Otaikiriza Ediini ey’Ebishuba!

Sitaani na daimoni be tibari kwenda oheereze Ruhanga. Nibenda ku baakubaasa baiha biri omwe ahari Ruhanga. Nibagyezaho kukikora bata? Omuhanda ogumwe n’okuraba amu diini y’ebishuba. (2 Abakorinso 11:13-15) Ediini neeba ey’ebishuba yaaba etari kwegyesa mazima agari omu Biabuli. Ediini y’ebishuba ni nka sente z’ebikwangara—nizireebeka nk’eziri zo buzima kwonka zitaine mugasho. Zibaasa kukureetera emirabanamu mingi.

Ebishuba by’ediini tibibaasa kushemeza Yehova, Ruhanga owa mazima. Obu Yesu yabaire ari omu nsi hakaba hariho ekigombe ky’ediini ekyabaire nikyenda kumwiita. Bakaba nibateekateeka ngu omuhanda gwaabo ogw’okuramya nigwo gwabaire guhikire. Bakagira bati: “Twiine Tataitwe omwe Ruhanga.” Yesu akaikiriza? Ngaaha! Akabagira: ‘Muri aba shoimwe Sitaani.’ (Yohaana 8:41, 44) Obwiire obu abantu baingi nibagira ngu nibaramya Ruhanga kwonka nibaheereza Sitaani na ba daimoni be!—1 Abakorinso 10:20.

Nk’oku ekiti kifiire kiri kwaana ebijuma bibi, ediini y’ebishuba eine abantu abari kukora ebihagaro. Ensi eijwireemu emirabanamu ahabw’ebihagaro ebi abantu bari kukora. Harimu obushambani, okurwaana, okwiiba, okugayana, okwiita, n’okuhamba. Baingi abari kukora ebihagaro ebi baine ediini, kwonka ediini yaabo teri kubahweera ngu bakore gye. Tibari kubaasa kuba bwanywani ba Ruhanga, okwihaho baarekyera aho kukora ebihagaro.—Matayo 7:17, 18.

Ediini ey’ebishuba neyegyesa abantu kushaba ebishushani. Ruhanga naagira ngu tutarishaba ebishushani. Eki n’oky’obwengye. Iwe okaakunda omuntu otarigamba niiwe okwihaho agamba nekishushani kyawe? Omuntu ogwo nabaasa kuba munywani wawe owahamara? Ngaaha tari kumuba. Yehova nayenda abantu okugamba nawe kutari kugamba n’ebishushani ebitaine magara.—Okuruga 20:4, 5.

Ediini ey’ebishuba neyegyesa ngu ni kirungi kwita abandi omu bwiire bw’entaro. Yesu akagira ngu banywani ba Ruhanga na b’okukundana. Ti tuturi kubaasa kwita obu turi kukunda. (Yohaana 13:35) Ti tushemereire n’okwita abantu ababi. Abazigu ba Yesu ku baizire kumukwata taraikiriize beegi be kumurwanirira.—Matayo 26:51, 52.

Ediini ey’ebishuba neyegyesa ngu ababi baryabonabonesibwa omu muriro. Kwonka, Baiburi neyegyesa ngu empeera y’ekibi ni rufu. (Abarooma 6:23) Yehova ni Ruhanga wa rukundo. Ruhanga wa rukundo akaabaasa kubonabonesa abantu ebiro byona? Tikiri kubaasika! Omu Kibanja kya Ruhanga haryabamu ediini emwe yonka ei Yehova ari kusiima. (Okushuuruurwa 15:4) Amadiini goona agegamire aha bishuba bya Sitaani garyaaba gatakiriho.