eti: “Abahuriire bamanya ku barifa; kwonka abafiire tibagira ki bamanya.” (Omubuurizi 9:5) Yesu akeegyesa ngu abafu baryazoorwa—ekyakubaire kitarikwetengyesa kuri hariho ekintu ekitafa ekiruga omu muntu aha kufa. (Yohaana 11:11-25) Ediini yaawe neeyegyesa ngu hariho ekintu ekitafa ekiruga omu muntu aha kufa?

◼ NIZIIKIRIZA OBUSHAMBANI: Omu mahanga maingi, ediini ezimwe nizeemeka abashaija abarikubyama n’abashaija bataahi baabo n’abakazi abarikubyama n’abakazi kuzeebembera, kandi bashaba zaagavumenti kwikiriza obushwere bw’abashaija n’abashaija n’obw’abakazi n’abakazi. Nangwa n’ediini ezirikukyeena obushambani niziikiriza kuguma nizebemberwa abarikutoroboza abaana. Kwonka shi, Baibuli yo neeyegyesa ki? Neeshoborora eti: “Mutaribeihwa; abashambani, nari abarikuramya ebishushani, nari abeegira abakazi, nari ebitingwa, . . . tibarihungura bukama bwa Ruhanga.” (1 Abakorinso 6:9, 10) Hariho ediini ezi orikumanya ezirikwikiriza obushambani?

N’enki ekirikuza kuhika aha diini ezirikwana ebijuma bijunzire? Yesu akagira ati: “Omuti gwona ogutaana byana birungi gutemwa, gunagwa omu muriro.” (Matayo 7:19) Buzimazima, ediini z’ebishuba niziza kucwekyerezibwa! Kwonka shi niziza kucwekyerezibwa zita, kandi ni ryari? Obunabi oburi omu kitabo kya Baibuli ekya Okushuuruurwa eshuura 17 na 18, nibutuha eky’okugarukamu.

Ediini z’ebishuba niziza kumarwaho zita?

Teera akashushani, maraaya ashutami aha mugongo gw’enyamaishwa erikutiinisa. Enyamaishwa egyo eine emitwe mushanju n’amahembe ikumi. (Okushuuruurwa 17:1-4) Maraaya ogwo niwe oha? Aine obushoboorozi aha ‘bagabe b’ensi.’ Ajwaire emyenda ya bujwa, naakoresa omugaju kandi aine obutungi bwingi. Ekindi, naakoresa oburogo bwe ‘kuhabisa amahanga goona.’ (Okushuuruurwa 17:18; 18:12, 13, 23) Baibuli neetuhwera kwetegyereza ngu maraaya ogu nizo diini z’ebishuba zoona omu nsi, ezirikwana ebijuma bijunzire.

Enyamaishwa ei maraaya ogwo ashutamiho neemanyisa obutegyeki bw’omu nsi.a (Okushuuruurwa 17:10-13) Ediini z’ebishuba nizigyendera aha mugongo gw’egyo nyamaishwa, zirikuteeraho kugihabura eby’okucwamu n’ah’okutoora.

Kwonka omu bwire butari bwa hare, nihaza kubaho ekirikutangaaza. “Amahembe ikumi agu waareeba hamwe n’enyamaishwa baryayanga maraaya ogwo, atsigare wenka ajwaire busha; baryarya enyama ye, bamwokyeze kimwe n’omuriro.” (Okushuuruurwa 17:16) Abategyeki b’amahanga g’ensi egi baryahindukira ediini z’ebishuba kitaraariire, bazicwekyerereze kimwe! N’enki ekirituma abategyeki b’amahanga baakora ekyo? Ekitabo kya Baibuli ekya Okushuuruurwa nikigarukamu kiti: ‘Ruhanga akakita omu mitima yaabo ngu bahikiirize enaama ye.’ (Okushuuruurwa 17:17) Buzima, Ruhanga naaza kucwekyereza ediini z’ebishuba ahabw’ebihagaro byona ebi zikozire omu iziina rye. Omu buringaaniza, Ruhanga naaza kukoresa abeebembezi b’eby’obutegyeki abaine omukago nazo okuzicwekyereza.

N’enki eki oshemereire kukora ku oraabe otarikwenda kucwekyerezibwa hamwe n’ediini z’ebishuba? Ruhanga naaragiira ati: “Mururugyemu imwe bantu bangye ’mwe.” (Okushuuruurwa 18:4) Buzimazima, obu nibwo bunaku obw’okuhunga kuruga omu diini z’ebishuba! Kwonka shi obuhungiro burahi? Tiburi omuri abo abarikugira ngu Ruhanga tabaho, ahabw’okuba abo nabo tibaine matsiko. (2 Abatesalonika 1:6-9) Obuhungiro buri omu diini ey’amazima yonka. Okaataanisaho ota ediini ey’amazima?

Oku orikubaasa kutaanisaho ediini ey’amazima

Ni bijuma ki ebirungi ebi ediini ey’amazima eshemereire kwana?—Matayo 7:17.

Ediini ey’Amazima . . .

◼ NEMANYIRWA AHA KWOREKA RUKUNDO: Abaramya ab’amazima “ti b’ensi,” tibarikushoroora mu nganda, nari omu mahanga, kureka ‘niboorekana rukundo.’ (Yohaana 13:35; 17:16; Ebyakozirwe 10:34, 35) Tibarikwitana, kureka nibakundana munonga bahika n’aha kufeera bataahi baabo kyaba nikyetengyesa.—1 Yohaana 3:16.

◼ NEEYESIGA EKIGAMBO KYA RUHANGA: Ediini ey’amazima terikwegyesa “migyenzo” nari “ebiragiro by’abantu,” kureka ebi erikwegyesa nibiruga omu Baibuli, Ekigambo kya Ruhanga. (Matayo 15:6-9) N’ahabw’enki? N’ahabw’okuba “ebyahandiikirwe byona, ebihandiikisiibwe [o]mwoyo wa Ruhanga, biine omugasho gw’okwegyesa omuntu, n’okumuhana, n’okumuhabura.”—2 Timoseo 3:16.

◼ NEEHAMYA AMAKA KANDI EGYENDERA AHA MITINDO Y’AHAIGURU OMU MITWARIZE:

Ediini ey’amazima neetendeka abashaija ‘kukunda abakazi baabo nk’oku barikwekunda,’ eyegyesa abakazi ‘kuha baibabo ekitiinisa,’ kandi eyegyesa n’abaana ‘kworobera abazaire baabo.’ (Abaefeso 5:28, 33; 6:1) N’ekindi, abo abarikuheebwa obujunaanizibwa baine kuba bari eky’okureeberaho kirungi omu mitwarize mirungi.—1 Timoseo 3:1-10.

Hariho ediini erikuhikiiriza ebyo byona? Ekitabo ekirikwetwa Holocaust Politics, ekyahandiikirwe omu gwa 2001 nikigira kiti: “Kuri abantu baingi nibata omu nkora ebi Abajurizi ba Yehova barikubuurira kandi bakakora, abantu bakaabaire batarikwitana.”

Buzimazima, Abajurizi ba Yehova omu mahanga 235 tibarikwegyesa kwonka, abantu emitindo ya Baibuli aha kutwaza kurungi kureka nibagigyenderaho n’omu magara gaabo. Nitukuhiga kushaba Abajurizi ba Yehova okukuhwera kwega eki Ruhanga arikukwenza kugira ngu obaase kumuramya omu muringo ogu arikusiima. Obu nibwo bwire bw’okukora ekyo. Otakaayeziringa. Omuheru gw’ediini z’ebishuba guri haihi!—Zefania 2:2, 3.

Ku oraabe nooyenda kumanya ebikwatiraine n’obutumwa bwa Baibuli obu Abajurizi ba Yehova barikubuurira, bahandiikire orikukoresa endagiriro egi ahaifo.

□ Ntaine kweyama kwona, ninshaba kuheebwa akatabo akarikwetwa Mugume Nimureeba!

□ Nimbashaba kumpikaho aha bikwatiraine n’okushomesibwa Baibuli ahabwa busha.

[Obugambo obw’Ahansi]

[Ebigambo ebitoorainwe aha rupapura 3]

Ediini z’ebishuba ‘ziine obushoboorozi aha bagabe b’ensi’

[Ebigambo ebitoorainwe aha rupapura 3]

“Mururugyemu imwe bantu bangye ’mwe”