‘Tibarataireho Omutima’
OBUTATA omutima aha kurabura nikibaasa kurugamu akabi.
Ab’omu rurembo Darwin, omuri Australia, bakaba nibeteekateekyera ebiro bikuru omu gwa 1974 obu haabaho okurabura aha ihunga ry’amaani eryabaire niryija. Kwonka Darwin ekaba etakateerwahoga eihunga okumara emyaka nka 30. Mbwenu hati nibwo ryabaire niriza kwija? Abatuura-gye baingi akabi ako tibarakateekateekireho nk’ak’amaani okuhitsya obu eihunga ry’amaani ryatandikire kutwara amabaati g’amaju n’okuhirika ebisiika by’amaju omu baabaire beerundaniire. Omu kasheeshe akaakuratsireho, orurembo rwona rukaba ruri ekifurukwa.
Omuri Colombia omu kwezi kwa Ikumi na Kumwe 1985, orushozi rukatanaka omuriro. Orubaare orwanyongyebereire rukatsintsimura ebyondo ebyatabikire abantu barikurenga omu 20,000 aha batuuzi b’omu rurembo Amero. Noogira shi ngu tiharabandize kubaho okurabura? Orushozi rukabanza kutengyeta kumara ameezi. Kwonka, ahabw’okugira ngu bakaba bamanyiriire kutuura haihi n’orushozi rw’omuriro oru, abantu baingi omuri Amero tibarataireho omutima. Abakuru b’abantu bakatunga amakuru aga ngu akabi kakaba kari haihi kubaho, beitu tibarataireho omutima kurabura abantu. Ebirango bikateebwa aha rediyo okugarura omutima omu bantu. Emizindaaro y’ekanisa ekeejunisibwa okwehanangiriza abantu okuteemereza mitima n’okucureera. Omu mwabazyo, hakabaho okurigita kw’amaani kw’emirundi ebiri. Okaarekireho ebintu byawe ohunga? Bakye bonka bakagyezaho kuhunga kwonka kikaba kitakibaasika.
Emirundi mingi, abarikushoma eby’omwitaka nibamanya ahu emitsitsa erikuza kuba. Kwonka tibarikukira kugamba obwire bwenyine obu eraabeho. Omuri 1999, emitsitsa omu nsi yoona ekaita abantu nka 20,000. Baingi ahari abo abaafiire bakaba nibateekateeka ngu kikaba kitarikuza kubahikaho.
Nootwara ota Okurabura Okurikuruga Ahari Ruhanga We Wenka?
Baibuli ekashoborora gye ebyabaire nibiza kubaho omu biro by’aha mperu obwire butakahikire. Ebikwatiraine n’ebi, Baibuli netwehanangiriza kuteekateeka aha ‘biro bya Noa.’ “Omu biro ebyo ebyabandiize omwegyemure gw’amaizi,” abantu bakaba beemariire omu mirimo ya butoosha haza batarikufayo aha kurengyesereza kw’obutemu. Kandi okurabura oku Ruhanga yaaheereize kurabira omu muheereza we Noa, ‘tibarakufiireho okuhitsya obu omwegyemure gw’amaizi gwaizire kandi gukabatwara boona.’ (Matayo 24:37-39) Iwe okaabaire waahurikiriize okurabura okwo? Mbwenu ekyo nikyo orikukora hati?
Kiri kita ku ogire ngu okaba nootuura omuri Sodoma, haihi n’Enyanja y’Omwonyo, omu bunaku bwa Looti omwana w’omurumuna wa Abrahamu? Ekyaro ekyo kikaba kiri nk’ekibanja kya Ruhanga. Orurembo rukaba rwine eitungo. Abantu bamwo bakaba nibahurira baine obusingye. Omu bunaku bwa Looti, “bakaba nibarya, nibanywa, nibagura, nibatunda, nibahinga, nibombeka.” Abantu abu baabaire nibatuura nabo bakaba barengyesereize omu micwe mibi. Okaabaire waataire omutima aha kurabura obu Looti yaajumiriire ebikorwa bibi? Okaabaire waahurikiriize ku yaakukugambiire ngu Ruhanga amaririire kuhwerekyereza orurembo Sodoma? Ninga okaakitwire nk’omuzaano, nk’oku bakwe ba Looti abaabaire nibenda kushwera abahara baakozire? Okaabaire waahungire reero bwanyima oreeba enyima, nka muka Looti? N’obu abandi bataratwire okurabura okwo nka kukuru, aha izooba eri Looti yaarugire omuri Sodoma, “omuriro n’ekibiriiti bikagwa okuruga omu iguru, byabacwekyereza boona.”—Luka 17:28, 29.
Abantu baingi omu bunaku bwaitu obu tibarikufayo. Kwonka eby’okureeberaho ebi birindiirwe omu Kigambo kya Ruhanga nk’eky’okutuhuguura, okutuhangaana ngu TUGUME NITUREEBA!
[Akabokisi/Ekishushani ekiri aha rupapura 22]
N’eky’Amazima ngu Hakabaho Omwegyemure omu Nsi Yoona?
Abahakani baingi nibagira ngu Ngaaha. Kwonka Baibuli neegira ngu buzima kwo gukabaho.
Yesu Kristo we wenka akagugambaho, kandi akaba ariho obu gwabaho, akagureeba ari omu iguru.
[Akabokisi/Ekishushani ekiri aha rupapura 23]
N’eky’Amazima Sodoma na Gomora Bikacwekyerezibwa?
Abakugu abarikwetegyereza ebitimbirwe omu itaka nibahamya ngu eki kikabaho.
Ebyafaayo nibigamba ahari eki.
Yesu Kristo akahamya ekyabaireho eki, kandi ekyabaireho eki nikigambwaho omu bitabo bya Baibuli ebindi 14.